Bɔ ni Akɛ Okpɔlɔ loo Shwiili Tsuɔ Nii Kɛyeɔ Odase

Okpɔlɔ loo shwiili ni akɛtsuɔ nii kɛyeɔ odase lɛ miiwo yibii waa, ni ehã mɛi ni hiɛ tsui kpakpa lɛ miile anɔkwale lɛ. (Yoh. 6:44) No hewɔ lɛ, aawo asafoŋ onukpai hewalɛ ni amɛto maŋ odaseyeli he gbɛjianɔ yɛ hei ni mɛi fɔɔ tsɔmɔ yɛ amɛsafo lɛ shikpɔŋkuku lɛ mli lɛ. Akɛni akɛ okpɔlɔ loo shwiili lɛ emaaa he kome sɔŋŋ hewɔ lɛ, ehe ehiaaa ni abi amralofoi lɛ gbɛ dani akɛyama he ko. Namɛi baanyɛ amɛkɛ amɛhe awo mli? Shiɛlɔi ni kɛ hiɛshikamɔ tsuɔ nii, amɛsaa amɛhe jogbaŋŋ, ni amɛnyɛɔ amɛkɛ mɛi gbaa sane jogbaŋŋ. Ŋaawoi ni nyiɛ sɛɛ nɛɛ ji nibii ni esa akɛ shiɛlɔi afee kɛ nibii ni esaaa akɛ amɛfeɔ.

Nibii ni Esa akɛ Afee:

Jiemɔ naanyobɔɔ su kpo, feemɔ mɔ ni anyɛɔ abɛŋkɛɔ lɛ, ni oye obua mɛi ni tsɔɔ jɛmɛ lɛ. Shiɛlɔi komɛi feɔ amɛhiɛ ŋmɔlɔŋmɔlɔ, ni amɛkɛ miishɛɛ ŋaa mɛi lɛ. Kɛ́ mɔ ko miiho ni eekwɛ woji ni ato lɛ, obaanyɛ okɛɛ lɛ akɛ, “Obaanyɛ okɔ emli nɔ ni osumɔɔ.”
Damɔmɔ he ko ni baahã gbɛ ni sa akã okɛ he ni ato woji lɛ yɛ lɛ teŋ. Yɛ hei komɛi lɛ, kɛ́ shiɛlɔi lɛ damɔ he ko ni kɛ he ni ato woji lɛ yɛ jekɛɛɛ tsɔ lɛ, amɛyeɔ omanye. Mɛi krokomɛi hu ena akɛ, kɛ́ amɛdamɔ woji lɛ ahe lɛ, ewaa kɛhãa mɛi ni hoɔ lɛ akɛ amɛbaaba he, no hewɔ lɛ amɛyaa sɛɛ fioo, ni amɛmɛɔ kɛyashiɔ mɔ ko baa he. Kɛ́ mɔ ko ba he lɛ, bɔɔ mɔdɛŋ ni okɛ lɛ agba sane; obaanyɛ obi lɛ akɛ, “Ani osusu sanebimɔ nɛɛ he pɛŋ?”
Okɛ Biblia lɛ afɔ nitsumɔ.
Gbalamɔ bɔ ni wɔkɛ mɛi kaseɔ Biblia lɛ mli otsɔɔ mɔ fɛɛ mɔ ni baaŋɔ woji ni wɔkɛ mɛi kaseɔ, tamɔ Biblia lɛ Tsɔɔ wolo lɛ eko lɛ. Kɛɛmɔ lɛ akɛ obaasumɔ ni ojie vidio ni yitso ji, Mɛni Hewɔ Esa akɛ Okase Biblia Lɛ? ni yɔɔ ilɛtrɔnik tsɔne ni ohiɛ lɛ nɔ lɛ otsɔɔ lɛ.
Bi mɛi ni yɔɔ wiemɔ lɛ he miishɛɛ lɛ ni amɛkɛ amɛgbɛ́i kɛ adrɛs kɛ tɛlifoŋ nɔmba ahã bo. Kɛ́ mɔ lɛ bɛ nyɛshikpɔŋkuku lɛ mli lɛ, no lɛ ŋmalamɔ Please Follow Up (S-43) wolo lɛ nɔ nii ni okɛhã nyɛwoloŋmalɔ lɛ oya nɔŋŋ.