Suɔmɔ Ji Nɔ̃ Titri ni Haa Sɔɔmɔ Nitsumɔ lɛ Woɔ Yibii
1 “Nyɛbaa miŋɔɔ, . . . ni maha nyɛ hejɔɔmɔ.” (Mat. 11:28) Wiemɔi ni ŋɔɔ nɛɛ ni Yesu kɛtsu nii lɛ tsɔɔ akɛ eyɛ suɔmɔ kpele kɛha gbɔmɛi. Ákɛ sɔɔlɔi ni ji Kristofoi lɛ, wɔmiisumɔ ni wɔjie suɔmɔ kpo wɔtsɔɔ mɛi ni jeŋ ni suɔmɔ bɛ mli nɛɛ eha amɛhao lɛ, koni wɔkɛ no feemɔ akase Yesu. Mɛɛ gbɛ nɔ wɔɔtsɔ wɔjie suɔmɔ kpo yɛ shiɛmɔ nitsumɔ lɛ mli?
2 Yɛ Wiemɔ Mli: Suɔmɔ ni Yesu yɔɔ kɛha gbɔmɛi lɛ ha ekɛ hegbɛi fɛɛ ni ená lɛ tsu nii kɛjaje sanekpakpa lɛ. (Yoh. 4:7-14) Suɔmɔ haŋ wɔshashao shi akɛ wɔɔye mɛi trukaa odase. Gbekɛyoo ko ni eye afii ekpaa lɛ ye yoo onukpa ko odase ni mɔɔ shi beni amɛmɛɔ koni amɛyana datrɛfonyo ni baakwɛ amɛ lɛ. Mɛni tsirɛ lɛ ni efee nakai? Etsɔɔ mli akɛ, “Yoo lɛ tamɔ mɔ ko ni esa akɛ atsɔɔ lɛ Yehowa he nii.”
3 Wɔbaanyɛ wɔha mɛi ana akɛ wɔsusuɔ amɛhe kɛtsɔ wɔtsuiiaŋ ni wɔɔjɛ wɔfee wɔhiɛ ŋmɔlɔŋmɔlɔ kɛ gbee ni ŋɔɔ ni wɔkɛaawie lɛ nɔ. Kɛ́ wɔbo mɛi lɛ awiemɔi atoi jogbaŋŋ, wɔyɔse amɛnaagbai lɛ, ní wɔjɛ wɔtsuiŋ wɔfo amɛnɔ̃ mli lɛ, no hu tsɔɔ akɛ wɔyɛ suɔmɔ kɛha amɛ. (Abɛi 15:23) Kɛ́ wɔɔkase Yesu lɛ, esa akɛ wɔma Maŋtsɛyeli shɛɛ sane ni woɔ mɔ hewalɛ lɛ kɛ musuŋtsɔlɛ ni Yehowa yɔɔ kɛha gbɔmɛi lɛ nɔ mi.—Mat. 24:14; Luka 4:18.
4 Yɛ Nifeemɔ Mli: Yesu he fee oya ni ekɛ heloonaa nii pɔtɛɛ ni he hiaa mɛi lɛ ye bua amɛ. (Mat. 15:32) Ekolɛ wɔ hu wɔbaaná hegbɛi ni wɔkɛjie mlihilɛ kpo wɔtsɔɔ mɛi yɛ shiɛmɔ nitsumɔ lɛ mli. Nyɛmiyoo ko na akɛ yoo ko ni miibo sane ko ni he hiaa toi yɛ tɛlifoŋ nɔ lɛ nuuu maŋ nɔ wiemɔ ni akɛ lɛ wieɔ lɛ shishi. Wɔnyɛmiyoo lɛ kɛ ehe ha ni etsɔɔ wiemɔi lɛ ashishi eha yoo lɛ. Suɔmɔ kpojiemɔ nɛɛ gbele gbɛ kɛha Ŋmalɛ mli sanegbaa ni enɛ ha yoo lɛ kpɛlɛ Biblia mli nikasemɔ nɔ. Yɛ shihilɛ kroko mli lɛ, nyɛminuu ko tee koni eyafee sɛɛkuu-kɛsaramɔ, shi eyati shiatsɛ lɛ nɔ ni ehao akɛni sɛi agbo ni ekɛmiiya etsu lɛ mli lɛ eka yɛ shinaa lɛ naa lɛ hewɔ. Beni nyɛminuu lɛ ye bua lɛ ni akɛ sɛi lɛ wo tsu lɛ mli sɛɛ lɛ, nuu lɛ hiɛ sɔ enɛ ni eha nyɛminuu lɛ ta sɛi lɛ nɔ ni ekɛ lɛ je Biblia mli nikasemɔ shishi.
5 Wɔjieɔ suɔmɔ ni wɔyɔɔ kɛha Nyɔŋmɔ kɛ wɔnaanyo gbɔmɔ lɛ kpo kɛtsɔ shiɛmɔ nitsumɔ lɛ ni wɔkɛ wɔhe woɔ mli lɛ nɔ. (Mat. 22:36-40) Suɔmɔ ni tamɔ nɛkɛ ni wɔjieɔ lɛ kpo yɛ wɔwiemɔ kɛ wɔnifeemɔ mli lɛ haa mɛi ni hiɛ tsui ni ja lɛ naa akɛ wɔ wɔhiɛ anɔkwale lɛ.