KƐ́ OYAAJE SANEGBAA SHISHI
NIKASEMƆ 2
Hã Sanegbaa Lɛ Aya Nɔ
Shishitoo mla: “Wiemɔ ni awieɔ yɛ be ni sa mli lɛ—ehi waa diɛŋtsɛ!”—Abɛi 15:23.
Nɔ Ni Filipo Fee
1. Kwɛmɔ VIDIO lɛ, loo kanemɔ Bɔfoi 8:30, 31. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
Mɛni Filipo wie kɛje sanegbaa lɛ shishi?
Mɛni hewɔ ehi akɛ ewie enɛ kɛje sanegbaa lɛ shishi dani etsɔɔ lɛ nɔ ko hee kɛjɛ Ŋmalɛ lɛ mli?
Mɛni Wɔkaseɔ Yɛ Nɔ Ni Filipo Fee Lɛ Mli?
2. Bei pii lɛ, kɛ́ wɔwie nibii ni baatsɛ sanegbaa lɛ, no baanyɛ ahã mɔ lɛ kɛ ehe awo sanegbaa lɛ mli. Kɛkɛ lɛ, sɛɛ mli kɛ́ wɔmiiwie sane ni wɔhiɛ lɛ he lɛ, ewaaa akɛ ebaabo wɔ toi.
Kasemɔ Filipo
3. Okɛ ohiɛ afɔ̃ shi. Bɔ ni mɔ ko feɔ enii ehãa kɛ bɔ ni efee ehiɛ ehã lɛ baanyɛ atsɔɔ bo nibii babaoo yɛ ehe. Kɛ́ okwɛ lɛ, ani eenya sane ni okɛ lɛ gbaa lɛ he? Kɛ́ ona akɛ eenya he lɛ, ekolɛ obaanyɛ obi lɛ kɛkɛ akɛ, “Ani ole akɛ . . . ?” ni okɛgbala ejwɛŋmɔ kɛya Biblia mli sane ko nɔ. Shi kɛ́ ona akɛ mɔ lɛ sumɔɔɔ ni ekɛ bo gbaa sane lɛ, shi lɛ.
4. Kaaye ohe oyai. Kaanu he akɛ, kɛ́ okɛ lɛ je sanegbaa lɛ shishi nɔŋŋ lɛ, esa akɛ okɛ lɛ awie Biblia mli sane ko he. Nyɛgbaa sane lɛ aahu kɛyashi obaana akɛ hegbɛ ko eba ni obaanyɛ okɛ Biblia mli sane ko awo mli. Bei komɛi lɛ, klɛŋklɛŋ be ni okɛ mɔ lɛ baagba sane lɛ, hegbɛ lɛ baŋ ni okɛ lɛ agba Biblia mli sane, shi ekolɛ hegbɛ lɛ moŋ baaba be kroko ni okɛ lɛ baagba sane.
5. Nyiɛmɔ sanegbaa lɛ sɛɛ. Kɛ́ sanegbaa lɛ tsake kɛtee sane ko ni osusuko he kwraa nɔ lɛ, okɛ mɔ lɛ awie Biblia mli sane ko ni kɔɔ sane ni ewó nɔ lɛ he lɛ he, kɛjeee no oto oyiŋ akɛ okɛ lɛ baagba be ni nyɛje sanegbaa lɛ shishi po.