Évanjil a Jan

5 Tibwen tan apré, sé Juif-la té k’ay fété on fèt, é Jézi monté Jérizalèm. 2 A Jérizalèm, ni on pisin yo ka kriyé Bètzata an ébré. Pisin-lasa ka touvé-y owa pòt a sé Mouton-la. Alantou a pisin-la, ni 5 galri ki ni onpakèt poto. 3 Té ni onpakèt moun kouché anba sé galri-lasa : moun-malad, moun-avèg, moun ka bwété é moun-andikapé*. 4 ——* 5 Té ni on boug la, é sa té ja ka fè 38 an i té malad. 6 Konm Jézi vwè boug-la kouché la, é konm i té sav kè sa té ja ka fè onpakèt tan boug-la té malad, i mandé-y : « Ès ou anvi géri ? » 7 Boug-la réponn-li : « Ségnè, an pa ni ponmoun pou mèt-mwen an pisin-la lèwvwè dlo-la ka soukwé. Kifè, pannan an k’ay pou mwen rantré an dlo-la, ondòt moun ka désann avan mwen. » 8 Jézi di-y : « Lévé-w ! Pran branka a-w* é maché. » 9 É boug-la géri onfwamenm. I pran branka a-y é i mété-y ka maché.

Sé té on jou a saba. 10 Alò sé Juif-la mèt-yo ka di boug-la Jézi té géri la : « Jòdla sé on jou a saba, é ou pa ni dwa pòté branka-lasa. » 11 Men i réponn-yo : « Misyé-la ki géri-mwen la, sé-y ki di-mwen : “Pran branka a-w é maché.” » 12 Yo mandé-y : « Aki boug-la ki di-w pran branka a-w é maché ? » 13 Men misyé-la pa té sav kimoun Jézi té yé, davwa Jézi té fofilé kò a-y pawmi foulmoun-la ki té la la.

14 Aprésa, Jézi jwenn boug-la an Tanp-la é i di-y : « Konnyéla, ou géri. Pa péché ankò pou on biten pi mové pa rivé-w. » 15 Boug-la pati, é i di sé Juif-la kè sé Jézi ki té géri-y. 16 Mi pou ki rézon sé Juif-la té ka pèwsékité Jézi : sé pas i té ka géri moun pannan saba-la. 17 Men i réponn-yo : « Jousalè, Pap’an mwen ka kontinyé travay, é mwen osi, an ka kontinyé travay. » 18 Lè sé Juif-la tann sa, sé lè yo té bizwen tchouyé-y menm. Yo té vlé fè sa pas pou yo, i pa té ka rèspèkté lwa a saba-la é i té bizwen fè moun kwè kè i menm nivo ki Bondyé pas i té ka kriyé-y Papa.

19 Alò Jézi di-yo : « Zò pé kwè-mwen : Gason-la pé pa pran asi-y pou i fè ayen, men sé enki sa i vwè Papa-la fè, i ka fè. Pas tousa Papa-la ka fè, Gason-la ka fè-y menmjan-la osi. 20 É wi, Papa-la enmé Gason-la fò toubònman, é i ka montré-y tousa limenm a-y ka fè. É i ké montré-y dòt biten i ké fè é ki pi èstraòwdinè ki sa ankò. Kifè, zò ké rété èstèbèkwè. 21 Pas menmjan Papa-la ka résisité moun-mò, menmjan-la osi, Gason-la ka résisité moun i vlé. 22 Pas Papa-la pa’a jijé ponmoun, men sé Gason-la i mèt pou jijé toutmoun. 23 Konsa, toutmoun ké pòté Gason-la anlè kon yo ka pòté Papa-la anlè. Si on moun pa’a pòté Gason-la anlè, i pa’a pòté Papa-la anlè nonplis pas sé Papa-la ki voyé Gason-la. 24 Zò pé kwè-mwen : dépi on moun ka kouté sa an ka di é i ka kwè adan Sila ki voyé-mwen la, i ké ni lavi étèwnèl, é ponmoun pé’é kondanné-y. Sé konsidiré moun-lasa té mò, é konnyéla i vivan.

25 « Zò pé kwè-mwen : lè-la ka vin, é an réyalité i ja asi nou, pou sé moun-mò-la tann vwa a Gason a Bondyé ; é moun ki ké pran tan kouté ké viv. 26 Pas Papa-la ni pouvwa pou i ba moun lavi*, é i ba Gason-la pouvwa pou i ba moun lavi osi. 27 I ba-y dwa jijé, pas Gason-la sé Gason a lòm. 28 Pa touvé sa fò, pas rivé onlè, tout sé moun-la ki adan sé tonm-la ké tann vwa a-y 29 é yo ké sòti. Sa ki fè bon biten ké sòti pou yo pé sa ni lavi étèwnèl, é sa ki té ni labitid fè mové biten ké sòti pou yo pé sa jijé-yo. 30 An pé pa pran si mwen pou fè ayen. An ka jijé moun dapré sa Papa-la ka di-mwen. É an ka jijé on mannyè ki jis, pas an pa’a chèché a fè sa an vlé, men an ka chèché a fè sa Sila ki voyé-mwen la vlé.

31 « Si sé mwenmenm an mwen ki ka palé dè mwen, yo pé’é kwè sa an ka di. 32 Ni ondòt moun ki ka palé dè mwen, é an sav kè sa i ka di asi mwen sé lavérité. 33 Zò voyé déotwa boug vwè Jan, é i palé-yo dè mwen, é sa i di-yo sé lavérité. 34 Apapoudi an bizwen on moun palé dè mwen, men an ka di sé biten-lasa pou zò pé sa sové. 35 Boug-lasa té ka touvé-y kon on lanp ki limé é ki ka kléré. É pannan on ti moman, zò té bizwen pwofité dè limyè a-y pou tchè a zòt té kontan toubònman. 36 Jan di sé moun-la kè sé owa Papa-la an sòti. Men an ni on pi bèl prèv ankò ki ka montré kè sé Papa-la ki voyé-mwen : an ka fè tout sé biten-la i voyé-mwen fè la. 37 Anplisdisa, Papa-la limenm di kè sé-y ki voyé-mwen. Zò po’o jen tann vwa a-y é zò po’o jen vwè figi a-y. 38 É pawòl a-y pa’a rété andidan tchè a zòt pas zò pa’a kwè sila i voyé la.

39 « Zò ka pran tan a zòt pou zò étidyé Lézékriti byen, èvè lidé zò ké ni lavi étèwnèl ; é sé Lézékriti yomenm a yo ki ka montré kè sé Papa-la ki voyé-mwen. 40 Men magrésa, zò vé pa vin owa an mwen pou zò ni lavi étèwnèl. 41 An vé pa nonm ban-mwen glwa, 42 é an sav byen kè andidan tchè a zòt, pa ni lanmou pou Bondyé. 43 Pap’an mwen voyé-mwen é i ka soutyenn-mwen, men zò pa ka rèsèvwa-mwen. Si ondòt moun té ka vin limenm a-y, san ponmoun voyé-y, zò té’é rèsèvwa-y. 44 Zò enmé lèwvwè moun ka ba-zòt glwa, men sèl Bondyé-la ki ni la, zò pa’a chèché a fè-y plézi, pou i pé sa kontan-zòt. Alò kijan zò ké fè pou kwè-mwen ? 45 Pa mèt an tèt a zòt kè an ké akizé-zòt douvan Papa-la. Ni on moun ki ka akizé-zòt : sé Moyiz, moun-la zò ka fèfon asi-y la. 46 Men lè nou byen gadé, si zò té ka kwè Moyiz, zò té’é kwè-mwen. Pas adan sa i maké, i ka palé dè sa an té’é fè. 47 Men si zò pa’a kwè adan sa i maké, kijan zò ké fè pou kwè sa an ka di-zòt ? »