Nikasemɔ 13
Te Ooofee Tɛŋŋ Ona Anɔkwa Jamɔ Lɛ?
Ani jamɔi fɛɛ saa Nyɔŋmɔ hiɛ, aloo ekome pɛ? (1)
Mɛni hewɔ jamɔi babaoo kɛɔ akɛ Kristofoi ji amɛ lɛ? (2)
Te ooofee tɛŋŋ oyɔse anɔkwa Kristofoi? (3-7)
1. Yesu je anɔkwa Kristofoi ajamɔ kome shishi. No hewɔ lɛ Yehowa Nyɔŋmɔ anɔkwa jalɔi akuu kome pɛ yɔɔ ŋmɛnɛ. (Yoh. 4:23, 24; Efe. 4:4, 5) Biblia lɛ tsɔɔ akɛ mɛi fioo pɛ nyiɛ gbɛ fintɔ̃ɔ ni yaa wala mli lɛ nɔ.—Mat. 7:13, 14.
2. Biblia lɛ gba efɔ shi akɛ, yɛ bɔfoi lɛ agbele sɛɛ lɛ, tsɔɔmɔi gbohii kɛ nifeemɔi ni esaaa Kristofoi baabote Kristofoi asafo lɛ mli fiofio. Hii aaakpala heyelilɔi kɛaanyiɛ amɛ sɛɛ fe ni amɛaanyiɛ Kristo sɛɛ. (Mat. 7:15, 21-23; Bɔf. 20:29, 30) No hewɔ ni wɔnaa jamɔi sɔrɔtoi babaoo ni kɛɔ akɛ Kristofoi ji amɛ lɛ. Te wɔɔfee tɛŋŋ wɔyoo anɔkwa Kristofoi?
3. Anɔkwa Kristofoi akadimɔ nii ni fe fɛɛ ji akɛ, amɛyɛ suɔmɔ diɛŋtsɛ yɛ amɛteŋ. (Yoh. 13:34, 35) Atsɔɔɔ amɛ akɛ amɛsusu akɛ amɛhi fe adesai awekui loo hewolonɔ su mli bii krokomɛi. Asaŋ atsɔɔɔ amɛ akɛ amɛnyɛ̃ maji krokomɛi amli bii. (Bɔf. 10:34, 35) No hewɔ lɛ amɛkɛ amɛhe wooo tawuu mli. Anɔkwa Kristofoi kɛ amɛteŋ mɔ fɛɛ mɔ yeɔ akɛ nyɛmimɛi hii kɛ yei.—1 Yoh. 4:20, 21.
4. Anɔkwa jamɔ he okadi kroko hu ji akɛ emli bii lɛ yɛ bulɛ ni mli kwɔ kɛha Biblia lɛ. Amɛkpɛlɛɔ nɔ akɛ Nyɔŋmɔ Wiemɔ, ni amɛheɔ nɔ ni ekɛɔ lɛ amɛyeɔ. (Yoh. 17:17; 2 Tim. 3:16, 17) Amɛbuɔ Nyɔŋmɔ Wiemɔ akɛ ehe hiaa kwraa fe adesai asusumɔi loo kusumii. (Mat. 15:1-3, 7-9) Amɛbɔɔ mɔdɛŋ ni amɛhi shi yɛ Biblia lɛ naa yɛ amɛ daa gbi shihilɛ mli. No hewɔ lɛ amɛshiɛɛɛ nɔ kome ni sɛɛ mli lɛ amɛfee nɔ kroko.—Tito 1:15, 16.
5. Esa akɛ anɔkwa jamɔ awo Nyɔŋmɔ gbɛi hiɛ nyam hu. (Mat. 6:9) Yesu ha mɛi krokomɛi le Nyɔŋmɔ gbɛi, ni ji Yehowa. Esa akɛ anɔkwa Kristofoi hu afee nakai nɔŋŋ. (Yoh. 17:6, 26; Rom. 10:13, 14) Namɛi yɔɔ nyɛ akutso lɛ mli ni gbaa mɛi krokomɛi Nyɔŋmɔ gbɛi lɛ he sane?
6. Esa akɛ anɔkwa Kristofoi ashiɛ Nyɔŋmɔ Maŋtsɛyeli lɛ he sane. Yesu fee nakai. Ewie Maŋtsɛyeli lɛ he be fɛɛ be. (Luka 8:1) Efã ekaselɔi lɛ akɛ amɛshiɛ nɛkɛ sane nɛɛ nɔŋŋ yɛ shikpɔŋ lɛ nɔ fɛɛ. (Mat. 24:14; 28:19, 20) Anɔkwa Kristofoi heɔ yeɔ akɛ Nyɔŋmɔ Maŋtsɛyeli lɛ pɛ kɛ anɔkwa toiŋjɔlɛ kɛ shweshweeshwe shihilɛ baaba shikpɔŋ nɛɛ nɔ.—Lala 146:3-5.
7. Esa akɛ Yesu kaselɔi lɛ afee mɛi ni jɛɛɛ jeŋ fɔŋ nɛɛ mli. (Yoh. 17:16) Amɛkɛ amɛhe wooo je lɛŋ maŋkwramɔŋ nifeemɔi kɛ adesai ateŋ bei amli. Amɛkpooɔ jeŋbai, nifeemɔi, kɛ subaŋi fɔji ni egbɛ eshwa je lɛŋ lɛ. (Yak. 1:27; 4:4) Ani obaanyɛ oyɔse jamɔ kuu ko yɛ nyɛ akutso lɛ mli ni yɔɔ anɔkwa Kristojamɔ kadimɔ nii nɛɛ?
[Mfonirii ni yɔɔ baafa 27]
Anɔkwa Kristofoi sumɔɔ amɛhe, amɛbuɔ Biblia lɛ, ni amɛshiɛɔ Nyɔŋmɔ Maŋtsɛyeli lɛ he sane