Fè ansòt pou ‘flanm-la ki ka vin dè Ja’ pa jen étenn

1. Kijan Labib ka palé dè vré lanmou-la ?

« FLANM a lanmou sé on gwo difé. Flanm-lasa ka vin dè Ja. Pon gran dlo pé pa étenn lanmou é pon gwo rivyè pé pa chayé-y » (Chanté a S. 8:6, 7). Mi on bèl ègzanp pou palé dè vré lanmou-la mi ! Lè nou ka li sé pawòl-lasa, ni on biten ki ka rasiré sé moun-la ki mayé la toubònman : ni mwayen pou lanmou-la yonn ni pou lòt pa jen disparèt.

2. Ka 2 moun-mayé pé fè pou lanmou a yo pa jen étenn ?

² Fò 2 moun-mayé fè éfò pou yonn enmé lòt tout vi a yo. Pou nou konprann sa, an-nou pran ègzanp a on foyé-difé. Pou difé-la kontinyé brilé, fò on moun kontinyé mèt bwa adan-y. Si ponmoun pa ka okipé dè difé-la, i ké fin pa étenn. Menmjan-la, lanmou-la on mari é madanm a-y ni yonn pou lòt pé kontinyé rété fò tout vi a yo si yo ka fè ansòt pou lanmou-lasa kontinyé grandi. Délè, 2 moun-mayé pé ni lenprésyon kè yonn pa enmé lòt fò kon avan. Sa pé rivé lèwvwè yo ka jwenn pwoblèm a lajan oben pwoblèm a santé oben lèwvwè yo ka vin ni timoun é kè fò-yo lévé sé timoun-lasa. Siwvwè ou mayé, kijan ou pé fè ansòt pou « flanm-la ki ka vin dè Ja » pa jen étenn adan mayé a-w ? Adan awtik-lasa nou ké vwè 3 biten 2 moun-mayé pé fè pou yonn pé sa enmé lòt fò é pou yonn é lòt pé sa ni tchè-kontanb.

KONTINYÉ VIN PI BON ZANMI ÈVÈ JÉOVA

3. Lè 2 moun-mayé bon zanmi èvè Jéova, sa ka édé-yo pou lanmou a yo pa jen étenn. Poukwa nou ka di sa ? (Éklézyas 4:12 ; gadé imaj-la osi).

³ Pou ‘flanm-la ki ka vin dè Ja’ pa jen étenn, ki mari-la, ki madanm-la dwètèt fè tousa yo pé pou yo bon bon zanmi èvè Jéova. Kijan sa pé édé-yo antann-yo pi byen adan mayé a yo ? Lèwvwè toulédé moun-la ki mayé la ka ba lanmityé-la yo ni la èvè Pap’a yo ki an syèl-la onlo valè, suiv konsèy a Jéova sé on plézi pou yo. Grasa sa, yo pé’é jwenn sèwten pwoblèm ki té’é pé fè lanmou a yo fébli oben sa ké édé-yo rivé about a sé pwoblèm-lasa (li Éklézyas 4:12). Anplisdisa, on moun ki bon bon zanmi èvè Jéova ka fè éfò pou imité-y é pou imité bèl kalité a-y kon bonté a-y, pasyans a-y é mizérikòd a-y (Éféz. 4:32 – 5:1). Lèwvwè 2 moun-mayé ni sé kalité-lasa, sa ka fè lanmou a yo grandi. Lena sé on sè ki mayé dépi plis ki 25 an. Mi sa i ka di : « Lè on moun bon zanmi èvè Jéova, ou pé enmé moun-lasa é rèspèkté-y san fòsé. »

4. Poukwa sé Jozèf é Mari kè Jéova chwazi pou vin papa é manman timoun-la ki té’é vin Mési-la ?

⁴ An-nou pran on ègzanp ki adan Labib. Lèwvwè Jéova chwazi 2 moun pou vin papa é manman a timoun-la ki té’é vin Mési-la, sé Jozèf é Mari i chwazi. Pawmi tout désandan a David, poukwa sé yo Jéova chwazi ? Paskè yo toulédé té bon bon zanmi èvè-y. É Jéova té sav kè yo té’é mété-y prèmyé douvan adan mayé a yo. Si ou mayé, ka ègzanp a Jozèf é Mari pé aprann-vou ?

5. Ka ègzanp a Jozèf pé aprann sé mari-la ?

⁵ Lèwvwè Jéova té ka mandé Jozèf fè on biten, i té ka fè-y volontyé é sé sa ki fè si i vin on pibon mari. Omwen 3 fwa Jéova di-y ka pou li é fanmi a-y té fè. Chakfwa Jéova palé ba Jozèf, i obéyi tousuit menmsi sa pa té senp (Mat. 1:20, 24 ; 2:13-15, 19-21). Lèwvwè Jozèf fè sa Jéova té ka mandé-y, i pwotéjé Mari é i pran swen a-y. Sèten lèwvwè Mari vwè jan Jozèf té ka kouté Jéova, sa édé-y rèspèkté-y plis ankò é enmé-y pi fò ankò. Sé mari-la, zò pé imité Jozèf lèwvwè zò k’ay chèché konsèy adan Labib pou pran swen a fanmi a zòtc. Lèwvwè zò ké mété sé konsèy-lasa an pratik menmsi sa vlé di kè fò zò fè sèwten chanjman, zò ké montré madanm a zòt kè zò enmé-y é zò ké vin pi bon zanmi èvè-y. Mi sa on sè ki ka rété o Vanouatou é ki mayé dépi plis ki 20 lanné ka di : « Lèwvwè mari an mwen ka chèché sé konsèy-la Jéova ka ban-nou la é kè i ka suiv-yo, an ka rèspèkté-y plis ankò, an ka santi-mwen ansékirité é an ka fè-y konfyans lè i ka pran on désizyon. »

6. Ka ègzanp a Mari pé aprann sé madanm-la ?

⁶ Mari té bon bon zanmi èvè Jéova é i té ka fè ansòt pou fwa a-y pé sa solid. I té konnèt Lézékriti byen menm (gadé nòt-la ki k’ay èvè Lik 1:46 adan Bib-la ki fèt pou étidyé la an fransé). É i té ka òwganizé-y pou i ni tan médité asi Lézékriti (Lik 2:19, 51). On biten ki sèten sé kè sé lanmityé a-y èvè Jéova ki té ka fè kè i té on bon madanm. Jòdijou ni onlo madanm ki ka fè éfò pou suiv bèl ègzanp a-y. An-nou palé dè Emiko. Mi sa i ka di : « Lè an té sélibatè, an té ni labitid fè sèwten biten pou rété bon bon zanmi èvè Bondyé. Men apré mayé an mwen, sé mari an mwen ki té ka priyé pou nou. É lè nou té ka fè dé biten pou adoré Jéova ansanm, sé-y ki té ka okipé-y dè tout biten. Alò an rann-mwen kont kè an té koumansé atann asi-y pou fè sé biten-lasa pou mwen. Fò an té kontinyé fè dé biten pou vin pi bon zanmi èvè Jéova. Sé pousa aprézan an ka fè ansòt mwen touvé-mwen tousèl an mwen, mwen pé sa pasé tan èvè Bondyé, mwen pé sa priyé-y, mwen pé sa li Pawòl a-y é mwen pé sa médité asi Pawòl a-y » (Gal. 6:5). Sé madanm-la, fò-zòt sav kè si zò ka kontinyé fè dé biten pou vin pi bon zanmi èvè Jéova, sa ké ba mari a zòt dòt rézon ankò pou félisité-zòt é pou enmé-zòt (Pwov. 31:30).

7. Sa enpòwtan kè 2 moun-mayé adoré Jéova ansanm. Ka ègzanp a Jozèf é Mari pé aprann moun ki mayé adan domenn-lasa ?

⁷ Jozèf é Mari té ka travay ansanm-ansanm pou yo toulédé té rété bon bon zanmi èvè Jéova. Yo té ka konprann jan sa té enpòwtan kè yo adoré Jéova an fanmi (Lik 2:22-24, 41 ; 4:16). Sèten sa pa té toujou fasil, siwtou lèwvwè yo vin ni plizyè timoun. Men yo réyisi. Mi on bèl ègzanp pou moun ki mayé jòdila mi ! Si kon Jozèf é Mari, zò ni timoun, pétèt zò ké touvé kè sa pa fasil pou vin adan tout sé réinyon-la é pou fè étid familyal la chak simenn. É pétèt zò ké touvé kè sa pi difisil ankò pou zò touvé on ti moman pou zò pé sa étidyé é priyé a 2. Men pa oubliyé, lèwvwè zò ka adoré Jéova ansanm, zò ka vin pi bon zanmi èvè-y é zò toulédé ka vin pi bon zanmi yonn èvè lòt. Alò fè ansòt pou zò mèt adorasyon-la zò ka ba Jéova la prèmyé douvan adan vi a zòt.

8. Lè adan on mayé yonn pa byen èvè lòt, ka yo pé fè pou yo pé sa pwofité dè étid familyal a yo plis ankò ?

⁸ É vinvwè aprézan yonn pa byen èvè lòt, ka pou zò fè ? Pétèt kè lèwvwè ou ka sonjé kè fò zò ké fè étid familyal la ansanm, ou pa tèlman anvi. Si sé sa ou ka rèsanti, odépa, zò pé òwganizé-zòt pou étid familyal la pa diré two lontan é zò pé mèt-zòt dakò pou zò ègzaminé on sijé kè zò toulédé enmé. Sa pé édé-zòt pou yonn pé sa enmé lòt pi fò é pou zò anvi adoré Jéova ansanm.

FÒ YONN PASÉ TAN ÈVÈ LÒT

9. Poukwa fò on mari é madanm a-y pasé tan ansanm ?

⁹ Moun-mayé, si yonn ka pasé tan èvè lòt osi, yonn ké pé enmé lòt pi fò. Lè zò ka fè sa, sa ka pi fasil pou zòt dè sav ka moun-la zò mayé èvè-y la ka pansé é ka i ka rèsanti (Jén. 2:24). An-nou pran ègzanp a Lilia é Ruslan. Yo mayé ja ni plis ki 15 an é on titak tan apré mayé a yo, yo rèmawké on biten. Mi sa Lilia ka di : « Nou té ka pansé kè lèwvwè nou té’é mayé nou té’é pasé onlo tan ansanm men nou rann-nou kont kè a pa konsa sa ka pasé. Nou toulédé ka travay, toujou ni on biten a fè an kaz-la é aprésa nou vin ni sé timoun-la é fò-nou okipé dè yo. Kifè, jouné-la ka fin nou pa menm ka vwè akilè. Alò, nou rann-nou kont kè si nou pa ka òwganizé-nou pou nou pasé on ti moman ansanm, nou pé’é bon zanmi kon avan. »

10. Kijan sé moun-la ki mayé la pé suiv prensip-la nou ka touvé adan Éfézyen 5:15, 16 ?

¹⁰ Ka 2 moun-mayé pé fè pou yo sèten yo ké rivé pasé on ti moman ansanm ? Pétèt fò-yo ké prévwa on moman adan pwogram a yo pou yo rivé fè sa (li Éfézyen 5:15, 16). Uzondu, sé on frè ki ka viv o Nijérya. I ka di-nou sa ki ka maché ba-y : « Lè an ka fè pwogram an mwen, an ka chwazi plizyè moman pou mwen é madanm an mwen pé sa pasé tibwen tan ansanm. É an pa’a lésé ayen anpéché-mwen pasé sé ti moman-lasa èvè madanm an mwen » (Filip. 1:10). Gadé kijan Anastasia, ki mayé èvè on rèsponsab a siwkonskripsyon an Mòldavi ka sèvi èvè tan a-y méyè fason ki tini. Mi sa i ka di : « An ka éséyé fè tout sé biten-la an ni a fè la lèwvwè mari an mwen ka okipé-y dè sa ki ka konsèwné sèwvis a-y. Konsa, apré nou ka pé pasé on ti moman ansanm. » Men vinvwè tèlman zò ni biten a fè, zò pa ka rivé touvé on ti moman yonn pou lòt, ka zò pé fè ?

11. Ki biten Akilas é Prisil té ka fè ansanm ?

¹¹ Ègzanp a Akilas é Prisil pé aprann sé moun-mayé-la onlo biten. Akilas é Prisil té mayé é sé frè é sè la ki té ka viv a épòk a yo la té enmé-yo onlo (Wom. 16:3, 4). Labib pa’a di-nou onlo biten asi jan sa té ka pasé adan mayé a yo. Men i ka di-nou kè lè yo té ka travay, lè yo té ka préché é lè yo té ka édé lézòt, yo té ka fè sa ansanm (Akt 18:2, 3, 24-26). An réyalité, lèwvwè Labib ka palé dè Akilas é dè Prisil, i pa’a jen ka palé dè yonn si i pa’a palé dè lòt la osi.

12. Ka on mari é madanm a-y pé fè pou yo pé sa pasé plis tan ansanm ? (gadé imaj-la osi).

¹² Kijan 2 moun-mayé pé imité Akilas é Prisil ? Moun-mayé, sonjé tousa zò ni a fè adan on jouné. Ès zò té’é pé fè sèwten adan sé biten-lasa ansanm olyé zò fè-yo zòchak dè koté a zòt ? Akilas é Prisil té ka préché ansanm. Ès zò ni labitid préché ansanm ? Anplisdisa, Akilas é Prisil té ka travay ansanm. Pétèt kè vou é moun-la ou mayé èvè-y la pa ka fè menm travay-la men lè zò ka fè sèwten biten an kaz-la, ès zò pa té’é pé fè-y ansanm ? (Ékl. 4:9). Siwvwè yonn ka édé lòt konsa, zò ké santi kè zò adan menm ékip-la é zò ké ni lokazyon palé yonn èvè lòt. Robert é Linda mayé dépi 50 an é mi sa Robert ka di : « An pé’é manti ba zòt, nou pa gè ni lokazyon fè dé biten pou anmizé-nou ansanm. Men lèwvwè an ka fè vésèl-la é kè madanm an mwen ka vin suiyé vésèl-la oben lèwvwè an ka raché vyé zèb é kè madanm an mwen ka vin èvè mwen, an ni tchè-kontan toubònman. Lèwvwè nou ka fè dé ti biten ansanm, sa ka fè-nou vin pi bon zanmi. É yonn ka vin enmé lòt pi fò. »

13. Pou 2 moun-mayé pé sa vin bon bon zanmi, ka yo dwèt fè ?

¹³ Ni on biten pou nou pa oubliyé, sé kè a pa paskè on mari é madanm a-y ka viv ansanm kè yonn ké vin pi bon zanmi èvè lòt. Mi sa on sè ki mayé é ki ka viv o Brézil ka di : « Konm nou ka viv an menm kaz-la nou té’é pé konpranndèdi nou ka pasé tan ansanm. Men a pa konsa sa ka pasé toutlè pas jòdijou ni tèlman biten ki pé distrè-nou. An rann-mwen kont kè menm lè nou ansanm, sa pa ka sifi. Fò an pran tan kouté mari an mwen, fè on ti kozé èvè-y é montré-y kè kèlkèswa sa i bizwen an toujou la pou-y. » Sé sa Bruno é madanm a-y, Tays, ka fè osi. Yo ka fè ansòt pou yonn toujou santi kè lòt-la la pou-y. Mi sa Bruno ka di : « Lèwvwè nou ni on ti moman pou nou, nou ka mèt téléfòn an nou akoté é nou ka pwofité dè ti moman-la nou ka pasé la ansanm. »

14. Si on mari é madanm a-y pa enmé pasé tan ansanm, ka yo pé fè ?

¹⁴ Men vinvwè vou é moun-la ou mayé èvè-y la pa enmé pasé tan ansanm, ka zò pé fè ? Pétèt kè yonn pa enmé menm biten ki lòt oben kè lèwvwè yonn èvè lòt, zò ka fè kòlè vit. Adan ka-lasa, ka zò pé fè ? An-nou woupalé dè ègzanp a difé-la nou palé an koumansman a awtik-la. Lèwvwè nou sòti limé difé-la, i po’o ka voyé gwo flanm. Pou nou ba-y plis fòs, fò-nou mèt bwa adan-y piti-a-piti, é chaklè, fò-nou chwazi dé mòso bwa ki pi gwo ki séla nou té ja mèt la. Menmjan-la, pétèt ou té’é pé pasé déotwa ti moman sèlman èvè moun-la ou mayé èvè-y la é pétèt ou té’é pé fè sa chakjou. A moman-lasa, zò pé éséyé fè on biten kè zò toulédé enmé ; pa fè on biten ki té’é pé fè-zòt fè kòlè (Jak 3:18). Konsa, piti-a-piti, yonn ké vin enmé lòt pi fò.

FÒ YONN MONTRÉ LÒT KÈ I NI RÈSPÉ POU-Y

15. Si 2 moun-mayé vé pa kè lanmou a yo fébli, poukwa fò yonn montré lòt kè i ka rèspèkté-y ?

¹⁵ Pou on mayé touné won fò yonn ni rèspé pou lòt. Nou pé konparé rèspé-la èvè òksijèn-la ki an lèw-la. Siwvwè on difé pa ni òksijèn, i ka étenn adan on ti moman. Menmjan-la osi, menmsi 2 moun-mayé enmé-yo, siwvwè pa ni rèspé, lanmou-lasa ké fébli adan on batzyé. Pawkont, pi yonn ni rèspé pou lòt adan mayé-la, pi yonn ké enmé lòt. Men on biten pou ou mèt fon an tèt a-w, sé kè sa ki pi enpòwtan, a pa kè vou ou di kè ou ka rèspèkté moun-la ou mayé èvè-y la men sé kè moun-la ou mayé èvè-y la santi kè ou ka rèspèkté-y. An-nou pran ègzanp a Penny é Aret ki mayé dépi plis ki 25 an. Mi sa Penny konstaté : « Konm yonn ka rèspèkté lòt, akaz an nou ni onlo lanmou. Yonn pé di lòt sa i ka pansé pas i sav kè lòt-la ké ba sa i ka di la onlo valè. » Alò, ka ou pé fè pou mari a-w oben madanm a-w santi kè ou ka rèspèkté-y vréman ? An-nou vwè ègzanp a Abraam é Sara.

16. Ka ègzanp a Abraam pé aprann sé mari-la ? (1 Pyè 3:7 ; gadé imaj-la osi).

¹⁶ Abraam té ka aji èvè onlo rèspé épi Sara. I té ka tchenn kont dè sa madanm a-y té ka pansé é dè sa i té ka rèsanti osi. On jou, ni on pwoblèm ki té ka pran tèt a Sara toubònman. I di Abraam tousa i té ni asi tchè a-y. I jous di Abraam kè sé té fòt a-y si yo té ka jwenn pwoblèm-lasa. Ès Abraam fè kòlè èvè-y pousa ? Awa, i té sav kè madanm a-y té ka rèspèkté otorité a-y é kè i toujou té ka soutyenn-li. I pran tan kouté-y é i éséyé touvé on solisyon (Jén. 16:5, 6). Ka sa ka aprann-nou ? Sé mari-la, sé zòt ki ni otorité-la pou pran désizyon pou fanmi a zòt (1 Kor. 11:3). Men, lè zò ni on désizyon a pran, zò ka montré madanm a zòt kè zò enmé-y lè zò ka pran tan pou kouté-y byen siwtou siwvwè désizyon-lasa ké chanjé sèwten biten pou madanm a zòt (1 Kor. 13:4, 5). É lèwvwè madanm a zòt ka santi-y istrésé é kè i bizwen di sa i ka rèsanti, kijan zò ka réyaji ? Ès zò ka rèspèkté sa i ka rèsanti é ès zò ka pran tan kouté-y byen konm i fo ? (li 1 Pyè 3:7). An-nou palé dè Angela é Dmitry. Sa ka fè prèskè 30 lanné kè yo mayé. Angela ka èspliké kijan mari a-y ka fè ansòt pou i santi kè i ka rèspèkté-y. Mi sa i ka di : « Lèwvwè an pa kontan oben lèwvwè an dékourajé oben kè an bizwen palé ba on moun, mari an mwen toujou paré pou kouté-mwen. I ni pasyans é i ka kouté-mwen menm lèwvwè an bizwen palé dè sa an ka rèsanti é kè an pa’a rivé rété kalm. »

17. Ka ègzanp a Sara pé aprann sé madanm-la ? (1 Pyè 3:5, 6).

¹⁷ Sara té ka rèspèkté Abraam. Sé pousa lèwvwè Abraam té ka pran on désizyon, i toujou té ka soutyenn-li (Jén. 12:5). On jou, dé moun vin owa Abraam alòskè i pa té ka atann-yo é i désidé akéyi-yo. Alò, i mandé Sara arété fè sa i té ka fè la pou i té pé sa fè on gran kantité pen (Jén. 18:6). Sara soutyenn mari a-y é tousuit i mété-y ka fè pen-la. Sé madanm-la, zò pé imité Sara. Kijan zò pé fè sa ? Lèwvwè mari a zòt ka pran on désizyon, soutyenn-li. Si zò ka fè sa, zò ké rann mayé a zòt pi solid (li 1 Pyè 3:5, 6). Talè la nou palé dè Dmitry. I ka èspliké ka madanm a-y ka fè pou montré kè i ka rèspèkté-y. Mi sa i ka di : « An ka vwè kè madanm an mwen ka fè éfò pou soutyenn-mwen toubònman é an ka aprésyé sa onlo pas menmsi i pa dakò èvè sé désizyon-la an ka pran la, i ka soutyenn-mwen. É si sa an désidé la pa maché, i pa’a kritiké-mwen. » Lèwvwè on moun ka rèspèkté-nou, nou ka rivé enmé-y pi fasilman !

18. Si 2 moun-mayé ka fè tousa yo pé pou yonn kontinyé enmé lòt, ki byenfé sa ké pwokiré-yo ?

¹⁸ Sa Satan vlé, sé kè sé krétyen-la ki mayé la pa enmé-yo ankò. I sav byen kè siwvwè yonn arété enmé lòt, yo pé rivé a ba Jéova do. Men ayen pé pa étenn vré lanmou-la ! Alò, fò-zò fè ansòt pou lanmou a zòt kon tala yo ka palé adan Chanté a Salomon la. Sa enpòwtan kè zò fè Jéova vin on poto-mitan adan mayé a zòt, kè zò òwganizé-zòt pou zò pasé on ti tan ansanm é kè zò rèspèkté sa lòt-la ka rèsanti é sa i bizwen. Fò zò byen désidé a fè sa. Si sé sa zò ka fè, zò ké ba Jéova lonnè, li ki sé Sous a vré lanmou-la. É kon on difé ki ka pétayé pas yo mèt bon bwa adan, yonn ké enmé lòt fò é sé ké pou touttan.