Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
OCTOBER 5-11
NYƆŊMƆ WIEMƆ LƐ MLI JWETRII | 2 MOSE 31-32
Pɛimɔ Ŋmalɛi Lɛ Amli Jogbaŋŋ
w87 9/1 29
Sanebimɔi Ni Jɛ Kanelɔi Adɛŋ
Kɛ́ Nyɔŋmɔ ná mɔ ko he miishɛɛ ni ekpɛlɛ enɔ (ní tsɔɔ akɛ, eŋma mɔ lɛ gbɛ́i “yɛ wala wolo lɛ mli”) lɛ, no etsɔɔɔ akɛ bɔ fɛɛ bɔ ni fee lɛ mɔ lɛ baaná naanɔ wala, oookɛɛ nɔ ko ni akpɛ mli ato loo anyɛŋ atsake. Mose kpa Yehowa fai ehã Israelbii lɛ akɛ: “Shi agbɛnɛ, kɛ́ oosumɔ lɛ, okɛ amɛhe esha lɛ ake amɛ; kɛjeee nakai lɛ, ofainɛ, gbee mi moŋ migbɛ́i kɛje owolo ni oŋma lɛ mli.” Nyɔŋmɔ hã lɛ hetoo akɛ: “Mɔ fɛɛ mɔ ni efee esha eshi mi lɛ, lɛ egbɛ́i magbe yɛ miwolo lɛ mli.” (2 Mose 32:32, 33) Hɛɛ, kɛ́ Nyɔŋmɔ ná mɔ ko he miishɛɛ ni eŋma egbɛ́i yɛ ‘ewolo’ lɛ mli po lɛ, sɛɛ mli lɛ, mɔ lɛ baanyɛ egbo Nyɔŋmɔ nɔ toi loo ekwa ehemɔkɛyeli lɛ. Kɛ́ eba lɛ nakai lɛ, Nyɔŋmɔ baagbe “egbɛ́i yɛ wala wolo lɛ mli.”—Kpojiemɔ 3:5.
OCTOBER 12-18
NYƆŊMƆ WIEMƆ LƐ MLI JWETRII | 2 MOSE 33-34
“Yehowa Sui Ni Yɔɔ Fɛo Lɛ”
it-2 466-467
Gbɛ́i
Adebɔɔ nibii hãa wɔnaa akɛ Nyɔŋmɔ yɛ, shi amɛtsɔɔɔ wɔ egbɛ́i. (La 19:1; Ro 1:20) Kɛ́ akɛɛ mɔ ko le Nyɔŋmɔ gbɛ́i lɛ, etsɔɔ babaoo fe le ni mɔ lɛ le bɔ ni atsɛɔ gbɛ́i lɛ ahãa lɛ kɛkɛ. (2Kr 6:33) Etsɔɔ akɛ mɔ lɛ le Nyɔŋmɔ jogbaŋŋ—ele eyiŋtoi, enifeemɔi, kɛ esui ni awie he yɛ e-Wiemɔ lɛ mli lɛ. (Okɛto 1Ma 8:41-43; 9:3, 7; Ne 9:10 lɛ he.) Nakai eji yɛ Mose gbɛfaŋ. Biblia lɛ kɛɛ Yehowa ‘le lɛ kɛ egbɛ́i,’ ni tsɔɔ akɛ, ele lɛ jogbaŋŋ. (2Mo 33:12) Mose na Yehowa anunyam lɛ, ni ‘enu ni Yehowa miijaje egbɛ́i eetsɔɔ,’ ni enɛ ji hegbɛ kpele. (2Mo 34:5) Be ni Yehowa jaje egbɛ́i lɛ etsɔɔ lɛ, etĩii egbɛ́i lɛ mli kɛkɛ, moŋ lɛ, ewie nɔ ko ni kɔɔ esui kɛ enifeemɔi ahe. Ewie akɛ: “Yehowa, Yehowa, Nyɔŋmɔ mɔbɔnalɔ kɛ musuŋtsɔlɔ, ní mli fuuu mra ni esuɔmɔ ni tsakeee kɛ enɔkwale fa babaoo, ejieɔ suɔmɔ ni tsakeee kpo etsɔɔ mɛi akpei abɔ, ekɛ tɔmɔ kɛ toigbele kɛ esha keɔ, shi egbalaa mɛi ni yeɔ fɔ lɛ atoi, ekɛ tsɛmɛi atɔmɔi lɛ ahe toigbalamɔ baa bii kɛ nabii anɔ, kɛ yinɔ ni ji etɛ kɛ yinɔ ni ji ejwɛ lɛ nɔ.” (2Mo 34:6, 7) Wiemɔi ni ji, “ejaakɛ majaje Yehowa gbɛ́i lɛ matsɔɔ” lɛ, yɛ lala ko ni Mose fo lɛ mli, ni nakai lala lɛ hu wie bɔ ni Nyɔŋmɔ kɛ Israelbii lɛ ye hã kɛ Nyɔŋmɔ sui lɛ ahe.—5Mo 32:3-44.
w09 5/1 18 kk. 3-5
Yehowa Diɛŋtsɛ Wie Esui Lɛ Ahe
Nɔ klɛŋklɛŋ ni Yehowa diɛŋtsɛ wie yɛ ehe ji akɛ, eji “Nyɔŋmɔ mɔbɔnalɔ kɛ musuŋtsɔlɔ.” (Kuku 6) Biblia he nilelɔ ko wie akɛ, Hebri wiemɔ ni atsɔɔ shishi akɛ “mɔbɔnalɔ” lɛ tsɔɔ akɛ, Nyɔŋmɔ “musuŋ tsɔɔ lɛ ni ejieɔ suɔmɔ kpo tamɔ tsɛmɛi feɔ amɛhãa amɛbii lɛ.” Wiemɔ ni atsɔɔ shishi akɛ “musuŋtsɔlɔ” lɛ kɛ Hebri feemɔwiemɔ ko yɛ tsakpaa, ni nakai wiemɔ lɛ kɔɔ “bɔ ni kɛ́ mɔ ko na mɔ ko ni nɔ ko he ehia lɛ lɛ, ejɛɔ etsuiŋ efeɔ he nɔ ko” lɛ he. Ekã shi faŋŋ akɛ, Yehowa miisumɔ ni wɔle akɛ, bɔ ni fɔlɔi sumɔɔ amɛbii waa ni amɛsumɔɔ waa akɛ amɛhã amɛbii lɛ nibii ni he hiaa amɛ lɛ, nakai nɔŋŋ lɛ hu efeɔ ehãa ejálɔi.—Lala 103:8, 13.
No sɛɛ lɛ, Yehowa wie akɛ, ‘emli fuuu mra.’ (Kuku 6) Ejeee mɔ ko ni be fɛɛ be nɛɛ, emli efu etsuji ni yɔɔ shikpɔŋ lɛ nɔ lɛ. Moŋ lɛ, etoɔ etsui shi ehãa amɛ, hewɔ lɛ kɛ́ amɛtɔ̃ lɛ, enáa tsui ehãa amɛ ni ehãa amɛ be ni amɛkɛtsake gbɛ gbonyo ni amɛkɔ lɛ.—2 Petro 3:9.
Nyɔŋmɔ wie kɛfata he akɛ, ‘esuɔmɔ ni tsakeee lɛ fa babaoo.’ (Kuku 6) Yehowa suɔmɔ ni tsakeee lɛ hewɔ lɛ, wekukpaa ni mli wa waa ni tsakeee bakãa lɛ kɛ ewebii lɛ ateŋ. (5 Mose 7:9) Agbɛnɛ hu, Yehowa wieɔ anɔkwale be fɛɛ be. Enyɛŋ elaka mɔ, asaŋ anyɛŋ lɛ alaka. Akɛni eji “anɔkwale Nyɔŋmɔ” hewɔ lɛ, wɔbaanyɛ wɔhe nɔ fɛɛ nɔ ni ekɛɔ wɔ lɛ—ni nibii ni ewo shi akɛ ebaafee wɔsɛɛ lɛ fata he lɛ—wɔye kwraa.—Lala 31:5.
w09 5/1 18 kk. 6
Yehowa Diɛŋtsɛ Wie Esui Lɛ Ahe
Yehowa he anɔkwale kroko ni he hiaa waa ni eesumɔ ni wɔle ji akɛ, “ekɛ tɔmɔ kɛ toigbele kɛ esha” keɔ. (Kuku 7) Eesumɔ waa ni ekɛ eshafeelɔi ni tsakeɔ amɛtsui lɛ ahe ake amɛ. (Lala 86:5) Shi yɛ nakai beiaŋ nɔŋŋ lɛ, Yehowa nyaaa efɔŋfeemɔ he. Etsɔɔ mli akɛ, “egbalaa mɛi ni yeɔ fɔ lɛ atoi.” (Kuku 7) Nyɔŋmɔ yɛ krɔŋkrɔŋ ni eja, no hewɔ lɛ, ehãŋ mɛi ni jeɔ gbɛ amɛfeɔ efɔŋ lɛ aye amɛhe. Bɔ fɛɛ bɔ ni fee lɛ, amɛbaakpa efɔŋ ni amɛfeɔ lɛ mli yibii.
OCTOBER 19-25
NYƆŊMƆ WIEMƆ LƐ MLI JWETRII | 2 MOSE 35-36
“Asaa Amɛ Kɛhã Yehowa Nitsumɔ Lɛ”
w14 12/15 4 kk. 4
Yehowa Jɔɔ Mɛi Ni Jɛɔ Amɛtsuiŋ Amɛfiɔ Anɔkwa Jamɔ Sɛɛ Lɛ Waa
Heloonaa nibii ni mɛi kɛshã afɔle kɛfi jamɔ krɔŋŋ sɛɛ lɛ hã Yehowa ná miishɛɛ, shi nɔ ni hã ená miishɛɛ fe fɛɛ ji amɛtsuiŋ ni amɛjɛ amɛfee nakai lɛ. Amɛtsui tsirɛ amɛ ni amɛkɛ amɛbe kɛ hewalɛ hu shã afɔle. Abɔ amaniɛ akɛ, “yei fɛɛ ni le ŋaa nitsumɔ jogbaŋŋ lɛ kɛ amɛniji tsɛ̃ kpãa.” Anɔkwa, “yei fɛɛ ni le ŋaa nitsumɔ jogbaŋŋ, ní tsui tsirɛ amɛ lɛ kɛ abotia hetsɔi lɛ tsɛ̃ kpãa.” Kɛfata he lɛ, Yehowa hã Bezalel “hiɛshikamɔ kɛ niiashishinumɔ kɛ nilee kɛhã ŋaa nitsumɔi srɔtoi fɛɛ.” Yɛ anɔkwale mli lɛ, Nyɔŋmɔ kɛ nitsumɔi fɛɛ ni efã ni atsu lɛ he ŋaalee wo Bezalel kɛ Oholiab mli.—2 Mo. 35:25, 26, 30-35.
OCTOBER 26–NOVEMBER 1
NYƆŊMƆ WIEMƆ LƐ MLI JWETRII | 2 MOSE 37-38
“Bɔ Ni Akɛ Sɔlemɔ Buu Lɛ Mli Afɔleshaa Latɛi Lɛ Tsu Nii Ahã Yɛ Anɔkwa Jamɔ Mli”
it-1 82 kk. 3
Afɔleshaa Latɛ
Tsofa-kɛ-ŋma afɔleshaa latɛ. Tsofa-kɛ-ŋma afɔleshaa latɛ lɛ (ní atsɛɔ lɛ hu akɛ “shika tsuru tsofa-kɛ-ŋma afɔleshaa latɛ lɛ” [2Mo 39:38]) hu lɛ, akɛ akasia tso ni fee, ni akɛ shika tsuru ha enɔ kɛ ehe fɛɛ kɛkpe. Akɛ shika tsuru ye sãma kɛbã naa kɛkpe. Ekoji ejwɛ lɛ fɛɛ yeɔ egbɔ, ni eko fɛɛ eko kɛlɛ ji sɛntimitai 44.5 (iŋtsii 17.5), ni ekwɔlɛ ji sɛntimitai 89 (nanetalɔi 2.9), ni eyɛ ‘akolontoi’ hu yɛ ekoji ejwɛ lɛ eko fɛɛ eko nɔ. Akɛ shika tsuru fee gai enyɔ awo he yɛ shika tsuru ni akɛye samã kɛbã naa lɛ shishigbɛ, yɛ ekoŋ biɛ kɛ biɛ, koni akɛ akasia tsei ni agbɔ ni akɛ shika tsuru eha he ni akɛbaawó lɛ ahɔlɔ mli. (2Mo 30:1-5; 37:25-28) Ashã tsofa-kɛ-ŋma krɛdɛɛ ko yɛ latɛ nɛɛ nɔ shii enyɔ daa gbi, leebi kɛ hulushinyɔɔ mli. (2Mo 30:7-9, 34-38) Atsĩ tã yɛ he kroko yɛ Ŋmalɛ lɛ mli akɛ, akɛ lajeenii shã tsofa-kɛ-ŋma, ni ekã shi faŋŋ akɛ, akɛtsu nii yɛ tsofa-kɛ-ŋma afɔleshaa latɛ lɛ hu nɔ. (3Mo 16:12, 13; Heb 9:4; Kpo 8:5; okɛto 2Kr 26:16, 19 lɛ he.) Akɛ tsofa-kɛ-ŋma afɔleshaa latɛ lɛ ma sɔlemɔ buu lɛ mli He Krɔŋkrɔŋ Fe Fɛɛ lɛ pateeshɛŋ lɛ hiɛ, hewɔ lɛ akɛɔ akɛ, ema “Odaseyeli adeka lɛ hiɛ.”—2Mo 30:1, 6; 40:5, 26, 27.
it-1 1195
Tsofa-kɛ-ŋma
Nibii ni jara wa ni Israelbii lɛ kɛhã ji nɔ ni akɛfee tsofa-kɛ-ŋma krɔŋkrɔŋ ni akɛtsu nii yɛ sɔlemɔ buu ni afee yɛ ŋa lɛ nɔ lɛ mli lɛ. (2Mo 25:1, 2, 6; 35:4, 5, 8, 27-29) Be ni Yehowa tsɔɔ Mose bɔ ni esa akɛ afutu tsofa-kɛ-ŋma ni akɛ nibii ejwɛ fee lɛ ahã lɛ, ekɛɛ lɛ akɛ: “Ŋɔɔ tsofai ni jeɔ ŋma nɛɛ eko: stakte kɛ onika kɛ galbano ni jeɔ ŋma kɛ frankinsɛnsi krɔŋŋ, ni eko fɛɛ eko falɛ afee pɛpɛɛpɛ. Okɛfee tsofa-kɛ-ŋma; afutu tsofai nɛɛ jogbaŋŋ, awo mli ŋoo, emli atse, ní efee krɔŋkrɔŋ. Shimɔmɔ eko ni ebo munyɔmunyɔ ni okɛ eko ama Odaseyelinɔ ni yɔɔ kpee buu lɛ mli lɛ hiɛ, he ni majie mihe kpo matsɔɔ bo yɛ lɛ. Etsɔ nɔ krɔŋkrɔŋ fe fɛɛ ehã nyɛ.” Bɔ ni afee ni Yehowa ahã Israelbii lɛ ana akɛ esaaa akɛ akɛ tsofa-kɛ-ŋma lɛ tsuɔ nɔ kroko fe nɔ ni efã akɛ akɛfee lɛ, ni akɛ, tsofa-kɛ-ŋma lɛ ji nɔ ko krɔŋkrɔŋ lɛ, ewie kɛfata he akɛ: “Mɔ fɛɛ mɔ ni baafee eko ni tamɔ no koni enu eŋma lɛ he lɛ, afo lɛ ashɛ afɔ̃ kɛje emaŋbii lɛ ateŋ.”—2Mo 30:34-38; 37:29.
it-1 82 kk. 1
Afɔleshaa Latɛ
Sɔlemɔ Buu Lɛ Mli Afɔleshaa Latɛi Lɛ. Be ni afeɔ sɔlemɔ buu lɛ, Nyɔŋmɔ hã afee afɔleshaa latɛi enyɔ hu, ni etsɔɔ bɔ ni afee amɛ ahã. Akɛ akasia tso fee shãa afɔle afɔleshaa latɛ lɛ (ní atsɛɔ lɛ hu akɛ “akɔɔble afɔleshaa latɛ lɛ” [2Mo 39:39]) tamɔ adeka ni gbɛ kã mli, ni eeenyɛ efee akɛ, akɛ nɔ ko ehaaa nɔ, ni akɛ nɔ ko wooo eshishi hu. Eyɛ koji ejwɛ ni yeɔ egbɔ, ni eko fɛɛ eko kɛlɛ ji mitai 2.2 (nanetalɔi 7.3) ni ekwɔlɛ ji mitai 1.3 (nanetalɔi 4.4) ni “akolontoi” mamɔ ekoji ejwɛ lɛ eko fɛɛ eko nɔ. Akɛ akɔɔble ha emli kɛ ehe fɛɛ kɛkpe. Akɛ looshãa dade ni akɛ akɔɔble fee wo nɔ ni akɛbã latɛ lɛ naa lɛ “shishigbɛ,” kɛmiiya latɛ lɛ “teŋgbɛ.” Afee gai ejwɛ awo ekoji ejwɛ lɛ, yɛ looshãa dade lɛ masɛi, ni etamɔ nɔ ni gai nɛɛ nɔŋŋ ni akɛ tsei enyɔ ni akɛ akɔɔble eha he lɛ hɔlɔɔ mli koni akɛwó latɛ lɛ. Enɛ baanyɛ atsɔɔ akɛ, afee gbɛi enyɔ yɛ latɛ lɛ biɛ kɛ biɛ bɔ ni looshãa dade tɛtrɛɛ baanyɛ ahɔ mli, ni gai lɛ yɛ gbɛi nɛɛ anaa. Biblia he nilelɔi hiɛ susumɔi srɔtoi yɛ sane nɛɛ he, ni amɛteŋ mɛi pii susuɔ akɛ gai kui enyɔ afee lɛ, ni kuu ni ji enyɔ lɛ yɛ latɛ lɛ he, ni no akɛ tsei ni akɛwóɔ latɛ lɛ hɔlɔɔ mli lɛ. Akɛ akɔɔble fee latɛ lɛ he nibii krokomɛi, ni nomɛi ji: gogai kɛ sofii ni akɛbaaloo lamulu, tsɛnsii ni akɛbaasɔɔ kooloi alá, fakai ni akɛbaajie loi, kɛ lajeenii.—2Mo 27:1-8; 38:1-7, 30; 4Mo 4:14.
Pɛimɔ Ŋmalɛi Lɛ Amli Jogbaŋŋ
it-1 36
Akasia
Ŋmei yɛ akasia tso lɛ niji ni kɛlɛ waa lɛ ahe. Akasia tsei lɛ niji lɛ lalaa akasia tsei ni bɛŋkɛ amɛ lɛ aniji ni amɛfeɔ koo hayii; ekã shi faŋŋ akɛ, enɛ hewɔ ni bei pii kɛ́ atsĩ akasia tso lɛ tã yɛ Biblia lɛ mli lɛ, akɛ epiifeemɔ wiemɔ ni ji, shit·timʹ lɛ tsuɔ nii lɛ. Akasia tso lɛ kwɔlɛ nyɛɔ eshɛɔ mitai 6 kɛmiimɔ 8 (nanetalɔi 20 kɛmiimɔ 26), shi kɛ́ okwɛ tso lɛ, etamɔ jwɛi. Ebai lɛ yɛ bɔdɔbɔdɔ tamɔ tsɛrɛ, efɔfɔi kɔla tamɔ wuɔfɔ, ni eyibii lɛ yɛ kakadaŋŋ. Ehe toto lɛ diɔ, ni ehe yɛ kpɔbiikpɔbii, shi kɛ́ ajie he lɛ anaa tso ni wa waa, ni yɛ fɛo, ni tsii hu, ni kooloi bibii tamɔ fɔte nyɛɛɛ aye. Esui nɛɛ kɛ kwɛ̃ ni ekwɛ̃ɔ yɛ shia ŋa nɔ lɛ hewɔ efee tso ni sa jogbaŋŋ kɛhã sɔlemɔ buu lɛ kɛ ehe nibii lɛ feemɔ lɛ. No akɛfee kpaŋmɔ adeka lɛ (2Mo 25:10; 37:1), okpɔlɔ ni akɛ hiɛmaa blodo lɛ ma nɔ lɛ (2Mo 25:23; 37:10), afɔleshaa latɛi lɛ (2Mo 27:1; 37:25; 38:1), tsei ni akɛwóɔ nibii nɛɛ (2Mo 25:13, 28; 27:6; 30:5; 37:4, 15, 28; 38:6), pateeshɛŋ srɔtoi lɛ akulashiŋi lɛ (2Mo 26:32, 37; 36:36), kɛ mplaŋi ni damɔ shi jaŋŋ lɛ (2Mo 26:15; 36:20) kɛ amɛmlibelemɔnii lɛ (2Mo 26:26; 36:31).