AWTIK POU ÉTIDYÉ 10
KANTIK 31 Marche avec Dieu !
Aprann rézonné kon Jéova é Jézi
« Konm Lèkris soufè adan lachè, zòt osi fò zò ni menm létadèspri-la » (1 PYÈ 4:1).
ON TI LIDÉ ASI SA NOU KAY VWÈ
Jan-la Jézi té ka rézonné la aprann Pyè onlo biten. Nou ké vwè ka sa aprann-li é ka sa ka aprann-nou nou osi.
1-2. a) Èvè ki biten lanmou an nou pou Jéova lyanné ? b) Kijan Jézi montré i té enmé Jéova èvè tout entélijans a-y ?
« FÒ OU enmé Jéova Bondyé a-w, èvè tout tchè a-w, èvè tout nanm a-w, èvè tout fòs a-w é èvè tout entélijans a-w » (Lik 10:27). Jézi té dakò pou di kè sé komandman-lasa ki té pli enpòwtan adan lwa a Moyiz. Enmé Jéova, sé enmé-y èvè tout tchè an nou kivédi fè atansyon a sa nou anvi é a sa nou ka rèsanti. Enmé Jéova sé osi enmé-y èvè tout nanm an nou, é èvè tout fòs an nou. Men lanmou-lasa lyanné osi èvè jan nou ka rézonné. Sé vré kè nou pé’é jen rivé konprann sa Jéova ka pansé a san pou san. Men lè nou ka étidyé ègzanp a Jézikris, nou ka rivé konprann sa Jéova ka pansé tibwen plis. Poukwa nou ka di sa ? Paskè Jézi imité Pap’a-y on mannyè ki pawfè. Alò mannyè i té ka rézonné sé konsa Pap’a-y té ka rézonné osi (1 Kor. 2:16).
2 Jézi té enmé Jéova èvè tout entélijans a-y. I té sav ka Bondyé té vlé i fè, é i té paré a fè sa menmsi fò i té soufè. Fè volonté a Pap’a-y sé sa ki té pli enpòwtan ba-y é i pa lésé ayen anpéché-y fè sa.
3. Ka ègzanp a Jézi aprann Pyè é ka i ankourajé sé krétyen-la fè ? (1 Pyè 4:1).
3 Pyè é sélézòt apòt-la pasé tan èvè Jézi é yo ni lokazyon vwè jan i té ka palé é jan i té ka aji. Adan 1é lèt-la Bondyé fè-y maké la, Pyè ni lokazyon di kè fò nou ni menm lètadèspri ki Jézikris (li 1 Pyè 4:1). Odépa, adan lang-la yo maké Bib-la, Pyè maké « mèt zàm asi-w ». Yo té ka sèvi èvè sé mo-lasa pou palé dè on sòlda ki ka mèt zàm a-y asi-y pou i ay adan on lagè. Si sé krétyen-la ka fè éfò pou ni menm mantalité ki Jézikris, sa ké sèvi-yo onlo pou yo goumé lè yo anvi fè sa ki mové. Sa ké sèvi-yo osi pou yo goumé pou mond a Satan pa détenn asi yo (2 Kor. 10:3-5 ; Éféz. 6:12).
4. Ka nou ké vwè adan awtik-lasa ?
4 Adan awtik-lasa, nou ké vwè kijan Jézi té ka rézonné é kijan nou pé rézonné kon li. Nou ké vwè 1) sa nou dwèt fè pou nou rézonné kon Jéova, 2) sa nou dwèt fè pou nou ni imilité, é 3) sa nou dwèt fè pou nou vin dé moun ki ka réfléchi plibyen ankò.
AN-NOU IMITÉ MANNYÈ JÉOVA KA RÉZONNÉ
5. Onlè Pyè pa rézonné kon Jéova ka rézonné. Kijansa ?
5 On jou, Pyè touvé-y adan on sitiyasyon, é i pa rézonné kon Jéova ka rézonné. Jézi ni lokazyon di apòt a-y kè i té’é ay Jérizalèm, kè sé chèf a rèlijyon-la té’é arété-y, kè i té’é soufè bon soufè la, é kè i té’é mò (Mat. 16:21). Pyè té sav byen kè Jézi sé té Mési-la Jéova té pwomèt la, é kè sé-y ki té’é sové pèp a Bondyé. Alò i pa té ka vwè kijan Jéova té’é pèwmèt kè Jézi mò (Mat. 16:16). Kifè mi sa i di Jézi : « É non Ségnè, pa di sa ! Sé biten-lasa pé’é jen rivé-w » (Mat. 16:22). Konm a moman-lasa Pyè pa té ka rézonné kon Jéova ka rézonné, i pa té dakò èvè Jézi.
6. Kijan Jézi montré i té ka rézonné kon Pap’a-y ?
6 Jézi té ka rézonné ègzaktèman kon Pap’a-y. Kifè mi sa i réponn Pyè : « Pasé dèyè mwen, Satan ! Ou sé on wòch ki la pou fè-mwen tribiché, pas jan-la ou ka rézonné la, a pa konsa Bondyé ka rézonné, men sé lézòm ki ka rézonné konsa » (Mat. 16:23). Jézi té sav kè pou fè volonté a Bondyé fò i té soufè é fò i té mò, alò Jézi pa kouté konsèy a Pyè, menmsi Pyè pa té ni pon mové lentansyon. Sa ki pasé montré Pyè kè i té bizwen rézonné kon Jéova ka fè-y. É lèson-lasa enpòwtan ban nou osi.
7. Kijan Pyè montré i té anvi fè on travay asi-y pou rézonné kon Jéova ka rézonné ? (gadé imaj-la).
7 Kèlkètan apré, Pyè montré i té anvi aprann rézonné kon Jéova ka fè-y. Lè-la té rivé pou moun a dòt nasyon fè pawti a pèp a Jéova. Alò Jéova voyé Pyè préché ba Kòwnèy alòskè Kòwnèy pa té juif. Kòwnèy té kay fè pawti a sé prèmyé moun-la ki pa juif la adan lasanblé-la. An tan-lasa sé Juif-la pa té ka mélanjé-yo èvè moun ki pa juif. Alò Pyè té bizwen fè on travay asi-y pou i té ay préché ba sé moun-lasa. Lè Pyè fin pa konprann sa Jéova té ka pansé dè moun ki pa té juif, i chanjé létadèspri a-y. Kifè lè Kòwnèy mandé Pyè vin préché ba-y, Pyè alé san bougonné (Akt 10:28, 29). I préché ba Kòwnèy é sé moun-la ki té akaz a-y la é yotout pran lèbatèm (Akt 10:21-23, 34, 35, 44-48).
Pyè ka rantré aka Kòwnèy (gadé paragraf 7 la).
8. Kijan nou pé rézonné kon Jéova ? (1 Pyè 3:8).
8 Plizyè lanné apré, Pyè di sé krétyen-la kè fò yo « ini adan menm pansé-la » (li 1 Pyè 3:8). Nou ka montré nou ini adan menm pansé-la èvè frè é sè an nou lè nou ka imité jan Jéova ka rézonné. Nou ka touvé jan i ka rézonné adan Pawòl a-y Labib. An-nou pran on ègzanp. Jézi di disip a-y fò yo mèt Wayòm-la prèmyé douvan an vi a yo (Mat. 6:33). Imajiné on frè ka désidé suiv konsèy-lasa é i ka vin pyonyé pèwmanan. A moman-lasa, fò nou ké fè atansyon pou nou pa dékourajé-y. Okontrè fò nou ké palé dè sèwvis-la on mannyè ki pozitif é nou pé jous mandé-y ka nou pé fè pou nou pé sa édé-y.
AJI ÈVÈ IMILITÉ
9-10. Kijan Jézi montré i té ni onlo imilité ?
9 Lannuit-la avan Jézi mò la, i montré Pyè é sélézòt apòt-la on bèl biten asi limilité. Tibwen tan avan, Jézi mandé Pyè é Jan préparé tousa ki fo pou yotout té manjé on dènyé fwa èvè Jézi avan i mò. Sèten lèwvwè yo préparé tousa ki té fo, yo mèt on basin é déotwa twèl akoté, pou on moun té pé sa lavé pyé a yo kon yo té abityé fè-y pou sé envité-la avan yo té manjé. Men kimoun ki té’é ni asé imilité pou fè travay-lasa ?
10 Jézi pa ézité fè travay-lasa. Sa té ka montré i té ni onlo imilité. Sé apòt-la dwèt té étoné vwè Jézi fè sa pas nòwmalman sé té travay a on sèwvitè. I woté lenj a-y, i maré on mòso twèl an ren a-y, i mèt tibwen dlo adan basin-la, é i koumansé lavé pyé a yo (Jan 13:4, 5). Sa dwèt pran onlo tan pas yo té a 12. Anplisdisa, pawmi yo té ni Jida ki té kay trayi Jézi. Men èvè imilité, Jézi fè tout travay-lasa. Aprésa, èvè pasyans, mi sa i di-yo pou fè-yo rézonné : « Ès zò konprann sa an sòti fè ba zòt ? Zò ka kriyé-mwen “Anségnan” é zò ka kriyé-mwen “Ségnè”, é zò ni rézon, pas sé sa an yé. Alò si mwen, ki sé Ségnè é Anségnan, an lavé pyé a zòt, zòt osi fò yonn lavé pyé a lòt » (Jan 13:12-14).
Imilité lyanné èvè sa nou ka pansé dè noumenm é èvè sa nou ka pansé asi lézòt
11. Ka ki ka montré kè Pyè byen konprann fò i té ni imilité ? (1 Pyè 5:5 ; gadé imaj-la osi).
11 Pyè vwè jan Jézi té ni imilité an 2 zyé a-y. Apré Jézi viré an syèl-la, Pyè fè on mirak é i géri on misyé ki té enfim dépi toupiti (Akt 1:8, 9 ; 3:2, 6-8). On foulmoun vwè mirak-lasa é yo vin alantou a Pyè (Akt 3:11). Men Pyè pa té vlé sé moun-la pòté-y anlè, magré i lévé adan on kilti sé moun-la té enmè fè moun vwè-yo. Okontrè i té ni imilité é i èspliké sé moun-la kè sé Jéova é Jézi pou yo pòté anlè. Mi sa i di-yo : « Sé grasa non a [Jézi] é grasa fwa-la nou ni la adan non a-y kè misyé-la zò ka vwè la é kè zò konnèt la vin fò » (Akt 3:12-16). Déotwa tan apré, Pyè ékri on lèt ba sé krétyen-la pou montré-yo kè fò yo ni imilité. I itilizé on èsprésyon ki ka montré kè fò nou abiyé-nou èvè imilité konsi imilité-la sé té on lenj. Sa ka fè-nou sonjé lè Jézi maré on mòso twèl an ren a-y pou i té lavé pyé a sé apòt-la (li 1 Pyè 5:5).
Apré Pyè fè on mirak, i ba Jéova é Jézi tout lonnè-la. Nou osi nou pé montré nou ni imilité lè nou pa’a chèché a fè moun pòté-nou anlè parapòt a on biten nou fè pou yo. Nou pa’a fè sa nonplis pou trapé on biten an rètou (gadé sé paragraf 11 é 12 la).
12. Ka nou pé fè pou nou kontinyé aji èvè imilité kon Pyè ?
12 Nou pé imité Pyè siwvwè nou ka kontinyé aji èvè imilité. On biten pou nou sonjé sé kè a pa enki an pawòl pou nou montré nou ni imilité. Mo-la Pyè sèvi èvè-y la é ki bay « imilité », yo ka itilizé-y pou palé dè on kalité ki ka aji asi sa ou ka pansé an fon a tchè a-w, asi sa ou ka pansé dè voumenm é asi sa ou ka pansé asi lézòt. Nou ka fè dé biten pou lézòt paskè nou enmé Jéova é paskè nou enmé sé moun-la, men a pa paskè nou anvi yo pòté-nou anlè. Nou ka montré kè nou ni imilité vréman lèwvwè nou kontan sèvi Jéova é kè nou kontan édé frè é sè an nou menmsi ponmoun pa’a vwè sa nou ka fè (Mat. 6:1-4).
KONTINYÉ « NI BON JIJMAN »
13. Èspliké ka sa vlé di lè on moun « ni bon jijman. »
13 Ka sa vé di lè on moun « ni bon jijman » ? (1 Pyè 4:7). On krétyen ki ni bon jijman ka chèché a sav ka Jéova ka pansé avan i pran on désizyon. On krétyen ki konsa sav kè sa ki pi enpòwtan adan vi a-y, sé lanmityé a-y èvè Jéova. I pa’a mèt an tèt a-y kè i konnèt plis biten ki ponmoun, men i pa’a mèt an tèt a-y nonplis kè i pa konnèt ayen. I ka montré i ka fè Jéova konfyans. Pousa, i ka priyé-y toutlè pou mandé-y dirèksyon a-ya.
14. A ki moman Pyè montré i pa té ka fèfon asi Jéova ?
14 Dènyé lannuit-la Jézi pasé asi latè, i avèti disip a-y é i di-yo : « Oswè-la zòtout ké lagé-mwen akòz dè sa ki kay rivé-mwen. » Men Pyè bat lèstonmak a-y é i di : « Menmsi tout sélézòt-la lagé-w akòz dè sa ki ké rivé-w, mwenmenm an mwen, an pé’é jen lagé-w ! » Tibwen plita, Jézi ba sèwten adan disip a-y on bèl konsèy. I di-yo : « Rété véyatif é priyé akontinyé » (Mat. 26:31, 33, 41). Men Pyè pa suiv konsèy-lasa. Siwvwè i té fè sa, i té’é ni fòs pou i di douvan toutmoun kè i sé disip a Jézi. Olyé dè sa, i di i pa konnèt Jézi ni an blan ni an nwè, é aprésa i règrété sa onlo (Mat. 26:69-75).
15. Jézi kontinyé ni bon jijman dènyé lannuit-la i pasé asi latè. Ka ki édé-y ?
15 Jézi té ka fèfon asi Jéova a san pou san. Magré i té pawfè, i toujou té ka priyé Pap’a-y. Sé sa ki ba-y kouraj-la i té bizwen la pou i kontinyé fè tousa Jéova té vlé i fè (Mat. 26:39, 42, 44 ; Jan 18:4, 5). Sèten Pyè pa jen oubliyé jan Jézi priyé dènyé lannuit-la i pasé asi latè.
16. Kijan Pyè montré i té ni bon jijman ? (1 Pyè 4:7).
16 Pyè aprann fè Jéova konfyans plis ankò é i mété-y ka priyé plis ki avan. Lèwvwè Jézi résisité, i di Pyè é sélézòt disip-la kè i té’é voyé lèspri sen asi yo pou yo rivé préché bon nouvèl-la. Men i di-yo kè annatandan, fò yo té rété Jérizalèm (Lik 24:49; Akt 1:4, 5). Pannan Pyè té ka atann, ka i fè ? Li é sélézòt disip-la « pa jen arété priyé » (Akt 1:13, 14). Adan 1é lèt-la i maké la, Pyè ankourajé sé krétyen-la ni bon jijman é priyé Jéova èvè konfyans (li 1 Pyè 4:7). Pyè vin on moun ki byen doubout adan lavérité, i rivé ni bon jijman é i vin on poto-mitan adan lasanblé-la (Gal. 2:9).
17. Menmsi nou ni onlo kapasité, ka pou nou kontinyé fè ? (gadé imaj-la osi).
17 Pou nou pé sa ni bon jijman, fò nou priyé Jéova toutlè. Fò noumenm an nou rèkonnèt kè nou bizwen Jéova gidé-nou menmsi nou ni onlo kapasité. Lèwvwè fò nou pran on désizyon ki enpòwtan, nou ka priyé Jéova pou i gidé-nou pas nou sèten kè sé-y ki konnèt sa ki pibon ban nou.
Pyè aprann fèfon asi Jéova é priyé-y plis ankò. Nou osi nou ka montré nou ni bon jijman lè nou ka priyé Jéova pou mandé-y édé-nou, siwtou lè nou ni on désizyon enpòwtan a pran (gadé paragraf 17 la).b
18. Ka nou pé fè pou nou imité mannyè Jéova ka rézonné plis ankò ?
18 Nou ni onlo rèkonésans pou Jéova davwa i ka pèwmèt-nou imité kalité a-y (Jén. 1:26). Nou ka tou konprann kè nou pé’é jen pé imité Jéova a san pou san (Iz. 55:9). Men kon Pyè, nou pé kontinyé aprann rézonné kon Jéova ka fè-y, nou pé kontinyé aji èvè imilité, é nou pé kontinyé ni bon jijman.
KANTIK 30 Mon Ami, mon Dieu, mon Père
b SA NOU KA VWÈ ASI IMAJ-LA : Yo mandé on sè vin pou on travay. Pannan i ka atann i ka priyé an tchè a-y.