Nɔ Ni He Hiaa Gbekɛbii Kɛjɛɔ Amɛfɔlɔi Adɛŋ

FƆLƆ fɛɛ fɔlɔ kɛ ehe woɔ nifeemɔ ko ni adesa ko nyɛɛɛ anu shishi jogbaŋŋ lɛ mli. Amɛteŋ mɔ fɛɛ mɔ kɛ egbɔmɔtso lɛ fã ko haa. Yɛ enɛ hewɔ lɛ nɔ ni daa yɛ nyɛ lɛ musuŋ lɛ ji adesa ni enɔ fɛɛ nɔ eshɛ ni yɔɔ wala mli. Belɛ, ebɛ naakpɛɛ mɔ akɛ, kɛ afɔ abifao ko lɛ, mɛi wieɔ nɔ ni etee nɔ lɛ he akɛ “naakpɛɛ nii ni kɔɔ bifɔmɔ he lɛ.”

Shi kɛlɛ, bii afɔmɔ ji fɔlɔi lɛ agbɛnaa nii lɛ shishijee kɛkɛ. Klɛŋklɛŋ lɛ, fufɔbii ni ji adesai ahe nifeemɔi fɛɛ damɔ mɔ ko nɔ, shi yɛ be mli ni amɛdaraa lɛ, nɔ ni fe gbɔmɔtsoŋ kwɛmɔ he bahiaa amɛ. Yelikɛbuamɔ ni amɛkɛaadara yɛ jwɛŋmɔŋ, henumɔŋ, jeŋba mli, kɛ mumɔŋ he hiaa amɛ.

Bɔni afee ni gbekɛbii anine ashɛ dalɛ kpakpa nɔ lɛ, fɔlɔi lɛ asuɔmɔ he hiaa amɛ waa diɛŋtsɛ. Eyɛ mli akɛ wiemɔi ni tsɔɔ suɔmɔ he hiaa moŋ, shi esa akɛ, akɛ nifeemɔi afi wiemɔi lɛ asɛɛ. Hɛɛ, fɔlɔi anɔkwɛmɔnɔ kpakpa he miihia gbekɛbii lɛ. Gbɛtsɔɔmɔ yɛ jeŋba mli, kɛ shishitoo mlai ni amɛbaahi shi yɛ naa lɛ ahe miihia amɛ. Ni enɛɛmɛi ahe hiaa amɛ kɛjɛɔ amɛ gbekɛbiiashi kɛyaa. Saji ni kumɔɔ mɔ tsui baanyɛ aba, ni amɛbaa kɛji akɛ gbekɛbii lɛ anine shɛɛɛ yelikɛbuamɔ nɔ kɛyashi be mli ni eeekpe sɛɛ tsɔ.

Shishitoo mla ni hi fe fɛɛ eko ni aaaná lɛ ji nɔ ni anaa yɛ Biblia lɛ mli lɛ. Tsɔsemɔ ni damɔ Biblia lɛ nɔ lɛ he yɛ sɛɛnamɔ fe fɛɛ eko. Gbekɛbii jeɔ shishi amɛyɔseɔ kɛtsɔɔ tsɔsemɔ ni tamɔ nɛkɛ nɔ akɛ, nɔ ni akɛɔ amɛ lɛ jeee nɔ ni adesa ko kɛkɛ kɛɔ, shi moŋ nɔ ni amɛ-Bɔlɔ lɛ, amɛŋwɛi Tsɛ lɛ kɛɔ. Enɛ haa ŋaawoo lɛ bafeɔ nɔ ni hewalɛ yɔɔ mli ni eko kwraa bɛ ni kɛ lɛ yeɔ egbɔ.

Biblia lɛ woɔ fɔlɔi ahewalɛ koni amɛtsu nii koni amɛtɛo shishitoo mlai kpakpai amɛwo amɛbii ajwɛŋmɔi amli. Shi, yɛ be mli ni gbekɛbii daraa lɛ, bei pii lɛ, ewaa waa kɛhaa fɔlɔi akɛ amɛkɛ amɛ aaawie nibii ni he hiaa titri lɛ ahe. Aŋma nɛkɛ wolo nɛɛ, ni ji, Kasemɔ Nii Kɛjɛ Tsɔɔlɔ Kpele lɛ Ŋɔɔ lɛ koni etsi shihilɛ ni tamɔ nɛkɛ ni aaaba lɛ gbɛ. Ekɛ mumɔŋ saji ni bo kɛ obii baanyɛ akane kutuu baaha nyɛ. Shi, kɛfata he lɛ, esa akɛ ekanya sanegbaa yɛ gbekɛbii kɛ mɛi ni kɛ amɛ kaneɔ nɛkɛ wolo nɛɛ lɛ ateŋ.

Obaana akɛ wolo lɛ kanyaa gbekɛbii lɛ koni amɛha saji ahetoo. Akɛ sanebimɔi babaoo ni sa ni ákala eha. Kɛji akɛ obashɛ enɛɛmɛi anɔ lɛ, obaana ni afo liamɔ nɛɛ (—). Enɛ baakai bo koni omɛ fioo, ni owo gbekɛ lɛ hewalɛ koni etsɔɔ ejwɛŋmɔ. Gbekɛbii sumɔɔ ni amɛkɛ amɛhe awo sanegbaa mli. Kɛji akɛ aŋmɛɛɛ gbekɛ lɛ gbɛ lɛ, etsɛɛɛ ni elaajeɔ miishɛɛ ni eyɔɔ lɛ.

Shi, nɔ ni he hiaa fe fɛɛ lɛ, sanebimɔi nɛɛ baaye abua bo koni ole nɔ ni yɔɔ gbekɛ lɛ jwɛŋmɔ mli. Eji anɔkwale akɛ, ekolɛ gbekɛ lɛ baaha hetoo ko ni ejaaa kwraa. Shi ato saji ni akala ni nyiɛɔ sanebimɔ fɛɛ sanebimɔ sɛɛ lɛ he gbɛjianɔ koni eye ebua gbekɛ lɛ koni eya nɔ ejwɛŋ saji ni ja lɛ ahe.

Nɔ krɛdɛɛ ni sa kadimɔ yɛ wolo lɛ mli ji emli mfonirii ni fa fe 230 ni atɛŋ yɛ mli lɛ. Enɛɛmɛi ateŋ nɔ ni fa hiɛ saneyitsei ni biɔ ni gbekɛ lɛ atsɔɔ nɔ ni esusuɔ, ní damɔ nɔ ni enaa kɛ nɔ ni ekane lɛ nɔ. No hewɔ lɛ, okɛ gbekɛ lɛ apɛi mfonirii lɛ amli. Amɛbaanyɛ amɛfee nii ni yeɔ buaa nitsɔɔmɔ yɛ gbɛ ni hi jogbaŋŋ nɔ, ní baanyɛ ama nii ni atsɔɔ lɛ lɛ anɔ mi.

Kɛji akɛ gbekɛ lɛ kase nikanemɔ lɛ, wo lɛ hewalɛ koni ekane wolo lɛ waa etsɔɔ bo, ni ekane eha lɛ diɛŋtsɛ ehe hu. Babaoo ni ekaneɔ lɛ babaoo hu ni emli ŋaawoo kpakpa lɛ baaka ejwɛŋmɔ kɛ etsui mli ji no. Shi, bɔni afee ni awo hedɔɔ kɛ bulɛ tsakpãa ni kã bo kɛ obi lɛ teŋ lɛ mli hewalɛ lɛ, bɔ fɛɛ bɔ ni eji lɛ, okɛ lɛ fɛɛ akane wolo lɛ kutuu, ni nyɛfea enɛ daa.

Yɛ gbɛ ko nɔ lɛ, nɔ ni gbekɛbii naa ji bɔlɛnamɔ ni mla eŋmɛɛɛ gbɛ, mumɔi atsɛmɔ nifeemɔi, kɛ nifeemɔi krokomɛi ni baa mɔ shi lɛ yɛ gbɛ ni anyɛŋ asusu he kwraa nɔ yɛ afii fioo ni eho lɛ amli. No hewɔ lɛ, hebuu he miihia amɛ, ni wolo nɛɛ miiye kɛmiibua ní ekɛ enɛ aha yɛ gbɛ ni woo yɔɔ mli ni yɔɔ tɛ̃ɛ nɔ. Kɛlɛ, ehe miihia ni akudɔ gbekɛbii lɛ titri kɛya nilee fɛɛ Jɛɛhe, ni ji, wɔŋwɛi Tsɛ lɛ, Yehowa Nyɔŋmɔ ŋɔɔ. Enɛ ji nɔ ni Yesu, Tsɔɔlɔ Kpele lɛ fee be fɛɛ be. Wɔyɛ hiɛnɔkamɔ yɛ anɔkwayeli fɛɛ mli akɛ, wolo nɛɛ baaye abua bo kɛ oweku lɛ koni eha nyɛba nyɛjeŋ yɛ gbɛ ni aaasa Yehowa hiɛ lɛ nɔ, kɛha nyɛnaanɔ jɔɔmɔ.