Hiɛnɔkamɔ Ni Ma Shi Shiŋŋ Kɛhã Gbohii Lɛ

OBLAYOO ko ni eye afii 25 ŋma akɛ: “Kansa gbe yoo ni ŋɔ mi efee ebi lɛ yɛ afi 1981 mli. Egbele lɛ bafee nɔ ko ni mi kɛ minyɛmi nuu ni eŋɔ lɛ hu efee ebi lɛ nyɛɛɛ wɔdamɔ naa kwraa. No mli lɛ miye afii 17, ni minyɛmi nuu lɛ eye afii 11. Mihiɛ tseɔ lɛ waa fe nine. Shi, akɛni atsɔɔ mi akɛ etee ŋwɛi hewɔ lɛ, mibasumɔ akɛ magbe mihe koni maya eŋɔɔ. Eji minaanyo ni misumɔɔ lɛ fe fɛɛ.”

Etamɔ nɔ ni esaaa kwraa akɛ gbele aaaná hewalɛ ni eŋɔ mɔ ko ni osumɔɔ lɛ lɛ kɛya. Ni kɛ eba lɛ nakai lɛ, jwɛŋmɔ ni onáa ni tsɔɔ akɛ onyɛŋ okɛ suɔlɔ lɛ awie dɔŋŋ, onyɛŋ okɛ lɛ aŋmɔ dɔŋŋ, loo onyɛŋ omɔ emli dɔŋŋ gbi ko gbi ko lɛ hesusumɔ bafeɔ nɔ ni wa waa ni onyɛɛɛ naa odamɔ. Ní aaakɛɛ bo akɛ osuɔlɔ lɛ etee ŋwɛi lɛ ejieee nakai awerɛho lɛ kɛyaaa diɛŋtsɛ.

Shi kɛlɛ, Biblia lɛ kɛ hiɛnɔkamɔ ni yɔɔ srɔto kwraa haa. Taakɛ wɔkadi kɛtsɔ hiɛ lɛ, Ŋmalɛi lɛ tsɔɔ akɛ obaanyɛ okɛ osuɔlɔ ni egbo lɛ akpe ekoŋŋ yɛ wɔsɛɛ be ni ebɛŋkɛ lɛ mli, jeee yɛ ŋwɛi ko ni aleee jɛmɛ shi moŋ yɛ biɛ yɛ shikpɔŋ nɛɛ nɔ yɛ toiŋjɔlɛ shihilɛi ni ja shishi. Ni yɛ nakai beaŋ lɛ, adesai baakpa gbɛ akɛ amɛbaaná gbɔmɔtsoŋ hewalɛ ni yeɔ emuu mli ŋɔɔmɔ, ni amɛgboiŋ dɔŋŋ gbi ko gbi ko. Ekolɛ mɛi komɛi aaakɛɛ akɛ, ‘Shi ekã shi faŋŋ akɛ enɛ jeee nɔ ko ni baaba mli anɔkwale!’

Mɛni he hiaa dani anyɛ atsɔ oyiŋ akɛ eji hiɛnɔkamɔ ko ni ma shi shiŋŋ? Kɛ obaahe shiwoo ko oye lɛ, no lɛ ehe baahia ni ona nɔmimaa akɛ mɔ ni woɔ bo shi lɛ miisumɔ ni eye eshiwoo lɛ nɔ, ni ebaanyɛ eye nɔ hu. Belɛ, namɔ woɔ shi akɛ gbohii baaba wala mli ekoŋŋ lɛ mɔ?

Yɛ afi 31 Ŋ.B. agbiɛnaa be mli lɛ, Yesu Kristo kɛ ekãa wo shi akɛ: “Bɔ ni tsɛ lɛ téeɔ gbohii ashi ni ehaa amɛ wala lɛ, nakai nɔŋŋ bi lɛ hu haa mɛi ni esumɔɔ lɛ wala. Enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli lɛ aaanu [Yesu] egbee, ni amɛaaje kpo.” (Yohane 5:21, 28, 29) Hɛɛ, Yesu Kristo wo shi akɛ mɛi akpekpei abɔ ni egboi amrɔ nɛɛ baahi wala mli ekoŋŋ yɛ shikpɔŋ nɛɛ nɔ ni amɛná gbɛkpamɔ akɛ amɛaahi shi kɛya naanɔ yɛ toiŋjɔlɛ paradeiso shihilɛi amli. (Luka 23:43; Yohane 3:16; 17:3; okɛto Lala 37:29 kɛ Mateo 5:5 he.) Akɛni Yesu wo shi lɛ hewɔ lɛ, eyɛ shweshweeshwe akɛ aaasusu he akɛ eesumɔ ni eye shiwoo lɛ nɔ. Shi ani ebaanyɛ eha eba mli?

Beni Yesu wo shi lɛ sɛɛ nɔ ni shɛɛɛ afii enyɔ lɛ, etsɔɔ yɛ gbɛ ni mɔɔ shi nɔ akɛ eesumɔ ni etée gbohii ashi, ni ebaanyɛ etée amɛ shi hu.

“Lazaro ee, Jee Kpo!”

No mli lɛ, eji awerɛho shihilɛ ko. Lazaro he miiye waa diɛŋtsɛ. Enyɛmimɛi yei enyɔ, Maria kɛ Marta, tsu ni akɛ shɛɛ ayaha Yesu, yɛ Yordan Faa lɛ sɛɛ, akɛ: “Nuŋtsɔ, naa, mɔ ni osumɔɔ lɛ he miiye.” (Yohane 11:3) Amɛle akɛ Yesu sumɔɔ Lazaro sane. Ani Yesu sumɔŋ ni ena enaanyo ni he yeɔ lɛ? Naakpɛɛ nɔ ko ji akɛ, ni Yesu aaaya Betania amrɔ nɔŋŋ lɛ, ehi shi yɛ he ni eyɔɔ lɛ gbii enyɔ ni nyiɛ sɛɛ lɛ.​—Yohane 11:5, 6.

Lazaro gbo beni akɛ ehela lɛ he shɛɛ etee lɛ sɛɛ. Yesu le be mli ni Lazaro gbo, ni eto eyiŋ akɛ ebaafee he nɔ ko. Yɛ naagbee beni Yesu yashɛ Betania lɛ, no mli lɛ enaanyo ni esumɔɔ lɛ lɛ egbo gbii ejwɛ. (Yohane 11:17, 39) Ani Yesu baanyɛ ekɛ mɔ ko ni egbo etsɛ lɛ aba wala mli ekoŋŋ?

Beni Marta ni ji yoo ni feɔ ekãa lɛ nu akɛ Yesu miiba lɛ, ejo foi etee koni ekɛ lɛ ayakpe. (Okɛto Luka 10:38-42 he.) Beni awerɛho ni eyeɔ lɛ fee Yesu mɔbɔ lɛ, ewo lɛ shi akɛ: “Onyɛmi nuu lɛ baate shi.” Beni etsɔɔ hemɔkɛyeli ni eyɔɔ yɛ gbohiiashitee ni baaba wɔsɛɛ be mli lɛ he lɛ, Yesu kɛɛ lɛ yɛ faŋŋ mli akɛ: “Mi lɛ miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaakã.”​—Yohane 11:20-25.

Beni Yesu shɛ gbonyobu lɛ naa lɛ, efã akɛ ajie tɛ ni akɛtsĩ naa lɛ. Agbɛnɛ, beni esɔle waa sɛɛ lɛ, efã akɛ: “Lazaro ee, jee kpo!”​—Yohane 11:38-43.

Mɛi fɛɛ ni yɔɔ jɛmɛ lɛ miikwɛ gbonyobu lɛ gãa. No sɛɛ lɛ, nɔ ko fa kpo yɛ duŋ lɛ mli kɛba. Fũu-mamai fimɔ enaji kɛ eniji fɛɛ, ni duku ha ehiɛ. Yesu fã akɛ: “Nyɛfɛnea lɛ, ni nyɛhaa eyaa.” Naagbee fũu-mamai ni afɛneɔ lɛ shwie shikpɔŋ. Hɛɛ, Lazaro ni, nuu ni egbo gbii ejwɛ sɔŋŋ lɛ!​—Yohane 11:44.

Ani Eba Mli Lɛɛlɛŋ?

Akɛ sane ni kɔɔ Lazaro shitee lɛ he lɛ eha yɛ Yohane Sanekpakpa lɛ mli akɛ yinɔsane mli anɔkwa sane. Saji ni akɛtsɔɔ mli fitsofitso lɛ yɛ faŋŋ tsɔ fe bɔ ni eeefee adesã ko kɛkɛ. Kɛ abi sane yɛ bɔ ni eji anɔkwale ha yɛ yinɔsane mli lɛ he lɛ, belɛ akɛ no miitsɔɔ akɛ aabi Biblia mli naakpɛɛ nii fɛɛ, ni Yesu Kristo diɛŋtsɛ shitee lɛ he sane fata he lɛ he sane. Ni Yesu shitee lɛ he ŋwane ni aaaje lɛ tsɔɔ Kristofoi ahemɔkɛyeli muu lɛ fɛɛ kwamɔ.​—1 Korintobii 15:13-15.

Yɛ anɔkwale mli lɛ, kɛ oheɔ oyeɔ akɛ Nyɔŋmɔ yɛ lɛ, no lɛ esaaa ni ewaa kɛhaa bo kwraa akɛ ooohe gbohiiashitee lɛ oye. Kɛ aaatsɔɔ mli lɛ: Mɔ ko baanyɛ emɔmɔ eshamansheo he gbɛjianɔtoo he saji ewo vidio-kpãa nɔ, ni beni egbo sɛɛ lɛ, ewekumɛi kɛ enanemɛi baanyɛ ana lɛ ni amɛnu ewiemɔ, yɛ nakai beaŋ nɔŋŋ, be mli ni etsɔɔ bɔ ni esa akɛ atsu etsu kɛ nibii ni eyɔɔ lɛ ahe nii aha lɛ. Afii 100 ni eho nɛ lɛ, no mli lɛ asusuuu nɔ ko ni tamɔ nɛkɛ feemɔ he. Ni yɛ mɛi komɛi ni yɔɔ je lɛŋ hei srɔtoi shɔŋŋ lɛ agbɛfaŋ lɛ, vidio ni amɔmɔɔ saji awoɔ ekpãai anɔ lɛ ji sane ko ni wa kɛha amɛ akɛ amɛaanu shishi, ni efeɔ tamɔ naakpɛɛ nɔ ko kɛhaa amɛ. Kɛ adesai baanyɛ amɛkɛ jeŋ nilee mli shishitoo mlai ni Bɔlɔ lɛ fee lɛ asaa afee shihilɛ mli mfoniri ni anaa ni anuɔ emli gbeei hu tamɔ nɛkɛ lɛ, ani esaaa akɛ Bɔlɔ lɛ nyɛɔ efeɔ nɔ ni yɔɔ naakpɛɛ kwraa fe enɛ? Belɛ, ani jwɛŋmɔ bɛ mli akɛ, Mɔ ni bɔ wala lɛ baanyɛ abɔ ehee?

Lazaro ni akɛ lɛ ba wala mli ekoŋŋ lɛ he naakpɛɛ sane lɛ ha hemɔkɛyeli ni ayɔɔ yɛ Yesu kɛ gbohiiashitee lɛ mli lɛ fa babaoo. (Yohane 11:41, 42; 12:9-11, 17-19) Ejieɔ bɔ ni Yehowa kɛ e-Bi lɛ sumɔɔ waa diɛŋtsɛ akɛ amɛaatee gbohii ashi yɛ gbɛ ni yɔɔ naakpɛɛ nɔ lɛ kpo, ni enáa mɔ nɔ hewalɛ waa hu.

‘Nyɔŋmɔ Baasumɔ’

Bɔ ni Yesu fee enii yɛ Lazaro gbele lɛ he lɛ jieɔ mɔbɔnalɛ ni Nyɔŋmɔ Bi lɛ yɔɔ lɛ kpo etsɔɔ. Bɔ ni enu nii ahe waa eha yɛ be ni tamɔ nɛkɛ mli lɛ tsɔɔ bɔ ni esumɔɔ waa akɛ etée gbohii ashi lɛ mli faŋŋ. Wɔkaneɔ akɛ: “Beni Maria ba he ni Yesu yɔɔ lɛ ni ena lɛ lɛ, eho egbee enaji anaa, ni ekɛɛ lɛ akɛ: Nuŋtsɔ, eji oyɛ biɛ kulɛ, minyɛmi lɛ naaa agbo. Agbɛnɛ, beni Yesu na lɛ akɛ eefo, kɛ Yudafoi lɛ hu ni kɛ lɛ ba lɛ, akɛ amɛ hu amɛmiifo lɛ, ehũŋ yɛ emumɔ mli ni ekpokpo; ni ekɛɛ: Nɛgbɛ nyɛto lɛ yɛ? Amɛkɛɛ lɛ akɛ: Nuŋtsɔ, ba ni obakwɛ. Ni Yesu fó. Kɛkɛ lɛ Yudafoi lɛ kɛɛ: Kwɛ, bɔ ni edɔɔ ehe!”​—Yohane 11:32-36.

Atsɔɔ Yesu musuŋtsɔlɛ ni jɛ etsuiŋ lɛ mli yɛ biɛ yɛ wiemɔi srɔtoi etɛ mli akɛ: “ehũŋ,” “ekpokpo,” kɛ “[e]fó.” Shishijee wiemɔi ni akɛtsu nii yɛ sane ni ba ni woɔ mɔ awerɛho ni aŋma afɔ shi nɛɛ mli lɛ tsɔɔ akɛ Yesu naanyo Lazaro ni esumɔɔ lɛ lɛ gbele kɛ bɔ ni ena ni Lazaro nyɛmi yoo lɛ foɔ lɛ ha E-hiŋmɛii amli yimɔ obɔ kɛ yaafonui.a

Nɔ ni sa kadimɔ waa ji akɛ Yesu etsɔ hiɛ ekɛ mɛi krokomɛi enyɔ eba wala mli ekoŋŋ momo. Ni eto eyiŋ kwraa kɛmɔ shi akɛ ebaafee nakai nɔŋŋ eha Lazaro. (Yohane 11:11, 23, 25) Kɛlɛ, “[e]fó.” No hewɔ lɛ, adesai ni akɛ amɛ baa wala mli ekoŋŋ lɛ jeee nifeemɔ folo ko kɛkɛ kɛha Yesu. Emɔbɔnalɛ kɛ henumɔ ni mli wa ni ejie lɛ kpo yɛ nɛkɛ be nɛɛ mli lɛ tsɔɔ bɔ ni esumɔɔ waa akɛ ejie awuiyeli ni gbele kɛbaa lɛ kɛya yɛ faŋŋ mli.

Akɛni Yesu ji ‘Yehowa Nyɔŋmɔ su lɛ henɔ’ hewɔ lɛ, yɛ gbɛ ni ja nɔ lɛ wɔkpaaa nɔ ko ni shɛɛɛ enɛ gbɛ yɛ wɔŋwɛi Tsɛ lɛ he. (Hebribii 1:3) Anɔkwafo Hiob wie yɛ bɔ ni Yehowa diɛŋtsɛ sumɔɔ akɛ etée gbohii ashi lɛ he akɛ: “Kɛji gbɔmɔ gbo lɛ, ani ehiɛ aaakã ekoŋŋ? . . . Kulɛ oootsɛ, ni mahereo nɔ; ni [ooosumɔ] oootao onine naa nitsumɔ lɛ sɛɛ gbɛ.” (Hiob 14:14, 15) Shishijee wiemɔ ni atsɔɔ shishi yɛ biɛ akɛ “ooosumɔ” lɛ tsɔɔ bɔ ni Nyɔŋmɔ kɛ miishɛɛ sumɔɔ ni eeshwe ni efee nɔ ko. (1 Mose 31:30; Lala 84:3) Ekã shi faŋŋ akɛ, Yehowa kɛ miishɛɛ miikpa gbɛ akɛ eeetée gbohii ashi.

Ani wɔbaanyɛ wɔhe gbohiiashitee he shiwoo lɛ nɔ wɔye lɛɛlɛŋ? Hɛɛ, ŋwanejee ko kwraa bɛ he akɛ Yehowa kɛ e-Bi lɛ fɛɛ miisumɔ ni amɛha eba mli, ni amɛbaanyɛ amɛtsu he nii hu. Mɛni enɛ tsɔɔ kɛhaa bo? Gbɛkpamɔ yɛ kɛha bo akɛ okɛ osuɔlɔi ni egboi lɛ baakpe ekoŋŋ yɛ biɛ yɛ shikpɔŋ nɛɛ nɔ, shi yɛ shihilɛi ni esoro no kwraa yɛ nɔ ni yɔɔ amrɔ nɛɛ lɛ he!

Yehowa Nyɔŋmɔ, mɔ ni ha adesai bɔi shihilɛ yɛ abɔɔ fɛfɛo ko mli lɛ ewo shi akɛ ekɛ Paradeiso baaba shikpɔŋ nɛɛ nɔ ekoŋŋ yɛ E-ŋwɛi Maŋtsɛyeli nɔyeli ni yɔɔ Yesu Kristo ni awo ehiɛ nyam bianɛ lɛ dɛŋ lɛ nɔyeli lɛ shishi. (1 Mose 2:7-9; Mateo 6:10; Luka 23:42, 43) Yɛ nakai Paradeiso ni akɛbaaba ekoŋŋ lɛ mli lɛ, adesai aweku lɛ baaná gbɛkpamɔ akɛ amɛaaná wala ni baŋ naagbee, ní helai srɔtoi fɛɛ kɛ tsɛŋemɔ helai hu bɛ mli lɛ mli ŋɔɔmɔ. (Kpojiemɔ 21:1-4; okɛto Hiob 33:25; Yesaia 35:5-7 he.) Nɔ ni baaho aya hu ji hetsɛ̃, hewolonɔ su mlijiemɔ, maŋ ta, kɛ shika helɛtemɔ mli naagbai fɛɛ. Shikpɔŋ ni tamɔ nɛkɛ ni atsuu nɔ ji nɔ ni Yehowa Nyɔŋmɔ baatsɔ Yesu Kristo nɔ atée gbohii ashi kɛba nɔ.

Nakai ji Kristofonyo yoo ni atsĩ etã kɛjɛ fã nɛɛ shishijee mli lɛ hiɛnɔkamɔ bianɛ. Yɛ enyɛ gbele sɛɛ afii babaoo lɛ, Yehowa Odasefoi ye amɛbua lɛ ni ekase Biblia lɛ jogbaŋŋ. Ekaiɔ akɛ: “Beni mikase gbohiiashitee hiɛnɔkamɔ lɛ he nii migbe naa lɛ, mifo. Eŋɔɔ minaa waa akɛ male akɛ mana minyɛ ekoŋŋ.”

Kɛ otsui miishwe nakai nɔŋŋ akɛ ooona osuɔlɔ ko ekoŋŋ lɛ, no lɛ Yehowa Odasefoi kɛ miishɛɛ baaye abua bo koni okase bɔ ni ooofee ni oha hiɛnɔkamɔ ni ma shi shiŋŋ nɛɛ afee bo diɛŋtsɛ onɔ.