Amɛje Kpa—Ni Kɛlɛ, Amɛmiiwo Yibii
1 Kɛ oji Yehowa Odasefoi babaoo ni eje kpa lɛ ateŋ mɔ ko lɛ, obaanyɛ owo yibii yɛ shiɛmɔ nitsumɔ lɛ mli yɛ enɛ fɛɛ sɛɛ. Yɛ anɔkwale mli lɛ, ekolɛ shihilɛ mli ni oyɔɔ lɛ baanyɛ aha oná hegbɛi krɛdɛɛi ni okɛye mɛi odase ni owo mɛi krokomɛi hewalɛ.
2 Hegbɛi ni Okɛaaye Odase: Mɛi babaoo ni esa akɛ amɛkpee kpajee naa lɛ miiná shiɛmɔ nitsumɔ lɛ mli gbɛfaŋnɔ kɛmiimɔ shi. Ákɛ nɔkwɛmɔnɔ lɛ, nyɛmi yoo ko ní kɛtsɔ opireshɛn ko ni afee lɛ lɛ nɔ hewɔ lɛ, enyɛɛɛ enyiɛ jogbaŋŋ ni ewie jogbaŋŋ hu lɛ na akɛ ebaanyɛ ekɛ ehe awo woji tɛtrɛbii ajaa mli kɛji ewu kɛ amɛtsɔne lɛ yama gbɛ ko ni mɛi fɔɔ nɔ tsɔmɔ lɛ toi. Be ko lɛ eha woji tɛtrɛbii 80 yɛ ŋmɛlɛtswai enyɔ pɛ mli! Oshihilɛ ni yɔɔ srɔto lɛ baaha ni ekolɛ oná hegbɛ hu koni okɛ mɛi ni yɛ gbɛ ko nɔ lɛ ewa akɛ nine baashɛ amɛnɔ lɛ akpe. Kɛji nakai ni lɛ, buu amɛ akɛ amɛji shikpɔŋkuku krɛdɛɛ ko mli bii ni oná.
3 Oshiɛmɔ nitsumɔ lɛ baanyɛ amɔ shi jogbaŋŋ! Beni mɛi krokomɛi naa bɔ ni otswa ofai shi oha kɛ hewalɛ kpakpa ni Biblia mli anɔkwale lɛ ená yɛ oshihilɛ nɔ lɛ, ekolɛ ebaagbala amɛ kɛba Maŋtsɛyeli shɛɛ sane lɛ he. Kɛfata he lɛ, kɛji okɛ mɛi ni miina amanehulu kpe lɛ, niiashikpamɔ ni oná yɛ shihilɛ mli lɛ baanyɛ aye abua bo ni ojɛ Nyɔŋmɔ Wiemɔ lɛ mli ni oshɛje amɛmii.—2 Kor. 1:4.
4 Wó Mɛi Krokomɛi Hewalɛ: Ani Laurel Nisbet ní kɛ afii 37 hi tsɔne ko ni akɛtsuɔ flufla he nii lɛ mli, ni kɛlɛ, eye ebua aŋkroaŋkroi 17 ni amɛbaná Biblia mli anɔkwale lɛ he anɔkwa nilee lɛ wala shihilɛ he sane lɛ wooo bo hewalɛ? Nakai nɔŋŋ onɔkwɛmɔnɔ lɛ baanyɛ awo nanemɛi heyelilɔi hewalɛ koni amɛmia amɛhiɛ yɛ Yehowa sɔɔmɔ mli.—g93 1/22 bf. 18-21.
5 Kɛ́ oshihilɛ lɛ eŋmɛɛɛ bo gbɛ ni okɛ ohe awo shiɛmɔ nitsumɔ lɛ mli bɔ ni kulɛ ooosumɔ po lɛ, obaanyɛ owo mɛi krokomɛi hewalɛ kɛ̃. Nyɛmi nuu ko kɛɛ akɛ: “Mikase akɛ mɔ ko ni kpajee lɛ mli wa waa po baanyɛ afee yelikɛbuamɔ nɔ̃ kpele kɛha mɛi krokomɛi. Mi kɛ miŋa etsɔmɔ tamɔ sɛ́kɛ wɔha mɛi srɔtoi yɛ asafo lɛ mli. Yɛ bɔ ni wɔshihilɛi ji ha hewɔ lɛ, wɔyɛ biɛ daa, ni wɔfee klalo be fɛɛ be.” Shi kɛlɛ, yɛ okpajee lɛ hewɔ lɛ, shishinumɔ yɛ he akɛ ekolɛ jeee be fɛɛ be obaanyɛ otsu nii yɛ ekãa ni oyɔɔ lɛ naa. Fɛɛ sɛɛ lɛ, obaanyɛ okɛ ohe awo shiɛmɔ nitsumɔ lɛ mli kɛ ekãa kɛ́ aye abua bo fioo ko. No hewɔ lɛ, kɛ́ yelikɛbuamɔ ko he miihia bo lɛ, kaashashao shi akɛ oooha onukpai lɛ loo asafoŋbii krokomɛi ni baanyɛ amɛye amɛbua lɛ ale enɛ.
6 Yehowa naa nɔ fɛɛ nɔ ni ofeɔ bɔni afee ni osɔmɔ lɛ lɛ, ni enáa osusuma muu fɛɛ sɔɔmɔ lɛ he miishɛɛ. (Lala 139:1-4) Beni okɛ ohiɛ fɔ̃ɔ enɔ lɛ, ebaanyɛ ewo bo hewalɛ ni oshiɛmɔ nitsumɔ lɛ amɔ shi ni ewo yibii.—2 Kor. 12:7-10.