Ani Oji Mɔ ko ni Hiɛ Gboɔ?
1 Efeee wɔ naakpɛɛ akɛ wɔɔna gbekɛ bibioo ko ni miitee yɛ enyɛ loo etsɛ sɛɛ ní eefili wɔ. Hiɛ ni gboɔ nii lɛ ji adebɔɔ su ni jɛ gbekɛbiiashi tɔ̃ɔ. Mɛi babaoo yɛ ni yɛ adebɔɔ su naa lɛ, amɛhiɛ gboɔ fiofio, kɛ́ amɛdara po. Kɛ hiɛ ni gboɔ nii lɛ náa ohe ni okɛwoɔ shiɛmɔ nitsumɔ lɛ mli lɛ nɔ hewalɛ lɛ, mɛni obaanyɛ ofee?
2 Hiɛ ni Gboɔ lɛ Naa ni Aaadamɔ: Ehe miihia ni wɔgbala jwɛŋmɔ kɛya ‘tsuiiaŋ gbɔmɔ ni aŋɔtee lɛ’ nɔ. (1 Pet. 3:4) Ha suɔmɔ ni oyɔɔ kɛha Yehowa kɛ onaanyo gbɔmɔ lɛ mli awa. Ná nɔmimaa waa diɛŋtsɛ akɛ famɔ ni akɛha wɔ akɛ wɔshiɛ ni wɔtsuɔ he nii lɛ ji gbɛ̀i ni hi fe fɛɛ lɛ ateŋ ekome ni wɔkɛaatsɔɔ akɛ wɔyɛ he-kɛ-afɔleshaa suɔmɔ. Okɛ teemɔŋ nikasemɔ kɛ kpeeiyaa he gbɛjianɔtoo kpakpa atsu nii. Sɔlemɔ daa kɛha Yehowa dɛŋ yelikɛbuamɔ yɛ nɔ̃ pɔtɛɛ ni otaoɔ lɛ he. Hemɔkɛyeli ni mli wa kɛ hekɛnɔfɔɔ ni aaaná yɛ emli lɛ baaha aná nɔmimaa, ni ebaaha aná ‘ekãa waa ní akɛjaje Nyɔŋmɔ wiemɔ lɛ ni asheee gbeyei.’—Fil. 1:14.
3 Ye henumɔi ni tsɔɔ akɛ onyɛŋ nɔ ko ofee lɛ nɔ. Etamɔ nɔ ni ehe bahia ni Timoteo afee enɛ. Paulo wo Timoteo hewalɛ koni ‘ekaha mɔ ko gbe ehe guɔ yɛ oblanyo ni eji lɛ hewɔ,’ ni ekai lɛ akɛ “Nyɔŋmɔ haaa wɔ gbeyeishemɔ mumɔ, shi moŋ hewalɛ.” (1 Tim. 4:12; 2 Tim. 1:7) Yehowa kɛ Timoteo tsu nii jogbaŋŋ, ni ekɛ bo baatsu nii hu kɛ́ okɛ hekɛnɔfɔɔ kwraa ni oyɔɔ yɛ E-mli lɛ tee hiɛ.—Lala 56:12.
4 Biblia ŋmalɛ tamɔ Mateo 10:37 lɛ ye ebua nyɛmi yoo ko ni bɔ ni esheɔ gbeyei ehaa lɛ ha eshe ewu ni waa lɛ yi lɛ gbeyei lɛ. Akɛni efĩ shi hewɔ lɛ, sɔɔmɔ nitsumɔ lɛ bafee mlɛo eha lɛ, ni yɛ naagbee lɛ, ewu, enyɛ, kɛ enyɛmimɛi hii fɛɛ mɔ anɔkwale lɛ mli!
5 Hesaamɔ He Miihia: Hekɛnɔfɔɔ ni oyɔɔ lɛ mli baawa lolo kɛ́ osaa ohe jogbaŋŋ kɛha shiɛmɔ nitsumɔ lɛ. Halamɔ shiɛmɔ wiemɔ kuku ko kɛjɛ Reasoning wolo lɛ loo Wɔ Maŋtsɛyeli Sɔɔmɔ srɔtoi ni etsɔ hiɛ lɛ mli, kasemɔ ni otĩ mli shii abɔ. Yɛ nɔ najiaŋ ni okɛ ohe aaaha gbeyeishemɔ ni esaaa lɛ, susumɔ nibii ni hi jogbaŋŋ ahe. Ná ekãa yɛ be mli ni okɛ mɛi krokomɛi tsuɔ nii jogbaŋŋ lɛ. Ha ehi ojwɛŋmɔ mli akɛ mɛi babaoo ni okɛkpeɔ yɛ shinaai anaa lɛ hu sheɔ gbeyei tamɔ bo nɔŋŋ. Maŋtsɛyeli shɛɛ sane lɛ he hiaa mɔ fɛɛ mɔ.
6 Kɛ oji mɔ ko ni hiɛ gboɔ lɛ, onijiaŋ akaje wui. Be mli ni okɛ ohe woɔ mli waa lɛ, Yehowa baaye ebua bo koni ofee sanekpakpa shiɛlɔ ni he esa. Kɛkɛ lɛ, omli baafili bo yɛ shiɛmɔ nitsumɔ ni okɛ ohe woɔ mli lɛ mli.—Abɛi 10:22.