Poukwa fò-nou krenn Jéova ?

1-2. Dapré Sòm 25:14, ka pou nou fè pou nou vin bon bon zanmi èvè Jéova ?

SÈLON vou, ka pou 2 zanmi fè si yo vé lanmityé a yo diré ? Pétèt ou ké di kè fò yonn enmé lòt é kè fò yonn soutyenn lòt. Men pétèt ou pé’é di kè fò yonn krenn lòt. É poutan, vèwsé-la ki lyanné èvè tèm a awtik-lasa ka di kè si on moun vé vin bon bon zanmi èvè Jéova fò moun-lasa ‘krenn-li’ (li Sòm 25:14).

² Ki sa ka fè lontan nou ka sèvi Jéova, ki nou toufré adan lavérité, fò-noutout krenn Jéova. Men ka sa vé di krenn Jéova ? Kijan nou pé aprann fè sa ? É ka ègzanp a Abdyas, ègzanp a gran prèt-la Joad é ègzanp a wa Joas ka aprann-nou adan domenn-lasa ? An-nou réponn a sé kèsyon-lasa.

KRENN BONDYÉ, KA SA VLÉ DI OJIS ?

3. Èspliké kijan lèwvwè nou pè on biten, sa pé pwotéjé-nou.

³ Souvantfwa, lè nou pè on biten sé pas nou sav kè biten-lasa pé fè-nou soufè. Men pè-lasa pé ni bon koté a-y piskè sa pé pousé-nou aji èvè sajès. Pa ègzanp, lèwvwè on moun pè tonbé adan on fon, i pé’é maché òbò on falèz. Oben lèwvwè on moun ka vwè on danjé ka vin, i ké ba danjé-lasa gran lè a-y pas i ké pè on biten rivé-y. É si on moun bon zanmi èvè ondòt moun, i pé’é di moun-lasa nenpòt kibiten é i pé’é fè-y nenpòt kibiten nonplis pas i pè pèd zanmi a-y.

4. Kijan Satan vé kè nou krenn Jéova ?

⁴ Satan vé kè nou krenn Jéova on mannyè ki négatif. I vé kè nou pè-y. Alò i ka éséyé fè moun kwè kè Jéova sé on Bondyé ki enmé pini moun, ki enmé fè kòlè é kè pa ni mwayen fè-y plézi. Sé lidé-lasa Élifaz té éséyé mèt an tèt a Jòb (Jòb 4:18, 19). Sa Satan té’é vlé, sé kè tèlman nou pè Jéova, nou arété sèvi-y. Pou on biten konsa pa rivé, fò-nou aprann rèspèkté Jéova é fò-nou pè fè-y lapenn.

5. Krenn Bondyé, ka sa vé di ojis ?

⁵ On moun ki ka krenn Bondyé enmé-y é i vé pa fè ayen ki té’é pé fè-y pèd lanmityé-la i ni èvè-y la. Sé sa Jézi té ka rèsanti. I té ka krenn Bondyé (Ébr. 5:7). I pa té ka trapé latranblad douvan Bondyé (Iz. 11:2, 3). Okontrè, i té enmé-y onlo toubònman é i té anvi obéyi-y (Jan 14:21, 31). Nou osi, kon Jézi, nou ni onlo onlo rèspé pou Jéova é nou anvi adoré-y èvè tout tchè an nou paskè Jéova sé on moun ki plen lanmou, ki ni sajès, ki jis é ki puisan. Nou sav kè i enmé-nou fò é kè jan-la nou ka réyaji la lè i ka anségné-nou ni on éfé asi-y : swa sa pé fè-y plézi oben swa sa pé fè-y lapenn (Sòm 78:41 ; Pwov. 27:11).

APRANN KRENN BONDYÉ

6. Ka nou pé fè pou nou aprann krenn Bondyé ? (Sòm 34:11).

⁶ Lè nou fèt, nou pa té ka krenn Bondyé ; sé aprann nou ka aprann fè sa (li Sòm 34:11). Lè nou ka pran tan pou gadé lakréyasyon, sé on bon mwayen pou nou aprann fè sa. Pli nou ké gadé sé biten-la Jéova kréyé la, pi nou ké vwè jan i ni sajès, jan i ni puisans é jan i enmé-nou, é pi nou ké ni rèspé é lanmou pou-y (Wom. 1:20). Mi sa on sè non a-y sè Adrienne di : « Lèwvwè an ka gadé sa Jéova kréyé, an ka vwè balan sajès i ni é an ka di-mwen konsa kè i sav sa ki pibon pou mwen. » Afòs i médité asi sa, mi sa i fin pa di : « An pa anvi fè ayen ki té’é pé détwi lanmityé-la an ni la èvè Jéova pas sé li ki ban-mwen lavi. » Ès ou té’é pé pran on ti moman an simenn-lasa pou-w pé sa réfléchi asi on biten Jéova kréyé ? Sa ké édé-w ni plis rèspé é plis lanmou pou-y (Sòm 111:2, 3).

7. Lapriyè sé ondòt mwayen pou nou aprann krenn Bondyé. Kijansa ?

⁷ Ondòt biten nou pé fè pou nou aprann krenn Bondyé, sé pran labitid priyé-y. Pi nou ka priyé-y, pi nou ka aprann konnèt-li. Chakfwa nou ka mandé-y fòs pou nou pé sa andiré on éprèv, nou ka sonjé jan i ni puisans. Chakfwa nou ka di-y mèsi davwa i sakrifyé Gason a-y pou nou, sa ka fè-nou sonjé jan i enmé-nou. É lèwvwè nou adan on pwoblèm é kè nou ka sipliyé-y pou i pé sa édé-nou, sa ka fè-nou sonjé jan i ni sajès. Lè nou ka fè dé priyé kon séla, sa ka édé-nou ni plis rèspé pou Jéova é sa ka édé-nou pou nou byen désidé a pa fè ayen ki té’é pé anpéché-nou rété bon zanmi èvè-y.

8. Ka pou nou fè pou nou pa jen arété krenn Bondyé ?

⁸ Pou nou pa jen arété krenn Bondyé, lè nou ka étidyé Labib, fò-nou chèché a vwè ka sé ègzanp-la ki an Bib-la ka aprann-nou, ki sé on bon ègzanp ki sé on mové ègzanp. Sé on òbjèktif pou nou toujou ni lè nou ka étidyé. An-nou koumansé èvè ègzanp a 2 sèwvitè a Jéova ki té fidèl : Abdyas ki té ka okipé-y dè kaz a wa Akab é Joad ki té on gran prèt. Aprésa, nou ké vwè ka nou pé aprann dè ègzanp a Joas, on wa a Jida ki té fidèl a Jéova lèwvwè i koumansé gouvèné men ki touné an chimen.

KRENN BONDYÉ É AJI ÈVÈ KOURAJ KON ABDYAS

9. Konm Abdyas té ka krenn Jéova, ki jan dè moun i vin ? (1 Wa 18:3, 12).

⁹ Prèmyé fwa yo ka palé dè Abdyasb adan Bib-la, yo ka di kè i sé on moun ki « té ka krenn Jéova onlo toubònman » (li 1 Wa 18:3, 12). Lèfètkè i té ka krenn Bondyé, ki jan dè moun i vin ? Ében i vin on moun ki té onèt é on moun yo té pé fè konfyans. Dayè, wa-la ba-y okipé dè kaz a-y (gadé Néémi 7:2). Konm Abdyas té ka krenn Bondyé, sa édé-y vin on moun ki té ni onlo kouraj osi. É an tan-lasa, fò ou té ni kouraj paskè sé Akab ki té ka gouvèné é non sèlman misyé-lasa té méchan men i « fè biten pli mové an zyé a Jéova ki touséla ki té avan-y la » (1 Wa 16:30). Anplisdisa, madanm a wa-la sé té Jézabèl, on madanm ki té ka adoré Baal. Tèlman i té hay Jéova, i éséyé fin bat èvè vré adorasyon-la adan wayòm di Nò la. I jous fè-yo tchouyé onlo adan pwofèt a Bondyé (1 Wa 18:4). Nou ka tou konprann kè a épòk a Abdyas, pou ou té adoré Jéova sa pa té senp menm !

10. Poukwa nou ka di kè Abdyas montré kè i té ni onlo kouraj toubònman ?

¹⁰ Abdyas montré kè i té ni onlo kouraj toubònman. Ka ki ka fè-nou di sa ? Lè Jézabèl mété-y ka chèché pwofèt a Bondyé pou tchouyé-yo, Abdyas « kaché 100 pwofèt a Jéova adan 2 gwòt, 50 adan yonn, 50 adan lòt-la » é i « té ka menné pen é dlo ba yo » (1 Wa 18:13, 14). Siwvwè Jézabèl té vin sav sa, i té’é fè-yo tchouyé Abdyas. É sèten Abdyas pa té anvi mò. Alò i dwèt té pè ! Men i té enmé Jéova é sèwvitè a-y plis ki pwòp vi a-y.

11. Kijan onlo sèwvitè a Jéova ki ka viv a épòk an nou ka montré kè yo ni kouraj kon Abdyas ? (gadé imaj-la osi).

¹¹ Jòdijou, onlo sèwvitè a Jéova pa ni dwa adoré Jéova adan péyi-la yo ka viv la. Frè é sè an nou ni onlo rèspé pou sé gouvènman-la, men kon Abdyas, yo pa dakò pou arété sèvi Jéova (Mat 22:21). Yo ka montré Jéova kè yo ka krenn-li lèwvwè yo ka kouté-y olyé yo kouté lézòm (Akt 5:29). É yo ka montré-y kè yo ka kouté-y lèwvwè yo ka kontinyé préché bon nouvèl-la é kè yo ka kontinyé réini-yo, menmsi yo ka fè sa on mannyè pou ponmoun pa suiv sa (Mat 10:16, 28). Anplisdisa, yo ka òwganizé-yo pou frè é sè a yo toujou ni nouriti èspirityèl la yo bizwen la. An-nou palé dè Henri, on frè ki ka viv adan on péyi an Afrik. Pannan on tan, nou pa té ni dwa adoré Jéova adan péyi-lasa. Alò pannan tout péryòd-lasa, i té dakò pou ay ba frè é sè a-y piblikasyon oben dòt biten pou yo rété bon bon zanmi èvè Jéova. Mi sa i maké : « An sé on moun ki timid. Si an té ni kouraj pou an fè sa, an sèten kè sé pas an ni onlo onlo rèspé pou Jéova. » Ès ou ka pansé ou pé ni kouraj kon Henri té ni kouraj ? Ében ou ké pé ni kouraj konsa siwvwè ou ka fè ansòt pou-w toujou krenn Bondyé.

KRENN BONDYÉ É MONTRÉ-W FIDÈL KON JOAD GRAN PRÈT-LA

12. Kijan gran prèt-la Joad é madanm a-y montré kè yo té fidèl a Jéova toubònman ?

¹² Joad, gran prèt-la, montré kè i té fidèl a Bondyé é i défann vré adorasyon-la. Poukwa i fè sa ? Pas i té ka krenn Jéova. I montré sa byen lèwvwè Atali, fi a Jézabèl, vin renn é kè i koumansé gouvèné Jida alòskè i pa té ni dwa fè sa. Pèp-la té pè madanm-lasa pas i pa té ni pityé pou ponmoun é i té vé gouvèné atoupri. I jous éséyé tchouyé tout timoun a wa-la pou yo pa té monté asi twòn-la alòskè sé timoun-lasa sé té pitit a pwòp gason a-y ! (2 Kron. 22:10, 11). Ni yonn adan yo ki pa mò, Joas. I rété vivan pas Jèochabat sové-y. Madanm-lasa sé té madanm a Joad. Li èvè mari a-y, yo kaché timoun-la é yo okipé-yo dè-y. Lè yo fè sa, yo fè on biten pou désandan a David pa té disparèt. Magré Joad té ja ni on bèl laj, i rété fidèl a Jéova é i pa tranblé douvan Atali (Pwov. 29:25).

13. Lèwvwè Joas vin ni 7 an, kijan Joad montré Jéova ankò kè i té fidèl a-y ?

¹³ Ondòt kou ankò, Joad montré Jéova kè i té fidèl a-y. Lèwvwè Joas vin ni 7 an, Joad mèt on plan si pyé ki té’é pèwmèt Joas vin wa. Joas té on érityé a David ki té ni dwa gouvèné asi twòn-la. Si plan-lasa pa té ka maché, yo té’é pé tchouyé Joad. Men konm Jéova mèt men a-y é kè i béni-y, plan-la maché. Sé chèf a pèp-la é sé Lévit-la soutyenn Joad, kifè i fè Joas vin wa é i fè-yo tchouyé Atali (2 Kron. 23:1-5, 11, 12, 15 ; 24:1). Aprésa, « i fè on alyans ant Jéova, wa-la é sé moun-la ki té adan pèp-la, pou yo pwomèt kè yo ké kontinyé montré kè yo sé pèp a Jéova » (2 Wa 11:17). « Anplisdisa, i mèt moun pou véyé pòt a tanp a Jéova, pou anpéché moun ki pa pwòp pou Bondyé antré adan tanp-la » (2 Kron. 23:19).

14. Kijan yo onoré Joad davwa i onoré Jéova ?

¹⁴ Jéova té ja di : « Moun ki ka onoré-mwen, an ké onoré-yo. » É nou pé di kè Jéova onoré Joad poudèbon menm (1 Sam. 2:30). I fè ansòt pou yo maké adan Labib jan gran prèt-lasa té fidèl. Konsa, sa pé sèvi-nou ègzanp (Wom. 15:4). É Lèwvwè Joad mò, Jéova fè-yo ba-y on bèl lonnè toubònman : « Yo téré-y adan Vil a David owa sé wa-la, pas i té fè onlo bon biten an Izrayèl pou vré Bondyé-la é pou tanp a-y » (2 Kron. 24:15, 16).

15. Ka istwa a Joad ka aprann-nou ? (gadé imaj-la osi).

¹⁵ Istwa a Joad pé édé-noutout krenn Jéova plis ankò. Sé ansyen-la pé imité Joad lèwvwè yo ka fè tousa yo pé pou yo pwotéjé lasanblé-la (Akt 20:28). Ègzanp a Joad pé itil pou frè é sè an nou ki ja ni on bèl laj. Sa ka montré-yo kè siwvwè yo ka krenn Jéova é kè yo ka kontinyé rété fidèl a-y, i pé sèvi èvè yo pou akonpli pwojé a-y. I pé’é jen mèt-yo akoté. Jan-la Jéova aji la èvè Joad pé itil pou sé jenn-la osi. Sa ka montré-yo kijan yo pé aji épi onlo rèspé èvè frè é sè ki ja ni on bèl laj, siwtou si sé frè é sè lasa ka sèvi Jéova dépi onpakèt lanné (Pwov. 16:31). É pou fin, jan-la sé chèf a pèp-la é sé Lévit-la soutyenn Joad pé itil pou noutout. An-nou imité-yo, an-nou kouté ‘séla ki ka dirijé-nou la’ pou montré-yo kè nou ka soutyenn-yo (Ébr. 13:17).

PA FÈ KON WA JOAS

16. Poukwa nou pé di kè Joas sé té on wa ki té fèb ?

¹⁶ Lèwvwè Joas koumansé gouvèné, Joad té ka édé-y maché dwèt (2 Wa 12:2). Sé pousa, tout tan-la Joad té la pou ba Joas konsèy, Joas té ka chèché a fè Jéova plézi. Men lèwvwè Joad mò, i mété-y ka kouté sé prens-la, alòskè sé moun-lasa sé té dé apòsta. Ki rézilta sa bay ? Ki Joas ki pèp-la koumansé ka « adoré poto sakré é idòl » (2 Kron. 24:4, 17, 18). Sa fè Jéova lapenn, men magrésa i « té ka voyé pwofèt anmitan a yo pou fè-yo wouvin owa a-y […] men yo pa té vé kouté ». Pa menm Zakari, gason a Joad, yo pa kouté. É poutan sé té pwofèt a Jéova é i té prèt, anplisdisa sé té kouzen a Joas. Apré tousa fanmi a Zakari té fè ba-y, Joas fè-yo tchouyé Zakari ! (2 Kron. 22:11 ; 24:19-22).

17. Ka ki rivé Joas ?

¹⁷ Joas pa té ka krenn Jéova é sa mal fin ba-y. Jéova té ja avèti-y. I té di-y konsa : « Moun ki ka méprizé-mwen, an ké fè-yo wont » (1 Sam. 2:30). Sé Siriyen-la té ni on toupiti lawmé men yo ba lawmé a Joas on plich alòskè lawmé a-y « té ni onpakèt sòlda adan ». Yo jous blésé Joas « oséryé menm ». Apré sé Siriyen-la pati, pwòp sèwvitè a Joas tchouyé-y pas i té tchouyé Zakari. Pou pèp-la, wa-lasa té tèlman méchan kè « yo pa téré-y adan tonm a sé wa-la » (2 Kron. 24:23-25 ; gadé nòt-la ki asi « fils de Barakia » adan Matyé 23:35 adan Bib-la ki fèt pou étidyé la an fransé).

18. Dapré Jérémi 17:7, 8, ka pou nou fè pou nou pa sanm Joas ?

¹⁸ Ka istwa a Joas pé aprann-nou ? Joas té ka sanm sé pyébwa-la, ki bizwen yo mèt on biten pou koré-yo pou yo rété dwèt, pas rasin a yo pa k’ay fon an tè-la. Lèwvwè moun-la ki té ka édé Joas maché dwèt vin mò, kivédi Joad, é lèwvwè Joas mété-y ka kouté sé apòsta-la, i koumansé maché kochi é i pa rété fidèl a Jéova. Ègzanp-lasa ka montré-nou byen kè fò pa nou ka krenn Bondyé yenki pas nou ni dé moun ki ka ban-nou on bon ègzanp adan fanmi an nou oben adan lasanblé-la. Pou nou rété bon bon zanmi èvè Jéova, fò-nou fè ansòt pou nou enmé-y é rèspèkté-y plis ankò. Nou ka fè sa lè nou ka pran labitid étidyé, médité é priyé (li Jérémi 17:7, 8 ; Kol. 2:6, 7).

19. Ka Jéova ka mandé-nou fè ?

¹⁹ Jéova pa’a mandé-nou fè onlo biten. An déotwa mo, mi sa i ka mandé-nou fè dapré Éklézyas 12:13 : « Krenn vré Dyé-la é suiv komandman a-y, pas sé tousa on nonm dwèt fè. » Siwvwè nou ka krenn Bondyé, nou ké ni fòs pou nou fasadé èvè éprèv ki ka vin é nou ké rété solid kon Abdyas é Joad. É ayen pé’é pé anpéché-nou rété bon bon zanmi èvè Jéova.