Ehe Miihia ni Wɔnanemɛi Anu Sanekpakpa Lɛ
1 Nyɔŋmɔ miisumɔ akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Mɛi ni fata “gbɔmɛi fɛɛ” he lɛ ji wɔnanemɛi fɛɛ. Amɛŋɔɔ ni wɔkɛ sanekpakpa lɛ aaashɛ lɛ biɔ ni wɔfee wɔhe mɛi ni nyɛɔ amɛtsakeɔ amɛhe amɛwoɔ shihilɛi srɔtoi amli yɛ wɔshiɛmɔ wiemɔi lɛ amli, ni wɔsusu nɔ ni mɔ fɛɛ mɔ ni wɔkɛkpeɔ lɛ baaná he miishɛɛ lɛ he. (1 Kor. 9:19-23) Yehowa gbɛjianɔtoo lɛ kɛ dɛŋdadei ni baanyɛ aye abua wɔ koni wɔshɛ “mɛi ni ajie ato naanɔ wala” lɛ atsuii ahe lɛ eha. (Bɔf. 13:48) Nyɛhaa wɔkwɛa bɔ ni wɔɔfee wɔkɛ woji bibii srɔtoi lɛ atsu nii yɛ July kɛ August nyɔji lɛ amli koni wɔkɛ mumɔŋ hiamɔ nii aha wɔnanemɛi lɛ.
2 Woji Bibii ni Akɛbaatsu Nii: Obaana gbɛtsɔɔmɔi ni baanyɛ aye abua bo yɛ be mli ni okɛ woji bibii lɛ eko tsuɔ nii ni okɛ oshiɛmɔ wiemɔ lɛ haa lɛ yɛ nibii ni aŋmala yɛ shishigbɛ lɛ mli. Nɔ ni fata gbɛtsɔɔmɔ fɛɛ gbɛtsɔɔmɔ he ji (1) sanebimɔ ko ni teeɔ sane he susumɔ shi kɛha sanegbaa shishijee, (2) Woji amli he ni abaana wiemɔi kɛha sanegbaa lɛ yɛ, yɛ wolo bibioo lɛ mli lɛ, kɛ (3) Ŋmalɛi ni sa ni abaanyɛ akane beni sanegbaa lɛ yaa nɔ lɛ. Obaanyɛ okɛ bo diɛŋtsɛ owiemɔi afata shiɛmɔ wiemɔ lɛ he yɛ bɔ ni mɔ lɛ baahere nɔ aha lɛ naa. Yɛ woji bibii lɛ babaoo agbɛfaŋ lɛ, atsɛ Wɔ Maŋtsɛyeli Sɔɔmɔ ni je kpo nyɛsɛɛ nɛɛ eko yisɛɛ, he ni obaana shiɛmɔ wiemɔ ni agbala mli jogbaŋŋ kɛha wolo bibioo lɛ yɛ lɛ.
Ani Nyɔŋmɔ Susuɔ Wɔhe Lɛlɛŋ?
Mɛɛ hiɛnɔkamɔ osusuɔ akɛ eyɔɔ kɛha mɛi ni náa nɔ̃ yɛ niseniianiifeemɔ mli lɛ?—Baafai 27-28, kukuji 23-27; Yes. 65:17, 18; km 7/97 bf. 8.
Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?
Mɛni hewɔ etamɔ nɔ ni gbɔmɛi babaoo ni yɔɔ ŋmɛnɛ lɛ amii shɛɛɛ amɛhe yɛ shihilɛ mli ni amɛyɔɔ lɛ?—Baafai 29-30, kukuji 2, 25-26; Lala 145:16; km 7/96 bf. 8.
Na Wala Mli Ŋɔɔmɔ yɛ Shikpɔŋ Nɔ Kɛya Naanɔ!
Ani osusu nɔ ni Yesu Kristo feɔ amrɔ nɛɛ he pɛŋ?—Mfonirii 41-42; Kpoj. 11:15.
Nɔyeli Ni Kɛ Paradeiso Baaba.
Ani obaasumɔ ni ole Maŋtsɛyeli ni Yesu tsɔɔ wɔ ni wɔsɔle yɛ he lɛ he nɔ ko?—Baafa 3; Mat. 6:9, 10.
Beni Mɔ Ko ni Osumɔɔ Lɛ Egbo.
Ani osusu gbɛ nɔ ni oootsɔ oshɛje mɔ ko ni elaaje esuɔlɔ ko yɛ gbele mli lɛ mii he pɛŋ?—Baafa 26, kukuji 2-5; Yoh. 5:28, 29; km 7/97 bf. 8.
Ani Esa akɛ Ohe Triniti lɛ Oye?
Ani shishinumɔ ni wɔnáa kɛhaa bɔ ni anɔkwa Nyɔŋmɔ lɛ yɔɔ lɛ he hiaa kɛha wɔ wɔsɛɛ shihilɛ?—Baafa 3, kukuji 3, 7-8; Yoh. 17:3.
3 Woji Bibii Lɛ Ekomɛi: Aŋmala woji krokomɛi yɛ nɔ ni aŋma ahɔ February 1998 Wɔ Maŋtsɛyeli Sɔɔmɔ lɛ mli lɛ mli, ni nɔ ni fata he ji woji bibii ni aje gbɛ afee koni akɛtsu nii kɛye Afrikabii ablema saji jálɔi, Buddhabii, Hindubii, Yudafoi, kɛ Muslimbii odase. Yɛ shihilɛi ni sa mli lɛ, abaanyɛ akɛ woji bibii nɛɛ aha gbɔmɛi ni wɔkɛ amɛ kpeɔ lɛ. Obaanyɛ otĩ gbɛtsɔɔmɔi ni akɛha yɛ baafai 4-6 ni yɔɔ nɔ ni aŋma ahɔ mli lɛ mli, ni okɛ Bɔ ni Ajeɔ Biblia Mli Sanegbaa Shishi ni Atsaa Nɔ wolo bibioo lɛ baafai 13-16 lɛ afata he, ni owie shiɛmɔ wiemɔ ni baanyɛ atee gbɔmɛi nɛɛ amiishɛɛ shi lɛ he kuku.
4 Áfee wolo bibioo kroko hu koni akɛye kɛbua gbɔmɛi ni ekolɛ amɛle woloŋ jogbaŋŋ shi Biblia lɛ he nɔ ko fioo ko pɛ amɛle lɛ. Afee kɛ yiŋtoo lɛ akɛ, ekanya amɛ ni amɛsumɔ akɛ amɛbaakase Nyɔŋmɔ Wiemɔ lɛ. Nyɛbaanyɛ nyɛhala ni nyɛkɛ nɔ ni nyiɛ sɛɛ lɛ atsu nii yɛ he ni sa:
Wolo Kɛha Gbɔmɛi Fɛɛ.
Ani okpɛlɛɔ nɔ akɛ Biblia lɛ he nilee ko ni aaaná lɛ fata woloŋ nikasemɔ ni aaaná lɛ he?—Baafa 3, kukuji 1-3 kɛ baafa 30, kuku 2; Jaj. 12:9, 10.
5 Wolo Bibioo ni Akɛfeɔ Biblia Mli Nikasemɔ: Esa akɛ daa gbi lɛ oti ni ma wɔhiɛ yɛ sɔɔmɔ nitsumɔ lɛ mli lɛ afee akɛ wɔbaaje Biblia nikasemɔ shishi, kɛji akɛ yɛ wɔklɛŋklɛŋ jɛmɛ yaa aloo yɛ sɛɛsaramɔ ni nyiɛ sɛɛ lɛ mli. Enɛ hewɔ lɛ, wɔyɛ wolo bibioo ni ekɛ nitsumɔ waaa ni nyiɛ sɛɛ nɛɛ ni akɛjeɔ shia Biblia mli nikasemɔi ashishi ni akɛfeɔ hu:
Mɛni Nyɔŋmɔ Taoɔ yɛ Wɔdɛŋ?
Ani ole akɛ yɛ minitii 30 mli aloo nɔ ni shɛɛɛ nakai yɛ otsi fɛɛ otsi mli lɛ obaanyɛ oná shishijee saneshishinumɔ ni yɔɔ Biblia lɛ mli yɛ be kukuoo mli?—Nikasemɔ 2, kuku 6; 2 Tim. 3:16, 17; km 3/97 bf. 4.
6 Yɛ Yesu nɔkwɛmɔnɔ ni ekɛha ni kɔɔ naanyo Samarianyo lɛ he lɛ mli lɛ, etsɔɔ yɛ faŋŋ mli akɛ naanyo kpakpa ji mɔ ko ni jieɔ suɔmɔ kɛ mlihilɛ kpo ni ekɛyeɔ ebuaa mɔ kroko ni yɔɔ jaramɔ mli lɛ. (Luka 10:27-37) Wɔnanemɛi yɛ mumɔŋ jaramɔ mli. Ehe miihia ni amɛnu sanekpakpa lɛ. Nyɛhaa wɔtsuɔ gbɛnaanii ni kã wɔnɔ akɛ wɔɔgba amɛ sane lɛ he nii ni wɔkɛtsɔɔ akɛ wɔji Yesu Kristo kaselɔi lɛɛlɛŋ.—Mat. 24:14; Gal. 5:14.