Ŋaalee, Kɛlɛ kɛ Shiŋŋfeemɔ

ŊAALEE ji nyɛmɔ ni ayɔɔ ni akɛ mɛi yeɔ ní atɔ̃ɔɔ amɛnɔ bɔ ni esaaa. Nɔ ni fata he ji le ni aaale bɔ ni awieɔ, kɛ be ni esa akɛ awie. Enɛ etsɔɔɔ akɛ wɔbaaŋmɛɛ nɔ ni ja lɛ he kɛsaa, loo wɔbaatsɔmɔ anɔkwalei lɛ. Esaaa akɛ wɔkɛ ŋaalee futuɔ gbɔmɔ gbeyeishemɔ.—Abɛi 29:25.

Mumɔ lɛ yibii lɛ kɛ nɔdaamɔ nɔ kpakpa fe fɛɛ haa kɛha ŋaalee kɛ nitsumɔ. No hewɔ lɛ, mɔ ko ni suɔmɔ kanyaa lɛ lɛ sumɔŋ ni ewo mɛi krokomɛi amlifu; eesumɔ ni eye ebua amɛ. Mɔ ni mli hi ni emli jɔ lɛ toɔ etsui shi yɛ gbɛ ni etsɔɔ nɔ efeɔ nii lɛ mli. Mɔ ni sumɔɔ toiŋjɔlɛ lɛ taoɔ gbɛ̀i ni eeetsɔ nɔ ewo ekɛ mɛi krokomɛi ateŋ wekukpaa kpakpa mli hewalɛ. Kɛ́ gbɔmɛi jie yiwalɛ su kpo po lɛ, mɔ ko ni yɔɔ tsuishitoo lɛ feɔ diŋŋ.—Gal. 5:22, 23.

Shi kɛlɛ, ekɔɔɔ he eko bɔ ni akɛ Biblia mli shɛɛ sane lɛ baaha lɛ fɛɛ sɛɛ lɛ, mɛi komɛi amli baafu yɛ he. Yɛ tsui gbonyo ni klɛŋklɛŋ afii oha lɛ mli Yudafoi babaoo hiɛ lɛ hewɔ lɛ, Yesu Kristo tsɔ “tɛmɔtɛ kɛ nanetɔtɔmɔ tɛsaa” eha amɛ. (1 Pet. 2:7, 8) Yɛ nɔ ni kɔɔ Yesu Maŋtsɛyeli jajemɔ nitsumɔ lɛ he lɛ, ekɛɛ akɛ: “La woo miba yɛ shikpɔŋ lɛ nɔ.” (Luka 12:49) Ni Yehowa Maŋtsɛyeli lɛ he shɛɛ sane lɛ, ní bɔ ni ehe ehia akɛ adesai ayɔse amɛ-Bɔlɔ lɛ nɔyeli lɛ fata he lɛ, kã he eji sane ko ni he hiaa waa ni adesai kɛkpe. Mɛi babaoo amli fuɔ yɛ shɛɛ sane ni akɛhaa akɛ etsɛŋ ni Nyɔŋmɔ Maŋtsɛyeli lɛ baajie nibii agbɛjianɔtoo fɔŋ nɛɛ kɛya lɛ he. Ni kɛlɛ, wɔyaa nɔ wɔshiɛɔ yɛ Nyɔŋmɔ toiboo mli. Shi kɛlɛ, yɛ be mli ni wɔfeɔ enɛ lɛ, belɛ wɔmiiha Biblia mli ŋaawoo nɛɛ miihi wɔjwɛŋmɔ mli, akɛ: “Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”—Rom. 12:18.

Okɛ Ŋaa Atsu Nii Beni Oyeɔ Odase Lɛ. Shihilɛi babaoo yɛ ni wɔkɛgbaa mɛi krokomɛi wɔhemɔkɛyeli lɛ he sane. Eji anɔkwale akɛ wɔfeɔ nakai yɛ shiɛmɔ nitsumɔ lɛ mli, shi wɔtaoɔ hegbɛi ní sa hu beni wɔkɛ wɔwekumɛi, nanemɛi nitsulɔi, kɛ skulbii yɔɔ lɛ. Yɛ shihilɛi nɛɛ fɛɛ mli lɛ, ŋaa he miihia.

Kɛ́ wɔkɛ Maŋtsɛyeli shɛɛ sane lɛ haa yɛ gbɛ ni haa mɛi krokomɛi nuɔ he tamɔ nɔ ni wɔmiikã amɛ lɛ, amɛmli baanyɛ afu. Kɛ́ amɛ biko wɔ yelikɛbuamɔ, ni ekolɛ, amɛnuuu he akɛ ehe miihia amɛ lɛ, no lɛ ekolɛ amɛmli baafu yɛ nɔ fɛɛ nɔ ni baafee tamɔ nɔ ni aaajaje amɛ lɛ he. Te wɔɔfee tɛŋŋ wɔkaha aná jwɛŋmɔ gbonyo yɛ wɔhe hu? Kasemɔ ni wɔɔkase sanegbaa ni naanyobɔɔ su yɔɔ mli he ŋaa lɛ baanyɛ aye abua.

Bɔɔ mɔdɛŋ ni oje sanegbaa lɛ shishi kɛtsɔ sane ko ni mɔ kroko lɛ náa he miishɛɛ ni oootee lɛ shi lɛ nɔ. Kɛ́ mɔ lɛ ji wekunyo, naanyo nitsulɔ, loo skulnyo lɛ, no lɛ ekolɛ ole nɔ ni he miishɛɛ ni enáa momo. Kɛ́ okɛ mɔ lɛ ekpeko dã po lɛ, obaanyɛ owie sane ko ni onu yɛ adafitswaa mli loo okane yɛ adafitswaa wolo ko mli lɛ he. Bei pii lɛ, nakai saji lɛ jieɔ nɔ ni yɔɔ mɛi babaoo ajwɛŋmɔ mli lɛ kpo. Kɛ́ ootsu nii yɛ shia-kɛ-shia lɛ, feemɔ mɔ ni yɔseɔ nii. Nibii ni akɛsaa shia, shwɛmɔ nii ni yɔɔ kpo lɛ nɔ, jamɔ mli nibii, kɛ woji ni akɛkpɛtɛ tsɔne ko he yɛ gbɛ lɛ afã lɛ baanyɛ etsɔɔ nibii ni shiatsɛ lɛ náa he miishɛɛ. Kɛ́ shiatsɛ lɛ badamɔ shinaa lɛ naa lɛ, bo lɛ toi beni ewieɔ lɛ. Nɔ ni ebaakɛɛ lɛ baama bɔ ni omu sane naa yɛ nibii ni esumɔɔ kɛ esusumɔi ahe lɛ nɔ mi loo ebaajaje lɛ, ni ekɛ nɔ kroko hu baaha ni tsɔɔ nɔ ni ehe hiaa ni osusu he ni okɛye odase.

Beni sanegbaa lɛ yaa nɔ lɛ, gbaa lɛ saji otii ni yɔɔ Biblia lɛ kɛ Biblia kasemɔ woji ni wieɔ sane lɛ he lɛ mli. Shi kaahe sanegbaa lɛ fɛɛ. (Jaj. 3:7) Kɛ́ shiatsɛ lɛ miisumɔ ni egba sane lɛ, no lɛ gbalamɔ lɛ owo mli. Ná esusumɔi kɛ ejwɛŋmɔi ahe miishɛɛ. Enɛɛmɛi baanyɛ amɛkɛ nibii ni otaoɔ bɔni afee ni okɛ ŋaa atsu nii lɛ aha.

Dani oookɛɛ nɔ ko lɛ, susumɔ bɔ ni mɔ kroko lɛ baabu lɛ aha lɛ he. Abɛi 12:8 lɛ jieɔ ‘nilee naabu’ yi. Akɛ Hebri wiemɔ ni akɛtsu nii yɛ biɛ lɛ toɔ susumɔi ni ahiɛ tamɔ sɛɛyoomɔ kɛ hiɛshikamɔ he. No hewɔ lɛ, nilee kɔɔ he ni aaakwɛ jogbaŋŋ yɛ wiemɔ mli yɛ saji ni asusu he jogbaŋŋ lɛ hewɔ bɔni afee ni afee nii yɛ nilee mli. Nakai Abɛi awolo lɛ yitso lɛ nɔŋŋ kuku 18 bɔɔ kɔkɔ eshiɔ ‘wiemɔ ni awieɔ bambam, tamɔ adumɔɔ klante.’ Abaanyɛ ahiɛ Biblia mli anɔkwalei lɛ amli ni awooo mɔ ko mlifu.

Sɛɛyoomɔ ni okɛaatsu nii yɛ owiemɔi ahalamɔ mli lɛ baanyɛ aye abua bo koni otsi ohe kɛjɛ gbɛtsii nii ni he ehiaaa ni oootee lɛ shi lɛ he. Kɛ́ wiemɔ “Biblia lɛ” kɛ nitsumɔ teeɔ jwɛŋmɔŋ gbɛtsii nii ashi lɛ, obaanyɛ okɛ wiemɔi tamɔ “ŋmalɛi krɔŋkrɔŋi” lɛ loo “wolo ko ni amrɔ nɛɛ akalaa yɛ wiemɔ ni fa fe 2,000 mli lɛ” atsu nii. Kɛ́ owie Biblia lɛ he lɛ, obaanyɛ oha mɔ lɛ atsɔɔ ejwɛŋmɔ yɛ he, ni no sɛɛ lɛ okɛ ewiemɔi lɛ atsu nii yɛ osanegbaa lɛ mli.

Bei pii lɛ, ŋaalee ni akɛaatsu nii lɛ kɔɔ le ni aaale be ni sa akɛ akɛwie nibii ahe. (Abɛi 25:11) Ekolɛ okɛ nɔ ni mɔ kroko lɛ kɛɔ lɛ fɛɛ kpãaa gbee, shi ehe ehiaaa ni ote shi owo susumɔ fɛɛ susumɔ ni kɛ ŋmalɛi kpãaa gbee ni eeewie he lɛ. Kaabɔ mɔdɛŋ akɛ oookɛɛ shiatsɛ lɛ nɔ fɛɛ nɔ yɛ be kome too lɛ nɔŋŋ mli. Yesu kɛɛ ekaselɔi lɛ akɛ: “Miyɛ nii pii lolo ni makɛɛ nyɛ; shi nyɛnyɛŋ mli nyɛmɔ amrɔ nɛɛ.”—Yoh. 16:12.

Kɛ́ eeehi lɛ, okɛ miishɛɛ ajie mɛi ni okɛgbaa sane lɛ ayi. Kɛ́ shiatsɛ lɛ jeɔ ŋwane po lɛ, obaanyɛ oya nɔ ojie eyi akɛ ehiɛ nakai susumɔ lɛ mli. Bɔfo Paulo fee enɛ beni ewieɔ etsɔɔ jeŋ nilelɔi lɛ yɛ Areopago yɛ Ateene lɛ. Jeŋ nilelɔi lɛ “kɛ lɛ taa naa.” Te eeefee tɛŋŋ ewie ni ewooo mɔ ko mlifu hu? Etsɔ hiɛ ena afɔleshaa latɛi babaoo ni amɛyɔɔ kɛha amɛnyɔŋmɔi lɛ. Yɛ nɔ najiaŋ ni eeebu Ateenebii lɛ fɔ yɛ amɛ wɔŋjamɔ nifeemɔi lɛ ahe lɛ, ekɛ ŋaa jie amɛyi yɛ henumɔ ni mli wa ni amɛyɔɔ kɛha jamɔ lɛ he. Ekɛɛ akɛ: “Miyooɔ yɛ nibii fɛɛ mli akɛ nyɛjáa wɔji pɛpɛɛpɛ.” Gbɛ ni ekɔ nɛɛ gbele gbɛ kɛha lɛ ni ekɛ eshɛɛ sane ni kɔɔ anɔkwa Nyɔŋmɔ lɛ he lɛ ha. Nɔ ni jɛ mli ba ji akɛ, mɛi komɛi batsɔmɔ heyelilɔi.—Bɔf. 17:18, 22, 34.

Kɛ́ ate shi awo bo lɛ, omli akafu. Feemɔ diŋŋ. Buu enɛɛmɛi akɛ hegbɛi ni okɛaale mɔ lɛ susumɔi. Obaanyɛ oda lɛ shi akɛ etsɔɔ esusumɔi. Ni kɛ́ ekɛɛ amrɔ nɔŋŋ akɛ: “Miyɛ mi diɛŋtsɛ mijamɔ lɛ,” no hu? Obaanyɛ obi lɛ yɛ ŋaa gbɛ nɔ akɛ: “Ani oji mɔ ko ni sumɔɔ jamɔ owala be fɛɛ?” Kɛkɛ lɛ, beni eha hetoo sɛɛ lɛ, kɛfata he akɛ: “Ani osusuɔ akɛ be ko baashɛ ní abaafee adesai ekome yɛ jamɔ kome mli?” Enɛ baanyɛ agbele gbɛ kɛha sanegbaa kroko.

Kɛ́ wɔna jwɛŋmɔ kpakpa yɛ wɔhe lɛ, ebaanyɛ eye ebua wɔ koni wɔkɛ ŋaa atsu nii. Wɔyɛ nɔmimaa ni ma shi shiŋŋ yɛ ja ni Yehowa gbɛ̀i lɛ ja, kɛ anɔkwale ni e-Wiemɔ lɛ ji lɛ he. Wɔkɛ nɔmimaa wieɔ nibii nɛɛ ahe. Shi yiŋtoo ko bɛ ni wɔɔdamɔ nɔ wɔbu wɔhe jalɔi. (Jaj. 7:15, 16) Wɔdaa shi akɛ wɔle anɔkwale lɛ ni wɔmiina Yehowa dɛŋ jɔɔmɔi, shi wɔle jogbaŋŋ akɛ enɔkpɛlɛmɔ ni wɔɔna lɛ jɛ emlihilɛ ni esaaa wɔ lɛ kɛ Kristo mli hemɔkɛyeli lɛ hewɔ, shi jeee wɔ diɛŋtsɛ wɔjalɛ nifeemɔ hewɔ. (Efe. 2:8, 9) Wɔle akɛ ehe miihia ni ‘wɔka wɔ diɛŋtsɛ wɔhe wɔkwɛ akɛ wɔyɛ hemɔkɛyeli lɛ mli lo, ní wɔkwɛ wɔ diɛŋtsɛ wɔhe ní ahi.’ (2 Kor. 13:5) No hewɔ lɛ, kɛ́ wɔkɛ mɛi wie bɔ ni ehe ehia ni amɛhi shi yɛ Nyɔŋmɔ taomɔ nii lɛ anaa lɛ he lɛ, wɔ diɛŋtsɛ hu wɔjɛɔ heshibaa mli wɔkɛ Biblia mli ŋaawoo lɛ tsuɔ nii. Jeee wɔgbɛnaa ji wɔkojo wɔnaanyo gbɔmɔ. Yehowa “étu kojomɔ lɛ fɛɛ éwo bi lɛ dɛŋ,” ni no hewɔ lɛ, ekojomɔ sɛi lɛ hiɛ ji he ni wɔbaabu wɔhe akɔntaa wɔha lɛ yɛ.—Yoh. 5:22; 2 Kor. 5:10.

Okɛtsu Nii yɛ Weku lɛ kɛ Nanemɛi Kristofoi Ateŋ. Esaaa ní efeɔ akɛ wɔkɛ ŋaa tsuɔ nii yɛ shiɛmɔ nitsumɔ lɛ mli pɛ. Akɛni ŋaalee ji Nyɔŋmɔ mumɔ lɛ yibii akpojiemɔ hewɔ lɛ, esa akɛ wɔjie ŋaalee kpo yɛ shia beni wɔkɛ weku lɛ mli bii yeɔ lɛ. Suɔmɔ baatsirɛ wɔ koni wɔsusu mɛi krokomɛi ahenumɔ nii ahe. Maŋnyɛ Ester wu lɛ jeee Yehowa jalɔ, shi yoo lɛ jie bulɛ kɛ hiɛshikamɔ kpo etsɔɔ lɛ beni ekɛ saji ni kɔɔ Yehowa tsuji ahe lɛ shwieɔ ehiɛ lɛ. (Ester, yitsei 3-8) Yɛ shihilɛi komɛi amli lɛ, ŋaa ni wɔkɛaatsu nii beni wɔkɛ wekunyo ni jeee Odasefonyo lɛ yeɔ lɛ baabi ni wɔha wɔjeŋba ajie anɔkwale gbɛ lɛ yi atsɔɔ amɛ moŋ fe ni wɔɔgbala wɔhemɔkɛyelii lɛ amli wɔtsɔɔ amɛ.—1 Pet. 3:1, 2.

Nakai nɔŋŋ hu anɔkwale ni eji akɛ wɔle asafo lɛ mli bii jogbaŋŋ lɛ etsɔɔɔ akɛ wɔbaanyɛ wɔkɛ amɛ aye yɛ gbɛ ni mlihilɛ bɛ mli nɔ. Esaaa akɛ wɔsusuɔ akɛ, akɛni amɛdara yɛ mumɔŋ hewɔ lɛ, esa akɛ amɛnu shishi. Ni esaaa akɛ wɔjieɔ wɔnaa ni wɔkɛɔ akɛ: “Ojogbaŋŋ, nakai ji bɔ ni miyɔɔ.” Kɛ́ wɔna akɛ gbɛ ni wɔtsɔɔ nɔ wɔwieɔ lɛ gbaa mɛi krokomɛi anaa lɛ, esa akɛ wɔbɔ mɔdɛŋ ni wɔtsake. Esa akɛ ‘suɔmɔ ní mli wa ni wɔkɛsumɔsumɔɔ wɔhe’ lɛ atsirɛ wɔ ni ‘wɔfee mɛi ni wɔkɛ amɛ hiɛ hemɔkɛyeli kome lɛ ejurɔ.’—1 Pet. 4:8, 15; Gal. 6:10.

Beni Owieɔ Otsɔɔ Toibolɔi. Ehe miihia ni mɛi ni wieɔ kɛjɛɔ wiemɔ kpoku lɛ nɔ lɛ hu kɛ ŋaalee atsu nii. Toibolɔi lɛ feɔ mɛi ni jɛ hei srɔtoi kɛ shihilɛi srɔtoi amli. Amɛshɛ hei srɔtoi yɛ amɛmumɔŋ dalɛ lɛ mli. Ekolɛ, no ji klɛŋklɛŋ kwraa ni mɛi komɛi ba Maŋtsɛyeli Asa lɛ nɔ. Ekolɛ, mɛi krokomɛi hu kɛ nɔnyɛɛ titri ko ni wielɔ lɛ leee lɛ miikpe. Mɛni baanyɛ aye abua wielɔ lɛ koni ekagba etoibolɔi lɛ anaa?

Yɛ bɔfo Paulo ŋaawoo ni ekɛha Tito lɛ kɛ gbeekpãmɔ naa lɛ, ha ni efee oti ni ma ohiɛ akɛ ‘owieŋ mɔ ko he efɔŋ, obaafee kpoo, ni okɛ ohe baatsɔɔ mɔ fɛɛ mɔ akɛ ohe jɔ.’ (Tito 3:2) Tsi ohe kɛjɛ wiemɔi ni gbeɔ gbɔmɛi ni jɛ weku kroko, wiemɔ kuu, loo maŋ kroko mli lɛ ahe guɔ, ní je lɛ kɛtsuɔ nii lɛ kasemɔ he. (Kpoj. 7:9, 10) Okɛ anɔkwayeli agba Yehowa taomɔ nii lɛ ahe sane, ni otsɔɔ nilee ni yɔɔ enɛɛmɛi kɛ nitsumɔ mli; shi tsi ohe kɛjɛ mɛi ni enyiɛɛɛ Yehowa gbɛ lɛ nɔ bianɛ lɛ aheguɔgbee wiemɔ he. Yɛ no najiaŋ lɛ, wo mɛi fɛɛ hewalɛ ni amɛyoo nɔ ni ji Nyɔŋmɔ suɔmɔnaa nii ni amɛfee nɔ ni sa ehiɛ. Okɛ wiemɔ ni hi awo ŋaa ni hedɔɔ kɛ anɔkwa yijiemɔ afata he. Tsɔ gbɛ ni otsɔɔ nɔ owieɔ lɛ kɛ ogbee nɔwomɔ nɔ okɛ nyɛmimɛi ahedɔɔ ni esa akɛ wɔ fɛɛ wɔjie lɛ kpo wɔtsɔɔ wɔhe lɛ atsu nii.—1 Tes. 4:1-12; 1 Pet. 3:8.