NIKASEMƆ 48
Halamɔ Onanemɛi Yɛ Hiɛshikamɔ Mli
Nanemɛi kpakpai kɛ wɔ fɛɛ náa miishɛɛ yɛ bei ni hi amli, ni amɛwoɔ wɔ hewalɛ yɛ bei ni ehiii amli. Shi Biblia lɛ bɔɔ wɔ kɔkɔ akɛ, jeee mɔ fɛɛ mɔ baafee naanyo kpakpa. Hewɔ lɛ, mɛni baawa bo ni ohala nanemɛi kpakpai? Sanebimɔi ni nyiɛ sɛɛ nɛɛ ahetoi lɛ baawa bo.
1. Mɛɛ gbɛ nɔ mɛi ni ohalaa akɛ onanemɛi lɛ baanyɛ atsake bo?
Kɛ́ okɛ mɔ ko bɔ aahu lɛ, ofeɔ onii tamɔ lɛ. Ni enɛ baanyɛ afee sane kpakpa loo sane fɔŋ—kɛji wɔkɛ mɔ lɛ bɔɔ hiɛ kɛ hiɛ jio, wɔkɛ lɛ bɔɔ yɛ Intanɛt lɛ nɔ jio. Biblia lɛ kɛɔ akɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai [loo mɛi ni sumɔɔɔ Yehowa] bɔɔ lɛ, egbeŋ naa ekpakpa.” (Abɛi 13:20) Kɛ́ onanemɛi lɛ sumɔɔ Yehowa ni amɛjáa lɛ lɛ, amɛbaanyɛ amɛwa bo ni ohi emasɛi ni okpɛ yiŋ kpakpai hu. Shi kɛ́ wɔkɛ mɛi ni sumɔɔɔ Yehowa bɔɔ naanyo lɛ, amɛbaanyɛ amɛhã wɔshi lɛ. Enɛ hewɔ Biblia lɛ woɔ wɔ hewalɛ ni wɔhala wɔnanemɛi yɛ hiɛshikamɔ mli lɛ! Kɛ́ wɔkɛ mɛi ni sumɔɔ Nyɔŋmɔ bɔ naanyo lɛ amɛbaaná wɔnɔ hewalɛ kpakpa, ni wɔ hu wɔbaaná amɛnɔ hewalɛ kpakpa. No baahã wɔnyɛ ‘wɔwowoo wɔhe hewalɛ, ni wɔtswatswaa wɔhe wɔma shi.’—1 Tesalonikabii 5:11.
2. Te Yehowa nuɔ he ehãa tɛŋŋ yɛ mɛi ni wɔkɛbɔɔ naanyo lɛ hewɔ?
Jeee mɔ fɛɛ mɔ kɛkɛ Yehowa kɛbɔɔ naanyo. “Mɔ ni ja lɛ, lɛ ekɛbɔɔ naanyo.” (Abɛi 3:32) Kɛ́ wɔkɛ mɛi ni sumɔɔɔ Yehowa bɔ naanyo lɛ, te ebaanu he ehã tɛŋŋ? Ewerɛ baaho ehe waa! (Kanemɔ Yakobo 4:4.) Shi kɛ́ wɔtsi wɔhe kɛje nanemɛi fɔji ahe, ni wɔtsi wɔbɛŋkɛ Yehowa kɛ mɛi ni sumɔɔ lɛ lɛ, ebaaná miishɛɛ ni ekɛ wɔ baafee enanemɛi.—Lala 15:1-4.
KASEMƆ PII OFATA HE
Obaana nɔ hewɔ ni ehe hiaa waa ni ohala nanemɛi ni sa, kɛ nɔ ni baawa bo ni oná nanemɛi kpakpai.
3. Okɛ mɔ fɛɛ mɔ kɛkɛ akabɔ naanyo
Kɛ́ mɔ ko sumɔɔɔ Nyɔŋmɔ kɛ emlai lɛ, belɛ ejeee naanyo kpakpa. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Mɛni baanyɛ ahã mɔ ko kɛ ehe awo naanyobɔɔ gbonyo mli ni eyɔseee?
Nyɛkanea 1 Korintobii 15:33 lɛ, ni nyɛsusua sanebimɔi nɛɛ ahe:
Namɔ obaanyɛ otsɛ lɛ akɛ naanyo gbonyo? Mɛni hewɔ okɛɔ nakai?
Nyɛkanea Lala 119:63 lɛ, ni nyɛsusua sanebimɔ nɛɛ he:
Mɛni baawa bo ni ona kɛji mɔ ko baafee naanyo kpakpa?
Apol kome ni ekpɔtɔ baanyɛ afite ekrokomɛi lɛ. Kɛ́ onanemɛi lɛ ateŋ mɔ kome pɛ po ji naanyo gbonyo lɛ, mɛɛ gbɛ nɔ ebaanyɛ ená onɔ hewalɛ?
4. Mɛi ni esoro amɛ yɛ wɔhe lɛ baanyɛ abatsɔmɔ wɔnanemɛi kpakpai
Hii enyɔ komɛi ni hi blema Israel ni atsɛɔ amɛ David kɛ Yonatan lɛ ahe sane yɛ Biblia lɛ mli. Yonatan ye David onukpa kwraa, ni maŋtsɛ bi hu ji lɛ; kɛ̃lɛ, amɛbatsɔmɔ nanemɛi ni sumɔɔ amɛhe waa. Nyɛkanea 1 Samuel 18:1 lɛ, ni nyɛsusua sanebimɔ nɛɛ he:
Mɛni hewɔ jeee wɔtipɛŋfoi loo mɛi ni shihilɛ tamɔ wɔnɔ lɛ pɛ esa akɛ wɔkɛbɔ naanyo lɛ?
Nyɛkanea Romabii 1:11, 12 lɛ, ni nyɛsusua sanebimɔ nɛɛ he:
Mɛɛ gbɛ nɔ nanemɛi ni sumɔɔ Yehowa lɛ baanyɛ awowoo amɛhe hewalɛ?
Yɛ vidio nɛɛ mli lɛ, obaana bɔ ni fee ni oblanyo ko ná naanyo yɛ he ni ekpaaa gbɛ. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
Mɛni hewɔ naanyo ni Akil bɔɔ yɛ skul lɛ gba efɔlɔi anaa lɛ?
Shishijee lɛ, mɛni kɛ mɛni hã ekɛ mɛi ni yɔɔ skul lɛ bɔ lɛ?
Te efee tɛŋŋ eye shoofeemɔ ni enuɔ he lɛ nɔ?
5. Bɔ ni ooofee oná nanemɛi kpakpai
Obaana nɔ ni baawa bo ni oná nanemɛi kpakpai—kɛ nɔ ni baawa bo ni otsɔ mɔ ni abaanyɛ akɛ lɛ abɔ naanyo. Jiemɔ VIDIO lɛ.
Nyɛkanea Abɛi 18:24 kɛ 27:17 lɛ, ni nyɛsusua sanebimɔi nɛɛ ahe:
Mɛɛ gbɛi anɔ nanemɛi kpakpai yeɔ amɛbuaa amɛhe?
Ani oyɛ nanemɛi ni tamɔ nakai? Kɛ́ obɛ eko lɛ, mɛni obaanyɛ ofee koni oná eko?
Nyɛkanea Filipibii 2:4 lɛ, ni nyɛsusua sanebimɔ nɛɛ he:
Kɛ́ oosumɔ ni oná nanemɛi kpakpai lɛ, belɛ esa akɛ bo hu ofee ohe naanyo kpakpa. Te ooofee tɛŋŋ ofee nakai?
Kɛ́ oosumɔ ni oná nanemɛi kpakpai lɛ, belɛ esa akɛ bo hu ofee ohe naanyo kpakpa
MƐI KOMƐI KƐƆ AKƐ: “Obaanyɛ okɛ mɔ fɛɛ mɔ kɛkɛ abɔ naanyo.”
Kɛ́ mɔ ko kɛɛ nakai lɛ, mɛni obaakɛɛ?
EMLI OTI
Kɛ́ wɔhala wɔnanemɛi yɛ hiɛshikamɔ mli lɛ, Yehowa baaná miishɛɛ ni wɔ hu wɔbaaná he sɛɛ.
Mɛni Okase?
Ani mɛi ni wɔhalaa akɛ wɔnanemɛi lɛ jeee Yehowa he sane ko? Mɛni hewɔ okɛɔ nakai?
Namɛi esaaa akɛ wɔkɛbɔɔ naanyo?
Te ooofee tɛŋŋ oná nanemɛi kpakpai, ni ohã okɛ amɛ teŋ naanyobɔɔ lɛ mli awa hu?
EHE SAJI KROKOMƐI
Obaana bɔ ni nanemɛi kpakpai baanyɛ awa wɔ be ni wɔkɛ shihilɛi ni mli wawai miikpe.
“Hã Naanyobɔɔ Ni Yɔɔ Okɛ Onyɛmimɛi Lɛ Ateŋ Lɛ Mli Awa Dani Naagbee Lɛ Aba” (Buu-Mɔɔ, November 2019)
Obaana nibii ni obaanyɛ ofee koni oná nanemɛi kpakpai.
Mɛni esa akɛ ole yɛ naanyo ni akɛ mɛi bɔɔ yɛ Intanɛt lɛ nɔ lɛ he?
Kɛ́ okane sane ni ji, “Mishwe Akɛ Maná Tsɛ” lɛ, obaana nɔ ni hã nuu ko tsake mɛi ni ekɛbɔɔ naanyo lɛ.