Akt (sa sé apòt-la fè)
4 Pannan Pyè é Jan té ka palé ba pèp-la, sé prèt-la, kapitèn a Tanp-la, é sé sadiséyen-la enki débaké. 2 Yo pa té kontan pas sé apòt-la té ka anségné pèp-la, é pas yo té ka di toutmoun kè Jézi té résisité. 3 Alò yo arété Pyè é Jan, é yo mèt-yo lajòl jiska lèlandèmen, pas té ja ka fè nwè. 4 Men pawmi sé moun-la ki kouté diskou-la, ni onlo ki koumansé ni fwa an Jézi ; té ni 5000 nonm apépré.
5 Lèlandèmen-la, sé chèf-la, sé ansyen-la, é sé iskrib-la sanblé a Jérizalèm 6 èvè Àn prèt pi enpòwtan la, Kayif, Jan, Alèksann, é èvè tout fanmi a Àn. 7 Yo mèt Pyè é Jan doubout anmitan a yo, é yo koumansé pozé-yo kèsyon. Yo mandé-yo : « Kijan zò fè ni pouvwa pou fè sé biten-lasa ? É an non a kimoun zò fè sa ? » 8 Alò Pyè touvé-y plen lèspri sen, é i di-yo :
« Zòt, chèf a pèp-la, é zòt, sé ansyen-la, 9 ès zò anvi sav ki bon biten nou fè ba boug enfim lasa, é kijan i fè géri ? 10 Fò-zòtout sav, é fò tout pèp a Israèl sav kè boug-lasa géri an non a Jézikris Nazaréyen-la, sila zò tchouyé asi poto-la é kè Bondyé résisité. Sé grasa Jézi si boug-lasa byen pòtan konnyéla, é si i doubout douvan a zòt. 11 Jézi-lasa, sé-y ki vin wòch-la ki pi enpòwtan* la, é zòt, sé moun-la ki ka konstwi la, zò pa té vlé-y. 12 Anplisdisa, pa ni pondòt moun ki pé sové-nou si a pa-y, pas Bondyé pa chwazi pondòt moun* asi latè* pou sové-nou. »
13 Yo té étoné lè yo vwè jan Pyè é Jan té ka palé franchman, é lè yo konstaté kè sé boug-lasa pa té fè gran lékòl* é kè yo té tousenp. Alò yo rann-yo kont kè Pyè é Jan té ka maché èvè Jézi. 14 Konm yo té ka vwè kè boug-la ki té géri la té doubout owa Pyè é Jan, yo pa té pé réponn ayen. 15 Alò yo mandé-yo sòti adan sal a Sannédren-la, é yo koumansé palé antrè yo. 16 Yonn té ka di lòt : « Ka nou ké fè èvè sé boug-lasa ? On biten ki sèten, sé kè yo fè on mirak ki èstraòwdinè. Tout moun ki ka rété Jérizalèm okouran a sa, é noumenm an nou, nou pé pa di a pa vré. 17 Alò pou sa pa tonbé an zòrèy a plis moun adan pèp-la, an-nou mennasé-yo, é an-nou défann-yo palé dè non-lasa èvè moun. »
18 Alò yo kriyé-yo é yo di-yo pa jen palé an non a Jézi, é pa jen anségné an non a-y nonplis. 19 Men Pyè é Jan réponn-yo : « Si zò ka pansé kè Bondyé té’é pisimé nou kouté-zòt olyé nou kouté-y, sé zòt ki ka vwè. 20 Men nou, nou pé pa arété palé dè sé biten-la nou vwè la é dè sé biten-la nou tann la. » 21 Alò yo woumennasé-yo ankò, é yo lagé-yo. Yo fè sa pas yo pa touvé ayen ki té’é pé pèwmèt-yo pini-yo é pas yo té pè pèp-la, davwa toutmoun té ka ba Bondyé glwa parapòt a sa ki té fèt. 22 Boug-la yo té géri la grasa mirak-la yo té fè la té ni plis ki 40 an.
23 Lèwvwè yo lagé-yo, Pyè é Jan ay jwenn sélézòt disip-la, é yo rakonté-yo tousa sé prèt pi enpòwtan la é sé ansyen-la té di-yo. 24 Lè yo tann sa Pyè é Jan di, tout moun-la mèt-yo ansanm pou priyé Bondyé, é yo di :
« Pli gran Ségnè an nou, sé-w ki fè syèl-la, tè-la, lanmè-la é tousa ki adan yo. 25 Zansèt an nou David, sé té sèwvitè a-w. Ou sèvi èvè lèspri sen a-w pou fè-y palé é mi sa ou fè-y di : “Poukwa sé nasyon-la fè kòlè konsa, é poukwa sé pèp-la mèt-yo ka réfléchi asi biten ki pa ni pon valè ? 26 Sé wa-la ki asi latè la paré pou yo goumé, é sé chèf-la mèt-yo ansanm pou yo fè yonn kont Jéova é kont sila i chwazi la*.” 27 É sé ègzaktèman sa ki pasé, piskè ki Éwòd, ki Pons Pilat, ki sé Israélit-la, ki sé moun-la ki adan sélézòt nasyon-la, yotout sanblé kont Jézi, sèwvitè a-w kè ou chwazi é ki sen. 28 Yo sanblé pou fè sa ou té anonsé. Sé biten-lasa fèt pas ou ni pouvwa-la ki fo la é pas sa té annakò èvè volonté a-w. 29 É konnyéla, Jéova, kouté jan yo ka mennasé-nou, é édé èsklav a-w pou yo pé sa kontinyé préché pawòl a-w èvè onlo kouraj. 30 An menm balan-la, lonji men a-w pou géri moun, pou fè biten èstraòwdinè é pou fè mirak an non a Jézi, sèwvitè a-w ki sen. »
31 Apré yo sipliyé Bondyé*, koté-la yo té sanblé la mété-y ka tranblé. Yotout touvé-yo plen lèspri sen, é yo mèt-yo ka préché pawòl a Bondyé èvè onlo kouraj.
32 Anplisdisa, tout sé disip-la té ni menm mantalité-la é yotout té k’ay an menm sans-la*. É ponyonn pa té ka di kè sa i ni sé ta-y tousèl. Okontrè, yo té ka pawtajé tousa yo té ni. 33 Sé apòt-la té ka kontinyé palé dè rézirèksyon a Jézi Ségnè-la, é yo té ka fè sa byen konm i fo*. É Bondyé té ka voyé onpakèt bénédisyon asi yotout. 34 Yotout té ni sa ki té fo-yo, pas touséla ki té ni tè oben kaz té ka vann sé biten-lasa, é yo té ka pòté lajan-la yo té gangné la ; 35 yo té ka mété-y an pyé a sé apòt-la. Aprésa, sé apòt-la té ka distribiyé lajan-la silon sa chakmoun té bizwen. 36 Jistèman Jozèf, on Lévit ki té fèt a Chip, é kè sé apòt-la té ka kriyé Bawnabé osi (kivédi « sila ki ka ankourajé lézòt* »), 37 té ni on mòso tè. I vann-li, é i menné lajan-la an pyé a sé apòt-la.