Sanebimɔi Ni Jɛ Kanelɔi Adɛŋ

Mɛɛ be wɔbaakpa sane kpakpa lɛ shiɛmɔ?

Yesu wie akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.” (Mat. 24:14) Greek wiemɔ ni atsɔɔ shishi akɛ “naagbee” yɛ ŋmalɛ nɛɛ, ni ji Mateo 24:14 lɛ, kɛ Mateo 24:​6, 13 lɛ ji, teʹlos, ni ekɔɔ be ni Satan je lɛ baaba naagbee kwraa yɛ Harmagedon lɛ he. (Kpo. 16:​14, 16) Enɛ hãa wɔnaa akɛ, wɔbaaya nɔ wɔshiɛ sane kpakpa lɛ kɛyashi be ni eshwɛ fioo ni Harmagedon ta lɛ baaje shishi. Enɛ ji shishinumɔ hee ni wɔná yɛ ŋmalɛ nɛɛ he.

Be ko ni eho lɛ, wɔwie akɛ, kɛ́ amanehulu kpeteŋkpele lɛ je shishi, ni tsɔɔ akɛ, akpãtã Babilon Kpeteŋkpele lɛ hiɛ lɛ, wɔbaakpa sane kpakpa lɛ shiɛmɔ. (Kpo. 17:​3, 5, 15, 16) Wɔwie nakai, ejaakɛ no mli lɛ wɔheɔ wɔyeɔ akɛ, “Yehowa mlihilɛ afi lɛ,” ni ji be ni ehã mɛi ni amɛtsake amɛtsui lɛ, baaba naagbee kɛ́ amanehulu kpeteŋkpele lɛ je shishi. (Yes. 61:2) Agbɛnɛ hu, wɔyasusu akɛ, mɛi ni miisɔmɔ Yehowa momo dani amanehulu kpeteŋkpele lɛ baaje shishi lɛ pɛ baaje amanehulu kpeteŋkpele lɛ mli. Wɔwie akɛ, mɛi nɛɛ tamɔ Yudafoi ni yi ná wala be ni akpãtã Yerusalem hiɛ yɛ afi 607 D.Ŋ.B. lɛ. Akadi Yudafoi nɛɛ kɛhã yibaamɔ dani akpãtã maŋ lɛ hiɛ, ejaakɛ amɛnyɛɔ efɔŋfeemɔ ni amɛmiijá Yehowa momo dani hiɛkpatamɔ be lɛ shɛ. (Eze. 5:11; 9:4) Shi mlitsɔɔmɔ nɛɛ kɛ sane ni Yesu wie yɛ Mateo 24:14 lɛ enyiɛɛɛ, ejaakɛ nɔ ni Yesu wie yɛ nakai ŋmalɛ lɛ mli lɛ hãa wɔnaa akɛ, mɛi baaná hegbɛ amɛnu sane kpakpa lɛ ni amɛtsake amɛtsui aahu kɛyashi be ni eshwɛ fioo ni Harmagedon ta lɛ baaje shishi.

Shishinumɔ hee nɛɛ ni wɔná yɛ Mateo 24:14 lɛ he lɛ ehã wɔná shishinumɔ hee yɛ Kpojiemɔ 16:21 lɛ hu he. Nakai ŋmalɛ lɛ wieɔ nyɔŋmɔŋtɛi kpelei komɛi ni jɛ ŋwɛi lɛ ahe. Be ni wɔpɛi nii amli ekoŋŋ lɛ, wɔna akɛ ŋmalɛ nɛɛ, ni ji Kpojiemɔ 16:21 lɛ, miiwie sane kome too lɛ nɔŋŋ ni awie yɛ Mateo 24:14 lɛ akɛ abaashiɛ lɛ he. Mɛni hewɔ wɔkɛɔ nakai? Hetoo lɛ yɛ sane ko ni bɔfo Paulo wie ni kɔɔ bɔ ni mɛi feɔ amɛnii amɛhãa yɛ Maŋtsɛyeli lɛ he sane ni wɔshiɛɔ lɛ he lɛ mli. Ewie akɛ, sane ni wɔshiɛɔ lɛ ji “wala he ŋma” loo sane kpakpa kɛhã “mɛi ni aahere amɛyiwala lɛ,” shi eji “gbele he fũ” loo sane fɔŋ kɛhã mɛi ni nyɛɔ Nyɔŋmɔ lɛ. (2 Kor. 2:​15, 16) Mɛi ni nyɛɔ Nyɔŋmɔ lɛ sumɔɔɔ Maŋtsɛyeli lɛ he sane lɛ kwraa, ejaakɛ ehãa anaa faŋŋ akɛ, je nɛɛ ni amɛsumɔɔɔ ni ebaa naagbee lɛ mli eyi obɔ kɛ efɔŋfeemɔ, ni akɛ, Satan ni yeɔ nɔ, ni etsɛŋ abaakpãtã hiɛ.—Yoh. 7:7; 1 Yoh. 2:17; 5:19.

Kpojiemɔ 16:21 lɛ wie hu akɛ, nyɔŋmɔŋtɛi lɛ ahaomɔ lɛ baafee haomɔ ni “da fe nine.” Etamɔ nɔ ni wiemɔi nɛɛ tsɔɔ akɛ, yɛ amanehulu kpeteŋkpele lɛ mli lɛ, sane ni wɔshiɛɔ lɛ baawo mɛi amli la kwraa fe bianɛ po, ni mɛi baale Yehowa gbɛ́i lɛ fe bei fɛɛ ni eho. (Eze. 39:7) Yɛ nakai be lɛ mli, be ni akpãtã Babilon Kpeteŋkpele lɛ hiɛ ni je lɛ miihe aba naagbee lɛ, ani Maŋtsɛyeli lɛ he sane lɛ baaje ŋma ehã mɛi? Ani amɛbaanya he? Efeŋ wɔ naakpɛɛ kɛ́ eba lɛ nakai. Ekolɛ mɛi baakai loo amɛbaaná amɛle akɛ, Yehowa Odasefoi kɛ afii pii eshiɛ akɛ abaakpãtã amale jamɔi fɛɛ ni yɔɔ je lɛ mli lɛ ahiɛ, ni amɛbaayɔse akɛ no nɔŋŋ eba mli lɛ.

Wɔbaanyɛ wɔkɛ enɛ ato nɔ ni tee nɔ yɛ Ejipt yɛ Haomɔi Nyɔŋma lɛ asɛɛ lɛ he. Be ni Yehowa ‘kojo Ejipt nyɔŋmɔi lɛ fɛɛ’ ni ehã ewebii lɛ ye amɛhe lɛ, “mɛi srɔtoisrɔtoi ni jeee Israelbii” bafata ewebii lɛ ahe. (2 Mo. 12:​12, 37, 38, shn.) Eeenyɛ efee akɛ, mɛi nɛɛ yɔse akɛ, nɔ fɛɛ nɔ ni Mose wie yɛ Haomɔi Nyɔŋma lɛ ateŋ eko fɛɛ eko he lɛ ba mli. Ekolɛ enɛ ji nɔ ni tsirɛ amɛ ni amɛbafata Yehowa webii lɛ ahe lɛ.

Mɛi ni ekolɛ amɛbaatsake amɛtsui ni amɛbafata Yehowa webii lɛ ahe yɛ Babilon Kpeteŋkpele lɛ hiɛkpatamɔ lɛ sɛɛ lɛ baaná hegbɛ amɛye amɛbua Kristo nyɛmimɛi lɛ ateŋ mɛi ni yɔɔ shikpɔŋ lɛ nɔ lolo yɛ nakai beiaŋ lɛ. (Mat. 25:​34-36, 40) Shi be ni eshwɛ fioo ni Harmagedon ta lɛ baaje shishi lɛ, mɛi ni afɔ amɛ mu lɛ ateŋ mɛi fioo ni eshwɛ yɛ shikpɔŋ lɛ nɔ lɛ baaya ŋwɛi, ni no hewɔ lɛ, mɛi náŋ hegbɛ dɔŋŋ akɛ amɛbaaye amɛbua amɛ koni adamɔ no nɔ akojo amɛ akɛ gwantɛŋi.

Shishinumɔ hee nɛɛ hãa wɔnaa akɛ, Yehowa sumɔɔ adesai waa, ni enaa mɔbɔ. Lɛɛlɛŋ, Yehowa ‘sumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.’—2 Pet. 3:9.