Ani yiŋtoo ko hewɔ afee wɔshikpɔŋ lɛ?

Afee wɔshikpɔŋ lɛ bɔ ni afee ni nibii ni yɔɔ wala mli anyɛ ahi nɔ. Nu babaoo yɛ nɔ, ni no hãa gbɔmɛi, kooloi, kɛ tsei hiɔ wala mli. Akpa shikpɔŋ lɛ afã fioo, ebɔleɔ ehe, ni ebɔleɔ hulu lɛ. Afee lɛ nakai bɔ ni afee ni ŋshɔ lɛ akawa ni etsɔ aisi, loo emli dɔ ni eŋala. Ni kɔɔyɔɔ ni ha shikpɔŋ lɛ he lɛ, kɛ stiili ni yɔɔ nɔ lɛ buɔ shikpɔŋ lɛ he kɛjɛɔ hulu la ni baanyɛ akpãta shikpɔŋ lɛ hiɛ lɛ he. Bɔ ni tsei yeɔ ebuaa kooloi ni kooloi hu yeɔ ebuaa tsei lɛ yɛ naakpɛɛ waa. Nibii nɛɛ ehã mɛi babaoo ekpɛlɛ nɔ akɛ abɔ wɔshikpɔŋ lɛ yɛ yiŋtoo ko hewɔ.​—Kanemɔ Yesaia 45:18.

Shi ekolɛ obaabi ohe akɛ: ‘Ani amanehulu kɛ jalɛsane ni ayeee fata nakai yiŋtoo lɛ he?’​—Kanemɔ 5 Mose 32:4, 5.

Ani yiŋtoo hewɔ ni afee shikpɔŋ lɛ baaba mli?

Afee shikpɔŋ lɛ koni adesai ni buɔ amɛhe ni sumɔɔ amɛ-Bɔlɔ lɛ kɛ miishɛɛ ahi nɔ. No hewɔ lɛ, yiŋtoo hewɔ ni abɔ adesai lɛ hi kwraa fe yiŋtoo hewɔ ni abɔ tsei loo kooloi. Wɔbaanyɛ wɔle wɔ-Bɔlɔ lɛ, ni wɔbaanyɛ wɔkase bɔ ni esumɔɔ mɔ, kɛ bɔ ni eyeɔ jalɛsane lɛ.​—Kanemɔ Jajelɔ 12:13; Mika 6:8.

Wɔ-Feelɔ lɛ baanyɛ afee nɔ fɛɛ nɔ ni ewoɔ shi yɛ he lɛ. No hewɔ lɛ, wɔbaanyɛ wɔná hiɛkɛnɔfɔɔ akɛ ebaafo amanehulu kɛ jalɛsane ni ayeee sɛɛ, ni ebaahã wɔshikpɔŋ lɛ afee shĩa ni yɔɔ miishɛɛ kɛhã adesai.​—Kanemɔ Lala 37:11, 29; Yesaia 55:11.