AWTIK POU ÉTIDYÉ 23
KANTIK 2 Non a-w sé Jéova
Poukwa non a Jéova enpòwtan pou nou ?
« Mi sa Jéova ka di : “Zò sé témwen an mwen” » (IZ. 43:10).
ON TI LIDÉ ASI SA NOU KAY VWÈ
Adan awtik-lasa nou ké vwè ka nou pé fè pou montré kè non a Jéova sen é kè tousa Satan di asi-y sé on manti.
1-2. Kijan nou fè sav kè non a Jéova ni onlo valè pou Jézi ?
PA NI biten ki té pi enpòwtan pou Jézi ki non a Jéova, é pa ni ponmoun asi latè ki fè moun konnèt non-lasa kon i fè-y. Adan awtik-la ki té avan la, nou vwè kè i té paré a mò pou non-lasa é pou montré kè Jéova toujou ka fè dé biten ki jis (Mawk 14:36 ; Ébr. 10:7-9). É lè sé 1 000 la ké bout, i ké mèt tout pouvwa-la i té ni la an men a Pap’a-y é i ké fè sa volontyé, pas i vé ba Jéova tout lonnè-la (1 Kor. 15:26-28). Tousa Jézi fè pou Jéova ka montré kè Jézi enmé-y toubònman.
2 Jézi vin asi latè pou palé an non a Jéova (Jan 5:43 ; 12:13). I fè disip a-y konnèt non a Pap’a-y (Jan 17:6, 26). Lè i té ka anségné sé moun-la é lè i té ka fè mirak, i té ka édé sé moun-la konprann byen kè sé Jéova ki bay sajès-la é pouvwa-la pou fè sé biten-lasa (Jan 10:25). É lè i priyé pou mandé Jéova voyé on zyé asi disip a-y, i mandé Jéova fè sa ‘akòz dè non a-y’ (Jan 17:11). Sa ka montré byen kè pa ni biten ki té ni plis valè pou Jézi ki non a Jéova. Kijan on moun pé di kè i sé disip a Jézi si i pa konnèt non a Jéova oben kè i pa’a sèvi èvè non-lasa ?
3. Ka nou ké vwè adan awtik-lasa ?
3 Konm nou ka suiv ègzanp a Jézi, nou ka ba non a Pap’a-y onlo valè (1 Pyè 2:21). Adan awtik-lasa nou ké vwè poukwa Jéova ba sé moun-la ki ka préché « bon nouvèl a Wayòm-la » non a-y (Mat. 24:14). Nou ké vwè osi poukwa fò non a Jéova ni onlo valè pou nouchak.
« ON PÈP POU NON A-Y »
4. a) Ka Jézi di disip a-y jis avan i viré an syèl-la ? b) A ki kèsyon nou ké réponn adan awtik-lasa ?
4 Jis avan Jézi viré an syèl-la, mi sa i di disip a-y : « Zò ké rèsèvwa puisans lè lèspri sen ké vin anlè zòt, é zò ké sèvi-mwen témwen a Jérizalèm, adan tout Lajidé é Lasamari, é jis koté-la ki pli lwen la asi latè » (Akt 1:8). Sa vé di kè a pa an Israèl tousèl sé disip-la té’é préché, men yo té’é préché toupatou asi latè. Anfinaldikont, moun ki asi toutlatè té’é pé vin disip a Jézi (Mat. 28:19, 20). Men mi sa Jézi ni lokazyon di osi : « Zò ké sèvi-mwen témwen ». Èskè sé nouvo disip-la té’é témwen a Jézi tousèl oben ès fò yo té’é konnèt non a Jéova osi ? Sa ki maké adan Akt chapit 15 ka édé-nou réponn a kèsyon-lasa.
5. Kijan sé apòt-la é sé ansyen-la ki té Jérizalèm montré kè fò toutmoun té konnèt non a Jéova ? (gadé imaj-la osi).
5 An lan 49, sé apòt-la é sé ansyen-la ki té Jérizalèm réini-yo pou yo té sav si sé moun-la ki pa té juif la té oblijé siwkonsi pou yo vin krétyen. Mi sa Jak, dèmi-frè a Jézi di an bout a ti kozé-lasa : « [Pyè] rakonté an détay kijan pou prèmyé fwa, Bondyé okipé dè sé nasyon-la pou chwazi moun adan yo pou yo vin on pèp pou non a-y. » Men dè ki non Jak té ka palé ? Pou réponn a kèsyon-lasa an-nou gadé sa Jak di apré. I palé dè sa pwofèt Amòs té di é mi sa i di : « Pou sé moun-la ki ka rété la chèché Jéova poudèbon, ki yo, ki moun ki adan tout nasyon, moun ki ka pòté non an mwen, sé sa Jéova ka di » (Akt 15:14-18). Non sèlman sé nouvo disip-la té’é aprann konnèt Jéova men yo té’é pòté non a-y osi. Sa vé di kè yo té’é fè toutmoun konnèt non a Bondyé é kè toutmoun té’é sav kè sé yo Bondyé chwazi pou palé an non a-y.
O 1é syèk, sé frè a komité santral la réini-yo é yo konprann kè fò sé krétyen-la pòté non a Jéova (gadé paragraf 5 la).
6-7. a) Poukwa Jézi vin asi latè ? b) Jézi vin asi latè pou ondòt rézon ki pli enpòwtan ankò. Kilès la ?
6 Non a Jézi vlé di « Jéova ka sové » é Jéova sèvi èvè Jézi pou sové toutmoun ki ni fwa adan-y é adan Gason a-y. Jézi vin asi latè pou bay vi a-y pou limanité (Mat. 20:28). Grasa sa i fè, Jéova pé padonné péché an nou é nou pé viv pou touttan (Jan 3:16).
7 Men poukwa nou té bizwen on moun sové-nou ? Sé parapòt a sa ki pasé adan Jadendédèn-la. Adan awtik-la ki té avan la, nou vwè kè prèmyé paran an nou, Adan é Èv té pou viv pou touttan. Konm yo ba Jéova do, yo pèd bèl posibilité-lasa (Jén. 3:6, 24). Sé vré Jézi vin asi latè pou i té sové lézimen, men i vin pou on biten ki té pli enpòwtan ankò (Jén. 3:4, 5). Satan té sali non a Jéova, alò fò toutmoun asi latè té sav kè Jéova pa fè pon biten ki mové é kè sé on Papa ki plen lanmou. É pa té ni moun ki té plibyen plasé ki Jézi pou montré sa, pas i palé an non a Jéova é i fè ègzaktèman sa Jéova té mandé-y fè.
Kijan on moun pé di kè i disip a Jézi alòskè i pa konnèt non a Pap’a-y é i pa’a sèvi èvè-y nonplis ?
8. Ka fò tout disip a Jézi té byen konprann ?
8 Tout sé krétyen-la té dwèt byen konprann kè sé té Papa Jézi ki té ka sové-yo, kivédi Jéova (Jan 17:3). Anplisdisa, fò yo té pòté non a Jéova kon Jézi. Fò yo té byen konprann osi kijan sa enpòwtan kè yo montré kè non a Jéova sen é sé on biten fò yo té fè pou yo té pé sa sové (Akt 2:21, 22). Kifè, fò tout disip a Jézi té aprann konnèt ki Jézi ki Jéova. Sé pousa, sa pa ka étoné-nou si Jézi fin priyè a-y ki adan Jan chapit 17 èvè sé mo-lasa : « An fè-yo konnèt non a-w é an ké kontinyé fè-yo konnèt-li. Konsa, yo ké montré kè yo enmé pwochen a yo menmjan ou montré kè ou enmé-mwen, é an ké soudé èvè yo » (Jan 17:26).
« ZÒ SÉ TÉMWEN AN MWEN »
9. Kijan nou pé montré kè non a Jéova enpòwtan pou nou ?
9 Kon nou vwè-y, sa enpòwtan toubònman kè sé vré krétyen-la montré kè non a Jéova sen (Mat. 6:9, 10). Pawmi tout sé non-la ki ka ègzisté la, fò sé non a Jéova ki pi enpòwtan pou yo é fò yo montré sa adan vi a yo. Men kijan nou pé montré kè non a Jéova sen é kè tousa Satan di asi Jéova sé manti ?
10. Dè ki biten Izayi chapit 42 a 44 ka palé ? (Izayi 43:9 ; 44:7-9 ; gadé imaj-la osi).
10 An Izayi chapit 42 a 44, nou ka vwè kijan nou pé montré kè Jéova sen. Adan sé chapit-lasa, Jéova ka mandé sé moun-la ki pa ka adoré-y la montré kè bondyé a yo ka ègzisté vréman. Anplisdisa, i ka mandé si ni on moun ki anvi vin témwagné, kon adan on tribinal. Men ponmoun pa ka rivé fè sa (li Izayi 43:9 ; 44:7-9).
Nou ka montré kè pa ni pondòt Bondyé ki Jéova adan sa nou ka di é adan sa nou ka fè (gadé sé paragraf 10 é 11 la).
11. Ka Jéova ka di sèwvitè a-y adan Izayi 43:10-12 ?
11 (Li Izayi 43:10-12.) Mi sa Jéova ka di pèp a-y : « Zò sé témwen an mwen, é mwen an sé Bondyé. » Aprésa, i ka mandé-yo réponn kèsyon-lasa : « Ès ni ondòt Dyé ki mwen ? » (Iz. 44:8). Noumenm osi, nou pé réponn a kèsyon-lasa é sé on bèl lonnè pou nou. Èvè sa nou ka di é sa nou ka fè, nou ka montré kè pa ni pondòt Dyé ki Jéova. Pa ni pon non ki kon ta Jéova. Menmsi Satan ka mèt baton an wou an nou, jan nou ka palé é adan jan nou ka viv ka montré kè nou enmé Jéova vréman é kè nou fidèl a-y. Sa ka ban-nou lokazyon montré kè non a-y sen.
12. Kijan pwofési-la nou ka touvé an Izayi 40:3, 5 réyalizé ?
12 Izayi té anonsé osi kè on moun té’é « trasé chimen a Jéova ! » (Iz. 40:3). Kijan sa réyalizé ? Jan Lèbatis wouvè chimen-la ba Jézi, men ‘chimen-la i trasé la sé ta Jéova’ pas sé Jéova ki té voyé Jézi é sé an non a Jéova i té’é palé (Mat. 3:3 ; Mawk 1:2-4 ; Lik 3:3-6). Pwofési-lasa té ka di osi kè « glwa a Jéova ké parèt » (Iz. 40:5). Kijan sa fèt ? Lè Jézi vin asi latè, i fè ègzaktèman sa Jéova té voyé-y fè, kifè sé konsi sé Jéova limenm ki té vin asi latè (Jan 12:45).
13. Kijan nou pé imité Jézi ?
13 Lè nou ka défann non a Jéova, oben répitasyon a-y, nou ka suiv ègzanp a Jézi. Kon Jézi, nou témwen a Jéova. Nou ka pòté non a-y é nou ka di moun nou ka kontré jan i ka fè bèl biten. Pou nou fè sa byen, fò nou fè sé moun-la konnèt osi tousa Jézi ja fè pou montré kè non a Jéova sen (Akt 1:8). Pi gran Témwen a Jéova ki ni, sé Jézi é nou ka suiv ègzanp a-y (Rév. 1:5). Kijan nou pé montré kè non a Jéova ni valè pou nou ?
KI DÒT MANNYÈ NOU PÉ MONTRÉ KÈ NON A JÉOVA ENPÒWTAN POU NOU ?
14. Dapré sa Sòm 105:3 ka di, lè nou ka sonjé non a Jéova, ka nou ka rèsanti ?
14 Nou fyèw dè non a Jéova (li Sòm 105:3). Lè nou fyèw dè non a Jéova é kè nou ka fè toutmoun sav sa, sa ka fè Jéova plézi toubònman (Jér. 9:23, 24 ; 1 Kor. 1:31 ; 2 Kor. 10:17). A pa ti kontan nou kontan nou pé ba non a-y lonnè é nou pé défann répitasyon a-y ! An-nou pa jen wont di kolèg an nou, kanmarad-lékòl an nou, vwazen an nou é dòt moun kè nou Témwen a Jéova. Dyab-la té’é byen kontan si nou té ka arété palé dè non a Bondyé èvè dòt moun (Jér. 11:21 ; Rév. 12:17). An réyalité, li é sé moun-la ki ka simé manti a-y la ka fè sa pou fè non a Jéova disparèt an lèspri a moun (Jér. 23:26, 27). Men konm nou enmé non a Jéova, nou vé ba-y louwanj chakfwa nou ni lokazyon (Sòm 5:11 ; 89:16).
15. Lè nou ka kriyé non a Jéova, ka sa vlé di ojis ?
15 Nou toujou ka kriyé non a Jéova (Joèl 2:32 ; Wom. 10:13, 14). Lè nou ka kriyé non a Jéova, a pa enki sav nou sav kè non a Bondyé sé Jéova é a pa enki sèvi nou ka sèvi èvè non a-y. Nou ka chèché a konnèt kimoun i yé vréman, nou ka fè-y konfyans, é nou ka fèfon asi-y pou i édé-nou é pou i gidé-nou (Sòm 20:7 ; 99:6 ; 116:4 ; 145:18). Anplisdisa, nou ka fè dòt moun konnèt non a-y é sé bèl kalité-la i ni la. Nou ka édé-yo chanjé mannyè yo ka viv osi pou yo fè Jéova plézi é pou Jéova sové vi a yo (Iz. 12:4 ; Akt 2:21, 38).
16. Kijan nou pé montré kè Satan ka manti ?
16 Nou paré a soufè pou non a Jéova (Jak 5:10, 11). Lè nou anba éprèv é kè nou ka rété fidèl a Jéova, nou ka montré kè Satan ka manti. An tan a Jòb, mi sa Satan ni lokazyon di parapòt a moun ki ka sèvi Jéova : « On nonm ké bay tousa i ni pou sové vi a-y » (Jòb 2:4). Satan di kè moun ka sèvi Jéova enki lè tout biten a yo ka maché, é lèwvwè yo ké koumansé jwenn difikilté, yo ké lagé Jéova. Jòb montré kè sa Satan té ka di pa té vré menm, pas i rété fidèl a Jéova. Nou osi nou pé fè sa. Kijan ? Ében sé lèwvwè nou pa ka lagé Jéova menmsi nou ka jwenn éprèv oben menmsi Satan ka éséyé mèt baton an wou an nou. Nou pé sèten a san pou san kè Jéova ké kontinyé voyé on zyé asi nou ‘akòz dè non a-y’ (Jan 17:11).
17. Dapré sa ki maké adan 1 Pyè 2:12, kijan nou pé ba non a Jéova lonnè ?
17 Nou ni onlo rèspé pou non a Jéova (Pwov. 30:9 ; Jér. 7:8-11). Konm sé moun-la sav kè nou Témwen a Jéova, sa nou ka fè pé ba Jéova louwanj oben sa pé sali non a-y (li 1 Pyè 2:12). Sé pousa nou vé fè tousa nou pé pou pawòl an nou é konpòwtasyon an nou ba Jéova lonnè. Konsa, magré nou enpawfè, nou ké ba non a Jéova lonnè-la i mérité la.
18. Ki dòt mannyè nou pé montré kè non a Jéova ni valè pou nou ? (gadé nòt-la osi).
18 Nou ka ba non a Jéova valè kèlkèswa sa moun ka pansé dè nou (Sòm 138:2). Poukwa sa enpòwtan konsa ? Sé pas lè nou ka fè sa ki ka fè Jéova plézi, souvantfwa sé moun-la ki alantou an nou la pa kontan, é yo ka di bétiz asi noua. Lè Jézi mò, pou sé moun-la i té on malfétè é yo voyé mépri ba-y. Men konm Jézi té sav kè anfinaldikont mò a-y té’é ba Jéova lonnè, i té paré a mò kon malfétè. Jézi « méprizé lahont » é i pa lésé sa lézòt té ka pansé dè-y pran tèt a-y (Ébr. 12:2-4). Sa ki té pli enpòwtan ba-y sé té fè sa Jéova té vé (Mat. 26:39).
19. Ka ou ka pansé dè non a Jéova é poukwa sa ?
19 Nou fyèw dè sèvi Jéova é léfètkè non an nou sé Témwen a Jéova, sé on lonnè ban nou. Kifè, menmsi yo ka voyé mépri ban nou, sa pa ka anpéché-nou sèvi Jéova. Non a Jéova pi enpòwtan ban nou ki sa moun ka pansé dè nou. Alò an-nou kontinyé ba non a Jéova lonnè magré Satan ka éséyé anpéché-nou fè sa. Konsa, menmjan ki Jézi, nou ké montré kè non a Jéova, sé sa ki pi enpòwtan ban nou.
KANTIK 10 An-nou louwé Bondyé an nou !
a Lè 3 nonm koumansé di kè Jòb fè dé mové biten, i koumansé lésé sa moun té ka pansé dè-y aji asi-y magré i té on moun ki té fidèl. Odépa, lè i pèd tout timoun a-y é tousa i té ni, « Jòb pa péché é i pa jen di kè Bondyé fè on biten ki pa bon » (Jòb 1:22 ; 2:10). Men lè yo di kè i fè on mové biten, i koumansé palé nenpòt kijan. A moman-lasa, sa ki té pi enpòwtan ba-y sé té défann répitasyon a-y olyé i té défann ta Jéova (Jòb 6:3 ; 13:4, 5 ; 32:2 ; 34:5).