Ani Mɔ Ko Yɛ ni Boɔ Sɔlemɔi Atoi?

“Tsutsu ko lɛ, miyiŋ etɛ̃ɛɛ mi akɛ Nyɔŋmɔ yɛ. Kɛlɛ, bei komɛi lɛ misɔleɔ. No mli lɛ, mibɛ nɔmimaa akɛ mɔ ko boɔ toi, shi yɛ anɔkwale mli lɛ mile akɛ mɔ ko miibo toi. Mináaa miishɛɛ, ni mibɛ yiŋtoo ko hu yɛ shihilɛ mli. Mishe gbeyei akɛ mahe Nyɔŋmɔ nɔ maye, ejaakɛ misusu akɛ mɛi ni hiɛ waaa pɛ heɔ Nyɔŋmɔ nɔ amɛyeɔ.”—PATRICIA,a IRELAND.

ANI onu he taakɛ Patricia nu he lɛ pɛŋ? Ani osɔleɔ kɛ́ oyiŋ etɛ̃ɛɛ bo po akɛ Nyɔŋmɔ yɛ? Kɛ́ nakai ni lɛ, jeee okome pɛ onuɔ he nakai. Susumɔ nɔ ni nyiɛ sɛɛ nɛɛ he okwɛ.

◼ Beni abibii Britaniabii 2,200 saji lɛ, ebafee faŋŋ akɛ, amɛteŋ oha mlijaa 22 pɛ heɔ yeɔ akɛ mɔ ko yɛ ni bɔ je lɛ, ni eboɔ sɔlemɔi atoi. Mɛi ni abibii amɛ saji lɛ ateŋ oha mlijaa 55 sɔleɔ bei komɛi.

◼ Beni abibii mɛi 10,000 saji yɛ je lɛŋ hei srɔtoi lɛ, mɛi ni kɛɔ akɛ amɛheee amɛyeee akɛ Nyɔŋmɔ yɛ lɛ ateaŋ oha mlijaa 30 sɔleɔ.

Mɛni Hewɔ Amɛyiŋ Etɛ̃ɛɛ Amɛ Lɛ?

Nuu ko ni jɛ England ni atsɛɔ lɛ Allan lɛ kɛɛ akɛ: “No mli lɛ, mikɛɔ akɛ miheee Nyɔŋmɔ nɔ miyeee ejaakɛ misusu akɛ ato jamɔ he gbɛjianɔ koni akɛkudɔ mɛi ni agbɛnɛ hu akɛtao shika. Kɛfata he lɛ, mishwie miyiŋ akɛ kɛji Nyɔŋmɔ yɛ lɛ, kulɛ shishiumɔ ekwɔŋ tso nɛkɛ. Kɛlɛ, be komɛi lɛ, mitaa shi diŋŋ ni miwieɔ ni mileee mɔ loo nɔ ni mikɛwieɔ lɛ. Mibiɔ mihe hu akɛ, ‘Te fee tɛŋŋ miba shihilɛ mli?’”

Mɔ fɛɛ mɔ ni nuɔ he nɛkɛ lɛ yɛ yiŋtoo hewɔ ni eyiŋ etɛ̃ɛɛ lɛ akɛ ahaa sɔlemɔi ahetoo lɛ. Bei babaoo lɛ, hetoi ni anáaa aha sanebimɔi ni nyiɛ sɛɛ nɛɛ ji nɔ ni haa mɔ ko yiŋ feɔ lɛ kɔshikɔshi lɛ:

◼ Ani Bɔlɔ ko yɛ?

◼ Mɛni hewɔ be pii lɛ jamɔ feɔ nibii gbohii lɛ?

◼ Mɛni hewɔ Nyɔŋmɔ ŋmɛɔ piŋmɔ gbɛ lɛ?

Kɛ́ oná sanebimɔi nɛɛ ahetoo lɛ, ani ebaaha oná hekɛnɔfɔ̃ɔ diɛŋtsɛ kɛsɔle?

[Shishigbɛ niŋmaa]