Kpee Krɛdɛɛ Gbi he Gbɛjianɔtoo Hee
1 “Nyɛfea Yehowa Kaselɔi” ji saneyitso kɛha kpee krɛdɛɛ gbi he gbɛjianɔtoo hee ni jeɔ shishi yɛ August mli lɛ. (Yoh. 6:45, NW) Ŋwɛi nitsɔɔmɔ ni jɛ Yehowa ŋɔɔ lɛ yeɔ ebuaa wɔ lɛlɛŋ koni wɔhi shihilɛi ni haa mɔ tsui nyɔɔ emli lɛ amli. Ehaa wɔhiɛ sɔɔ wɔ mumɔŋ gboshinii lɛ waa diɛŋtsɛ. Mɔdɛŋ ni wɔbɔɔ koni wɔye wɔbua mɛi krokomɛi ni amɛnu sanekpakpa lɛ haa wɔbafeɔ maŋbii ni he yɔɔ sɛɛnamɔ. Kpee krɛdɛɛ gbi nɛɛ baama jɔɔmɔi ni Yehowa kaselɔi lɛ naa mli ŋɔɔmɔ lɛ nɔ mi.
2 Gbɛjianɔtoo lɛ baatsɔɔ sɔrɔtofeemɔ ni yɔɔ sɛɛnamɔi ni yɔɔ ŋwɛi nitsɔɔmɔ, kɛ osharai ni yɔɔ je lɛŋ nikasemɔi amli lɛ mli. Wɔbaana bɔ ni Yehowa kɛ nikasemɔ gbɛ ni fe fɛɛ—ni ji nikasemɔ ni damɔ e-Wiemɔ ni ji Biblia lɛ nɔ lɛ hãa lɛ yɛ faŋŋ mli. Abaama jamɔ mli hei sɔrɔtoi etɛ ni wɔtsui nyɔɔ wɔmli yɛ mli akɛ Nyɔŋmɔ kaselɔi lɛ nɔ mi. Kɛfata he lɛ, abaawo obalahii kɛ obalayei ahewalɛ, ni amɛkase Biblia mli nɔkwɛmɔ nii sɔrɔtoi ni nɔ bɛ, tamɔ David kɛ Timoteo, koni amɛtswa amɛ shihilɛi kɛbɔle mumɔŋ nitsumɔi ahe. Abaawo wɔ hemɔkɛyeli hewalɛ, yɛ be mli ni amaa mɛi ni edara yɛ afii amli lɛ anɔkwayeli hu nɔ mi lɛ. Mɛi heei ni ejɔɔ amɛ wala nɔ ni sa lɛ baanyɛ aná baptisimɔ. Esa akɛ amɛha onukpai asɛinɔtalɔ lɛ ale nɔ ni amɛshweɔ nɛɛ kɛtsɔ hiɛ kwraa dani kpee gbi lɛ ashɛ.
3 Maŋshiɛmɔ ni abaaha yɛ kpee krɛdɛɛ gbi lɛ shishi lɛ yitso ji “Yehowa Etsɔɔ Amɛ Nii Koni Amɛfee Esuɔmɔnaa Nii.” Ebaama yiŋtoi ahewɔ ni ehe hiaa ni wɔ fɛɛ wɔya nɔ wɔkase nii, ni wɔfee shiŋŋ yɛ hemɔkɛyeli lɛ mli, ni wɔya wɔhiɛ daa lɛ nɔ mi. Abaawo wɔ hewalɛ ni wɔkase Yehowa, kɛtsɔ anɔkwale ni kɛ mɔ yaa naanɔ wala mli lɛ he nii ni wɔɔtsɔɔ mɛi krokomɛi lɛ nɔ. Akɛ niiashikpamɔi ni tswaa mɔ maa shi baafata he, koni akɛtsɔɔ bɔ ni Asafo lɛ woji lɛ eye ebua mɛi pii ni amɛfee mɛi ni Yehowa etsɔɔ amɛ nii. Abaama sɛɛnamɔi ni ejɛ Yehowa jeŋ muu fɛɛ nitsɔɔmɔ he gbɛjianɔtoo lɛ mli kɛba lɛ nɔ mi.
4 Too gbɛjianɔ jogbaŋŋ koni oya eko. Wo mɛi fɛɛ ni yɔɔ wiemɔ lɛ he miishɛɛ lɛ hewalɛ ni amɛya. Kpa gbɛ akɛ, wɔ-Tsɔɔlɔ Kpeteŋkpele lɛ baatsɔɔ wɔ nibii kpakpai babaoo.—Yes. 30:20.