Ka sé 40 dènyé jou-la Jézi pasé asi latè la ka aprann-nou ?

1-2. Ka ki rivé pannan sé 2 disip-la té ka maché pou ay Émayis ? (Lik 24:13-35).

NOU LÈ 16 nizan 33. Sé disip-la tris toubònman é yo pè. Ni 2 adan yo ki ka lésé Jérizalèm pou ay Émayis (vil-lasa ka touvé-y a 11 kilomèt dè Jérizalèm). Dé bra a sé disip-la kasé menm pas yo sòti tchouyé Jézi é sé-y yo té ka suiv. Pou yo, konm sé-y ki té Mési-la, i té’é fè dé biten èstraòwdinè pou sé Juif-la. Men alèla, konm i mò, tout krab-la mò an bari-la. Men sa yo pa té sav la sé kè on bèl ti siwpriz té ka atann-yo.

² On misyé yo pa konnèt ka vin jwenn-yo é i ka koumansé maché ansanm èvè yo. Sé disip-la ka rakonté-y sa ki rivé Jézi é kijan sa té rèd ba yo toubònman. Aprésa, boug-la ka koumansé palé dè biten yo pé’é jen oubliyé. « I koumansé pa sa Moyiz é tout sé Pwofèt-la té maké » é i ka di-yo poukwa fò Mési-la té soufè é poukwa fò i té mò. Lè sé 3 nonm-la ka rivé Émayis, boug-la ka di-yo kimoun i yé : i sé Jézi kè Bondyé résisité ! A pa ti kontan sé disip-la kontan sav kè Jézi résisité (Lik 24:13-35).

3-4. Ka ki rivé disip a Jézi é ka awtik-lasa ké aprann-nou ? (Akt 1:3).

³ Pannan sé 40 dènyé jou-la Jézi fè asi latè la, i parèt douvan sé disip-la a plizyè rèpriza (li Akt 1:3). Jézi ankourajé-yo, kifè yo pa té tris é yo pa té pè ankò. A moman-lasa, yo touvé-yo ni tchè-kontan é yo té ni kouraj pou yo té ay préché é anségné bon nouvèl a Wayòm la.

⁴ Nou pé aprann onlo biten dè sa Jézi viv pannan péryòd-lasa. Adan awtik-lasa, nou ké vwè kijan Jézi 1) ankourajé disip a-y, 2) i édé-yo konprann Lézékriti plibyen, é 3) kijan i préparé-yo pou travay-la ki té ka atann-yo la. Nou ké vwè osi kijan nou pé imité Jézi adan sé 3 domenn-lasa.

ANKOURAJÉ LÉZÒT

5. Poukwa sé disip-la té bizwen yo ankourajé-yo ?

⁵ Sé disip-la té bizwen yo té ankourajé-yo toubònman. Poukisa ? Pas ni sa adan yo ki té lésé kaz a yo, fanmi a yo é travay a yo pou yo té suiv Jézi (Mat. 19:27). Ni sa osi yo méprizé é kè moun pa té ka lévé digad ankò pas yo té vin disip a Jézi (Jan 9:22). Yo té fè onlo sakrifis pas yo té sèten kè Jézi sé té Mési-la (Mat. 16:16). Men lèwvwè yo tchouyé Jézi, yo té tris é yo té dékourajé pas yo pa té sav ka ki té’é rivé apré.

6. Ka Jézi fè apré i résisité ?

⁶ On biten nou pé sèten, sé kè lèwvwè Jézi vwè jan sé disip-la té tris, i pa jen mèt an tèt a-y kè sé pas fwa a yo té fébli. Pou-y, si yo réyaji konsa sé pas i té sòti mò. Sé pou sa menm jou-la i résisité la, i koumansé ankourajé zanmi a-y. Pa ègzanp, pannan Mari Magdaléèn-la té ka pléré douvan tonm a-y, Jézi parèt douvan a-y (Jan 20:11, 16). I parèt osi douvan sé 2 disip-la nou palé an koumansman a awtik-lasa. É i parèt douvan lapòt Pyè osi (Lik 24:34). Ka ègzanp a Jézi ka aprann-nou ? Pou nou réponn a kèsyon-lasa, an-nou vwè sa ki rivé lèwvwè i parèt douvan Mari Magdaléèn-la.

7. Lè Jézi gadé Mari, ka Mari té ka fè, é ka Jézi fè pou Mari ? (Jan 20:11-16 ; gadé imaj-la osi).

⁷ (Li Jan 20:11-16.) Lè 16 nizan, gran bonnè maten, 2 jenn madanm ki fidèl ay koté-la yo té mèt kò a Jézi la (Lik 24:1, 10). Mari Magdaléèn-la, sé té yonn adan yo. An-nou vwè sa ki pasé. Lèwvwè i rivé koté tonm-la, i gadé men pa té ni ayen adan. Alò i kouri di Pyè é Jan sa. Pyè é Jan ay owa tonm-la é Mari suiv-yo. Aprésa sé 2 disip-la rantré akaz a yo men li Mari rété la. I mété-y ka pléré men i pa jen konpranndèdi kè Jézi té ka gadé-y. Jézi vwè jan madanm fidèl lasa té tris é sa chouboulé-y. Alò i parèt douvan a-y é i fè on biten tou senp ki ankourajé Mari onlo : i palé ba-y é i ba-y on travay enpòwtan a fè. I di-y ay di sélézòt disip-la kè i té résisité (Jan 20:17, 18).

8. Kijan nou pé imité Jézi ?

⁸ Kijan nou pé imité Jézi ? Nou pé fè onlo biten pou ankourajé frè é sè an nou. Kon Jézi, fò-nou éséyé vwè ki difikilté frè é sè an nou ka jwenn, fò-nou éséyé konprann sa yo ka rèsanti é fò-nou chèché a konsolé-yo. An-nou pran ègzanp a Jocelyn. I enn pèd sè a-y alòskè i pa té atann-li a sa. Mi sa i ka di : « Tèlman an té tris, pannan plizyè mwa an pa té ka rivé woupran doubout an mwen. » Men on frè é madanm a-y ki té sav sa Jocelyn té ka viv té ka envité-y akaz a yo. Yo pran tan kouté-y é yo fè-y sonjé tout valè-la i té ni la pou Jéova. Mi sa Jocelyn ka di ankò : « Sé konsi anmitan lannuit an té adan on lanmè ki démonté é Jéova sèvi èvè frè-la é sè-la pou woté-mwen adan-y é mèt-mwen adan on ti kannòt pou mwen an ansékirité. Yo wouban-mwen anvi rété fidèl a Jéova. » Nou osi, nou pé ankourajé frè é sè an nou lè nou ka lésé-yo di-nou sa yo ka rèsanti é lè nou ka kouté byen sa yo ka di. Konsa nou pé konsolé-yo é nou pé édé-yo pou yo kontinyé sèvi Jéova (Wom. 12:15).

ÉDÉ LÉZÒT KONPRANN PAWÒL A BONDYÉ

9. Ka sé disip-la pa té ka konprann é kijan Jézi édé-yo ?

⁹ Sé disip-la té ka kwè adan Pawòl a Bondyé é yo té ka fè éfò pou apliké sé konsèy-la ki adan-y la (Jan 17:6). Men yo pa té ka konprann poukwa Jézi mò asi on poto-siplis kon malfétè. Jézi té sav byen kè yo té ni fwa é kè yo té enmé Jéova, men ni sèwten biten yo poto’o konnèt (Lik 9:44, 45 ; Jan 20:9). Sé pousa i sèvi èvè Lézékriti pou fè-yo rézonné. É sé sa i fè èvè sé 2 disip-la ki té k’ay Émayis la lè i parèt douvan yo. An-nou vwè kijan i rézonné èvè yo.

10. Ka Jézi fè pou disip a-y té sèten kè i té vréman Mési-la ? (Lik 24:18-27).

¹⁰ (Li Lik 24:18-27.) Jézi pa di sé nonm-la kimoun i té yé tousuit. Olyé dè sa i pozé-yo déotwa kèsyon. Poukwa i fè sa ? Pétèt sé té pou yo té wouvè tchè a yo ba-y é pou yo té di-y sa yo té ka pansé é sa yo té ka rèsanti. É sé sa yo fè. Yo di-y kè yo té ka pansé kè Jézi té’é vin wa an Izrayèl é kè i té’é woté-yo anba jouk a sé Women-la. Jézi ba-yo lokazyon di sa ki té ka pran tèt a yo. Aprésa i sèvi èvè Lézékriti pou édé sé nonm-la konprann tousa ki té ja fètb. Plita, i jwenn sélézòt disip-la é i anségné-yo menm biten-la (Lik 24:33-48). Ka sa ka aprann-nou ?

11-12. a) Mannyè Jézi anségné sé vérité-la ka aprann-nou on biten. Ki biten ésa ? (gadé sé imaj-la osi). b) Kijan frè-la ki fè étid a Nortey édé-y ?

¹¹ Kijan nou pé imité Jézi ? Lèwvwè ou ka étidyé èvè on moun, pozé-y déotwa kèsyon pou moun-lasa pé sa di-w ka i ka pansé pi fasilman. Men fò ou byen chwazi sé kèsyon-lasa (Pwov. 20:5). Lèwvwè i ké wouvè tchè a-y ba-w é kè ou ké konprann sa i ka rèsanti, ou pé montré-y kijan i pé touvé prensip adan Labib ki pé édé-y. Olyé ou di-y sa i ni a fè, édé-y rézonné èvè Lézékriti é édé-y vwè kijan i pé mèt sé prensip-la an pratik. Sé ègzaktèman konsa frè-la ki té ka fè étid a Nortey, on frè ki ka rété o Gana, fè èvè-y.

¹² Nortey koumansé étidyé Labib lèwvwè i té ni 16 an. Men fanmi a-y pa té dakò ditou-ditou èvè sa é yo koumansé mèt baton an wou a-y. Men i pa lagé. Ka ki édé-y ? Frè-la ki té ka fè étid a-y sèvi èvè Matyé 10 pou èspliké-y kijan sé vré krétyen-la té’é jwenn pèwsékisyon. Mi sa i ka di : « Lè an koumansé jwenn pèwsékisyon, an vin sèten kè an té adan lavérité. » Frè-la montré-y Matyé 10:16 osi pou i pé sa konprann kè fò i rété véyatif. Aprésa yo palé pou vwè kijan vèwsé-lasa té’é pé édé Nortey pou i èspliké fanmi a-y, èvè onlo rèspé, adan ki biten i ka kwè. Apré batèm a-y, Nortey té vé vin pyonyé, men pap’a-y li té vé i fè gran lékòl. Olyé frè-la ki fè étid a-y la di-y ka pou i fè, frè-la fè-y rézonné asi sé prensip-la ki an Bib-la é i pozé-y déotwa kèsyon. Ka sa bay ? Nortey vin pyonyé. Alò pap’a-y mété-y déwò. Men kijan Nortey ka santi-y jòdijou ? Mi sa i ka di : « An sèten kè sa an fè la sé méyè biten an té’é pé fè. » Menmjan-la, lè nou ka sèvi èvè Lézékriti pou nou fè sé moun-la rézonné, sa ka édé-yo vin dé krétyen ki byen chouké adan lavérité (Éféz. 3:16-19).

SÉ ANSYEN-LA, ÉDÉ FRÈ A ZÒT VIN ‘DÉ NONM BONDYÉ KA BAY KONM KADO’

13. Avan Jézi té viré an syèl-la, ka i fè pou disip a-y té kontinyé fè travay a prédikasyon-la asi latè ? (Éfézyen 4:8).

¹³ Lè Jézi té asi latè, i fè tousa Pap’a-y té ba-y fè byen menm (Jan 17:4). Men a pa pousa i té ka mèt an tèt a-y kè siwvwè i ni on biten a fè, pou biten-la fèt byen, vométan i fè-y limenm a-y. I rété 3 an é dèmi ka préché asi latè é pannan tout tan-lasa, i fòwmé disip a-y. Jézi té ka fè disip a-y konfyans. I ba-yo préché é anségné bon nouvèl a Wayòm la é i ba-yo okipé dè pèp a Bondyé ki ni onlo valè pou-y. Pétèt kè onlo adan sé disip-la i bay gwo rèsponsabilité-lasa poto’o ni 30 an (li Éfézyen 4:8). Sé nonm-lasa té ka travay rèd èvè Jézi é yo té fidèl a-y. Avan i té monté an syèl-la, Jézi fòwmé-yo é i édé-yo vin dè nonm Jéova ka bay konm kado. Ka i fè pou fòwmé-yo ?

14. Pannan sé 40 dènyé jou-la Jézi té asi latè, ka Jézi anségné disip a-y ? (gadé imaj-la osi).

¹⁴ Lè Jézi té ni lokazyon ba disip a-y konsèy, i té ka palé ba yo franchman men i té ka fè sa èvè onlo lanmou osi. Pa ègzanp, lè i vwè kè sèwten adan yo pa té ka kwè vréman kè i té mò é kè i té résisité, i édé-yo adan domenn-lasa (Lik 24:25-27 ; Jan 20:27). I fè-yo sonjé kè menmsi fò yo té travay, sa ki té pi enpòwtan sé pran swen a pèp a Bondyé (Jan 21:15). I fè-yo sonjé osi kè fò pa yo té konparé sa yo té ka fè pou Jéova èvè sa lézòt té ka fè (Jan 21:20-22). I fè-yo byen konprann kè sa yo té ka kwè asi Wayòm-la pa té bon é i ankourajé-yo a rété konsantré asi travay a prédikasyon-la (Akt 1:6-8). Ka ègzanp a Jézi pé aprann sé ansyen-la ?

15-16. a) Kijan sé ansyen-la pé imité Jézi ? b) Lè Patrick suiv sé konsèy-la yo ba-y la, ki byenfé sa pwokiré-y ?

¹⁵ Kijan sé ansyen-la pé imité Jézi ? Fò sé ansyen-la fòwmé sé frè-la pou montré-yo kijan pou yo pran swen a lasanblé-la, menmsi sèwten adan sé frè-la yo ka fòwmé la jenn toujouc. Sé ansyen-la ka konprann byen kè sé frè-la ké ni onlo biten pou yo aprann. Sa enpòwtan kè sé ansyen-la ba-yo dé ti konsèy èvè onlo lanmou. Sa ké édé-yo pou yo aprann aji èvè imilité, pou yo montré-yo fidèl é pou yo toujou paré pou édé lézòt (1 Tim. 3:1 ; 2 Tim. 2:2 ; 1 Pyè 5:5).

¹⁶ An-nou vwè ka ki rivé on frè non a-y sé Patrick. Lè i té jenn, i té ni labitid palé rèd ba moun. I jous té ka palé rèd ba sé sè-la osi é i té ka mal aji èvè yo. On jou, on ansyen ki ni èkspéryans vwè sa, i palé ba-y franchman, i ba-y déotwa ti konsèy men i fè sa èvè onlo lanmou. Mi sa Patrick ka di : « An tèlman kontan frè-la di-mwen ka an té ni a chanjé. An té dékourajé lè an té ka vwè kè yo té ka ba dòt frè rèsponsabilité kè an té’é byen anvi ni. Men ansyen-lasa édé-mwen konprann kè fò an té ni imilité é kè an montré frè é sè an mwen kè an enmé-yo olyé an té chèché a ni on grad adan lasanblé-la. Patrick suiv sé konsèy-la i rèsèvwa-la é grasa sa, yo nonmé-y ansyen lè i té ni 23 an (Pwov. 27:9).

17. Kijan Jézi montré kè i té ka fè disip a-y konfyans ?

¹⁷ Jézi mandé sé disip-la préché bon nouvèl-la men i mandé-yo anségné sé moun-la osi (gadé nòt a Matyé 28:20 ki asi « leur enseignant » adan Bib-la ki fèt pou étidyé la an fransé). Pétèt kè pou sé disip-la, yo pa té’é pé fè sa. Men li Jézi té sav yo té’é rivé fè travay-lasa é i pa té ni pon dout asi sa. Dayè, i di-yo sa. Mi sa i di-yo pou montré-yo jan i té ka fè-yo konfyans : « Menmjan Pap’an-mwen voyé-mwen, sé konsa an ka voyé-zòt osi » (Jan 20:21).

18. Kijan sé ansyen-la pé imité Jézi ?

¹⁸ Kijan sé ansyen-la pé imité Jézi ? Sé ansyen-la ki ni èkspéryans ka fòwmé lézòt lèwvwè yo ka ba-yo fè sèwten biten (Filip. 2:19-22). Pa ègzanp, yo pé mandé sé jenn-la nétwayé sal di Wayòm la oben fè dé ti travo adan sal-la. Lè sé ansyen-la ka ba-yo fè on biten, yo ka montré-yo kijan pou yo fè travay-lasa é yo ka di-yo kijan yo sèten kè yo ké fè travay-lasa byen. Matthew sé on frè pa ni lontan i ansyen é i kontan toubònman jan sé ansyen-la édé-y. Plizyè ansyen ki ni èkspéryans ba-y on bon fòwmasyon é yo ni lokazyon di-y kè yo té sèten i té’é fè travay-lasa byen. Mi sa Matthew ka di : « Lè an té ka fè érè, yo té ka rasiré-mwen é yo té ka di-mwen kè sé konsa an té’é aprann. Yo té ka édé-mwen pou kò an mwen vin pibon adan sa an té ka fè lad. »

19. Ka pou nou byen désidé a fè ?

¹⁹ Pannan sé 40 dènyé jou-la Jézi pasé asi latè la, i ankourajé disip a-y, i anségné-yo é i fòwmé-yo. Fò nou byen désidé a fè tousa nou pé pou nou suiv bèl ègzanp a-y (1 Pyè 2:21). Jézi ké édé-nou fè sa. Nou pé di sa pas mi sa limenm a-y pwomèt : « An ké èvè zòt touléjou, jiskatan fen a mond-la rivé » (Mat. 28:20).