AWTIK POU ÉTIDYÉ 45
KANTIK 138 Bèlté a moun a chivé blan
An-nou pwofité dè dènyé pawòl a nonm ki té ni fwa
« Ès a pa moun ki ni on bèl laj ki ni sajès, é ès a pa moun ki ka viv lontan ki ni entélijans ? » (JÒB 12:12).
ON TI LIDÉ ASI SA NOU KAY VWÈ
Si nou ka obéyi Jéova, i ké rékonpansé-nou dépi konnyéla é i ké ban-nou lavi étèwnèl plita.
1. Poukwa moun ki ja ni on bèl laj ni onlo biten pou aprann-nou ?
NOUTOUT bizwen konsèy pou nou pran bon désizyon. Pli souvan ki rarman, sé ansyen ki adan lasanblé an nou, oben frè é sè kè nou konnèt é ki byen doubout adan lavérité, ki ka ban-nou sé konsèy-lasa. Pétèt sé moun ki lontan pli vyé ki nou. Men a pa pousa fò-nou pansé tousuit kè sé konsèy-la yo ka ban-nou la ja fè tan a yo ! Jéova vlé nou aprann onlo owa moun ki ja ni on bèl laj. Poukisa ? Davwa yo ka viv dépi pli lontan ki nou, yo té ni plis tan pou aprann onlo biten asi lavi é pou aprann aji èvè bon jijman é viv èvè sajès (Jòb 12:12).
2. Ka nou ké vwè adan awtik-lasa ?
2 An tan a Labib, Jéova sèvi èvè moun ki ni on bèl laj pou ankourajé sèwvitè a-y é pou ba-yo on dirèksyon. Pa ègzanp, i sèvi èvè Moyiz, èvè David é èvè lapòt Jan. An-nou palé dè yo. Yo pa viv a menm épòk-la é yo pa viv menm biten-la. An bout a vi a yo, yo ba moun ki té pli jenn ki yo onlo bon konsèy. Yo toulétwa di jan sa enpòwtan obéyi Bondyé. É Jéova fè ansòt pou konsèy a yo, ki ni onlo sajès, maké adan Bib-la. Konsa sa té’é sèvi-nou lèson. Ki nou jennmoun, ki nou granmoun, si nou pran tan réfléchi asi sé konsèy-lasa, sa ké pwokiré-nou onlo byenfé (Wom. 15:4 ; 2 Tim. 3:16). Adan awtik-lasa, nou ké li déotwa adan sé dènyé pawòl-la yo di la é nou ké vwè ka sa ka aprann-nou.
« OU PÉ VIV LONTAN »
3. Moyiz sèvi Bondyé é nasyon a Israèl diféran mannyè. Kilès ?
3 Pannan tout vi a-y, Moyiz travay rèd pou Jéova. I té pwofèt, i té jij, i té on komandan, é i té ékriven. Tousa i fè aprann-li onlo biten menm ! I édé sé israélit-la sòti an Éjipt alòskè yo té èsklav anbala. Misyon-lasa fè-y vwè onlo mirak Bondyé fè. Anplisdisa, Jéova fè-y maké sé 5 prèmyé liv-la ki adan Bib-la é Sòm 90 la. Pétèt sé-y osi ki maké Sòm 91 la. É i ka sanmsa sé li ki maké liv a Jòb.
4. Kimoun Moyiz ankourajé é poukwa ?
4 Tibwen tan avan Moyiz mò, lè i té ni 120 lanné, i sanblé pèp a Israèl. I té vlé fè-yo sonjé sa yo té vwè é sa yo té viv sé lanné-la ki té pasé la. Sèwten pawmi yo té vwè mirak Jéova té fè é jan i té pini sé Éjipsyen-la (Ègz. 7:3, 4). Yo té vwè Jéova fann lanmè Wouj la pou yo travèsé. Yo vwè-y osi détwi Faraon é tout lawmé a-y (Ègz. 14:29-31). Pannan yo té adan dézè-la, yo vwè Jéova pwotéjé-yo é yo vwè-y ka ba-yo sa yo té bizwen (Dét. 8:3, 4). Aprézan, yo té kay rantré adan péyi-la Jéova té pwomèt-yo la, é Moyiz té vlé ankourajé pèp-la on dènyé fwa avan i té mòa.
5. Apré sé Israélit-la tann sa Moyiz di an Détéwonòm 30:19, 20, dè kibiten yo té pé sèten ?
5 Ka Moyiz di ? (li Détéwonòm 30:19, 20). I fè-yo sonjé tout sé bon biten-la ki té ka atann-yo la. Toutotan Jéova té’é béni-yo, yo té’é pé viv lontan adan péyi-la i té pwomèt-yo la. É sé té on bèl péyi ! A pa tibwen manjé tè-lasa té ka bay ! Mi konsa Moyiz palé dè péyi-la : « On péyi ki ni onlo bèl gran vil zòmenm pa konstwi, on péyi ki plen kaz ki ni tout kalité bon biten zò pa travay pou ni yo, on péyi ki plen sitèn zòmenm pa fouyé pou fè-yo, on péyi ki plen pyé-rézen é pyé-zoliv zò pa planté » (Dét. 6:10-12).
6. Poukwa Bondyé lésé Israèl pèd konba douvan dòt nasyon ?
6 Anplisdisa, Moyiz avèti-yo. Si yo té vlé kontinyé rété adan on péyi konsa, ki ka bay tousa manjé, fò-yo té obéyi lwa a Jéova. Moyiz ensisté pou yo « chwazi lavi ». Yo té’é montré sé sa yo chwazi, si yo té ka kouté Jéova é si yo té « ni on lyannaj ki fò èvè-y ». Malérèzman yo pa té ka obéyi. Sé pousa, rivé onlè, Jéova lésé-yo pèd konba douvan sé Asiriyen-la é, plita, douvan sé Babilonyen-la. I jous lésé-yo chayé sé Israélit-la pa fòs lwen a péyi a yo (2 Wa 17:6-8, 13, 14 ; 2 Kron. 36:15-17, 20).
7. Ka pawòl a Moyiz ka aprann-nou ? (gadé imaj-la osi).
7 Ka sa ka aprann-nou ? Si nou ka obéyi Jéova, nou pé viv pou touttan. Menmjan sé Israélit-la té toupré rantré adan péyi-la Bondyé té pwomèt-yo la, nou osi nou toupré rantré adan nouvo mond-la Bondyé pwomèt-nou la. Talè, latè ké vin on bèl paradi (Iz. 35:1 ; Lik 23:43). Dyab-la é tout sé démon a-y la pé ké la ankò (Rév. 20:2, 3). Pé ké ni pon rèlijyon ankò ki ka fè moun kwè mansonj asi Jéova (Rév. 17:16). Sé gouvènman-la, ki ka fè pèp-la ki anba men a yo la soufè, ké disparèt (Rév. 19:19, 20). Jéova pé’é lésé ponmoun chèché lézòt tren adan paradi-la (Sòm 37:10, 11). Ké ni lapé é linité toupatou pas toutmoun an paradi-la ké obéyi Jéova, toutmoun ké fè sa i ka mandé adan lwa a-y. Anplisdisa, yonn ké enmé lòt é yonn ké fè lòt konfyans (Iz. 11:9). A pa ti présé nou présé vwè sa fèt ! É pli bèl-la : si nou ka obéyi Jéova, nou ké viv adan paradi-lasa asi latè, pou touttan. A pa pou déotwa syèk, men pou lavi étèwnèl (Sòm 37:29 ; Jan 3:16).
Si nou ka obéyi Jéova, nou ké pé viv adan paradi-la asi latè pou touttan. A pa pou déotwa syèk, men pou lavi étèwnèl (gadé paragraf 7 la).
8. Jéova pwomèt-nou lavi étèwnèl. Kijan sa édé on frè ki misyonè dépi lontan ? (Jid 20, 21).
8 Si nou ka réfléchi asi lèfètkè Bondyé pwomèt-nou lavi étèwnèl é si nou ka fè tousa nou pé pou pwomès a-y rété byen chouké adan lèspri an nou, sa ké édé-nou obéyi Bondyé kèlkèswa pwoblèm nou té’é pé jwenn (li Jid 20, 21). Pwomès-lasa pé ban-nou fòs-la nou bizwen la pou janmbé défo nou pé ni. On frè, ki misyonè dépi lontan é ki ka préché an Afrik, té ka goumé èvè on défo ki rèd pou i té lagé. Mi sa i ka di : « An konprann kè si an pa té ka obéyi Jéova, an pa té’é pé viv étèwnèlman. Sa ban-mwen plis balan ankò pou mwen té goumé pou défo-lasa pa pran lanmen asi mwen. An sipliyé Jéova plis ankò pou i té édé-mwen lagé sa. Grasa-y, sé sa an rivé fè. »
« OU KÉ RÉYISI »
9. Ki difikilté David jwenn adan vi a-y ?
9 David té on bon wa toubònman. I té fidèl é i toujou sèvi Jéova. Sé té on mizisyen é on poèt. Sé té on sòlda é on pwofèt osi. I jwenn onlo difikilté. Pannan bon enpé lanné, fò i té kaché-y pas wa Sayil té ka chèché tchouyé-y. Apré i vin wa, fò i té kouri kaché ankò pas gason a-y Absalon té vé vin wa anplas a-y, kifè Absalon té ka chèché tchouyé-y. Magré sé pwoblèm-lasa é magré sé péché grav la David fè la, i pa lagé Jéova jistan i mò. Pou Jéova, David té ‘on nonm ki té ka fè ègzaktèman sa ki té ka fè Jéova plézi’. Alò nou pé fè David konfyans zyé-fèmé é kouté sé konsèy-la i bay la. Ni onlo sajès adan sé konsèy-lasa ! (Akt 13:22 ; 1 Wa 15:5).
10. Poukwa David ba gason a-y Salomon konsèy, avan i vin wa ?
10 An-nou réfléchi asi konsèy-la David ba gason a-y Salomon, alòskè i té kay vin wa a Israèl apré David. Jéova té chwazi on jennmoun kon Salomon pou konstwi on tanp, é sé la moun té ké vin adoré Jéova (1 Kron. 22:5). Salomon té ni onlo travay ki té ka atann-li é i té bizwen Jéova édé-y pou dirijé pèp-la. Alò, ki konsèy David té kay ba-y ? An-nou vwè sa.
11. Sèlon 1 Wa 2:2, 3, ki konsèy David ba Salomon, é ka ki rivé lè Salomon fè sa David té di-y ? (gadé imaj-la osi).
11 Ka David di ? (li 1 Wa 2:2, 3). David di gason a-y kè si i ka obéyi Jéova, i ké on bon wa é Jéova ké béni-y. É pannan lontan, Jéova ba Salomon onlo bon biten é i édé-y a plizyè rèpriz é diféran mannyè (1 Kron. 29:23-25). I konstwi on bèl tanp menm ! I maké déotwa liv adan Bib-la é ou jis ka touvé sèwten biten i di, dòt koté adan Bib-la. Tèlman i té ni sajès é tèlman i té rich, moun té ka palé asi sa (1 Wa 4:34). Men kon papa-y té di-y, Jéova té ké béni-y yenki si i té ka kontinyé obéyi Jéova. Malérèzman, lè Salomon vin granmoun, i koumansé adoré dòt dyé ki Jéova. Sa pa fè Jéova plézi é i arété ba Salomon sajès-la ki té ka fè-y dirijé pèp-la èvè tout bonté-la é jistis-la i té ni la (1 Wa 11:9, 10 ; 12:4).
Sé dènyé pawòl-la David di Salomon la ka aprann-nou kè si nou ka obéyi Jéova, i ké ban-nou sajès-la nou bizwen la pou pran bon désizyon (gadé sé paragraf 11 é 12 la).b
12. Ka pawòl a David ka aprann-nou ?
12 Ka sa ka aprann-nou ? Lè nou ka obéyi Jéova, i ka béni-nou é i ka édé-nou (Sòm 1:1-3). Nou ka tou konprann Jéova pa ka pwomèt i ké fè-nou vin rich é yo ké pòté-nou anlè toupatou, menmjan ki Salomon ! Men si nou ka kouté-y, i ké gidonné-nou é i ké ban-nou sajès-la nou bizwen-la pou fè sa ki byen (Pwov. 2:6, 7 ; Jak. 1:5). É sé vré, sé konsèy-la Jéova ka ban-nou la pé édé-nou, lè fò nou pran désizyon anrapò èvè travay, lékòl, lajan é anmizman. Anplisdisa, si nou ka suiv konsèy a Jéova, nou ké rété bon zanmi èvè-y é nou ké viv pou touttan (Pwov. 2:10, 11). Nou ké ni onlo dòt bon zanmi ankò é toutmoun adan fanmi an nou ké ni tchè-kontan.
13. Ka ki édé Carmen pran bon désizyon pou vi a-y vin pli bèl ?
13 Carmen ka viv o Mozanbik. I té ka pansé kè pou vi a-y vin pli bèl, fò i té fè gran lékòl. Alò i ay linivèwsité é i fè étid pou vin awchitèk. Mi sa i di : « A pa ti enmé an té enmé sa an té ka aprann ! Men sa té ka pran tout tan an mwen é tout fòs an mwen. Dépi 7 è-é-dèmi jis 6 è-d-swa, an té linivèwsité. Konm an té ka raté réinyon a lasanblé-la, an koumansé pran distans èvè Jéova. É an fin pa konprann kè an pa té ka suiv konsèy a Jéova ankò » (Mat. 6:24). Carmen palé Jéova dè sa é i fè rèchèch asi sa adan piblikasyon an nou. É mi sa i di : « Sé ansyen-la ban-mwen déotwa bon konsèy, é manman-mwen osi. Aprésa, an désidé arété ay linivèwsité pou an sèvi Jéova aplentan. An ka pansé sé pli bèl désizyon an pran adan vi an mwen é an kontan toubòlman an fè chwa-lasa. »
14. Ki konsèy enpòwtan Moyiz é David bay ?
14 Moyiz é David té enmé Jéova é yo té sav jan sa enpòwtan obéyi-y. Avan yo mò, yo ankourajé lézòt pou yo suiv ègzanp-la yo té ka lésé la pou yo pa lagé Jéova, Bondyé a yo. Yo toulédé avèti lézòt osi. Yo byen di-yo kè si yo té ka lagé Jéova, li osi té’é lagé-yo é kè i pa té’é ba-yo tout sé bon biten-la i té pwomèt-yo la. Konsèy a yo enpòwtan pou nou osi. Siwtou konnyéla ! Plizyè syèk apré, ondòt sèwvitè a Jéova èspliké kijan sa enpòwtan nou rété fidèl.
« PA NI AYEN KI KA FÈ-MWEN PLIS PLÉZI »
15. Kijan lapòt Jan aprann onlo biten ?
15 Jan té bon zanmi a Jézikri é apòt a-y osi (Mat. 10:2 ; Jan 19:26). I pasé onlo tan ka préché èvè Jézi é i vwè-y fè onlo mirak. Sé té on apòt fidèl ki toujou rété èvè Jézi menm lè Jézi jwenn difikilté. I té la lè yo tchouyé Jézi é i vwè-y apré Jézi résisité. I vwè osi lè lasanblé krétyèn la koumansé gwosi. Davwa Jan viv lontan, i vwè jan yo préché bon nouvèl-la « toupatou anba syèl-la » (Kol. 1:23).
16. Kimoun ki bénéfisyé dè sa Jan maké adan sé lèt-la i ékri la é kimoun ka bénéfisyé dè yo jòdijou ?
16 Lè Jan vin ni on bèl laj, i maké liv a Larévélasyon. Maké on liv konsa, sé té on bèl lonnè pou Jan. Lè ou ka li-y, i ka lésé-w èstèbèkwè (Rév. 1:1). Jan maké on Évanjil é i maké 3 lèt osi. Yo ka kriyé sé lèt-lasa 1 Jan, 2 Jan é 3 Jan. Sé ba Gayis i ékri twazyèm lèt-la. Jan té enmé Gayis é i té ka konsidéré-y kon timoun a-y davwa i té édé-y vin krétyen (3 Jan 1). É pétèt i té ka konsidéré onlo dòt krétyen menmjan-la, kon pitit a-y ! Tousa grannonm-lasa maké ka kontinyé ankourajé disip a Jézi jis a lajouné-jòdi.
17. Dapré 3 Jan 4, ka ki pé mèt onlo jwa adan tchè a on moun ?
17 Ka Jan ékri ? (li 3 Jan 4). Adan twazyèm lèt-la Jan maké la, i ka di i kontan vwè fré é sè a-y obéyi Bondyé. An tan-lasa, té ni déotwa moun ki té ka anségné mansonj é sa té ka mèt dézòd adan lasanblé-la. Men érèzman, té ni dòt krétyen ki té ka kontinyé ‘maché adan lavérité’. Yo té ka obéyi Jéova é yo té ka ‘maché dapré komandman a-y’ (2 Jan 4, 6). Sé krétyen-lasa té fidèl é sa té ka fè Jan é Jéova plézi toubòlman (Pwov. 27:11).
18. Ka pawòl a Jan ka aprann-nou ?
18 Ka sa ka aprann-nou ? Si nou ka rété fidèl a Jéova, nou ké kontan é nou ké fè lézòt plézi osi (1 Jan 5:3). Nou kontan pas nou sav nou ka fè Jéova plézi. Li Jéova, i kontan vwè lè nou ka goumé pou nou pa fè sa ki mal é pou nou fè sa i ka mandé-nou (Pwov. 23:15). Sé zanj-la osi an syèl kontan lè yo ka vwè sa (Lik 15:10). Nou osi nou ka kontan lè frè é sè an nou ka rété fidèl magré pèwsékisyon é tantasyon yo ka jwenn (2 Tés. 1:4). Kanta lèwvwè Jéova ké détwi mond-lasa ki an men a Satan, nou ké kontan davwa nou rété fidèl a Jéova.
19. Ka Rachel ka rèsanti lè i ka anségné lavérité ? (gadé imaj-la osi).
19 Lè nou ka édé lézòt aprann lavérité, sa ka pwokiré-nou on jwa èspésyal. Pou Rachel, on sè ki ka viv an Répiblik Dominikèn, sé on gran lonnè aprann lézòt konnèt Jéova Bondyé an nou. I édé plizyè moun koumansé adoré Jéova. Mi sa i di : « An pa’a rivé èspliké tout jwa-la an ka rèsanti la, lè an ka vwè étidyan an mwen koumansé enmé Jéova, é lè an ka vwè-yo ka aprann fè Jéova konfyans é chanjé tousa ki fo pou fè-y plézi. Jwa-la an ni la, pli gran ki tout sé éfò-la oben sé sakrifis-la an fè la pou té anségné-yo lavérité. »
Nou kontan toubòlman lè nou ka aprann lézòt enmé Jéova é obéyi-y (gadé paragraf 19 la).
AN-NOU PWOFITÉ DÈ DÈNYÉ PAWÒL A YO
20. Ankijan nou ka sanm Moyiz, David é Jan ?
20 Moyiz, David é Jan pa viv a menm épòk ki nou é yo pa té ka viv menmjan nou ka viv konnyéla. Men nou ka sanm-yo onlo. Menmjan ki yo, nou ka sèvi vré Dyé-la. Menmjan ki yo, nou ka priyé Jéova é nou ka konté asi-y pou i édé-nou é pou i ban-nou konsèy. É menmjan ki yo, nou sèten Jéova ka béni moun ki ka obéyi-y.
21. Kijan Jéova ké béni-nou si nou ka suiv konsèy a Moyiz, David é Jan é si nou ka obéyi-y ?
21 An-nou kouté konsèy a sé grannonm-lasa : an-nou obéyi komandman a Jéova. Anfinaldikont, nou ké réyisi tousa nou ké fè. Nou ‘ké viv lontan’, nou ké jous viv pou touttan ! (Dét. 30:20). É nou ké kontan fè Pap’an nou ki an syèl-la plézi. Tèlman i enmé-nou, i ké rékonpansé-nou on mannyè pli èstraòwdinè ki sa nou ka imajiné ! (Éféz. 3:20).
KANTIK 129 Fò-nou kenbé solid !
a Prèstout sé Israélit-la ki té vwè sé mirak-la Jéova fè la an lanmè Wouj la, mò san vwè Tè-la Jéova té pwomèt-yo la (Nonb 14:22, 23). Sa fèt pas Jéova té di kè tout sé nonm-la ki té ni 20 lanné oben plis ki sa té ké mò adan dézè-la (Nonb 14:29). Pawkont, onlo pawmi séla ki té ni mwens ki 20 lanné rété vivan. Ansanm èvè yo, Joziyé é Kalèb, é onlo adan tribi a Lévi travèsé Jouden-la é yo rantré an péyi-la Bondyé té pwomèt-yo la (Dét. 1:24-40).
b SA NOU KA VWÈ ASI SÉ IMAJ-LA : Agòch : David kouché asi kabann a-y, é i ka ba gason a-y Salomon on dènyé konsèy. Adwat : Adan on lékòl a pyonyé, sé frè é sè la ka rèsèvwa pli bèl ansègnman ki tini é yo ka bénéfisyé dè sajès a Jéova.