Nikasemɔ 4

Namɔ Ji Abonsam?

Satan Abonsam—nɛgbɛ ejɛ kɛba? (1, 2)

Mɛɛ gbɛ nɔ etsɔɔ elakaa mɛi? (3-7)

Mɛni hewɔ esa akɛ ote shi owo Abonsam? (7)

1. Wiemɔ “abonsam” lɛ shishi ji mɔ ni wieɔ mɔ kroko he amalei gbohii. “Satan” shishi ji henyɛlɔ loo shitee-kɛ-wolɔ. Enɛɛmɛi ji wiemɔi ni akɛtsɛɔ Nyɔŋmɔ henyɛlɔ ni fe fɛɛ lɛ. Tsutsu ko lɛ, eji ŋwɛibɔfo ni eye emuu ni kɛ Nyɔŋmɔ yɔɔ ŋwɛi. Shi, sɛɛ mli lɛ ebasusu ehe babaoo tsɔ ni eesumɔ ni enine ashɛ jamɔ ni ji Nyɔŋmɔ nɔ̃ ni sa lɛ nɔ.—Mat. 4:8-10.

2. Ŋwɛibɔfo nɛɛ, Satan, wie etsɔɔ Hawa kɛtsɔ onufu nɔ. Akɛni ekɛɛ lɛ amalei hewɔ lɛ, eha yoo lɛ gbo Nyɔŋmɔ nɔ toi. No hewɔ lɛ Satan tutua nɔ ni atsɛɔ no akɛ Nyɔŋmɔ “jeŋ muu fɛɛ nɔyeli,” loo egbɛhe akɛ Ŋwɛi Flooflonyo lɛ. Satan bi kɛji Nyɔŋmɔ yeɔ nɔ yɛ gbɛ ni ja nɔ, bɔ ni baahi aha E-shishi bii lɛ, he sane. Satan bi sane yɛ adesa ni baaya nɔ aye Nyɔŋmɔ anɔkwale lɛ hu he. Satan tsɔ enɛ nɔ efee ehe Nyɔŋmɔ henyɛlɔ. No hewɔ ni abatsɛ lɛ akɛ Satan Abonsam lɛ.—1 Mose 3:1-5; Hiob 1:8-11; Kpoj. 12:9.

3. Satan bɔɔ mɔdɛŋ ni elaka mɛi koni amɛja lɛ. (2 Kor. 11:3, 14) Gbɛ kome ni etsɔɔ nɔ elakaa mɛi ji kɛtsɔ apasa jamɔ nɔ. Kɛ jamɔ ko tsɔɔ Nyɔŋmɔ he amale tsɔɔmɔi lɛ, etsuɔ Satan yiŋtoo he nii diɛŋtsɛ. (Yoh. 8:44) Ekolɛ mɛi ni ji apasa jamɔi amli bii baasusu yɛ anɔkwale mli akɛ amɛmiija anɔkwa Nyɔŋmɔ lɛ. Shi Satan diɛŋtsɛ amɛsɔmɔɔ lɛ lɛ. Lɛ ji “je nɛŋ nyɔŋmɔ lɛ.”—2 Kor. 4:4.

4. Mumɔi atsɛmɔ ji gbɛ kroko ni Satan tsɔɔ nɔ ekɛ mɛi baa ehewalɛ shishi. Ekolɛ amɛbaatsɛ mumɔi koni amɛbu amɛhe, koni amɛye mɛi krokomɛi awui, koni amɛtsɔɔ nɔ ni baaba wɔsɛɛ, loo amɛfee naakpɛɛ nii. Satan ji hewalɛ fɔŋ ni hɔ nifeemɔi nɛɛ fɛɛ asɛɛ. Bɔni afee ni wɔsa Nyɔŋmɔ hiɛ lɛ, esaaa akɛ wɔkɛ mumɔi atsɛmɔ feɔ nɔ ko nɔ ko kwraa.—5 Mose 18:10-12; Bɔf. 19:18, 19.

5. Satan lakaa mɛi hu kɛtsɔɔ hewolonɔ su mli henɔwomɔ kɛ maŋkrwamɔŋ gbɛjianɔtoi ajamɔ nɔ. Mɛi komɛi nuɔ he akɛ amɛ maŋ loo hewolonɔ su hi fe mɛi krokomɛi anɔ. Shi enɛ jeee anɔkwale. (Bɔf. 10:34, 35) Mɛi krokomɛi kwɛɔ maŋkwramɔŋ gbɛjianɔtoi agbɛ koni amɛtao adesa naagbai anaa tsabaa. Kɛtsɔ enɛ feemɔ nɔ lɛ, amɛmiikpoo Nyɔŋmɔ Maŋtsɛyeli. No pɛ ji wɔ naagbai anaa tsabaa.—Dan. 2:44.

6. Gbɛ kroko ni Satan tsɔɔ nɔ elakaa mɛi ji kɛtsɔ eshafeemɔ akɔnɔi ni ekɛkaa amɛ lɛ nɔ. Yehowa kɛɔ wɔ akɛ wɔkpoo eshafeemɔ sui ejaakɛ ele akɛ amɛbaaye wɔ awui. (Gal. 6:7, 8) Ekolɛ mɛi komɛi baasumɔ ni ofata amɛhe yɛ nifeemɔi nɛɛ amli. Shi, kaimɔ akɛ, Satan diɛŋtsɛ ji mɔ ni sumɔɔ ni ofee enɛɛmɛi.—1 Kor. 6:9, 10; 15:33.

7. Ekolɛ Satan kɛ yiwaa loo shitee-kɛ-woo baatsu nii koni ekɛha oshi Yehowa. Ekolɛ osuɔlɔi lɛ ekomɛi amli baafu waa yɛ Biblia ni okaseɔ hewɔ. Ekolɛ mɛi krokomɛi baaye ohe fɛo. Shi, namɔ ohiɛ lɛ owala he nyɔmɔ? Satan miisumɔ ni ewo ohe gbeyei ni ofɔ̃ɔ Yehowa he nikasemɔ lɛ. Kaaha Satan ye kunim! (Mat. 10:34-39; 1 Pet. 5:8, 9) Obaanyɛ oha Yehowa ana miishɛɛ ni otsɔɔ akɛ ofiɔ E-jeŋ muu fɛɛ nɔyeli lɛ sɛɛ, kɛtsɔ Abonsam ni ooote shi owo lɛ lɛ nɔ.—Abɛi 27:11.

[Mfonirii ni yɔɔ baafa 9]

Apasa jamɔ, mumɔi atsɛmɔ, kɛ maŋhedɔɔ lakaa mɛi

[Mfonirii ni yɔɔ baafa 9]

Tee shi owo Satan kɛtsɔ Yehowa he nikasemɔ ni oootsa nɔ lɛ nɔ