« Amèn » : on mo ki ni onlo valè pou Jéova
JÉOVA ka ba adorasyon-la nou ka ba-y la onlo valè. I ka « kouté [sèwvitè a-y] byen byen menm », é mwenn tibiten nou ka fè pou bay louwanj ni onlo valè pou-y (Mal. 3:16). Nou pé palé dè on mo nou dwèt ja di onlo fwa. Mo-lasa, sé « amèn ». Ès mo-lasa enpòwtan pou Jéova ? Ou pé di sa ! Pou nou konprann poukwa i enpòwtan konsa, an-nou pran tan gadé ka i vlé di é kijan yo ka sèvi èvè-y adan Labib.
« TOUT PÈP-LA KÉ DI : “AMÈN !” »
Lèmo « amèn » vlé di « sé konsa menm pou sa fèt » oben « asirésèten ». I ka vin dè on mo ébré ki vlé di « fidèl, kè ou pé fè konfyans ». Défwa, yo té ka sèvi èvè-y adan domenn a lajistis. Apré on moun té fè on sèwman, i té ka di « amèn » pou fè moun vwè sé vérité i té ka di, é kè si i té manti, i té paré a risivwè on pinisyon (Nonb 5:22). Lè i té ka di « amèn » douvan toutmoun, sa té ka pousé-y a tchenn a mo a-y (Néém. 5:13).
Adan Détéwonòm 27, ni on bèl ègzanp ki ka montré kijan yo té ka sèvi èvè lèmo « amèn ». Apré sé Izraélit-la rantré adan Péyi-la Jéova té pwomèt-yo la, fò-yo té sanblé antrè Mòn Ébal é Mòn Garizim pou kouté lèkti a Lwa-la. A pa yenki pou kouté fò yo té vin la, men sété osi pou pwomèt kè yo té ké rèspèkté Lwa-la. Kijan ? Fò-yo té réponn « Amèn ! », chakfwa sé Lévit-la té ka li sa ki té ké rivé-yo si yo té ka dézobéyi (Dét. 27:15-26). Éséyé imajiné jan mo-lasa dwèt rézonné fò, lèwvwè milyé é milyé misyé, madanm, é timoun réponn ansanm-ansanm ! (Joz. 8:30-35). Sèten yo pa jen oubliyé pwomès-la yo té fè la jou-lasa. Dayè, yo tchenn a mo a yo, pas Labib ka di : « Izrayèl kontinyé sèvi Jéova an tan a Joziyé é an tan a sé ansyen-la ki viv apré Joziyé. Sé ansyen-lasa té vwè tousa Jéova té fè pou Izrayèl » (Joz. 24:31).
Jézi osi té ka sèvi èvè lèmo « amèn » pou montré kè sa i té ka di sété vérité, men i té ka itilizé-y osi on mannyè èspésyal. Olyé i té sèvi èvè mo-lasa apré on moun té di-y on biten, i té ka itilizé-y avan i di on biten enpòwtan (an ka-lasa, an kréyòl, pou tradui « amèn », nou ka itilizé « vréman »). Délè, i jous té ka répété mo-la dé fwa, « amèn amèn » (an kréyòl « wi, vréman ») (Mat. 5:18 ; Jan 1:51). Konsa, i té ka ba sé moun-la ki té ka kouté-y la on garanti kè sa i té ka di, sété pawòl sèryé. Jézi té pé sèten dè-y konsa, paskè sé-y Bondyé té chwazi pou réyalizé tout pwomès a-y (2 Kor. 1:20 ; Rév. 3:14).
« ALÒ TOUT PÈP-LA DI : “AMÈN !”, É YOTOUT BA JÉOVA LOUWANJ »
Sé Izraélit-la té ka di « amèn » osi lè yo té ka priyé Jéova é lè yo té ka ba-y louwanj (Néém. 8:6 ; Sòm 41:13). Lè yo té ka di mo-lasa an fen a on priyè, sa ki té ka kouté té ka montré kè yo té dakò èvè sa yo té di an priyè-la. Konsa, tousa ki té la té pé pawtisipé adan adorasyon-la yo té ka ba Jéova, èvè on tchè-kontan. Sé sa ki pasé lè Wa David menné Lawch a Jéova Jérizalèm. Pannan yo té ka sélébré évènman-lasa, David fè on priyè ki té ka sòti anfon a tchè a-y. Sé on priyè i chanté é ki maké adan 1 Kronik 16:8-36. Tèlman sa i di touché tchè a sé moun-la, « tout pèp-la di “Amèn !” é yotout ba Jéova louwanj ». Yo té kontan adoré Jéova ansanm toubònman !
O prèmyé syèk osi, sé krétyen-la té ka di « amèn » lè yo té ka ba Jéova louwanj. Ou ka touvé mo-lasa plizyè fwa adan sèwten liv a Labib (Wom. 1:25 ; 16:27 ; 1 Pyè 4:11). An Révélasyon, Jan ka jous palé dè kréyati ki an syèl-la ki ka ba Jéova glwa. Yo ka di : « Amèn ! Ba Jéova louwanj ! » (Rév. 19:1, 4). Lè yo té ka réini, sé prèmyé krétyen-la té ni labitid di « amèn » an fen a on priyè (1 Kor. 14:16). Men a pa té on mo yo té ka enn di konsa, san réfléchi.
POUKWA LÈ OU KA DI « AMÈN », SA NI ONLO VALÈ
Sé èsplikasyon-lasa ka édé-nou konprann poukwa sa enpòwtan konsa kè nou di « amèn » an fen a on priyè. Lè nou ka bout priyè an nou èvè mo-lasa, nou ka montré nou té sensè. É lè sé ondòt moun ka fè priyè-la an piblik, nou ka di « amèn », menmsi sé an tchè an nou, pou montré kè nou dakò èvè sa moun-la di la. Men an-nou vwè pou ki dòt rézon ankò mo-lasa enpòwtan.
Sa ka édé-nou rété konsantré asi priyè-la. Lè nou ka priyé, nou ka adoré Jéova non sèlman èvè sa nou ka di, men osi èvè konpòwtèman an nou. Nou vlé di « amèn » èvè tout tchè an nou, kifè nou ka fè éfò pou rété konsantré asi sa yo ka di adan priyè-la.
Nou ini lè nou ka adoré Bondyé. Pannan on priyè ki ka fèt an piblik, toutmoun adan lasanblé-la ka konsantré-yo asi menm biten-la, asi sa yo ka tann la (Akt 1:14 ; 12:5). Lè noutout ka di « amèn » ansanm-ansanm, nou ka pli soudé. Ki nou di « amèn » pou moun tann, ki nou di-y an tchè an nou, nou ka ba Jéova ondòt rézon ankò dè réponn a priyè-la ki sòti fèt la.
Lè nou ka di « amèn », sé on mannyè dè ba Jéova louwanj.
Nou ka ba Jéova louwanj. Jéova ka vwè mwenn tibiten nou ka fè pou adoré-y (Lik 21:2, 3). I sav ka ki ka pousé-nou aji é sa ki andidan tchè an nou. Menmsi sé pa téléfòn nou ka suiv réinyon-la, nou pé sèten kè lè nou di « amèn », Jéova ka tann. Nou ka ba Jéova louwanj ansanm èvè lasanblé an nou.
Pétèt pou nou, ti « amèn »-la nou ka di la, a pa granzafè, men pa konpranndèdi i pa vo ayen. Dapré on ansiklopédi biblik, « èvè senp timo-lasa », sèwvitè a Bondyé ka montré kè an tchè a yo, « yo ni konfyans, yo dakò bon dakò-la, é yo ni on èspérans ki sensè. » Alò an-nou fè ansòt pou chakfwa nou di « amèn », sa fè Jéova plézi ! (Sòm 19:14).