Okɛ Ohe Awo Nikpamɔ Nitsumɔ lɛ Mli Jogbaŋŋ Kɛmɔ Shi
1 Yehowa blema gbalɔi lɛ kɛ agbɛnɛ hu Yesu Kristo diɛŋtsɛ wie naabuamɔ nitsumɔ ko he. (Yes. 56:8; Ezek. 34:11; Yoh. 10:16) Yɛ be mli ni ashiɛɔ Maŋtsɛyeli lɛ he sanekpakpa lɛ yɛ jeŋ fɛɛ lɛ, belɛ, aagbe nakai nitsumɔ lɛ naa. (Mat. 24:14) Srɔtofeemɔ ni kã mɛi ni sɔmɔɔ Nyɔŋmɔ kɛ mɛi ni sɔmɔɔɔ lɛ lɛ ateŋ lɛ miifee faŋŋ diɛŋtsɛ. (Mal. 3:18) Mɛni enɛ tsɔɔ kɛha wɔ?
2 Bo Diɛŋtsɛ Ogbɛnaa Nii: Wɔbaanyɛ wɔkase nii kɛjɛ Paulo nɔkwɛmɔnɔ lɛ mli, mɔ ni kɛ ehe wo Kristofoi asɔɔmɔ lɛ hiɛnyiɛmɔ mli jogbaŋŋ kɛmɔ shi lɛ. Enu he akɛ sɔ̃ kã enɔ akɛ eshiɛ bɔni afee ni mɛi fɛɛ aná hegbɛ ni amɛnu sanekpakpa lɛ ni ahere amɛyiwala. Enɛ tsirɛ lɛ koni egbo amɛhe deŋme ni efɔɔɔ. (Rom. 1:14-17) Yɛ shihilɛi ni yɔɔ oshara ni adesai kɛkpeɔ ŋmɛnɛ lɛ hewɔ lɛ, ani wɔnuuu he diɛŋtsɛ akɛ ehe miihia ni wɔshiɛ wɔtsɔɔ mɛi ni yɔɔ wɔshikpɔŋkuku lɛ mli?—1 Kor. 9:16.
3 Be Kɛha Ehe Nitsumɔ Oya: Abaanyɛ akɛ shiɛmɔ nitsumɔ lɛ ato gbɔmɛi ataomɔ kɛ yiwalaheremɔ nitsumɔ ko he. Esa akɛ atao gbɔmɛi lɛ ni ahere amɛyiwala dani efee nɔ ni ekpe sɛɛ tsɔ̃. Be ni eshwɛ lɛ faaa. Wala he eba oshara! Ebɛ naakpɛɛ akɛ Yesu wo ekaselɔi lɛ hewalɛ ni ‘amɛkpa nikpamɔ Nuntsɔ lɛ fai, koni ewo nitsulɔi agbɛ kɛba enikpamɔ lɛ mli.’—Mat. 9:38.
4 Akɛni Maŋtsɛyeli nitsulɔi babaoo ena hiamɔ ni yɔɔ ŋmɛnɛ hewɔ lɛ, amɛha bɔ ni amɛkɛ amɛhe woɔ yibaamɔ nitsumɔ nɛɛ mli lɛ etee hiɛ. Gbekɛ ko ni eye kɛjɛ afii nyɔŋma kɛ etɛ kɛyaa ni atsɛɔ lɛ Hirohisa nyɛ ji fɔlɔ mɔ kome mɔ, ni ekɛ esɛɛbii ejwɛ kɛ amɛnyɛ lɛ yɔɔ. Eteɔ shi leebi ŋmɛji etɛ ni eyahɔɔ adafitswaa woji ni ekɛ shika ni ebaaná lɛ yeɔ ebuaa eweku lɛ. Yɛ enɛ mli po lɛ, Hirohisa sumɔ ni efee babaoo yɛ shiɛmɔ nitsumɔ lɛ mli, ni no hewɔ lɛ eje daa gbɛgbamɔ nitsumɔ lɛ shishi. Ani gbɛ̀i komɛi yɛ ni obaanyɛ okɛ ohe awo nitsumɔ ni atsuŋ eko dɔŋŋ nɛɛ mli babaoo kɛmɔ shi?
5 “Be lɛ faaa dɔŋŋ.” (1 Kor. 7:29) No hewɔ lɛ, eba akɛ wɔɔfee nɔ fɛɛ nɔ ni wɔɔnyɛ yɛ nitsumɔ ni he hiaa fe fɛɛ ni atsuɔ yɛ shikpɔŋ nɔ ŋmɛnɛ—ni ji Maŋtsɛyeli sanekpakpa lɛ shiɛmɔ kɛ kaselɔfeemɔ lɛ mli. Yesu kɛ shiɛmɔ nitsumɔ nɛɛ to nikpamɔ nitsumɔ he. (Mat. 9:35-38) Yɛ be mli ni wɔkɛ wɔhe woɔ nikpamɔ nitsumɔ lɛ mli babaoo kɛmɔɔ shi lɛ, nɔ ni baanyɛ afata wɔ deŋmegbomɔ lɛ mli yibii lɛ ahe ji mɔ ko ni wɔɔye wɔbua lɛ ni ebafata asafo babaoo ni jáa, ni awie amɛhe yɛ Kpojiemɔ 7:9, 10 lɛ ahe.