AWTIK POU ÉTIDYÉ 26
KANTIK 123 Fidèlement soumis à l’ordre théocratique
Montré ou ni imilité lè ou pa ka konprann on biten
« Pa ni mwayen nou rivé konprann Toupuisan-la » (JÒB 37:23).
ON TI LIDÉ ASI SA NOU KAY VWÈ
Ni onlo biten nou pa konnèt é fò nou aksèpté sa èvè imilité. Lè nou ka jwenn difikilté, an-nou konsantré-nou asi sa nou konnèt é an-nou fè Jéova konfyans.
1. Ki kapasité Jéova ban-nou é poukwa i fè sa ?
NOU ka rivé réfléchi, nou ka rivé aprann dé biten é nou ka rivé konprann kijan pou nou mèt sa nou aprann an pratik, pas sé konsa Jéova fè-nou. Poukwa i fè-nou konsa ? Pas i vlé kè nou aprann konnèt-li é kè nou pran dé bon désizyon toupannan nou ka sèvi-y (Pwov. 2:1-5 ; Wom. 12:1).
2. a) Ka fò nou rèkonnèt ? (Jòb 37:23, 24 ; gadé imaj-la osi). b) Lèfètkè nou pa konnèt tout biten é kè nou ka rèkonnèt sa, ki byenfé sa ka pwokiré-nou ?
2 Menmsi nou kapab aprann dé biten, toujou ké ni dé biten nou pé’é konnèt (li Jòb 37:23, 24). An-nou sonjé ègzanp a Jòb. Jéova pozé-y onlo kèsyon ki édé-y konprann kè ni onlo biten i pa té konnèt. Ti kozé-lasa èvè Jéova pèwmèt-li vwè kè i té bizwen ni imilité é kè fò i té chanjé jan i té ka pansé (Jòb 42:3-6). Menmjan-la osi, lèfètkè nou pa konnèt tout biten, sa ka édé-nou aji èvè imilité é nou ka lésé Jéova di-nou sa nou bizwen konnèt pou nou pran dé bon désizyon (Pwov. 2:6).
Kon Jòb, lèfètkè nou pa konnèt tout biten, sa ka pwokiré-nou onlo byenfé (gadé paragraf 2 la).
3. Ka nou ké vwè adan awtik-lasa ?
3 Adan awtik-lasa, nou ké palé dè sèwten biten nou pa konnèt. Nou ké vwè poukwa lèfètkè nou pa konnèt sé biten-lasa sa pé rèd pou nou, men poukwa anmenmditan sé on bon biten pou nou. Sa nou ké vwè la ké édé-nou fè Jéova konfyans plis ankò, li ki sé « Sila ki konnèt tout biten », é ki ka di-nou tousa nou bizwen konnèt (Jòb 37:16).
NOU PA SAV KITAN LAFEN KÉ VIN
4. Sèlon Matyé 24:36, ki biten nou pa konnèt ?
4 (Li Matyé 24:36.) Nou pa sav kitan lafen ké vin. Jézi ki té Jézi pa té konnèt ‘jou-lasa é lè-lasa’ lè i té asi latèa. Aprésa, i èspliké apòt a-y kè sé enki Jéova ki ni otorité pou désidé kitan sèwten évènman ké fèt (Akt 1:6, 7). Jéova chwazi on jou pou détwi mond-la men nou pé pa konnèt jou-lasa.
5. Konm nou pa konnèt a ki moman lafen ké rivé, kijan sa pé aji asi nou ?
5 Nou pa sav konmen tan ka rété ankò avan lafen rivé. Kifè, nou pé ni dimal a atann èvè pasyans oben sa pé dékourajé-nou, siwtou si sa ja ka fè bon déotwa tan nou ka atann kè jou a Jéova rivé. Pétèt osi kè moun an fanmi an nou oben dòt moun ka fè jé èvè tèt an nou pas lafen po’o vin, kifè, sa pé rèd pou nou (2 Pyè 3:3, 4). Pétèt pou nou, si nou té konnèt kitan lafen ké vin, sa té’é édé-nou atann pli fasilman é sa té’é ban-nou fòs pou nou andiré lè yo ka fè jé èvè nou.
6. Nou pa konnèt kitan lafen ké rivé. Poukwa sé on bon biten ?
6 Lèfètkè Jéova pa di-nou kitan lafen ké rivé, sa ka ban-nou lokazyon montré-y kè nou ka sèvi-y pas nou enmé-y é kè nou ka fè-y konfyans. A pa jistan lafen rivé kè nou vlé sèvi Jéova, men sé pou touttan. Olyé nou mandé-nou toutlè a ki moman « jou a Jéova » ké rivé, nou plito ka sonjé sé bon biten-la i ké pòté ban nou la. Sa ka édé-nou vin pli bon zanmi èvè Jéova, sa ka édé-nou fè-y konfyans é nou ka fè tousa nou pé pou nou fè-y plézi (2 Pyè 3:11, 12).
7. Ki biten nou sav ?
7 Sa enpòwtan kè nou konsantré-nou asi sa nou sav. Grasa sé pwofési-la, nou sav kè sé dènyé jou-la koumansé an 1914 é nou sav kijan biten-la té’é yé apré. Kifè, nou sèten kè ‘gran jou a Jéova toupré rivé’ (Sof. 1:14). Nou sav osi ka Jéova vlé nou fè. I vlé nou préché « bon nouvèl a Wayòm-la » ba on maksimòm dè moun (Mat. 24:14). Nou ka anonsé mésaj-lasa adan plis ki 240 péyi é an plis ki 1000 lang. Nou pa bizwen konnèt a ki moman lafen ké rivé pou nou préché èvè onlo balan.
NOU PA SAV KA JÉOVA KÉ FÈ BAN NOU
8. Ka Éklézyas 11:5 ka édé-nou konprann ?
8 A pa toutlè nou ka konprann « travay a vré Dyé-la » (li Éklézyas 11:5). Yo ka sèvi èvè èksprésyon-lasa pou palé dè sa Jéova ka fè oben dè sa i ka pèwmèt pou volonté a-y fèt. Nou pé pa sav ègzaktèman pou ki rézon Jéova ka pèwmèt on biten rivé ni kijan i ké édé-nou (Sòm 37:5). Nou pé konparé « travay a vré Dyé-la » èvè jan on tibébé ka grandi an vant a manman-y. Sé syantifik-la pa ka konprann tout biten anrapò èvè sa. Menmjan-la, a pa tout biten nou ka konprann asi sa Jéova ka fè.
9. Lèfètkè nou pa sav ka Jéova ké fè ban nou, ka nou pé rèsanti ?
9 Konm nou pa sav ka Jéova ké fè ban nou, nou pé touvé-nou an 2 lidé. Nou pé anvi fè plis pou Jéova oben ay on koté yo bizwen pwoklamatè men nou ka ézité. Si nou ka éséyé fè plis adan ministè-la men nou pa ka rivé atenn òbjèktif an nou, nou pé rivé a pansé kè Jéova pa kontan-nou. Pétèt osi nou ka éséyé préché plis men nou pa’a touvé pon étid a Labib oben pétèt nou ka pòté mannèv pou on biten lòwganizasyon mandé-nou fè, men nou ka jwenn onpakèt difikilté. Tousa pé fè-nou kwè kè Jéova pa èvè nou.
10. Lè nou pa sav kijan Jéova ké édé-nou, ki kalité sa pé édé-nou travay ?
10 Lèfètkè nou pa sav ègzaktèman ka Jéova ké fè, sa ka édé-nou ni plis imilité é rété adan limit an nou, 2 biten ki enpòwtan toubònman. Sa ka édé-nou konprann kè Jéova toujou konnèt sa ki pli bon (Iz. 55:8, 9). Lèfètkè nou pa sav ègzaktèman ka Jéova ké fè, sa ka aprann-nou fè-y konfyans plis ankò é lagé tout biten an men a-y. Lè sa ka maché ban nou an prédikasyon oben kè nou ka rivé fè on biten lòwganizasyon ka mandé-nou fè, nou ka ba Jéova tout lonnè-la (Sòm 127:1 ; 1 Kor. 3:7). É si tout biten pa ka pasé kon nou vlé, an-nou sonjé kè Jéova ka vwè tout biten (Iz. 26:12). Nou ka fè sa nou pé é nou sav kè Jéova ké fè rèstan-la. Nou sèten i ké gidé-nou, menmsi i pé’é fè on mirak kon i fè-y an tan a Labib (Akt 16:6-10).
11. Ki biten enpòwtan nou sav ?
11 Nou sav kè Jéova toujou ka aji èvè lanmou, èvè jistis é èvè sajès. Nou sav kè sa nou ka fè ba-y é ba frè é sè an nou ni onlo valè pou-y. Nou sav osi kè i ké toujou rékonpansé sèwvitè a-y ki fidèl (Ébr. 11:6).
NOU PA SAV KA KI KÉ FÈT DÈMEN
12. Dapré Jak 4:13, 14, ki biten nou pa konnèt ?
12 (Li Jak 4:13, 14.) Nou pa sav ka ki ké rivé-nou dèmen. Adan mond-la nou ka viv la, « tan difisil é évènman nou pa té prévwa » pé enn tonbé asi nou (Ékl. 9:11). Nou pé di kè nou ké fè on biten é lèwgadé, sa pa oblijé fèt oben lanmò pé chayé-nou é nou pa oblijé vwè dèmen.
13. Lèfètkè nou pa sav sa ki ké fèt dèmen, ka nou pé rèsanti ?
13 Lèfètkè nou pa sav sa ki ké fèt dèmen, sa pé rèd ban nou. Nou pé enkyèt parapòt a sa ki ké rivé-nou é sa pé fè-nou pèd jwa an nou. Vi an nou pé chanjé bout-pou-bout oben on malè pé rivé-nou é sa pé chouboulé-nou. Anplisdisa, si nou té anvi fè on biten é kè sa pa fèt, sa pé kasé 2 bra an nou (Pwov. 13:12).
14. Ka nou bizwen pou nou ni tchè-kontan ? (gadé sé imaj-la osi).
14 Kèlkèswa sa ki ka pasé adan vi an nou, nou pé montré kè sé pas nou enmé Pap’an nou ki an syèl-la kè nou ka sèvi-y. Plizyè istwa adan Labib ka montré kè fò pa nou konpranndèdi kè Jéova ka anpéché sé difikilté-la vin jwenn-nou, é kè i ka désidé alavans sa ki ké rivé-nou. Jéova sav kè a pa lèfètkè on moun konnèt sa ki ké fèt dèmen ki ka fè-y ni tchè-kontan. I ké ni tchè-kontan si i ka chèché konsèy a Jéova é si i ka obéyi-y (Jér. 10:23). Lè nou ka konté asi-y pou pran on désizyon, nou pa ka enkyété-nou twòp pou sa ki ké fèt dèmen. Okontrè sé konsi nou té ka di : « Si sé sa Jéova vlé, nou ké viv é nou ké fè tèl ou tèl biten » (Jak 4:15).
Lè nou ka chèché konsèy a Jéova é kè nou ka obéyi-y, sa ka pwotéjé-nou (gadé sé paragraf 14 é 15 la).b
15. Ka nou konnèt anrapò èvè dèmen ?
15 Menmsi nou pa konnèt ka dèmen ké pòté, nou sav kè Jéova pwomèt-nou lavi pou touttan, ki sé an syèl-la ki sé asi latè. Nou sav osi kè pa ni mwayen Jéova manti é kè ayen pé’é pé anpéché-y réyalizé pwomès a-y (Tit 1:2). Sé li tousèl ki pé di : « An ja ka di kijan sa ké fin, é dépi an tan lontan, an ka anonsé sé biten-la ki poko fèt la ». Tousa i ni lokazyon anonsé an tan lontan réyalizé é sé konsa osi tousa i anonsé pou dèmen ké réyalizé (Iz. 46:10). Nou sèten kè ayen pé pa anpéché Jéova enmé-nou (Wom. 8:35-39). Kèlkèswa pwoblèm-la nou ké jwenn la, i ké ban-nou sajès-la é fòs-la nou bizwen la é i ké konsolé-nou pou nou andiré. Nou pé sèten kè i ké toujou édé-nou é kè i ké toujou béni-nou (Jér. 17:7, 8).
NOU PÉ PA KONPRANN JAN JÉOVA KONNÈT-NOU BYEN
16. Dè ki konésans Sòm 139:1-6 ka palé, é poukwa sé on biten nou pé pa konprann a san pou san ?
16 (Li Sòm 139:1-6.) Kréyatè an nou konnèt tout biten asi nou. I konnèt poukwa nou ka pansé tèl ou tèl biten é poukwa nou ka rèsanti sa nou ka rèsanti la. I konnèt sa nou ka di é sa ki an tchè an nou. I konnèt osi tousa nou ka fè é poukwa nou ka fè sa. Kon wa David ni lokazyon di, Jéova toujou paré pou i édé-nou é i kapab fè-y. Gran Mèt a linivè, Bondyé toupuisan la ki kréyé tout biten ka voyé zyé asi-w ! Ou pa’a touvé sa fò ? Kon David, nou pé di : « On konésans konsa two fò pou an konprann-li. Tèlman i ho an pé pa trapé-y » (Sòm 139:6).
17. Poukwa nou pé ni dimal a kwè kè Jéova konnèt-nou byen menm ?
17 Pétèt kè parapòt a sa nou viv adan fanmi an nou, parapòt a kilti an nou oben parapòt a sé kwayans-la nou té ni la avan, nou ni dimal a kwè kè Jéova sé on papa ki plen lanmou é ki ka pran penn an nou. Pétèt osi kè parapòt a érè nou fè, nou pé pansé kè nou pa bon, kè Jéova pé’é jen anvi konnèt-nou é kè i pé’é jen lévé-nou digad. Délè sé sa David té ka rèsanti osi (Sòm 38:18, 21). On moun ki ka fè péché sèksyèl é ki ka goumé pou i chanjé pé rivé a mandé-y : « Si Bondyé konnèt-mwen byen, i pé aksèpté-mwen jan an yé. Poukwa i bizwen an chanjé ? »
18. Jéova konnèt-nou plibyen ki noumenm nou konnèt-nou. Lè nou ka rivé konprann sa, poukwa sé on bon biten ban nou ? (gadé sé imaj-la osi).
18 Jéova konnèt-nou plibyen ki noumenm nou konnèt-nou é i kapab vwè sa ki bon adan nou menmsi nou nou pa’a vwè-y. Nou pé fè on travay asi nou pou nou aksèpté lidé-lasa. Menmsi i ka vwè défo an nou é menmsi i ka konprann poukwa nou ka fè sèwten biten é sa nou pé ka rèsanti, i sav osi kè nou pé chanjé é i ka édé-nou fè sa èvè onlo lanmou (Wom. 7:15). Lè nou ka rivé konprann kè Jéova ka vwè ki jan dè moun nou pé vin, sa ka ban-nou fòs-la nou bizwen la pou nou sèvi-y èvè jwa.
Nou pa sav ki difikilté nou ké jwenn dèmen. Sé pousa Jéova ka édé-nou pou fwa an nou adan nouvo mond-la vin pi fò. Adan nouvo mond-lasa lavi ké pibèl (gadé sé paragraf 18 é 19 la).c
19. Ka nou sav anrapò èvè Jéova ?
19 Nou sav kè Bondyé sé lanmou, é nou pa ni pon dout asi sa (1 Jan 4:8). Nou sav kè si i ka di-nou fè on biten oben si i ka di-nou pa fè on biten, sé pas i enmé-nou é i vlé sa ki méyè pou nou. Nou sav kè Jéova vlé kè nou viv pou touttan. Dayè, sé pousa i bay vi a Gason a-y an ranson. Konm Jézi mò pou nou, nou pé sèten kè menmsi nou ka fè érè, nou pé sèvi Jéova é fè-y plézi (Wom. 7:24, 25). Nou sav osi kè « Bondyé pi gran ki tchè an nou é i konnèt tout biten » (1 Jan 3:19, 20). Jéova konnèt tout biten asi nou é i sèten kè nou pé rivé fè volonté a-y.
20. Menmsi ni dé biten nou pa konnèt, ka ki ké édé-nou pou sa pa tèwbolizé lèspri an nou ?
20 Jéova ka di-nou tousa nou bizwen konnèt. Alò menmsi ni dé biten nou pa konnèt, nou pa bizwen tèwbolizé lèspri an nou. Vométan nou konsantré-nou asi sa ki pli enpòwtan. Lè nou ka fè sa, nou ka montré kè nou ni imilité é kè nou ka fèfon asi Jéova a san pou san, pas i sé « Sila ki konnèt tout biten » (Jòb 36:4). Menmsi konnyéla ni sèwten biten kè nou po’o byen konprann, nou pé’é jen fin aprann dé nouvo biten asi Bondyé an nou ki èstraòwdinè toubònman (Ékl. 3:11).
KANTIK 104 Bondyé, ban-nou lèspri sen a-w
a Konm sé Jézi ki ké antèt adan lagè-la kont lènmi a Bondyé, konnyéla, sèten i dwèt konnèt a ki moman fò i ké « fin gangné konba-la » (Rév. 6:2 ; 19:11-16).
b SA NOU KA VWÈ ASI SÉ IMAJ-LA : On papa é gason a-y ka préparé on sak èvè dé biten ki enpòwtan adan pou sianka.
c SA NOU KA VWÈ ASI SÉ IMAJ-LA : On frè ki ka jwenn difikilté ka imajiné jan i ké pwofité dè lavi adan nouvo mond-la.