‘Nyɔŋmɔ Wiemɔ lɛ Yɛ Hewalɛ’
1 Bɔfo Paulo ŋma akɛ: “Nyɔŋmɔ wiemɔ hiɛ kã ni eyɛ hewalɛ.” (Heb. 4:12) Mɛni ekɛ enɛ tsɔɔ? Nyɔŋmɔ wiemɔ lɛ, loo shɛɛ sane ni anaa yɛ Biblia lɛ mli lɛ baanyɛ aná hewalɛ waa yɛ gbɔmɛi anɔ. Nilee ni yɔɔ Biblia lɛ mli lɛ yɛ hewalɛ ní ekɛaatsake mɔ ko shihilɛ ni ehi kwraa. Miishɛjemɔ kɛ hiɛnɔkamɔ ni ekɛhaa lɛ gbalaa adesai kɛbaa Wala Halɔ, Yehowa Nyɔŋmɔ ŋɔɔ. Eshɛɛ sane lɛ baanyɛ aha mɛi ni yɔɔ anɔkwa tsui lɛ aje naanɔ wala gbɛ lɛ nɔ nyiɛmɔ shishi. Ni kɛlɛ, bɔni afee ni wɔna nɔ ni baajɛ enɛ mli aba lɛ, esa akɛ wɔkɛ Biblia lɛ atsu nii beni wɔyeɔ mɛi krokomɛi odase lɛ.
2 Kanemɔ Ŋmalɛ lɛ yɛ Hegbɛ Fɛɛ Hegbɛ ní Oooná Mli: Etamɔ nɔ ni shiɛlɔi babaoo efɔɔɔ Biblia lɛ kɛ nitsumɔ yɛ shinaa naa. Ani enɛ ji anɔkwale yɛ ogbɛfaŋ? Akɛni etamɔ nɔ ni mɛi babaoo bɛ dekã kɛha sanegbaa ni sɛɛ tsɛɔ hewɔ lɛ, ekolɛ nɔ ni ofɔɔ feemɔ ji okɛ wolo ko haa loo owieɔ ŋmalɛ ko he kuku kɛkɛ. Wɔmiiwo shiɛlɔi fɛɛ hewalɛ koni amɛbɔ mɔdɛŋ waa ni kɛ hoo lɛ, amɛkane ŋmalɛ kuku kome kɛjɛ Biblia lɛ mli beni amɛkɛ sanekpakpa lɛ haa lɛ, kɛkɛ lɛ ebaaha mɔ lɛ ana akɛ wɔshɛɛ sane lɛ yɛ Nyɔŋmɔ Wiemɔ lɛ mli lɛɛlɛŋ.
3 Eyɛ mli akɛ mɛi fioo haa Biblia lɛ kanemɔ feɔ amɛsu moŋ, shi, mɛi babaoo kɛ bulɛ haa. Gbɔmɛi ni bɛ dekã lɛ po heɔ miniti kome loo nɔ̃ ni amɛboɔ shɛɛ sane ní akaneɔ lɛ tɛ̃ɛ kɛjɛɔ Nyɔŋmɔ Wiemɔ lɛ mli lɛ toi. Kɛ́ akɛ miishɛɛ kane ŋmalɛ ko ni sa ni atsɔɔ mli kuku lɛ, hewalɛ ni Yehowa wiemɔ lɛ yɔɔ lɛ baanyɛ aná toibolɔ lɛ nɔ hewalɛ kpakpa. Shi te ooofee tɛŋŋ okɛ ohiɛkpamɔ wiemɔ lɛ atsa ŋmalɛ kuku ko ni okaneɔ kɛjɛɔ Biblia lɛ mli lɛ?
4 Kaa Enɛ Okwɛ yɛ Woji Tɛtrɛbii kɛ Nitsumɔ Mli: Nɔkwɛlɔ gbɛfalɔ ko kɛ Ŋmalɛi lɛ tsuɔ nii kɛmɔɔ shi beni ekɛ ehe ewo woji tɛtrɛbii kɛ nitsumɔ lɛ mli. Ekɛ Biblia bibioo ko woɔ ekotoku mli. Beni ekɛ woji tɛtrɛbii lɛ etsɔɔ ní ewie sane ko he kuku sɛɛ lɛ, egbeleɔ Biblia lɛ ni eshashaooo shi, ni ekaneɔ kuku ni kɔɔ sane lɛ he. Obaanyɛ ofee enɛ kɛtsɔ bi ni ooobi akɛ: “Te osusuɔ tɛŋŋ yɛ shiwoo ni woɔ mɔ hewalɛ nɛɛ he?” lɛ nɔ, ni no sɛɛ nɔŋŋ lɛ okane ŋmalɛi ni ohala lɛ.
5 Ha efee oti ni ma ohiɛ akɛ obaagba Biblia lɛ mli kuku kome loo nɔ̃ he sane otsɔɔ toibolɔ fɛɛ toibolɔ. Ehewalɛ ni kanyaa mɔ lɛ baanyɛ agbele gbɛ koni gbɔmɛi babaoo atsi abɛŋkɛ Nyɔŋmɔ.—Yoh. 6:44.