Lè ou ka montré lézòt kè ou ka entérésé-w a yo, ou ka jwenn bénédisyon ki ka diré lontan

Papa té pastè adan Légliz Ini a Lèkanada. Chak dimanch, i té ka voyé-mwen lensisyon èvè sè an mwen, é aprésa, nou té k’ay jwenn-li pou prèch a-y a 11 è. Laprémidi, nou té k’ay an sal di Wayòm la èvè manman. Sé sa ki fè si nou pa té ni dimal a vwè ki diférans ki té tini ant sé 2 rèlijyon-la.

Manman pawtajé sa i té aprann èvè bon bon zanmi a-y, Bob é Marion Hutcheson, é yo osi, yo aksèpté lavérité. An 1958, fanmi-lasa menné-mwen Nouyòk èvè yo, pou nou té ay adan on lasanblé entèwnasyonal ki té ka diré 8 jou. Tèm a lasanblé-lasa sé té « La volonté divine ». Twa tigason a yo té la osi èvè nou. Lè an ka réfléchi, an ka rann-mwen kont kè sa dwèt mandé-yo bon éfò, men lasanblé-lasa ka fè pawti a yonn adan sé pi bèl moman-la an ja viv la.

DÉ FRÈ É SÈ ÉDÉ-MWEN POU AN FÈ PLIS POU JÉOVA

Lè an té jennmoun, nou té ka viv adan on fèwm. A pa ti enmé an té enmé okipé-mwen dè sé bèt-la ! Sèl biten ki té an tèt an mwen, sé té vin vétérinè. Manman palé sa èvè on ansyen a lasanblé-la. Ansyen-la palé ban mwen jantiman. I fan’an sonjé kè nou ka viv adan « sé dènyé jou-la ». É i fè-mwen réfléchi asi sa ki té’é pé rivé lanmityé an mwen èvè Jéova siwvwè an té ka pasé onlo lanné ka fè étid (2 Tim. 3:1). Anfinaldikont, an désidé pa ay linivèwsité.

Men an té ka mandé-mwen ka an té’é fè lè an té’é fin èvè lisé-la. Sé vré, chak wikenn an té an prédikasyon, men an pa té enmé sa. An pa té ka vwè-mwen ka vin pyonyé menm. Anplisdisa, pap’an mwen é tonton an mwen pa té ka sèvi Jéova, é yo té dèyè do an mwen pou an té travay aplentan adan on gran antrèpriz ki té ka fè asirans a Toronto. Tonton an mwen té ni on bèl plas adan antrèpriz-lasa, kifè an aksèpté travay-la.

A Toronto, an té ka fè onpakèt lè siplémantè adan travay-la, é an té ka pasé onlo tan èvè moun ki pa té ka sèvi Jéova. Sé sa ki fè si an pa té ka gè préché, é an té ka raté onlo réinyon. Odépa, an té ka viv aka granpè an mwen, ki pa té Témwen, men lè i vin mò, an té oblijé ay chèché on koté pou rété.

Frè é sè Hutcheson ki té menné-mwen lasanblé an 1958, té kon on fanmi pou mwen. An 1960, an pran batèm anmenmtan ki gason a yo, John. Aprésa, John vin pyonyé, é sa ban-mwen anvi préché plis. Sé frè-la adan lasanblé-la rann-yo kont kè an té ka fè bon pwogré, kifè yo jous mèt-mwen sèwvitè a l’École du ministère théocratiquea.

AN TOUVÉ ON MOUN ÈSTRAÒWDINÈ POU TRAVAY ÈVÈ MWEN É AN VIN PYONYÉ

An 1966, an mayé èvè Randi Berge, on sè ki té pyonyé é ki té ka pòté bon mannèv an prédikasyon. A pa ti anvi i té anvi ay la yo té bizwen ranfò ! Rèsponsab a siwkonskripsyon an nou té ka entérésé-y a nou, é i ankourajé-nou ay soutyenn lasanblé a Orillia, an Ontario. Alò nou maré paké an nou, é nou ay anba-la.

Rivé nou rivé Orillia, an vin pyonyé pèwmanan kon Randi. Balan-la i té ni la té détenn asi mwen ! Aprésa, an travay rèd pou an vin on bon pyonyé é an koumansé rèsanti jwa-la on moun ni la lè i ka wouvè Bib a-y, é kè i ka édé dòt moun konprann lavérité. Lè nou té Orillia, nou rivé édé on nonm é madanm a-y fè chanjman adan vi a yo é vin sèwvitè a Jéova. A pa ti kontan nou té kontan !

NOU KA APRANN ONDÒT LANG É NOU KA CHANJÉ MANTALITÉ AN NOU

On jou, nou té dè pasaj a Toronto, é an fè konésans a Arnold MacNamara, yonn adan sé frè-la ki té ka jéré aktivité a Bétèl-la. I mandé-nou si sa té’é di-nou dè vin pyonyé èspésyal. An réponn onfwamenm : « Men wi, ka ou ka di la ? Dépi a pa o Kébèk ! » Koté-lasa, sé fransé moun ka palé. Onlo moun Kanada ki ka palé anglé té ka vwè Kébèk on vyé jan é mantalité-lasa té ka aji asi mwen. A épòk-lasa, té ni on mouvman politik o Kébèk ki té ka lévé gaoulé toutlè pas yo té vé Kébèk pran endépandans a-y.

Arnold réponn-mwen konsa : « Pou lèmoman, sèl koté lafilyal ka voyé pyonyé èspésyal, sé o Kébèk. » Fin i té fin di sa, an di-y banko. An té ja sav Randi té’é kontan ay préché an téritwa-lasa. Kèlkè tan apré, an rann-mwen kont kè sé té on bon désizyon nou té pran la toubònman !

Mwen é Randi, nou pati èvè ondòt frè é madanm a-y, pou nou ay Rimouski, on vil ki té apépré a 540 kilomèt o nò a Monréal. Avan nou té pati anba-la, pannan 5 simenn, nou pran kouw pou aprann palé fransé, men nou té ni bon enpé pwogré a fè toujou. Dayè on jou, pannan on réinyon, sé mwen ki té ka fè sé kominikasyon-la, é olyé an té di kè adan pwochen lasanblé an nou, té’é ni onlo « délégués autrichiens », an di té’é ni onlo « délégués autruches ».

A Rimouski, plizyè moun vin jwenn-nou. Té ni 4 sè sélibatè ki té ka pòté bon mannèv an prédikasyon, frè é sè Huberdeau é 2 tifi a yo. Fanmi Huberdeau té ka louwé on kaz, ki té ni 7 chanm adan. Yo té ka kriyé-y « la Maison-Blanche » akòz dè koulè a sé poto-la é parapòt a douvan a kaz-la. Sé enki pyonyé ki té ka vin rété la é yotout té ka édé fanmi-la péyé lwayé-la. An jénéral, nou té ka apépré a 12 oben 14 moun ka louwé sé chanm-la. Difètkè mwen é Randi té pyonyé èspésyal, nou té ka préché lèmaten, laprémidi é lèswa. Nou té toujou ni on moun anba men an nou pou préché èvè nou, menm pannan livè, lè té ni bon fwadi lèswa. A pa ti kontan nou té ka kontan !

Nou té enmé sé pyonyé-la tèlman fò kè sé konsidiré yo té fanmi an nou. Dépawfwa, nou té ka limé on gran difé é nou té ka sizé alantou a-y. Délè nou té ka fè sa nou té ka kriyé « jouné pierogi » osi. Jou-lasa, nou té ka kuit ravioli kè nou té ka préparé ansanm. É pli souvan ki rarman, lèsanmdi swa, konm té ni on frè ki té konnèt jouwé mizik, nou té ka chanté é nou té ka dansé.

Prédikasyon-la té ka maché byen menm adan téritwa a Rimouski. Onlo étidyan a Labib pwogrésé, yo pran batèm, é apré 5 lanné, té ja ni 35 pwoklamatè adan lasanblé-la !

O Kébèk, nou trapé on bèl fòwmasyon adan prédikasyon-la. Nou vwè kijan Jéova édé-nou ki sé adan ministè an nou, ki sé pou nou té ni sa nou té bizwen. Anplisdisa, nou aprann enmé moun ki ka palé fransé, nou aprann enmé lang a yo é kilti a yo. Sé sa ki fè si nou vin aprann enmé dòt kilti ankò (2 Kor. 6:13).

Lèwgadé, lafilyal mandé-nou déménajé pou ay adan on vil yo ka kriyé Tracadie, ki anlè kòt ès a Nouveau-Brunswick. Nou pa té ka atann-nou a sa menm. I pa té mòl pou nou. Nou té sòti signé pou rantré adan on nouvo apawtèman. An té ka travay antankè pwofésè adan on lékòl, é an té signé on kontra pou travay-lasa pa pran tout tan an mwen. Anplis, nou té ni détwa étidyan ki té toufré vin pwoklamatè. Pou fin, nou té ka konstwi on sal di Wayòm, é sé travo-la poto’o paré pou yo bout.

Nou pasé tout wikenn-la ka priyé anrapò èvè chanjman-lasa, é nou ay vizité vil a Tracadie. Vil-lasa pa té ni ayen a vwè èvè Rimouski. Men konm sé la Jéova té vlé nou sèvi-y, nou désidé ay enstalé-nou la. Nou mèt Jéova a léprèv, é i woté tout difikilté nou jwenn asi chimen an nou (Mal. 3:10). Randi sé on moun ki ni bèl kalité, i toujou ka fè entéré a lézòt pasé avan ta-y é i enmé ri. Alò, kon dabitid, nou rivé adapté-nou a nouvo vi an nou san pon pwoblèm.

Adan nouvo lasanblé an nou, sé onsèl ansyen ki té ni, on dénonmé Robert Ross. Li é madanm a-y, Linda, té ja sèvi antankè pyonyé adan lasanblé-lasa é yo té désidé rété la lèwvwè yo fè prèmyé timoun a yo. Sé vré kè okipé dè tigason a yo té ka pran-yo onlo tan, men yo akéyi-nou èvè onlo lanmou, yo té byen désidé a pòté bon mannèv an prédikasyon é tousa ankourajé-nou onlo.

JWA-LA OU NI LA LÈ OU KA SÈVI JÉOVA KÈLKANSWA SA I BA-W FÈ

Nou sèvi antankè pyonyé a Tracadie pannan 2 lanné, aprésa, tchè an nou soté lè yo mandé-nou travay adan siwkonskripsyon-la. Pannan 7 an, nou vizité plizyè lasanblé an anglé, é aprésa yo voyé-nou adan on siwkonskripsyon an fransé o Kébèk. Frè-la ki té rèsponsab a distrik adan réjyon-lasa sé té Léonce Crépeaultb. I té ni labitid félisité-mwen pou diskou an mwen. Men apré i té fè sa, i té ka mandé-mwen : « Ès ou ka vwè kijan ou té’é pé fè ansòt pou sé lidé-la pi itil pou sé frè-la ? » I té ka entérésé-y a mwen é sa té sensè. Alò, sa ban-mwen anvi vin pi prési adan jan an ka anségné é fè ansòt pou sa an ka di fasil a konprann.

Si ni on biten an pa dwèt ké jen oubliyé, sé lasanblé entèwnasyonal la « La foi victorieuse », ki fèt Monréal an 1978. Yo té mandé-mwen travay adan kafétérya-la. Nou té ka atann 80 000 moun, é yo té sòti chanjé mannyè sèwvis-lasa té pou fonksyoné : matéryèl-la, sa yo té ka prévwa konm rèpa, é mannyè pou té préparé-yo, tousa té diféran. Nou té ni 20 frijidè ki té laj toubònman, men a pa toutlè yo té ka maché. Jou-la avan lasanblé-la, lavèy oswa, té ni on gwo évènman a ispò adan istad-la nou té kay sèvi èvè-y la, kifè sé enki koté minui nou té pé koumansé enstalé-nou adan. É fò-nou té limé sé fouw-la avan solèy té lévé, pou pé sa préparé sa ki fo pou ba sé moun-la manjé lèmaten. A pa ti las nou té las, men lè an rété gadé jan sé volontè-la ki té ka kolaboré èvè nou la té ka travay rèd, jan yo té ni bèl kalité, é jan yo té enmé ri, sa aprann-mwen onlo biten. Nou vin bon bon zanmi èvè yo, é jousalè, yo sé bon moun an nou toujou. An tèlman kontan an té la pou lasanblé-lasa ! Sé té on moman enpòwtan adan istwa a Lèkébèk davwa sé an sèktè-lasa yo té pèwsékité frè é sè an nou rèd menm koté 1940 é 1950 !

Pannan sé gran lasanblé-la a Monréal, an kolaboré èvè plizyè frè, é yo aprann-mwen tèlman biten ! Ni on lanné, sé frè David Splane, ki ka fè pawti a Komité santral la konnyéla, ki té ka jéré biwo a lasanblé-la. Ondòt lanné, sé mwen yo bay rèsponsabilité-lasa. Men apapousa David pa té kontan kolaboré èvè mwen, byen okontrè !

Apré nou rété adan siwkonskripsyon-la pannan 36 an, yo nonmé-mwen fòwmatè a Lékòl pou sé ansyen a sé lasanblé-la. Sé té an 2011. An 2 lanné, mwen é Randi dòmi adan 75 kabann diféran, men sé sakrifis-lasa té vo lapenn toubònman. Chakfwa on simenn-lékòl té ka bout, a pa tibwen rèkonésans sé ansyen-la té ka ni pou Komité santral la. Sé ansyen-la té ka rann-yo kont kijan lanmityé a yo èvè Jéova té enpòwtan pou sé frè a Komité-la.

Kèlkè tan apré, an vin fòwmatè pou Lékòl pou évanjélizatè a Wayòm-la. Byensouvan, sé zélèv-la té ka santi kè yo té ka néyé anba tousa yo té ni a fè chakjou : rété sizé pou sé lèson-la pannan 7 è-d-tan é dèvwa touléswa pannan 3 è-d-tan. Anplisdisa, fò-yo té préparé 4 ou 5 sijé anviwon pou chak simenn. Mwen é lòt fòwmatè-la, nou té ka èspliké-yo kè si Jéova pa té ka édé-yo, yo pa té’é jen rivé about. An pé’é jen oubliyé kijan sé zélèv-la té ka touvé-yo étoné lè yo té ka konstaté kè pas yo té ka konté asi Jéova, yo té ka rivé fè lontan plis ki sa yo té konprann.

LÈ OU KA MONTRÉ LÉZÒT KÈ OU KA ENTÉRÉSÉ-W A YO, OU KA JWENN BYENFÉ KI KA DIRÉ LONTAN

Konm manman té ka montré lézòt kè i té ka entérésé-y a yo, moun ki té ka étidyé Labib èvè-y té ka fè pwogré. É mannyè manman té ka aji jous édé papa vwè lavérité ondòt jan. Lè manman mò, 3 jou apré, alòskè nou pa té ka atann-nou a sa, papa vin an sal di Wayòm la pou kouté diskou piblik la, é pannan sé 26 lanné-la ki pasé la apré, i pa jen arété vin réinyon. Menmsi papa pa jen pran lèbatèm, sé ansyen-la di-mwen kè sé toujou li ki té prèmyé rivé adan sal di Wayòm la.

Manman-mwen toujou ba timoun a-y lègzanp, é sa aji asi nou toubònman. 3 sè an mwen é mari a yo ka sèvi Jéova é yo fidèl. An ni 2 sè ki bétélit, yonn o Pòwtigal é yonn an Ayiti.

Konnyéla, mwen é Randi nou pyonyé èspésyal a Hamilton, an Ontario. Lè nou té ka sèvi adan siwkonskripsyon-la, nou té byen kontan ay èvè sé frè é sè la lè yo té ka viré vwè moun oben lè yo té ka fè on étid. Men aprézan, lè nou ka vwè jan étidyan an nou ka pwogrésé é jan yo ka vin zanmi èvè Jéova, sa ka mèt onlo jwa an tchè an nou. Nou ka vin bon bon zanmi èvè frè é sè a nouvo lasanblé an nou. Lè nou ka vwè kijan Jéova la èvè yo, ki lè biten-la bon, ki lè biten-la rèd, sa ka ban-nou fòs toubònman.

Adan vi an nou, ni onlo moun ki montré kè yo té ka entérésé-yo a nou vréman é lè nou ka viré sonjé tout sé moun-lasa, a pa tibwen rèkonésans nou ni pou yo. Nou osi, nou fè onlo éfò pou montré lézòt kè nou té ka entérésé-nou a yo vréman. Nou ankourajé-yo itilizé kapasité a yo pou sèvi Jéova a san pou san (2 Kor. 7:6, 7). Pa ègzanp, adan on fanmi, madanm-la, tigason-la é tifi-la té ka sèvi Jéova aplentan. Alò, an mandé mari-la si sa té ja vin an lidé a-y dè vin pyonyé osi. I réponn-mwen kè i ja ka soutyenn 3 pyonyé. Alò an pozé-y kèsyon-lasa : « Ou ka di ou pé soutyenn-yo myé ki Jéova ? » Fanmi a-y té ni tchè-kontan é an ankourajé-y pou i pé sa pran gou a sa osi. Sis mwa pa ni tan pasé, i té ja pyonyé.

Mwen é Randi, nou ké kontinyé « rakonté jénérasyon-la ki ka vin la » tout « biten èstraòwdinè » Jéova fè. Sa nou té’é swété, sé kè yo ni tchè-kontan kon nou adan sèwvis a yo ! (Sòm 71:17, 18).