Atsɔɔ Wɔ ni Wɔfee Yehowa Suɔmɔnaa Nii
“Tsɔɔmɔ mi ni mafee osuɔmɔnaa nii, ejaakɛ bo ji mi-Nyɔŋmɔ.”—LALA 143:10.
1, 2. (a) Mɛɛ be esa akɛ atsɔɔ wɔ nii, ni kɛ mɛɛ jwɛŋmɔ kpakpa hewɔ? (b) Mɛni hewɔ Yehowa ni aaatsɔɔ wɔ nii lɛ he hiaa waa nakai lɛ?
GBI fɛɛ gbi ni gbɔmɔ yɔɔ wala mli ni eyɔɔ kamkam lɛ, abaanyɛ atsɔɔ lɛ nɔ ko ni sɛɛnamɔ yɔɔ he. Eji anɔkwale yɛ osane lɛ mli, ni eji anɔkwale hu yɛ mɛi krokomɛi ahe. Shi mɛni baa yɛ gbele mli? Nɔ ko nɔ ko bɛ ni abaanyɛ atsɔɔ bo aloo ni oookase yɛ nakai shihilɛ lɛ mli. Biblia lɛ kɛɔ faŋŋ akɛ, gbohii lɛ “amɛleee nɔ ko nɔ ko.” Nilee ko bɛ Sheol, adesai akwamaŋ gbonyobu lɛ mli. (Jajelɔ 9:5, 10) Ani enɛ tsɔɔ akɛ, nii ni atsɔɔ wɔ kɛ nilee ni wɔbuaa naa lɛ feɔ yaka? No damɔ nɔ ni atsɔɔ wɔ kɛ bɔ ni wɔkɛ nakai nilee lɛ tsuɔ nii wɔhaa lɛ nɔ.
2 Kɛ atsɔɔ wɔ je lɛŋ nibii pɛ lɛ, wɔbɛ wɔsɛɛ be ni sɛɛ tsɛɔ. Shi, yɛ miishɛɛ mli lɛ, aatsɔɔ gbɔmɛi akpekpei abɔ ni yɔɔ jeŋmaji fɛɛ mli lɛ ŋwɛi suɔmɔnaa nii, koni amɛna naanɔ wala. Hiɛnɔkamɔ nɛɛ nɔdaamɔ nɔ̃ damɔ Yehowa, nilee ni haa wala lɛ Jɛɛhe lɛ, ni aaatsɔɔ mɔ nii lɛ nɔ.—Lala 94:9-12.
3. (a) Mɛni hewɔ abaanyɛ awie akɛ Yesu ji Nyɔŋmɔ klɛŋklɛŋ kaselɔ lɛ? (b) Mɛɛ nɔmimaa wɔyɔɔ akɛ Yehowa baatsɔɔ adesai anii, ni mɛni baajɛ mli aba?
3 Atsɔɔ Nyɔŋmɔ kromɔ Bi, ákɛ E-klɛŋklɛŋ nikaselɔ lɛ nii, koni efee e-Tsɛ lɛ suɔmɔnaa nii. (Abɛi 8:22-30; Yohane 8:28) Yɛ no sɛɛ lɛ, Yesu tsɔɔ akɛ, e-Tsɛ lɛ baatsɔɔ adesai akpei nyɔŋma-nyɔŋmai abɔ nii. Mɛɛ gbɛkpamɔi yɔɔ kɛha wɔ mɛi ni wɔkaseɔ nii kɛjɛɔ Nyɔŋmɔ ŋɔɔ lɛ? Yesu kɛɛ: “Aŋma yɛ gbalɔi lɛ amli akɛ: ‘Amɛ fɛɛ amɛaafee Nyɔŋmɔ kaselɔi.’ Mɔ fɛɛ mɔ ni enu yɛ tsɛ lɛ naa, ni ekase hu lɛ, ebaa miŋɔɔ. . . . Lɛlɛŋ, lɛlɛŋ, mikɛɛ nyɛ akɛ: Mɔ ni heɔ minɔ yeɔ lɛ eyɛ naanɔ wala.”—Yohane 6:45-47.
4. Ŋwɛi nitsɔɔmɔ saa gbɔmɛi akpekpei abɔ he yɛ mɛɛ gbɛ nɔ, ni mɛɛ gbɛkpamɔi amɛyɔɔ?
4 Yesu miitsɛ wiemɔi ayisɛɛ kɛmiijɛ Yesaia 54:13, ni kɔɔ Nyɔŋmɔ okadi yoo, ni ji ŋwɛi Zion he lɛ. Nakai gbalɛ lɛ kɔɔ ebii, Yesu Kristo kaselɔi 144,000 ni akɛ mumɔ efɔ́ amɛ lɛ ahe titri. Nakai mumɔŋ bii lɛ ateŋ shwɛɛnii ko yɛ ekãa ŋmɛnɛ, ni amɛnyiɛ jeŋ muu fɛɛ nitsɔɔmɔ gbɛjianɔtoo ko hiɛ. Nɔ ni ejɛ mli eba ji akɛ, gbɔmɛi akpekpei abɔ krokomɛi ni feɔ “asafo babaoo” hu naa Yehowa ni tsɔɔ amɛ nii lɛ he sɛɛ. Amɛyɛ nikasemɔ ni gbele efoŋ mli he gbɛkpamɔ ko ni ekaaa. Yɛ mɛɛ gbɛ nɔ? Ojogbaŋŋ, amɛbaaje “amanehulu kpeteŋkpele” ni baa kɛ foi lɛ mli, ni amɛyana naanɔ wala mli ŋɔɔmɔ yɛ paradeiso shikpɔŋ ko nɔ.—Kpojiemɔ 7:9, 10, 13-17.
Nyɔŋmɔ Suɔmɔnaa Nii ni Aaafee lɛ Nɔ Mi ni Amaa Babaoo
5. (a) Mɛni ji 1997 afi ŋmalɛ lɛ? (b) Te esa akɛ wɔnu Kristofoi akpeei ni wɔyaa lɛ ahe wɔha tɛŋŋ?
5 Yehowa Odasefoi ni yɔɔ asafoi fe 80,000 amli yɛ jeŋ fɛɛ lɛ baaha Lala 143:10 shishijee wiemɔi: “Tsɔɔmɔ mi, ni mafee osuɔmɔnaa nii,” lɛ ahi amɛjwɛŋmɔ mli waa yɛ 1997. Enɛ baafee 1997 afi ŋmalɛ lɛ. Wiemɔi nɛɛ ni aŋmala ni anaa faŋŋ yɛ Maŋtsɛyeli Asai anɔ lɛ baatsu nii akɛ kaimɔ nɔ̃, ákɛ, he ni ekaaa ni nine aaashɛ ŋwɛi nitsɔɔmɔ nɔ yɛ ji, asafoŋ kpeei ashishi, he ni wɔɔnyɛ wɔná tsɔsemɔ he gbɛjianɔtoo ni yaa nɔ lɛ mli gbɛfaŋnɔ lɛ. Kɛ wɔkɛ wɔhe miibɔ wɔnyɛmimɛi lɛ ahe yɛ kpeei ashishi koni wɔ Tsɔɔlɔ Kpele lɛ atsɔɔ wɔ nii lɛ, wɔbaanu he taakɛ lalatsɛ ni ŋma sane nɛɛ nu he lɛ: “Mimii shɛɔ mihe, kɛ akɛɛ mi akɛ: ‘Ba ni wɔtee Yehowa we lɛ.’ ”—Lala 122:1; Yesaia 30:20.
6. Mɛni wɔkpɛlɛɔ nɔ yɛ David wiemɔi lɛ amli?
6 Hɛɛ, wɔmiisumɔ ni atsɔɔ wɔ nii ni wɔfee Nyɔŋmɔ suɔmɔnaa nii moŋ fe wɔ henyɛlɔ Abonsam suɔmɔnaa nii, aloo adesai ni yeee emuu lɛ asuɔmɔnaa nii. No hewɔ lɛ, taakɛ David ji lɛ, wɔkpɛlɛɔ Nyɔŋmɔ ni wɔjaa lɛ ni wɔsɔmɔɔ lɛ lɛ nɔ: “Ejaakɛ bo ji mi-Nyɔŋmɔ; ha omumɔ kpakpa lɛ atsɔɔ mi gbɛ yɛ shikpɔŋ trɛnɛɛ nɔ.” (Lala 143:10) Yɛ nɔ najiaŋ ni ekɛ gbɔmɛi ni ewieee anɔkwale aaabɔ moŋ lɛ, David sumɔ ni ehi he ni atsuɔ Yehowa jamɔ he nii yɛ. (Lala 26:4-6) Akɛni Nyɔŋmɔ mumɔ lɛ baakudɔ enajifaamɔi hewɔ lɛ, David baanyɛ anyiɛ yɛ jalɛ gbɛi anɔ.—Lala 17:5; 23:3.
7. Nyɔŋmɔ mumɔ lɛ etsu nii yɛ Kristofoi asafo lɛ nɔ yɛ mɛɛ gbɛ nɔ?
7 David Kpeteŋkpele, Yesu Kristo, ma nɔ mi kɛha bɔfoi lɛ akɛ, mumɔ krɔŋkrɔŋ lɛ baatsɔɔ amɛ nibii fɛɛ, ni ebaaha amɛkai nibii fɛɛ ni ekɛɛ amɛ lɛ. (Yohane 14:26) Kɛjɛ Pentekoste kɛbaa lɛ, Yehowa etee nɔ ejie “Nyɔŋmɔ nibii ni mli kwɔlɔ tete” ni yɔɔ e-Wiemɔ ni aŋma lɛ mli lɛ kpo fiofio. (1 Korintobii 2:10-13) Efee enɛ kɛtsɔ nitsɔɔmɔ gbɛ ni anaa ni Yesu tsɛ lɛ “tsulɔ anɔkwafo kɛ nilelɔ” lɛ nɔ. Ekɛ mumɔŋ niyenii ni asusuɔ he yɛ nitsɔɔmɔ gbɛjianɔtoo kɛha Nyɔŋmɔ webii ni yɔɔ jeŋ fɛɛ lɛ asafoi lɛ amli lɛ haa.—Mateo 24:45-47.
Atsɔɔ Wɔ Yehowa Suɔmɔnaa Nii yɛ Wɔ Kpeei Ashishi
8. Mɛni hewɔ Buu-Mɔɔ Nikasemɔ lɛ ni akɛ he woɔ mli lɛ he yɔɔ sɛɛnamɔ babaoo lɛ?
8 Saji ni yɔɔ daa otsi asafoŋ Buu-Mɔɔ Nikasemɔ lɛ mli lɛ fɔɔ Biblia mli shishitoo mlai kɛ nitsumɔ he wiemɔ titri. Enɛ yeɔ ebuaa wɔ diɛŋtsɛ ni wɔnyɛɔ wɔdamɔɔ shihilɛ mli yeyeeye feemɔi anaa. Asusuɔ mumɔŋ anɔkwalei ni mli kwɔlɔ loo Biblia gbalɛi ahe yɛ nikasemɔi krokomɛi ashishi. Kwɛ bɔ ni atsɔɔ wɔ nii babaoo yɛ nɛkɛ nikasemɔi nɛɛ ashishi! Maji pii yɛ ni Maŋtsɛyeli Asai nɛɛ amli yimɔɔ obɔbɔ kɛ́ aafee kpeei nɛɛ. Ni kɛlɛ, kpeei ni ayaa lɛ eba shi yɛ maji komɛi anɔ. Mɛni osusuɔ akɛ eha eba lɛ nakai? Ani ekolɛ mɛi komɛi miiŋmɛ gbɛ koni heloonaa nitsumɔ agba kpee ni amɛaakpe kutuu daa koni ‘amɛhiɛ adɔ suɔmɔ kɛ nitsumɔi kpakpai ahe’ lɛ naa? Aloo ekolɛ afiteɔ ŋmɛlɛtswai pii yɛ hiɛtserɛjiemɔ nitsumɔi loo yɛ tɛlivishin kwɛmɔ mli, ni haa amɛbe he gbɛjianɔtoo feɔ kpɛŋŋ tsɔ̃ bɔ ni no aaaha amɛya kpeei lɛ fɛɛ? Kaimɔ mumɔ naa fãmɔ ni yɔɔ Hebribii 10:23-25 lɛ. Ani wɔ henaabuamɔ kɛha ŋwɛi tsɔsemɔ lɛ jeee nɔ ni he hiaa waa bianɛ po yɛ be mli ni ‘wɔnaa ni gbi lɛ miibɛŋkɛ lɛ’?
9. (a) Sɔɔmɔ Kpee lɛ baanyɛ awula wɔ kɛha sɔɔmɔ nitsumɔ lɛ yɛ mɛɛ gbɛ nɔ? (b) Mɛni esa akɛ efee wɔ subaŋ yɛ odaseyeli he?
9 Wɔ gbɛnaa nii ni he hiaa waa lɛ ateŋ ekome ji ni wɔsɔmɔ akɛ Nyɔŋmɔ sɔɔlɔi. Ato Sɔɔmɔ Kpee lɛ he gbɛjianɔ koni etsɔɔ wɔ bɔ ni wɔɔtsu enɛ he nii kɛmɔ shi. Wɔkaseɔ bɔ ni ayaa mɛi aŋɔɔ, nɔ ni esa akɛ awie, bɔ ni esa akɛ wɔfee wɔnii wɔha kɛ akpɛlɛ sane lɛ nɔ, kɛ nɔ ni esa akɛ wɔfee kɛ akpoo wɔ shɛɛ sane lɛ po. (Luka 10:1-11) Beni asusuɔ gbɛi ni mɔɔ shi jogbaŋŋ he, ni afeɔ he nɔkwɛmɔ nɔ yɛ daa otsi kpee nɛɛ shishi lɛ, esáa wɔ jogbaŋŋ koni wɔnine ashɛ gbɔmɛi anɔ, jeee kɛtsɔ beni wɔyaa shia kɛ shia pɛ nɔ, shi beni wɔshiɛɔ yɛ gbɛjegbɛi anɔ, he ni ato tsɔnei amamɔ, yɛ gbɛfãa tsɔnei amli, yɛ kɔɔyɔŋ lɛji adaamɔ hei, yɛ nitsumɔ hei, loo yɛ skul sɔrɔtoi amli. Yɛ wɔ nibimɔ, “Tsɔɔmɔ mi ni mafee osuɔmɔnaa nii” lɛ kɛ gbeekpamɔ naa lɛ, wɔbaasumɔ ni wɔŋɔ hegbɛ fɛɛ hegbɛ ni wɔɔna ni wɔkɛfee nɔ ni wɔ Nuntsɔ lɛ wo hewalɛ yɛ he lɛ: “Nyɛhaa nyɛla atsoa yɛ gbɔmɛi ahiɛ, koni amɛwo . . . nyɛtsɛ ni yɔɔ ŋwɛi lɛ hiɛ nyam.”—Mateo 5:16.
10. Te wɔɔfee tɛŋŋ wɔye wɔbua ‘mɛi ni sa’ lɛ diɛŋtsɛ?
10 Atsɔɔ wɔ ni wɔfee mɛi krokomɛi kaselɔi yɛ asafoŋ kpeei ni tamɔ nɛkɛ shishi. Kɛ ana mɔ ni yɔɔ wiemɔ lɛ he miishɛɛ, loo akɛ wolo ko ha lɛ lɛ, oti ni ma wɔhiɛ beni wɔfeɔ sɛɛsaramɔ ji ni wɔje shia Biblia mli nikasemɔi ashishi. Yɛ shishinumɔ ko naa lɛ, enɛ tamɔ bɔ ni kaselɔi lɛ ‘kɛ mɛi ni sa lɛ hi shi’ koni amɛtsɔɔ amɛ nii ni Yesu efã lɛ. (Mateo 10:11; 28:19, 20) Akɛni wɔyɔɔ nibii ni yeɔ buaa ni nɔ bɛ, tamɔ Nilee Ni Kɛ Mɔ Yaa Naanɔ Wala Mli wolo lɛ hewɔ lɛ, awula wɔ jogbaŋŋ koni wɔgbe wɔ sɔɔmɔ lɛ naa kwraa. (2 Timoteo 4:5) Daa otsi ni oyaa Sɔɔmɔ Kpee lɛ kɛ Teokrase Sɔɔmɔ Skul lɛ, bɔɔ mɔdɛŋ ni onu saji otii ni yeɔ buaa, ni baaha ajie oyi akɛ Nyɔŋmɔ sɔɔlɔi ni he esa lɛ ateŋ mɔ kome lɛ shishi, ni okɛtsu nii hu, ni ofee esuɔmɔnaa nii.—2 Korintobii 3:3, 5; 4:1, 2.
11. Mɛi komɛi etsɔɔ hemɔkɛyeli ni amɛyɔɔ yɛ wiemɔi ni anaa yɛ Mateo 6:33 lɛ mli yɛ mɛɛ gbɛ nɔ?
11 Eji Nyɔŋmɔ suɔmɔnaa nii akɛ wɔya nɔ wɔtao “Nyɔŋmɔ maŋtsɛyeli lɛ kɛ ejalɛ lɛ tsutsu.” (Mateo 6:33) Bi ohe akɛ, ‘Mɛɛ gbɛ nɔ matsɔ ni mikɛ shishitoo mla nɛɛ atsu nii kɛ mi [loo mihefatalɔ lɛ] heloonaa nitsumɔ mli taomɔ nii tsĩɔ kpee-yaa naa lɛ?’ Mɛi ni amɛdara yɛ mumɔŋ lɛ ateŋ mɛi pii baato gbɛjianɔ ni amɛkɛ amɛ nitsumɔtsɛmɛi lɛ awie sane lɛ he. Sɔɔlɔ ko ni ji be-fɛɛ shiɛlɔ hã enitsumɔtsɛ lɛ le akɛ ehe miihia ni ehe be daa otsi bɔni afee ni eya asafoŋ kpeei. Ekpɛlɛ enibimɔ lɛ nɔ. Shi akɛni eetao ni ele nɔ ni yaa nɔ yɛ kpeei lɛ ashishi hewɔ lɛ, ekɛɛ akɛ lɛ hu ebaaya eko. Enu adafitswaa ko ni kɔɔ kpokpaa wulu nɔ kpee ko ni miiba lɛ he yɛ jɛmɛ. Nɔ ni jɛ mli ba ji akɛ, nitsumɔtsɛ lɛ to gbɛjianɔ koni ehi kpee lɛ shishi gbi muu fɛɛ. Mɛni okaseɔ kɛjɛɔ nɔkwɛmɔ nɔ nɛɛ mli?
Fɔlɔi ni Sheɔ Nyɔŋmɔ Gbeyei Tsɔɔ Lɛ Yehowa Suɔmɔnaa Nii
12. Mɛni esa akɛ fɔlɔi Kristofoi kɛ tsuishitoo kɛ shiŋŋfeemɔ afee, kɛ amɛaatsɔɔ gbekɛbii Yehowa suɔmɔnaa nii?
12 Shi asafoŋ kpeei kɛ kpeei wuji jeee gbɛjianɔtoo pɛ ni yɔɔ ni akɛtsɔɔ mɔ nii koni afee ŋwɛi suɔmɔnaa nii. Akɛ fãmɔ eha fɔlɔi ni sheɔ Nyɔŋmɔ gbeyei koni amɛlɛ amɛbii, amɛtsɔse amɛ, ni amɛtsɔɔ amɛ nii koni amɛjie Yehowa yi ni amɛfee esuɔmɔnaa nii. (Lala 148:12, 13; Abɛi 22:6, 15) Nakai feemɔ biɔ ni wɔkɛ wɔ “gbekɛbii” aya kpeei yɛ he ni ‘amɛbaabo sane toi ni amɛkase nii’ yɛ, shi ŋmalɛi krɔŋkrɔŋi lɛ ni wɔɔjɛ mli wɔtsɔɔ amɛ nii yɛ shia hu? (5 Mose 31:12; 2 Timoteo 3:15) Wekui pii kɛ hiɛdɔɔ jeɔ daa weku Biblia kasemɔ he gbɛjianɔtoo shishi, shi amɛŋmɛɔ gbɛ ni ebaa shi loo etsɛɛɛ ni amɛkpaa efeemɔ. Ani ona niiashikpamɔ ni tamɔ nɛkɛ? Ani obaamu sane naa akɛ bɔ ni ajie yi aha akɛ ana daa nikasemɔ ni tamɔ nɛkɛ lɛ esaaa, aloo oweku lɛ yɛ sɔrɔto kwraa akɛ, ekɛ nitsumɔ ehiŋ yɛ osane lɛ mli? Bɔ fɛɛ bɔ ni shihilɛ lɛ ji ha lɛ, fɔlɔi, nyɛfainɛ nyɛtĩa saji ni sɛɛnamɔ yɔɔ he, ni ji “Wɔ Mumɔŋ Gboshinii ni Jara Wa” kɛ “Hekãmɔ Mli Nyɔmɔwoi” ni yɔɔ August 1, 1995 Buu-Mɔɔ lɛ mli lɛ mli.
13. Wekui baanyɛ ana daa gbi ŋmalɛ lɛ hesusumɔ he sɛɛ yɛ mɛɛ gbɛ nɔ?
13 Aawo wekui ahewalɛ ni amɛkɛfee amɛsu akɛ amɛaasusu daa gbi ŋmalɛ lɛ he kɛjɛ Ŋmalɛi lɛ Amli ni Wɔɔkwɛ Daa lɛ mli. Ŋmalɛ lɛ kɛ emlitsɔɔmɔ lɛ kanemɔ kɛkɛ hi, shi ŋmalɛ lɛ hesusumɔ kɛ ekɛ nitsumɔ he yɛ sɛɛnamɔ babaoo. Akɛ nɔkwɛmɔ nɔ lɛ, kɛ aasusu Efesobii 5:15-17 he lɛ, weku lɛ mli bii baanyɛ asusu bɔ ni aaafee ‘ahe dekã lɛ eko’ kɛha teemɔŋ nikasemɔ, ni ana gbɛfaŋnɔ yɛ be-fɛɛ sɔɔmɔ lɛ fã ko mli, ni atsu teokrase nitsumɔi krokomɛi ahe nii lɛ he. Hɛɛ, daa gbi ŋmalɛ lɛ ni weku lɛ aaasusu he lɛ baaha mɔ ko loo mɛi pii ‘aya nɔ ayoo nii ni ji Yehowa suɔmɔnaa nii lɛ babaoo.’
14. Mɛɛ tsɔɔlɔi nɛkɛ 5 Mose 6:6, 7 tsɔɔ akɛ esa akɛ fɔlɔi afee, ni enɛ biɔ ni amɛfee mɛni?
14 Esa akɛ fɔlɔi afee amɛbii lɛ atsɔɔlɔi ni bɔɔ mɔdɛŋ. (5 Mose 6:6, 7) Shi no jeee amɛshwiei lɛ akãmɔ loo fãmɔ kɛkɛ. Ehe miihia ni ataa kɛ awo fɛɛ hu abo toi, ni yɛ nɛkɛ gbɛ nɔ lɛ ebaaha amɛle nɔ ni he hiaa ni atsɔɔ mli, aha efee faŋŋ, afee he nɔkwɛmɔ nɔ, loo ati mli lɛ jogbaŋŋ. Yɛ Kristofoi aweku ko mli lɛ, fɔlɔi lɛ kanyãa sanegbaa kɛtsɔɔ amɛbii lɛ ni amɛkɛɔ amɛ ni amɛbi saji ni kɔɔ nibii ni amɛnuuu shishi loo egbaa amɛnaa lɛ ahe lɛ nɔ. No ha amɛyoo akɛ, ewa kɛha amɛ binuu ni eye kɛjɛ afii nyɔŋma kɛ etɛ kɛyaa lɛ akɛ eeenu nɔ hewɔ ni Yehowa bɛ shishijee lɛ shishi. Fɔlɔi lɛ nyɛ amɛkɛ saji ni yɔɔ Buu Mɔɔ Asafo lɛ woji amli, ni tsɔɔ akɛ akpɛlɛɔ be kɛ ŋwɛiniiaŋ ni akɛɛ amɛbɛ naagbee nɔ lɛ tsu nii. Enɛ tsɔɔ sane oti lɛ mli, ni amɛ binuu lɛ mii shɛ he. No hewɔ lɛ, hemɔ be ni ojɛ Ŋmalɛi lɛ amli oha obii lɛ asanebimɔi lɛ ahetoo yɛ gbɛ ni mli ka shi faŋŋ nɔ, ni oye obua amɛ ni amɛna akɛ, Nyɔŋmɔ suɔmɔnaa nii ni akaseɔ lɛ baanyɛ afee nɔ ni haa mɔ tsui nyɔɔ emli. Mɛni hu atsɔɔ Nyɔŋmɔ webii—gbekɛbii kɛ onukpai—ŋmɛnɛ?
Atsɔɔ Amɛ Koni Amɛsumɔ ni Amɛwuu
15. Mɛɛ be mli abaanyɛ aka krɔŋŋ ni wɔnyɛmimɛi asuɔmɔ lɛ ji lɛ akwɛ?
15 Yɛ Yesu kita hee lɛ kɛ gbeekpamɔ naa lɛ, ‘Nyɔŋmɔ etsɔɔ wɔ akɛ wɔsumɔsumɔɔ wɔhe.’ (1 Tesalonikabii 4:9) Kɛ nibii miiya nɔ fɛfɛo jogbaŋŋ lɛ, ekolɛ wɔbaanu he akɛ wɔsumɔɔ wɔnyɛmimɛi lɛ fɛɛ. Ni kɛlɛ, mɛni baa kɛ béi te shi aloo wɔmli fu yɛ nɔ ni Kristofonyo kroko kɛɔ loo efeɔ lɛ hewɔ? Biɛ ji he ni akaa krɔŋŋ ni wɔsuɔmɔ lɛ ji lɛ akwɛɔ yɛ. (Okɛto 2 Korintobii 8:8 he.) Mɛni Biblia lɛ tsɔɔ wɔ ni wɔfee yɛ shihilɛi ni tamɔ nɛkɛ shishi? Nɔ kome ji, ni wɔbɔ mɔdɛŋ wɔjie suɔmɔ fɛɛ kpo wɔtsɔɔ. (1 Petro 4:8) Yɛ nɔ najiaŋ ni wɔɔdi wɔ diɛŋtsɛ wɔ suɔmɔnaa nii asɛɛ, ni wɔmli afũ yɛ fatɔɔi bibii ahe, aloo wɔniŋ efɔŋ he lɛ, esa akɛ wɔtsu nii ni wɔha suɔmɔ aha eshai babaoo nɔ. (1 Korintobii 13:5) Wɔle akɛ enɛ ji Nyɔŋmɔ suɔmɔnaa nii, ejaakɛ no e-Wiemɔ lɛ tsɔɔ.
16. (a) Mɛɛ tawuu nɛkɛ atsɔɔ Kristofoi ni amɛkɛ amɛhe awo mli? (b) Awula wɔ yɛ mɛɛ gbɛ nɔ?
16 Yɛ be mli ni mɛi pii kɛ suɔmɔ kɛ tawuu tsaŋ lɛ, sɛɛkpee nɔ̃ lɛ ji nɔ kroko ni atsɔɔ wɔ, shi eji tawuu ko ni yɔɔ sɔrɔto. David yɔse ehe ni ekɛfɔɔ Nyɔŋmɔ nɔ koni etsɔɔ lɛ gbɛ ni eeetsɔ nɔ ewuu ta, eyɛ mli akɛ yɛ ebei lɛ amli lɛ, nɔ ni fata enɛ he ji ta diɛŋtsɛ ni ewuɔ eshiɔ Israel henyɛlɔi. (1 Samuel 17:45-51; 19:8; 1 Maŋtsɛmɛi 5:3; Lala 144:1) Ni wɔ tawuu yɛ ŋmɛnɛ hu? Wɔ tawuu nii lɛ jeee heloo mli nɔ̃. (2 Korintobii 10:4) Wɔ nɔ̃ lɛ ji mumɔŋ tawuu, ni ehe miihia ni wɔkɛ mumɔŋ tawuu nii awula wɔhe. (Efesobii 6:10-13) Yehowa tsɔɔ e-Wiemɔ kɛ ewebii ni abua amɛnaa afee amɛ ekome lɛ anɔ etsɔɔ wɔ bɔ ni awuɔ mumɔŋ ta yɛ omanyeyeli mli.
17. (a) Mɛɛ ŋaa gbɛi Abonsam kɛtsuɔ nii koni ekɛgbala wɔjwɛŋmɔ? (b) Mɛni esa akɛ wɔkɛ nilee akwa?
17 Abonsam fɔɔ je lɛŋ nibii, hemɔkɛyeli kwalɔi, kɛ mɛi krokomɛi ni teɔ shi woɔ anɔkwale lɛ kɛ nitsumɔ yɛ shishiumɔ kɛ gbɛi ni yɔɔ nigii nɔ, yɛ mɔdɛŋ ni ebɔɔ koni egbala wɔ kɛya saji ni he ehiaaa nɔ lɛ mli. (1 Timoteo 6:3-5, 11; Tito 3:9-11) Etamɔ nɔ ni enaa akɛ enyɛŋ ekɛ tutuamɔ ni baa tɛ̃ɛ aye wɔnɔ kunim, no hewɔ lɛ ebɔɔ mɔdɛŋ ni eha wɔshane kɛtsɔ wɔmli ni etsɛɛɛ fũmɔ kɛ kwashiai asanebimɔi ni mumɔŋ sɛɛnamɔ ko bɛ mli lɛ nɔ. Ákɛ tabilɔi ni yɔɔ kamkam lɛ, esa akɛ wɔha wɔhiɛ ahi osharai ni tamɔ nɛkɛ lɛ anɔ nakai nɔŋŋ, taakɛ wɔfeɔ yɛ nɔ ni akɛtutuaa wɔ tɛ̃ɛ he lɛ.—1 Timoteo 1:3, 4.
18. Ákɛ wɔhiii shi wɔhaaa wɔ diɛŋtsɛ wɔhe dɔŋŋ lɛ kɔɔ mɛni he diɛŋtsɛ?
18 Wɔfiii gbɔmɛi akɔnɔ nii loo jeŋmaji lɛ asuɔmɔnaa nii asɛɛ. Yehowa etsɔɔ wɔ nii kɛtsɔ Yesu nɔkwɛmɔ nɔ lɛ nɔ akɛ, esaaa akɛ wɔhiɔ shi wɔhaa wɔ diɛŋtsɛ wɔhe dɔŋŋ; shi moŋ, esa akɛ wɔkɛ jwɛŋmɔ ni Kristo Yesu hiɛ lɛ nɔŋŋ awula wɔhe, ni wɔhi shi yɛ Nyɔŋmɔ suɔmɔnaa nifeemɔ naa. (2 Korintobii 5:14, 15) Ekolɛ tsutsu lɛ, wɔhi shi kɛ nyenyeŋtswibɔɔ ni hiɛshikamɔ bɛ mli, ni wɔfite be ni jara wa waa. Shwɛmɔi, dãatɔɔi, kɛ jeŋba shara ji nɔ ni ekadi jeŋ fɔŋ nɛɛ. Amrɔ nɛɛ ni aatsɔɔ wɔ koni wɔfee Nyɔŋmɔ suɔmɔnaa nii nɛɛ, ani wɔdaaa shi akɛ wɔtsi wɔhe kɛjɛ jeŋ ni ekpɔtɔ nɛɛ he? No hewɔ lɛ, nyɛhaa wɔwua ta waa yɛ mumɔŋ, koni wɔkɛ wɔhe akawo je lɛŋ nifeemɔi ni woɔ mɔ he muji lɛ amli.—1 Petro 4:1-3.
Atsɔɔ Wɔ Nii ni He Baaba Sɛɛnamɔ Aha Wɔ
19. Yehowa suɔmɔnaa nii ni atsɔɔ wɔ, ni agbɛnɛ wɔfeɔ lɛ kɛ mɛɛ sɛɛnamɔi baaba?
19 Ehe miihia waa ni wɔyɔse akɛ, nii ni atsɔɔ wɔ koni wɔfee Yehowa suɔmɔnaa nii lɛ he baaba sɛɛnamɔ babaoo aha wɔ. Anuɔ shishi akɛ, esa akɛ wɔfee wɔ gbɛfaŋnɔ kɛtsɔ toiboo ni wɔɔfee jogbaŋŋ nɔ koni wɔkase, koni agbɛnɛ wɔdi famɔi ni tsɔɔ e-Bi lɛ nɔ kɛbaa wɔŋɔɔ, kɛ agbɛnɛ kɛtsɔ e-Wiemɔ lɛ kɛ ewebii ni abua amɛnaa lɛ anɔ lɛ sɛɛ. (Yesaia 48:17, 18; Hebribii 2:1) Kɛtsɔ nakai feemɔ nɔ lɛ, abaawaje wɔ ni wɔdamɔ shi shiŋŋ yɛ amanehulu bei nɛɛ amli, ni wɔtsɔ ahum ni yɔɔ wɔhiɛ lɛ amli shweshweeshwe. (Mateo 7:24-27) Bianɛ po, wɔbaanyɛ wɔsa Nyɔŋmɔ hiɛ kɛtsɔ esuɔmɔnaa nifeemɔ nɔ, ni no maa nɔ mi akɛ abaaha wɔ sɔlemɔi ahetoo. (Yohane 9:31; 1 Yohane 3:22) Ni wɔbaana miishɛɛ diɛŋtsɛ.—Yohane 13:17.
20. Mɛni nɔ ebaahi akɛ ooojwɛŋ, yɛ be mli ni onaa afi ŋmalɛ lɛ yɛ 1997 mli fɛɛ lɛ?
20 Yɛ 1997 mli lɛ, wɔbaana hegbɛ shii abɔ koni wɔkane ni wɔsusu afi ŋmalɛ lɛ, ni ji Lala 143:10: “Tsɔɔmɔ mi ni mafee osuɔmɔnaa nii” lɛ he. Yɛ be mli ni wɔfeɔ enɛ lɛ, nyɛhaa wɔkɛ bei lɛ eko asusua gbɛjianɔ ni Nyɔŋmɔ eto kɛha wɔ, koni atsɔɔ wɔ nii, taakɛ atsɔɔ yɛ yiteŋgbɛ lɛ he. Ni nyɛhaa wɔkɛ nakai wiemɔi lɛ anɔjwɛŋmɔ atsua nii akɛ kanyamɔ nii, koni wɔfee wɔ nii pɛpɛɛpɛ yɛ nakai faikpamɔ lɛ kɛ gbeekpamɔ naa, akɛni wɔle akɛ, “mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ” lɛ hewɔ.—1 Yohane 2:17.
Te Obaaha Hetoo Oha Tɛŋŋ?
◻ Namɛi atsɔɔ amɛ nii ŋmɛnɛ koni amɛfee Yehowa suɔmɔnaa nii?
◻ Te esa akɛ Lala 143:10 asa wɔhe aha tɛŋŋ yɛ 1997 mli?
◻ Mɛɛ gbɛ nɔ atsɔɔ atsɔɔ wɔ nii, koni wɔfee Yehowa suɔmɔnaa nii?
◻ Mɛni ataoɔ yɛ fɔlɔi Kristofoi adɛŋ yɛ amɛbii anitsɔɔmɔ mli?