Bɔni Obaafee Oná Oshiɛmɔyaa Kuu lɛ He Sɛɛ
1. Mɛɛ nibii komɛi ní kulɛ afeɔ yɛ Asafo Woloŋ Nikasemɔ lɛ shishi abaanyɛ afee yɛ shiɛmɔyaa kui lɛ amli?
1 Ani oshweɔ nibii komɛi ni no mli lɛ afeɔ yɛ Asafo Woloŋ Nikasemɔ lɛ shishi lɛ? No beaŋ lɛ kui lɛ daraaa, ni bɔni afeɔ lɛ lɛ haa mɔ fɛɛ mɔ tsui nyɔɔ emli. Enɛ ha efee mlɛo kɛha wɔ akɛ wɔbaabɔ nanemɛi ni baaye abua wɔ koni wɔhe awa yɛ mumɔŋ. (Abɛi 18:24, Ga Biblia hee) No beaŋ lɛ, asafo woloŋ nikasemɔ nɔkwɛlɔ lɛ náa eleɔ shihilɛ pɔtɛ̃ɛ mli ni wɔyɔɔ, ni enyɛɔ ewoɔ aŋkroaŋkroi fɛɛ ni yɔɔ ekuu lɛ mli lɛ hewalɛ. (Abɛi 27:23; 1 Pet. 5:2, 3) Abaanyɛ aya nɔ afee nibii nɛɛ yɛ shiɛmɔyaa kui lɛ amli.
2. Te wɔbaafee tɛŋŋ wɔha naanyobɔɔ ni mli wa ni tswaa mɔ maa shi yɛ mumɔŋ abakã wɔ kɛ mɛi ni yɔɔ wɔshiɛmɔyaa kuu lɛ mli lɛ ateŋ?
2 Bo Klɛŋklɛŋ Feemɔ: Shiɛmɔyaa kui lɛ adaramɔ tamɔ bɔ ni asafo woloŋ nikasemɔ kui lɛ adaramɔ ji lɛ nɔŋŋ. Kɛ́ wɔkɛ mɛi krokomɛi fee ekome kɛtsu sɔɔmɔ nitsumɔ lɛ, ehaa naanyobɔɔ ni mli wa bakãa wɔ kɛ amɛ teŋ. (Fil. 1:27) Mɛi enyiɛ onyɛ okɛtee shiɛmɔ yɛ oshiɛmɔyaa kuu lɛŋ? Ani obaanyɛ ‘olɛɛ omli’ yɛ enɛ gbɛfaŋ? (2 Kor. 6:13) Kɛfata he lɛ, be kɛ beaŋ lɛ, wɔbaanyɛ wɔfɔ̃ wɔkuu lɛ mli nyo ko nine koni ebafata wɔhe kɛfee wɔgbɛkɛ Weku Jamɔ loo ekɛ wɔ abaye nii. Yɛ asafoi komɛi amli lɛ, shiɛmɔyaa kui toɔ naa amɛfeɔ wielɔi ni jɛɔ asafoi krokomɛi amli amɛbahaa wiemɔ lɛ gbɔ. Kɛ́ eshɛ kuu ko nɔ akɛ eto gbɔ lɛ, kuu lɛ mli bii lɛ kpeɔ kɛhaa niyeli, amɛwowoɔ amɛhe hewalɛ, ni amɛfeɔ nakai kɛ́ wielɔ lɛ baaa niyeli lɛ po.
3. Mɛɛ gbɛjianɔi ato bɔni afee ni akɛsara wɔ koni awo wɔ hewalɛ yɛ wɔshiɛmɔyaa kui lɛ amli?
3 Eyɛ mli akɛ amrɔ nɛɛ asafo lɛ kpeɔ shii enyɔ pɛ yɛ otsi lɛŋ moŋ, shi no etsɔɔɔ akɛ kuu nɔkwɛlɔi lɛ akafɔ shiɛlɔi lɛ saramɔ. Ahole kuu nɔkwɛlɔi yɛ kuu fɛɛ kuu mli koni amɛwo aŋkroaŋkroi ni yɔɔ kuu lɛŋ lɛ hewalɛ, ní amɛtsɔse amɛ kɛha shiɛmɔ nitsumɔ lɛ. Kɛ́ okuu nɔkwɛlɔ lɛ kɛbo etoko gbɛjianɔ kɛha shiɛmɔyaa lɛ, mɛni hewɔ okɛɛɛ lɛ akɛ obaasumɔ ni okɛ lɛ aya shiɛmɔ? Kɛfata he lɛ, daa nyɔɔŋ lɛ, shiɛmɔ nitsumɔ nɔkwɛlɔ lɛ toɔ gbɛjianɔ ni ekɛ shiɛmɔyaa kuu kroko yaa shiɛmɔ yɛ otsi ko naagbee. Yɛ asafoi bibii ni shiɛmɔyaa kui fioo pɛ yɔɔ mli lɛ amli lɛ, shiɛmɔ nitsumɔ nɔkwɛlɔ lɛ toɔ gbɛjianɔ ni esaraa kuu fɛɛ kuu shii enyɔ yɛ afi mli. Ani otoɔ obe he gbɛjianɔ koni oya shiɛmɔ kɛ́ ebasɔmɔ okuu lɛ?
4. (a) Te atoɔ kpeei kɛha shiɛmɔyaa ahe gbɛjianɔ ahaa tɛŋŋ? (b) Mɛni hewɔ esa akɛ oshwe akɛ okɛ oshĩa baaha koni akpe yɛ jɛmɛ kɛya shiɛmɔ?
4 Bei pii lɛ, sɛɛnamɔ babaoo yɛ he akɛ kuu fɛɛ kuu baakpe yɛ ekutsoŋ kɛya shiɛmɔ yɛ otsi lɛ naagbee. Kɛ́ kuu fɛɛ kuu yɛ he ko ni ekpeɔ yɛ kɛha shiɛmɔ, ni akpeɔ aaafee be kometoo lɛ nɔŋŋ mli lɛ, efeɔ mlɛo kɛhaa shiɛlɔi lɛ akɛ amɛya kpee kɛha shiɛmɔ kɛ shikpɔŋkuku lɛ mli hu. Ebaaha kuu nɔkwɛlɔ lɛ anyɛ ato shiɛlɔi lɛ ahe gbɛjianɔ oya koni amɛshi kɛya shikpɔŋkuku lɛŋ ni afiteee be. Agbɛnɛ hu enɛ haa efeɔ mlɛo kɛhaa kuu nɔkwɛlɔ lɛ akɛ eye ebua ekuu lɛ mli bii lɛ jogbaŋŋ. Kɛlɛ, shihilɛi komɛi baanyɛ aba ni baabi ní kui enyɔ loo nɔ ni fa fe nakai akpe yɛ he kome kɛha shiɛmɔyaa. Kɛ́ asafo muu lɛ fɛɛ kpe kɛha shiɛmɔyaa yɛ klɛŋklɛŋ Hɔɔ ni yɔɔ nyɔɔŋ lɛ nɔ, loo beni agbe Buu-Mɔɔ Nikasemɔ lɛ naa lɛ, ehi jogbaŋŋ akɛ abaatara shi yɛ shiɛmɔyaa kui lɛ anaa koni aha kuu nɔkwɛlɔi lɛ be fioo ni amɛkɛto amɛkuu mli bii lɛ ahe gbɛjianɔ dani asɔle kɛmu kpee kɛha shiɛmɔyaa lɛ naa.—Kwɛmɔ akrabatsa ni ji “Ani Obaanyɛ Okɛ Oshĩa Aha?”
5. Eyɛ mli akɛ akpa Asafo Woloŋ Nikasemɔ lɛ feemɔ moŋ, shi mɛɛ hekɛnɔfɔ̃ɔ wɔyɔɔ?
5 Eyɛ mli akɛ akpa Asafo Woloŋ Nikasemɔ lɛ feemɔ moŋ, shi Yehowa kã he ekɛ nibii fɛɛ ni esa akɛ wɔná koni wɔfee esuɔmɔnaa nii lɛ haa wɔ. (Heb. 13:20, 21) Kɛ́ wɔyɛ Yehowa kwɛmɔ shishi lɛ, nɔ ko kwraa ehiaŋ wɔ. (Lala 23:1) Kɛtsɔ wɔshiɛmɔyaa kui lɛ anɔ lɛ, wɔnáa jɔɔmɔi babaoo. Kɛ́ wɔ klɛŋklɛŋ wɔfee nibii ni baaha ‘wɔdũ nii yɛ jɔɔmɔ mli lɛ, jɔɔmɔ mli nɔŋŋ wɔbaakpa yɛ.’—2 Kor. 9:6.
[Akrabatsa yɛ baafa 6]
Ani Obaanyɛ Okɛ Oshĩa Aha?
Asafoi komɛi haa shiɛmɔyaa kui fe ekome kpeɔ kɛhaa shiɛmɔyaa yɛ otsi lɛ naagbee akɛni shĩai ni akpeɔ yɛ lɛ faaa hewɔ. Kpeei kɛha shiɛmɔyaa lɛ fata asafo lɛ gbɛjianɔtoo lɛ he, no hewɔ lɛ eji hegbɛ kpele diɛŋtsɛ akɛ wɔkɛ wɔshĩa baaha koni akpe yɛ jɛmɛ. Bɛ obaanyɛ okɛ oshĩa aha koni akpe yɛ jɛmɛ? Kaasusu akɛ oshĩa lɛ esaaa tsɔ bɔ ni obaanyɛ okɛha. Asafoŋ onukpai lɛ baasusu he ni oshĩa lɛ yɔɔ lɛ he, ni amɛbaakwɛ nibii krokomɛi hu taakɛ no mli lɛ afeɔ kɛ́ aasusu hei kɛha asafo woloŋ nikasemɔ lɛ ahe lɛ. Kɛ́ obaasumɔ ni okɛ oshĩa aha lɛ, ha okuu nɔkwɛlɔ lɛ ale.