Tsɔɔmɔ Mɛi Krokomɛi Nɔ ni Nyɔŋmɔ Taoɔ
1 Abaanyɛ aná mɛi babaoo ni áhã “Yehowa wiemɔi lɛ atoiboo” eŋmɛɛ amɛ yɛ mumɔŋ lɛ lolo. (Amos 8:11) Yɛ be mli ni mɛi komɛi heɔ yeɔ akɛ Nyɔŋmɔ yɛ lɛ, amɛleee eyiŋtoo kɛ etaomɔ nii. No hewɔ lɛ, ehe miihia ni wɔtsɔɔ amɛ Maŋtsɛyeli lɛ he anɔkwale ni hereɔ mɔ yiwala lɛ. Akɛni awula wɔ jogbaŋŋ ni wɔsaa wɔhe akɛ wɔɔye odase yɛ hegbɛ fɛɛ hegbɛ ni wɔɔna lɛ mli hewɔ lɛ, wɔnine baanyɛ ashɛ mɛi ni taoɔ amɛkase nɔ ni Yehowa taoɔ lɛ anɔ.
2 Yɛ April kɛ May mli lɛ, wɔbaaná Buu-Mɔɔ kɛ Awake! ni eba yɛ amɛbe naa pɛpɛɛpɛ lɛ koni wɔkɛha. Kɛfata he lɛ, enɛ ji klɛŋklɛŋ be kwraa ni wɔkɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ baatsu nii. Emli mfonirii fɛfɛji kɛ sanebimɔi ni haa asusuɔ sane he lɛ haa anaa wolo bibioo nɛɛ he miishɛɛ waa. Akɛ gbɛtsɔɔmɔi ni nyiɛ sɛɛ nɛɛ eha, koni eye ebua wɔ ni wɔkɛ wɔ woji ni nɔ bɛ lɛ atsu nii jogbaŋŋ kɛmɔ shi.
3 Gbɔmɛi lɛ Taomɔ: Yɛ hei ni mɛi babaoo bɛ shia beni wɔyaa shia kɛ shia lɛ, eefee nɔ ni sɛɛnamɔ yɔɔ he akɛ wɔɔtao gbɔmɛi lɛ yɛ he fɛɛ he ni amɛyɔɔ, ni wɔkɛ amɛ agba sane. Nɔ ni aŋma ahɔ September 1996 Wɔ Maŋtsɛyeli Sɔɔmɔ lɛ mli lɛ wo wɔ hewalɛ ni wɔshiɛ sanekpakpa lɛ yɛ he fɛɛ he—yɛ gbɛjegbɛ nɔ, tsɔne ni maŋbii taraa mli lɛ mli, kɛ shwɛmɔhei, tsɔnei adaamɔhei, kɛ nitsumɔhei. Ehaa wɔhiɛ hiɔ bɔ ni ehe hiaa ni wɔtao hegbɛi koni wɔshiɛ trukaa lɛ hu nɔ. Ákɛ enɛ he nɔkwɛmɔ nɔ lɛ, nyɛmi yoo gbɛgbalɔ ko tee kooloi akwɛmɔhe, ni ekɛ August 8, 1996 Awake! ni emli saji ni aŋmala kɛtsara nɔ lɛ hiɛ saneyitso ni ji “Kooloi Akui ni Aahe Abule Amɛ Shishi—Mɛni Hewɔ Esa akɛ Ekɔ Ohe?” lɛ ekomɛi tee. Eha mɛi komɛi ni yɔɔ kooloi ahe miishɛɛ waa lɛ ekomekomei 40 yɛ ŋmɛlɛtswaa kome mli! Kɛbashi amrɔ nɛɛ, mɛɛ omanye oye yɛ sanekpakpa lɛ shiɛmɔ yɛ he fɛɛ he lɛ mli? Buu-Mɔɔ kɛ Awake! kɛ Taoɔ wolo bibioo lɛ hu sa jogbaŋŋ kɛha odaseyelii lɛ sɔrɔtoi fɛɛ, akɛni amɛwieɔ saji ni kɔɔ gbɔmɛi ashihilɛi ahe ni amɛkãnyaa jwɛŋmɔŋ nyɛmɔ lɛ hewɔ.
4 Sanegbaai Ashishijee: October 1996 Wɔ Maŋtsɛyeli Sɔɔmɔ lɛ sɛɛ baafa lɛ kɛ saji babaoo ni tsɔɔ bɔ ni oooto bo diɛŋtsɛ oshiɛmɔ wiemɔ he gbɛjianɔ kɛha Buu-Mɔɔ kɛ Awake! woji tɛtrɛbii lɛ kɛhamɔ lɛ haa. Nakai gbɛtsɔɔmɔi lɛ nɔŋŋ baamɔ shi jogbaŋŋ yɛ be mli ni otoɔ Taoɔ wolo bibioo lɛ shiɛmɔ wiemɔ he gbɛjianɔ lɛ. Nɔ ni wɔkɛɔ lɛ baanyɛ afee wiemɔi fioo loo nɔ ni fa bɔ ni sa, ní aaanyɛ akɛ Ŋmalɛ mli sane ko afata he. Ehe miihia ni ahala wiemɔi ni akɛbaaje shishi lɛ jogbaŋŋ, akɛni amɛbaanyɛ amɛtsɔɔ kɛji mɔ ni obɛŋkɛɔ lɛ lɛ baaya nɔ abo toi lɛ hewɔ. Mɛi komɛi kɛ wiemɔ nɛɛ eje shishi ni amɛye omanye: “Mikane sane ko ni wo mi hewalɛ, ni miisumɔ ni mikɛ bo ana mli gbɛfaŋnɔ.” Aloo abaanyɛ atee sanebimɔ ko ni yɔɔ miishɛɛ shi koni akɛgbala mɔ kroko lɛ awo sanegbaa mli.
5 Kɛ nakai feemɔ baahi yɛ okutso lɛ mli lɛ, obaanyɛ obɔ mɔdɛŋ ni obi saji tamɔ nɔ ni nyiɛ sɛɛ nɛɛ yɛ oshiɛmɔ wiemɔi amli yɛ nɛkɛ nyɔŋ nɛɛ nɔ:
◼ “Ŋmɛnɛ, wɔnaa mfonirii ni atɛŋ yɛ gbogboi ahe, jwɛi kɛ mujiwoo nibii babaoo. Mɛni baaha shikpɔŋ lɛ nɔ afee falefale ni aha efee he ko ni hi saŋŋ kɛha shihilɛ?” Ŋmɛɛ gbɛ ni ewie, koni no sɛɛ lɛ otsɔɔ mli akɛ, oyɛ sane ko ni tsɔɔ wɔ bɔ ni shikpɔŋ lɛ baatsɔ jeŋ muu fɛɛ abɔɔ kɛ be ni ebaaba mli nakai. Okɛ mɔ lɛ ana wiemɔ pɔtɛɛ ko, ŋmalɛ kuku ko, kɛ mfoniri fɛfɛo ko ni jɛ wolo tɛtrɛɛ hee ko mli lɛ mli gbɛfaŋnɔ, koni no sɛɛ lɛ okɛha mɔ lɛ, ni otsĩ woloshɛɛ he gbɛjianɔ ni ato lɛ tã. Dani okɛ sanegbaa lɛ baaba naagbee lɛ, bɔɔ mɔdɛŋ ni oto gbɛjianɔ ni otsa nɔ be kroko.
◼ “Ani osusuɔ akɛ Nyɔŋmɔ to gbɛjianɔ akɛ wɔhi shi ni naagbai ni tamɔ nɔ ni wɔkɛkpeɔ ŋmɛnɛ nɛɛ abɔle wɔhe kɛkpe?” Beni mɔ lɛ eha hetoo sɛɛ lɛ, obaanyɛ okɛɛ: “Ekolɛ ole sɔlemɔ ni Yesu tsɔɔ ekaselɔi lɛ akɛ amɛsɔle ni amɛbi ni Nyɔŋmɔ Maŋtsɛyeli lɛ aba lɛ jogbaŋŋ. Ani osusu nɔ ni Nyɔŋmɔ Maŋtsɛyeli lɛ ji diɛŋtsɛ lɛ he?” Gbelemɔ nikasemɔ 6 yɛ Taoɔ wolo bibioo lɛ mli, ni okane saji ni abi yɛ nikasemɔ lɛ shishijee lɛ. No sɛɛ lɛ, be mli ni okaneɔ kuku 1 lɛ, tsɔɔmɔ hetoo ni akɛha klɛŋklɛŋ sanebimɔ lɛ. Tsɔɔmɔ mli akɛ nɛkɛ nɔŋŋ ji bɔ ni aha sanebimɔi ni eshwɛ lɛ ahetoo kukuji. Okɛ wolo bibioo lɛ aha ni oto gbɛjianɔ ni okɛ lɛ akpe ekoŋŋ koni nyɛgba Maŋtsɛyeli lɛ he sane babaoo.
◼ “Gbɔmɛi babaoo miije shishi amɛmiibu je lɛŋ jamɔi akɛ nomɛi ji nɔ ni kɛ adesa naagbai lɛ baa moŋ fe nɔ ni amɛaafee amɛnaa tsabaa. Mɛni osusuɔ yɛ no he?” Beni obo nɔ ni mɔ lɛ susuɔ yɛ he lɛ toi ogbe naa lɛ, tsɔɔmɔ lɛ nɔ ko yɛ woji tɛtrɛbii heei lɛ amli ni baanyɛ atee emiishɛɛ shi yɛ apasa jamɔ nine ni enyɛ shi loo eshigbeemɔ ni bɛŋkɛɔ lɛ he. Gbalamɔ ejwɛŋmɔ kɛya woloshɛɛ he gbɛjianɔ ni ato lɛ nɔ. Nyɛtsɔɔa nyɛgbɛi, ni okɛɛ lɛ akɛ obaaba eŋɔɔ ekoŋŋ koni onyɛ otsɔɔ bɔ ni eji akɛ anɔkwa jamɔ hako adesai anine anyɛ shi lɛ.
◼ “Akɛni naagbai babaoo yɔɔ weku shihilɛ mli ŋmɛnɛ hewɔ lɛ, ani osusu nɔ̃ diɛŋtsɛ ni aaatsɔ nɔ ana miishɛɛ yɛ weku mli lɛ he pɛŋ?” Mɛɛ ni ewie, koni otsɔɔ mli akɛ Nyɔŋmɔ tsɔɔ nɔ̃ diɛŋtsɛ ni kɛ weku miishɛɛ baa lɛlɛŋ yɛ Biblia lɛ mli. Ekolɛ obaanyɛ okane Yesaia 48:17. No sɛɛ lɛ gbelemɔ nikasemɔ 8 yɛ Taoɔ wolo bibioo lɛ mli, ni otsɔɔ Biblia mli ŋmalɛ kukuji ni aŋmalako emli wiemɔi ni kɛ gbɛtsɔɔmɔ ni akɛ he fɔɔ nɔ haa weku lɛ mli bii ateŋ mɔ fɛɛ mɔ lɛ. Kanemɔ sanebimɔi ni ato naa yɛ nikasemɔ lɛ shishijee lɛ. Bi kɛji mɔ lɛ baasumɔ ni ekane hetooi lɛ. Kɛ nakai lɛ, okɛ wolo bibioo lɛ aha lɛ ni okɛɛ lɛ akɛ obaaba be kroko koni okɛ lɛ abagba gbɛtsɔɔmɔ ni akɛtsuɔ nii ni yɔɔ Biblia lɛ mli kɛha weku shihilɛ ni miishɛɛ yɔɔ mli lɛ babaoo.
6 Nɔ ni aŋma ahɔ March 1997 Wɔ Maŋtsɛyeli Sɔɔmɔ lɛ mli lɛ wo wɔ hewalɛ ni wɔná ekãa ni wɔkɛfee sɛɛsaramɔi. Ejie yi akɛ akɛ Taoɔ wolo bibioo lɛ atsu nii koni akɛje Biblia mli nikasemɔi ashishi, kɛ jeee yɛ klɛŋklɛŋ saramɔ lɛ mli lɛ, no lɛ afee yɛ sɛɛsaramɔ lɛ mli. Nɔ ni he hiaa adesai fe fɛɛ ji ni amɛkase nɔ ni Nyɔŋmɔ taoɔ koni no sɛɛ lɛ amɛtsu he nii. (Kol. 1:9, 10) Wɔbaaha mɛi krokomɛi ana he sɛɛ babaoo yɛ April kɛ May mli kɛ wɔbaanyɛ wɔbɔi amɛ nɔ ni wɔle yɛ Yehowa taomɔ nii kɛha walanamɔ he lɛ tsɔɔmɔ.—1 Kor. 9:23.