Asafo Woloŋ Nikasemɔ Lɛ—Nɔ Hewɔ ni Ehe Hiaa Wɔ
1. Mɛɛ gbɛ nɔ atsɔ aje Asafo Woloŋ Nikasemɔ he gbɛjianɔtoo lɛ shishi?
1 Yɛ afi 1895 lɛ, abale Biblia Kaselɔi, taakɛ atsɛɔ Yehowa Odasefoi yɛ nakai beaŋ lɛ awoloŋ nikasemɔ kui lɛ akɛ Dawn Circles for Bible Study (Biblia Kasemɔ Kui Ashishijee). Woji ni akase yɛ nikasemɔi nɛɛ ashishi ji Millennial Dawn wolokpoi lɛ. Yɛ sɛɛ mli lɛ, abatsɛ nɛkɛ kui nɛɛ akɛ Berean Circles for Bible Study (Beroiabii Akui ni Kaseɔ Biblia Lɛ). (Bɔf. 17:11) Bei pii lɛ kuu fioo ko kpeɔ yɛ aŋkro ko shia yɛ gbɛkɛnaashi be ko ni baahi kɛha amɛ fɛɛ lɛ mli. Nɛkɛ gbɛ nɔ atsɔ aje Asafo Woloŋ Nikasemɔ lɛ shishi.
2. Wɔbaanyɛ wɔye wɔbua ‘kɛwowoo wɔhe hewalɛ’ yɛ woloŋ nikasemɔ lɛ shishi yɛ mɛɛ gbɛ nɔ?
2 Hewalɛwoo kɛ Yelikɛbuamɔ: Akɛni ajeɔ gbɛ ahaa mɛi fioo ko pɛ hiɔ nikasemɔ kui lɛ amli hewɔ lɛ, ehaa mɛi ni baa shishi lɛ náa hegbɛ babaoo ni amɛkɛwieɔ amɛhemɔkɛyeli lɛ he. Nɔ ni jɛɔ mli baa ji akɛ ‘amɛwowooɔ amɛhe hewalɛ, mɔ fɛɛ mɔ kɛtsɔ mɔ kroko lɛ hemɔkɛyeli nɔ.’—Rom. 1:12.
3, 4. Woloŋ nikasemɔ lɛ yeɔ ebuaa wɔ ni wɔtsu wɔsɔɔmɔ nitsumɔ lɛ kɛgbe naa yɛ mɛɛ gbɛ nɔ?
3 Ní wɔɔkwɛ gbɛ ni woloŋ nikasemɔ nɔkwɛlɔ lɛ tsɔɔ nɔ etsɔɔ nii lɛ baanyɛ aye abua wɔ koni ‘wɔja anɔkwale wiemɔ lɛ mli pɛpɛɛpɛ.’ (2 Tim. 2:15) Kadimɔ gbɛ ni etsɔɔ nɔ emaa Ŋmalɛ ni nikasemɔ ni asusuɔ he lɛ damɔ nɔ lɛ nɔ mi ehaa lɛ. Kɛ wolo ni akaseɔ lɛ baaŋmɛ efeemɔ gbɛ lɛ, ebaanyɛ ni yɛ nikasemɔ lɛ naagbee lɛ, ekɛ Biblia lɛ pɛ atsu nii ni ekɛtĩ saji otii ni yɔɔ mli lɛ amli. Nɔkwɛmɔnɔ kpakpa ni efeɔ lɛ baanyɛ aye abua wɔ ni wɔnitsɔɔmɔ yɛ Kristofoi asɔɔmɔ nitsumɔ lɛ mli aya hiɛ.—1 Kor. 11:1.
4 Kɛfata daa otsi nikasemɔ lɛ nɔkwɛmɔ he lɛ, woloŋ nikasemɔ nɔkwɛlɔ lɛ nyiɛɔ hiɛ yɛ sanekpakpa jajemɔ nitsumɔ lɛ mli. Ekɛ sɔɔmɔ nitsumɔ nɔkwɛlɔ lɛ feɔ ekome kɛtoɔ gbɛjianɔ ni sa kɛha shiɛmɔyaa. Ebɔɔ mɔdɛŋ ni eye ebua mɛi fɛɛ ni yɔɔ ekuu lɛ mli lɛ koni amɛtsu Kristofoi agbɛnaa nii ni kã amɛnɔ akɛ amɛshiɛ sanekpakpa lɛ ni amɛfee kaselɔi lɛ ahe nii.—Mat. 28:19, 20; 1 Kor. 9:16.
5. Mɛɛ yelikɛbuamɔ yɔɔ ní aŋkroaŋkroi anine baanyɛ ashɛ nɔ kɛtsɔ woloŋ nikasemɔ lɛ nɔ?
5 Woloŋ nikasemɔ nɔkwɛlɔ lɛ yɛ aŋkroaŋkroi fɛɛ ni yɔɔ ekuu lɛ mli lɛ amumɔŋ hilɛ-kɛhamɔ he miishɛɛ. Ejieɔ miishɛɛ nɛɛ kpo yɛ asafoŋ kpeei ashishi kɛ yɛ be mli ni ekɛ mɛi krokomɛi tsuɔ nii yɛ shiɛmɔ nitsumɔ lɛ mli. Ekɛ be ni ekɛ yasaraa nyɛmimɛi yɛ amɛshiai amli lɛ hu tsuɔ nii ni ekɛwoɔ amɛ hewalɛ yɛ mumɔŋ. Esa akɛ wɔteŋ mɔ fɛɛ mɔ aná he miishɛɛ akɛ eeebɛŋkɛ woloŋ nikasemɔ nɔkwɛlɔ lɛ kɛha mumɔŋ yelikɛbuamɔ kɛ́ ehe miihia.—Yes. 32:1, 2.
6. (a) Kui bibii amli ni wɔnyɛmimɛi ni yɔɔ shikpɔji komɛi anɔ lɛ kpeɔ yɛ lɛ ewo amɛ hewalɛ yɛ mɛɛ gbɛ nɔ? (b) Woloŋ nikasemɔ lɛ he eba sɛɛnamɔ kɛha bo diɛŋtsɛ yɛ mɛɛ gbɛ nɔ?
6 Nyɛwowoa Nyɛhe Hewalɛ: Bei pii lɛ nyɛmimɛi ni yɔɔ shikpɔji ni atsĩ Nyɔŋmɔ webii anitsumɔ naa yɛ jɛmɛ lɛ kpeɔ yɛ kui bibii amli. Nyɛmi nuu ko kaiɔ akɛ: “Eyɛ mli akɛ atsĩ wɔ-Kristofoi anitsumɔ lɛ naa moŋ, shi be fɛɛ be ni aaahi lɛ, wɔfeɔ wɔdaa otsi kpeei lɛ yɛ kui bibii ni mɛi aaashɛ 10 kɛmɔ 15 yɔɔ mli lɛ amli. Wɔnáa mumɔŋ hewalɛwoo kɛjɛɔ kpeei nɛɛ amli kɛtsɔ Biblia lɛ ni wɔkaseɔ kɛ agbɛnɛ wɔhe ni wɔkɛbɔɔ beni akpa nikasemɔ lɛ sɛɛ lɛ nɔ. Wɔsusuɔ niiashikpamɔi ni wɔná lɛ ahe, ni enɛ yeɔ ebuaa wɔ ni wɔyɔseɔ akɛ mple kome too lɛ nɔŋŋ wɔ fɛɛ wɔshiɔ. (1 Pet. 5:9) Eba akɛ wɔ hu wɔɔwowoo wɔhe hewalɛ yɛ nakai gbɛ nɔŋŋ nɔ kɛtsɔ Asafo Woloŋ Nikasemɔ gbɛjianɔtoo lɛ sɛɛ ni wɔɔfi kɛmɔ shi lɛ nɔ.—Efe. 4:16.