Poukwa non a Jéova enpòwtan pou Jézi konsa ?

1-2. a) Ka Jézi fè dènyé lannuit-la i pasé la asi latè ? b) Ka nou ké vwè adan awtik-lasa ?

LÈ JÉDI 14 nisan 33, pannan lannuit, Jézi sélébré rèpa a Ségnè la èvè sé apòt-la ki té fidèl la. Jézi té ja sav kè adan on ti moman, Jida té’é trayi-y, kè yo té’é fè-y bon abominasyon é kè lènmi a-y té’é tchouyé-y. Alò jous apré yo fin manjé, Jézi di onlo biten pou ankourajé apòt a-y. Lèwvwè moman-la rivé pou yo té pati, Jézi di on priyè é sa i di adan priyè-lasa té enpòwtan toubònman. Lapòt Jan maké priyè-lasa é nou ka touvé-y adan Jan chapit 17.

² Kijan priyè-lasa ka montré sa ki té an lèspri a Jézi a moman-lasa ? É ka ki té pli enpòwtan pou-y lè i té asi latè ? An-nou réponn a sé kèsyon-lasa.

« AN FÈ-YO KONNÈT NON A-W »

3. Ka Jézi di anrapò èvè non a Jéova é ka sa té vlé di ? (Jan 17:6, 26).

³ Mi sa Jézi di adan priyè a-y : « An fè-yo konnèt non a-w. » Sé té on biten enpòwtan ba Jézi pas i di sa 2 fwa (li Jan 17:6, 26). Ka i té vlé di pa la ? Ès sé li ki fè sé disip-la konnèt kè non a Bondyé sé Jéova ? Konm disip a Jézi té juif, yo té ja sav kè non a Bondyé sé Jéova. Ou ka touvé non a-y plizyè milyé fwa adan Lézékriti ki té maké an ébré. Kifè sa Jézi aprann-yo sé kimoun ki Jéova. I fè-yo konnèt pèwsonalité a-y, sa i ké fè pou lézimen é latè, é bèl kalité a-y. Sé enki Jézi ki té konnèt Jéova byen konsa.

4-5. a) Kijan non a on moun pé vin ni plis valè pou nou ? Bay on ègzanp ? b) Ka ki édé disip a Jézi konnèt Jéova pibyen ?

⁴ Pou nou byen konprann sa, an-nou pran on ègzanp. Imajiné kè ni on ansyen adan lasanblé a-w, non a-y sé David é ou konnèt-li dépi lontan. I dòktè é i ka opéré moun. On jou, on biten ka rivé-w é fò yo opéré-w vitman. Alò yo ka menné-w adan lopital-la la frè-la ka travay la. Frè-la ka opéré-w é i ka sové vi a-w. Alèla, sèten ou ké enmé frè-lasa plis ki avan, é tann ou ké tann non a-y, ou ké sonjé sa i fè ba-w. Nonsèlman David sé ansyen-la ou té ja konnèt la, men konnyéla, pou-w, frè-lasa sé dòktè-la ki sové vi a-w osi.

⁵ Menmjan-la, disip a Jézi té ja konnèt non a Jéova. Men non-lasa vin ni plis valè pou yo, pas Jézi édé-yo konnèt Jéova pibyen. Poukwa nou pé di sa ? Pas lè Jézi té ka palé é lè i té ka aji sé Pap’a-y i té ka imité. Alò lèwvwè sé disip-la té ka tann kijan Jézi té ka anségné é lè yo té ka vwè kijan i té ka aji èvè lézòt, sa té ka fè-yo « konnèt » Jéova pibyen (Jan 14:9 ; 17:3).

« NON A-W, NON-LA OU BAN-MWEN LA »

6. Lè Jézi di kè Pap’a-y té ba-y non a-y, ka sa té vé di ? (Jan 17:11, 12).

⁶ Lè Jézi priyé ba disip a-y, mi sa i ni lokazyon di Pap’a-y : « Voyé zyé anlè yo akòz dè non a-w, non-la ou ban-mwen la » (li Jan 17:11, 12). Ès sa té vé di kè yo té’é kriyé Jézi Jéova alèla ? Non a pa sa. Adan priyè-la, i di « non a-w » pou palé dè non a Jéova. Alò a pa pran i té’é pran non-lasa. Men lè i di « non-la ou ban-mwen la », ka sa té vé di ? Prèmyèwman, Jéova mandé Jézi palé anplas a-y. Pap’a-y voyé-y asi latè, é i fè dé biten ki èstraòwdinè an non a Pap’a-y (Jan 5:43 ; 10:25). Dézyèmman, non a Jézi vé di « Jéova ka sové ». Sa vé di non a Jéova lyanné èvè ta Jézi.

7. Bay on ègzanp ki ka montré kijan Jézi té pé palé an non a Pap’a-y.

⁷ An-nou pran on ègzanp. On prézidan pé chwazi on moun pou palé anplas a-y. Kifè, lè moun-lasa ka palé an non a prézidan-la, i andwa fè sa pas sé prézidan-la ki voyé-y. Menmjan-la, Jézi té andwa palé an non a Jéova pas sé Jéova ki té voyé-y (Mat. 21:9 ; Lik 13:35).

8. Poukwa Jéova di kè Jézi ‘ka aji an non a-y’ avan menm kè Jézi té vin asi latè ? (Ègzòd 23:20, 21).

⁸ Labib ka di kè Jézi sé Pawòl-la pas lè Jéova té bizwen palé ba sé zanj-la oben ba moun asi latè, oben lè i té bizwen yo fè on biten, Jéova té ka sèvi èvè Jézi pou di-yo sa (Jan 1:1-3). Pétèt kè Jézi sé té zanj-la Jéova sèvi èvè-y la pou pran swen a sé Israélit-la lèwvwè yo té adan dézè-laa. Lè Jéova di sé Israélit-la kè fò yo té kouté zanj-lasa, Jéova di-yo poukwa fò yo té fè sa. Mi sa i di-yo : « Pas i ka aji an non an mwen » (li Ègzòd 23:20, 21). Jéova di sa pas Jézi palé an non a-y é kè Jézi té pibyen plasé pou di kè Jéova ka fè sa ki dwèt é kè sé on Bondyé ki sen.

« PAPA, BA NON A-W GLWA »

9. Non a Jéova té enpòwtan ba Jézi toubònman. Poukwa nou ka di sa ?

⁹ Kon nou ja vwè-y, avan menm Jézi té vin asi latè, non a Jéova té enpòwtan ba Jézi toubònman. Lè i té asi latè, tousa i té ka fè té ka montré kijan non a Jéova té enpòwtan pou-y. Lèwvwè travay a prédikasyon a-y té kay bout, mi sa i mandé Pap’a-y : « Papa, ba non a-w glwa. » Alò tousuit Pap’a-y réponn-li. On vwa ki sòti an syèl-la mété-y ka palé ba-y é ou té’é di sé on loraj ki té ka pété. Mi sa i di : « An ba-y glwa é an ké wouba-y glwa ankò » (Jan 12:28).

10-11. a) Kijan Jézi ba non a Jéova lonnè ? (gadé imaj-la osi). b) Poukwa Jéova té bizwen yo fè non a-y vin sen é kè yo défann non a-y ?

¹⁰ Jézi ba Pap’a-y lonnè osi. Kijan i fè sa ? I di lézòt jan Pap’a-y sé on bon moun toubònman é i di-yo ki bèl biten Pap’a-y ja fè. Men a pa sa tousèl i fè. Fò Jézi té montré kè Jéova ka aji on mannyè ki dwèt é kè non a Jéova sen. Jézi montré jan sa enpòwtan lè i aprann disip a-y kijan pou yo priyé. Mi sa i di : « Pap’an nou ki an syèl-la, fò non a-w vin sen » (Mat. 6:9).

¹¹ Poukwa Jéova té bizwen yo fè non a-y vin sen é kè yo défann non a-y ? Sé paskè adan Jadendédèn-la Satan bay onpakèt manti asi Jéova. I di kè Jéova ka manti é kè i ka kouyonné Adan é Èv pou anpéché-yo pwofité dè on bon biten (Jén. 3:1-5). Lè Satan fè sa, sé konsi i té ka di kè Jéova pa ka aji byen. É konm i manti asi Jéova, onlo moun pé rivé a mèt an tèt a yo kè Jéova a pa on bon moun. Kèlkètan apré, an tan a Jòb, Satan di kè moun ki ka sèvi Jéova ka fè sa enki pou Jéova ba-yo on biten. Sa vé di kè lèwvwè yo ké touvé-yo anba difikilté, yo ké arété sèvi Jéova pas yo pa enmé-y vréman (Jòb 1:9-11 ; 2:4). Alò, fò Jéova té lésé tan pasé pou montré si sé-y ki té ka manti oben si sé Satan ki té ka manti.

« AN KA SAKRIFYÉ VI AN MWEN »

12. Ka Jézi té paré a fè davwa i té enmé non a Jéova ?

¹² Konm Jézi té enmé Jéova, i té paré a fè tousa i té pé pou fè non a Jéova vin sen é pou défann non-lasa. Mi sa i di : « An ka sakrifyé vi an mwen » (Jan 10:17, 18). I jous té paré a mò pou non a Jéovab. Adan é Èv ki té pawfè té ba Pap’a yo do é yo té pran pou Satan. Men Jézi kanta-y té paré a vin asi latè pou montré kè i té enmé Pap’a-y é kè i té enmé non a Pap’a-y osi. Tousa i té ka fè é tousa i té ka di té annakò èvè sa Jéova té ka mandé-y (Ébr. 4:15 ; 5:7-10). Magré i soufè bon soufè la, i rété fidèl a san pou san joustan i mò asi on poto (Ébr. 12:2).

13. Poukwa pa ni ponmoun ki té pibyen plasé ki Jézi pou di kè sé manti Satan ka manti ? (gadé imaj-la osi).

¹³ Tousa Jézi fè lèwvwè i té asi latè ka montré byen kè sé Satan ki ka manti, a pa Jéova ! (Jan 8:44). Pa ni ponmoun ki té konnèt Jéova myé ki Gason a-y. Si té ni menm onsèl ti biten ki té vré adan sa Satan di asi Jéova, Jézi té’é sav sa. Men i té byen désidé a kontinyé défann non a Pap’a-y ki plen lanmou. Menm lèwvwè Jéova arété pwotéjé-y, Jézi té paré a mò é a rété fidèl a Pap’a-y pito ki ba Pap’a-y doc (Mat. 27:46).

« AN FIN TRAVAY-LA OU BAN-MWEN FÈ LA »

14. Konm Jézi rété fidèl a Jéova, kijan Jéova rékonpansé-y ?

¹⁴ Adan priyè-la i fè la jouswa-la avan i mò la, mi sa Jézi di : « An fin travay-la ou ban-mwen fè la ». I té sèten kè Pap’a-y té’é rékonpansé-y pou fidélité a-y (Jan 17:4, 5). É i té ni rézon fè Pap’a-y konfyans, pas Pap’a-y pa lésé-y adan tonm-la (Akt 2:23, 24). I résisité Jézi é i ba-y on pli gwo pozisyon an syèl-la ki tala i té ni avan la (Filip. 2:8, 9). Aprésa, Jézi vin Wa a wayòm a Bondyé. Ka wayòm-lasa té ké fè ? Nou ka touvé répons-la adan sa Jézi di sé disip-la lè i aprann-yo priyé. I di : « Fò wayòm a-w vini. Fò volonté a-w fèt asi latè, kon i ja ka fèt an syèl-la » (Mat. 6:10).

15. Ki dòt biten Jézi ké fè ?

¹⁵ Talè, Jézi ké mèt anwout asi lènmi a Bondyé é i ké détwi tout sé méchan-la pannan lagè a Awmagédon (Rév. 16:14, 16 ; 19:11-16). On ti moman apré, Jézi ké jété Satan adan « tou-la ki pa ni fon la », é lè i ké la, a pa ayen i ké pé fè (Rév. 20:1-3). Aprésa, Jézi ké gouvèné pannan 1 000 an, i ké mèt lapé asi latè, é i ké édé toutmoun wouvin pawfè. I ké résisité moun ki mò. I ké fè tout latè touné an paradi. A moman-lasa, pwojé a Jéova ké réyalizé ! (Rév. 21:1-4).

16. Kijan lavi ké yé an bout a sé 1 000 an la ?

¹⁶ Kijan lavi ké yé an bout a sé 1 000 an la ? Pé’é ni pon péché ankò é pé’é ni ponmoun ki enpawfè ankò. Lézimen pé’é bizwen mandé Bondyé padonné péché a yo é yo pé’é bizwen ranson-la ankò. Yo pé’é bizwen Jézi sèvi-yo Gran Prèt ankò, ni kè sé 144 000 la sèvi-yo prèt ankò pou yo bon zanmi èvè Jéova. Anplisdisa, lanmò, ‘dènyé lènmi-la ké disparèt’. Sé mò-la ké ja résisité. Toutmoun asi latè ké pawfè (1 Kor. 15:25, 26).

17-18. a) Ka ki ké rivé an bout a sé 1 000 an la ? b) Lèwvwè Jézi ké fin gouvèné, ka i ké fè ? (1 Korentyen 15:24, 28 ; gadé imaj-la osi).

¹⁷ Ki dòt biten ki ké rivé lèwvwè sé 1 000 an la ké bout ? A moman-lasa, toutmoun ké sav kè Jéova sé on Bondyé ki sen é ki ka fè sa ki dwèt é pé’é ni pon dout asi sa. Poukwa nou ka di sa ? Adan Jadendédèn-la, Satan di kè Jéova ka manti é kè a pa èvè lanmou i ka gouvèné moun ki asi latè. Dépi sa, moun ki ka sèvi Jéova pa jen arété montré kè pa ni méyè chimen ki ta Bondyé. Kifè, apré sé 1 000 an la, ponmoun pé’é ni a défann répitasyon a Jéova ankò. Jéova ké ja montré kè i sé on papa ki plen lanmou.

¹⁸ Alò toutmoun ké sav kè tousa Satan di asi Jéova sé té on manti. Lèwvwè moman-la ké vin pou Jézi arété gouvèné, ka Jézi ké fè ? Ès i pé’é viré kont Jéova menmjan ki Satan ? Awa ! (li 1 Korentyen 15:24, 28). I ké woumèt Wayòm-la an men a Pap’a-y é i ké rété anba dominasyon a-y. Jézi pa kon Satan. I paré a lagé tout pouvwa-la i tini la pas i enmé Pap’a-y.

19. Ki valè Jézi té ka ba non a Jéova ?

¹⁹ Sa pa ka étoné-nou si Jéova té vlé ba Jézi non a-y ! Jézi montré on mannyè ki pawfè kijan Pap’a-y té yé. Pou Jézi, pa ni ayen ki pli enpòwtan ki non a Jéova. I té paré a mò pou non-lasa é lè sé 1 000 an la ké bout, i ké lagé tout biten an men a Jéova volontyé. Kijan nou pé imité ègzanp a-y ? Sé sa nou ké vwè adan awtik-la ki ka vin la.