Wɔyɛ Ekãa Kɛlɛ Wɔsumɔɔ Toiŋjɔlɛ

¹ Eyɛ mli akɛ nibii ni mɛi ni wɔshiɛɔ wɔhaa lɛ ateŋ mɛi babaoo heɔ amɛyeɔ lɛ kɛ Biblia mli anɔkwalei lɛ kpãaa gbee moŋ, shi amɛkɛteee wɔ. No hewɔ lɛ, eyɛ mli akɛ esa akɛ wɔkɛ ekãa ashiɛ moŋ, shi nakai beaŋ nɔŋŋ lɛ esa akɛ ‘wɔkɛ gbɔmɛi fɛɛ ahi shi yɛ toiŋjɔlɛ mli,’ ni wɔkawo mɔ ko mlila bɔ ni esaaa. (Rom. 12:18; Bɔf. 4:29) Mɛɛ gbɛ nɔ wɔɔtsɔ wɔkɛ ekãa ajaje Maŋtsɛyeli shɛɛ sane lɛ yɛ toiŋjɔlɛ mli?

² Taomɔ Saji ni Nyɛbaanyɛ Nyɛkpã Gbee yɛ He: Mɔ ni sumɔɔ toiŋjɔlɛ lɛ kɛ ehe wooo ŋwanejee mli. Kɛ́ shiatsɛ ko kɛɛ wɔ nɔ ko ni eheɔ eyeɔ waa ni wɔkɛma ehiɛ yɛ gbɛ ni esaaa nɔ akɛ nɔ ni eheɔ eyeɔ lɛ ejaaa lɛ, no haŋ ená tsui ni ebo wɔ toi. Kɛ́ ewie nɔ ko ni ejaaa po lɛ, wɔbaanyɛ wɔtsɔ ŋaa gbɛ nɔ wɔwie sane oti ko ni ekɛ wɔ baakpã gbee yɛ he lɛ he. Kɛ́ wɔma nibii ni ekɛ wɔ kpãa gbee yɛ he lɛ anɔ mi lɛ, ekolɛ no baaha ejie jwɛŋmɔ ni ejaaa ni ehiɛ yɛ wɔhe lɛ kɛje eyitsoŋ ni ebo wɔ toi.

³ Kɛ́ shiatsɛ ko wie nɔ ko ni ejaaa ni wɔku wɔhiɛ wɔshwie nɔ lɛ, ani no tsɔɔ akɛ wɔkpɛlɛɔ nɔ ni ekɛɛ lɛ nɔ aloo wɔmiiba anɔkwale lɛ shi? Dabi. Ákɛ Kristofoi lɛ, wɔnitsumɔ ji wɔshiɛ Nyɔŋmɔ Maŋtsɛyeli lɛ he sanekpakpa lɛ wɔtsɔɔ, shi jeee ni wɔkɛ sane fɛɛ sane ni ejaaa ni wɔkɛkpeɔ lɛ aaamamɔ mɛi anaa ni ejɛ lɛ ahiɛ. (Mat. 24:14) Kɛ́ mɔ ko wie nɔ ko ni ejaaa lɛ, yɛ nɔ najiaŋ ni wɔɔfee nii kɛteke nɔ lɛ, wɔbaanyɛ wɔkɛ nakai hegbɛ lɛ atsu nii koni wɔkɛle mɔ lɛ jwɛŋmɔ.—Abɛi 16:23.

⁴ Okɛ Woo Aha Shiatsɛ Lɛ: Bei komɛi lɛ, esa akɛ wɔkɛ shiŋŋfeemɔ kɛ ekãa aha mɛi ale akɛ tsɔɔmɔi ni amɛwieɔ he lɛ ejaaa. Kɛlɛ, ákɛ mɛi ni sumɔɔ toiŋjɔlɛ lɛ, wɔyeee mɛi ahe fɛo ni wɔkɛ heguɔgbee gbɛi tsɛɛɛ mɛi ni heɔ tsɔɔmɔi ni ejaaa amɛyeɔ ní amɛtsɔɔ hu lɛ. Kɛ́ wɔkɛ henɔwomɔ fee wɔnii akɛ wɔle fe amɛ lɛ, no haŋ amɛbɛŋkɛ wɔ, shi kɛ́ wɔkɛ amɛ wie yɛ heshibaa kɛ mlihilɛ mli lɛ, no baaha mɛi ni sumɔɔ anɔkwale lɛ abo wɔ toi. Kɛ́ wɔjie bulɛ kpo wɔtsɔɔ mɛi ni wɔshiɛɔ wɔhaa lɛ, ni wɔwieee nibii ni amɛheɔ amɛyeɔ lɛ ahe efɔŋ lɛ, no tsɔɔ akɛ wɔmiiwo amɛ, ni enɛ haa efeɔ mlɛo kɛhaa amɛ akɛ amɛaabo wɔshɛɛ sane lɛ toi.

⁵ Bɔfo Paulo susu nibii ni mɛi ni eshiɛ etsɔɔ amɛ lɛ heɔ amɛyeɔ lɛ ahe, ni ebɔ mɔdɛŋ akɛ ekɛ sanekpakpa lɛ baaha amɛ yɛ gbɛ ni baaha amɛbo toi lɛ nɔ. (Bɔf. 17:22-31) Ejɛ esuɔmɔ mli etsɔ ‘nɔ fɛɛ nɔ eha mɛi fɛɛ’ koni ‘bɔ fɛɛ bɔ ni aaafee lɛ, ekɛhere mɛi komɛi ayiwala.’ (1 Kor. 9:22) Wɔ hu wɔbaanyɛ wɔfee nakai kɛ́ wɔkɛ ekãa shiɛ sanekpakpa lɛ yɛ toiŋjɔlɛ mli.