An-nou gadé pou vwè kijan nou pé priyé Jéova plibyen

1. Ka Jéova ka mandé sèwvitè a-y fè ? (gadé imaj-la osi).

LÈWVWÈ nou bizwen on moun konsolé-nou oben lèwvwè nou bizwen konsèy, owa kimoun nou pé alé ? Nou ja konnèt répons-la. Nou pé priyé Jéova. É dayè, sé sa limenm ka mandé-nou fè. Labib ka di-nou kè fò nou « priyé toutlè ». Kifè, nou sav kè Jéova vlé nou pran labitid priyé-y (1 Tés. 5:17). Nou pé di-y tousa ki an tchè an nou é nou pé mandé-y gidé-nou adan tout domenn a vi an nou (Pwov. 3:5, 6). Konm Jéova sé on Bondyé ki donan toubònman, i ka di-nou kè nou pé priyé-y kantité fwa nou vlé.

2. Ka nou ké vwè adan awtik-lasa ?

² Lapriyè, sé on bèl kado Jéova fè-nou é nou ka ba kado-lasa onlo valè toubònman. Men délè, tèlman nou ni biten a fè, nou ni dimal a touvé tibwen tan pou pé sa priyé. Pétèt nou ka vwè osi kè fò-nou fè ansòt pou priyè an nou vin pi bèl. Érèzman, adan Labib, nou ka touvé onlo konsèy é onlo dòt biten ki ka ankourajé-nou. Adan awtik-lasa, nou ké sèvi èvè ègzanp a Jézi pou nou pé vwè kijan nou pé touvé tibwen tan pou nou pé sa priyé. Nou ké vwè osi ka nou pé fè pou nou priyé plibyen. Pou sa, nou ké palé dè 5 biten enpòwtan kè nou pé di adan priyè an nou.

JÉZI TÉ KA PRAN ON TAN POU PRIYÉ

3. Ka Jézi té sav anrapò èvè lapriyè ?

³ Jézi té sav kè pou Jéova, lapriyè sé on biten ki enpòwtan toubònman. Avan i té vin asi latè, i vwè jan Pap’a-y réponn a priyè a plizyè misyé é plizyè madanm ki té fidèl. Pa ègzanp, Àn, David, Éli é onlo dòt sèwvitè a Jéova ankò priyé-y èvè tout tchè a yo é lè Jéova réponn-yo, Jézi té owa a-y (1 Sam. 1:10, 11, 20 ; 1 Wa 19:4-6 ; Sòm 32:5). Sé pousa, Jézi ankourajé disip a-y priyé toutlè. É i di-yo kè fò yo ni fwa lè yo ka fè sa (Mat. 7:7-11).

4. Lè nou ka vwè jan Jézi té ni labitid priyé, ka sa ka aprann-nou ?

⁴ Jézi lésé on bèl ègzanp pou disip a-y. Pannan tout tan-la i rété ka préché la, i té ka priyé toutlè. Men konm pli souvan ki rarman, i té ni onlo biten a fè é té ni onlo moun alantou a-y, fò i té prévwa on ti tan pou i té pé sa priyé (Mawk 6:31, 45, 46). On jou, i lévé granbonnè maten pou i té priyé tousèl a-y (Mawk 1:35). Ondòt kou, i rété ka priyé pannan tout lannuit pou i té pé sa pran on gwo désizyon. É pétèt a pa onsèl fwa i fè sa (Lik 6:12, 13). Pannan dènyé lannuit-la i pasé asi latè avan i té mò, i fè priyè si priyè pou réyalizé sa ki té pi difisil adan travay-la Jéova té ba-y fè la (Mat. 26:39, 42, 44).

5. Kijan nou pé imité ègzanp a Jézi ?

⁵ Ègzanp-la Jézi lésé ban-nou la ka aprann-nou kè menmsi nou ni onlo biten a fè, fò nou pran on tan pou nou pé sa priyé. Pou nou fè sa, pétèt fò-nou ké òwganizé-nou pou nou lévé pi bonnè oben pou nou ay dòmi pli ta lèswa. Konsa, nou ké montré Jéova kè kado-la i ban-nou la ni onlo valè pou nou. On sè non a-y sé Lynne ka sonjé toujou sa i rèsanti lèwvwè i vin aprann kè i té pé palé èvè Jéova adan priyè a-y. Mi sa i ka èspliké : « Lèwvwè an aprann kè an té pé palé èvè Jéova a nenpòt ki moman, sa édé-mwen vwè-y kon méyè zanmi an mwen é an té anvi fè tousa an té pé pou priyè an mwen vin pi bèl. » Sèten onlo adan nou ka rèsanti menm biten ki Lynne. An-nou vwè 5 biten enpòwtan nou pé di Jéova adan priyè an nou.

SENK BITEN ENPÒWTAN NOU PÉ DI JÉOVA ADAN PRIYÈ AN NOU

6. Dapré Révélasyon 4:10, 11, ka Jéova mérité yo ba-y ?

⁶ Ba Jéova louwanj. Lapòt Jan vwè on vizyon ki té èstraòwdinè toubònman. I vwè 24 ansyen ka adoré Jéova an syèl-la. Yo té ka ba Jéova louwanj é yo té ka di kè Jéova « mérité rèsèvwa glwa-la é lonnè-la é puisans-la » (li Révélasyon 4:10, 11). Sé zanj-la ki fidèl la osi ni onlo rézon pou yo ba Jéova louwanj é pou yo onoré-y. Yo ka viv an syèl-la èvè-y é yo aprann konnèt-li byen. Yo ka vwè sé bèl kalité-la i ni la lè yo ka gadé tousa i ka fè. É lè yo ka vwè jan i ka aji, sa ka ba-yo anvi ba-y louwanj (Jòb 38:4-7).

7. Pou ki biten nou pé ba Jéova louwanj ?

⁷ Nou osi, lè nou ka priyé Jéova nou vlé ba-y louwanj. Nou vlé di-y tousa nou enmé é kè nou ka touvé bèl adan pèwsonalité a-y. Lèwvwè ou ka li é lèwvwè ou ka étidyé Labib, éséyé vwè ki kalité Jéova ni. Kilès adan yo ki ka atiré-w plis ? (Jòb 37:23 ; Wom. 11:33). Di-y sa lè ou ka priyé-y é èspliké-y poukwa sa ka touché-w konsa. Nou pé ba Jéova louwanj osi pou sa i ka fè pou nou é pou sa i ka fè pou tout frè é sè an nou ki asi latè. I ka pran swen an nou é i ka pwotéjé-nou akontinyé (1 Sam. 1:27 ; 2:1, 2).

8. Nou pé di Jéova mèsi pou onlo biten. Bay déotwa adan yo (1 Tésalonisyen 5:18).

⁸ Di Jéova mèsi. Pou kantité rézon nou ni dè di Jéova mèsi, pa ni mwayen nou konté sa (li 1 Tésalonisyen 5:18). An réyalité, nou pé di Jéova mèsi pou tout sé bèl biten-la nou ni la pas ‘tout bèl don ka vin dè-y’ (Jak 1:17). Pa ègzanp, nou pé di Jéova mèsi pou jan latè bèl, pou tout sé bèl biten èstraòwdinè la i kréyé la, pou fanmi an nou, pou zanmi an nou é pou vi-la é bèl èspérans-la i ka ban-nou la. Anplisdisa, nou vlé di Jéova mèsi pas i ka pèwmèt-nou vin zanmi a-y é pas lanmityé-lasa ni onlo valè pou nou.

9. Pétèt fò nou ké fè on éfò èspésyal pou nou toujou ni rèkonésans pou Jéova. Poukwa nou ka di sa ?

⁹ Pétèt fò nou ké fè on éfò èspésyal pou nou réfléchi pou vwè pou ki biten, nou pèwsonèlman, nou ni rèkonésans pou Jéova. Poukwa nou ka di sa ? Pas adan mond-la nou ka viv adan-y la, onlo moun engra. Olyé sé moun-la chèché a vwè kijan yo pé montré rèkonésans a yo pou sa yo ja ni, yo plito ka chèché a vwè kijan yo pé ni sa yo anvi. Si nou ka lésé sé moun-lasa détenn asi nou, nou ké enn touvé-nou ka mandé Jéova onpakèt biten san janmen di-y mèsi pou sa i ka ban-nou. Pou sa pa rivé-nou, fò-nou kontinyé ni rèkonésans pou tousa Jéova ka fè pou nou é fò-nou kontinyé montré-y jan nou ni rèkonésans pou-y (Lik 6:45).

10. On sè té ni onlo rèkonésans pou Jéova. Kijan sa édé-y andiré ? (gadé imaj-la osi).

¹⁰ Lèwvwè nou ni labitid montré jan nou ni rèkonésans, sa pé édé-nou andiré. An-nou palé dè on sè non a-y sé Kyung-sook. Nou ka touvé ègzanp a-y adan niméwo a 15 janvyé 2015 a Tou dè Gad la an fransé. Yo touvé kè sè-lasa té ni on kansè é kansè-lasa té ja byen avansé. Mi sa i ka di : « Mésyé, lè an vin sav sa, sa kasé 2 bra an mwen. An té ni lenprésyon kè an té pèd tousa an té ni é a pa ti pè an té pè. » Ka ki édé-y andiré ? Mi sa i ka èspliké : « Touléswa, avan an ay an kabann an mwen, an ka monté asi on véranda ki anho a kaz an mwen, é an ka palé ba Jéova tou ho pou mwen di-y mèsi pou 5 biten i fè ban mwen an jouné-la. Lè an ka fè sa, sa ka trankilizé-mwen é sa ka ban-mwen anvi di Jéova jan an enmé-y. » Mi sa i ka di apré : « An rann-mwen kont kè kèlkèswa éprèv-la nou ka jwenn la, Jéova toujou ka édé-nou. É an vwè osi kè menmsi ni éprèv, sa pa ayen owa kantité bénédisyon nou ka jwenn. » Kon Kyung-sook, menmsi konnyéla nou anba on éprèv, nou ni onlo rézon pou nou pé sa ni rèkonésans pou Jéova. Lè nou ka priyé Jéova pou di-y mèsi, sa pé édé-nou andiré é sa pé trankilizé-nou.

11. Apré Jézi viré an syèl-la, poukwa sé disip-la té bizwen kouraj ?

¹¹ Mandé Jéova kouraj pou ou pé sa préché. On ti moman avan Jézi té viré an syèl-la, i fè disip a-y sonjé kè fò yo té sèvi-y « témwen a Jérizalèm, adan tout Lajidé é Lasamari, é jis koté-la ki pli lwen la asi latè » (Akt 1:8 ; Lik 24:46-48). Men kèlkètan apré, sé chèf a rèlijyon juif la arété Lapòt Pyè é Lapòt Jan é yo menné-yo douvan Sannédren-la. Yo di-yo kè fò-yo arété préché é yo jous mennasé-yo (Akt 4:18, 21). Men kijan sé nonm fidèl lasa réyaji ?

12. Dapré Akt 4:29, 31, ka sé disip-la fè ?

¹² Magré sé chèf a rèlijyon juif la mennasé Pyè é Jan, mi sa Pyè é Jan réponn-yo : « Sé zòt pou jijé si, pou Bondyé, sa jis kè nou kouté-zòt olyé nou kouté Bondyé. Men nou, nou pé pa arété palé dè sé biten-la nou vwè la é dè sé biten-la nou tann la » (Akt 4:19, 20). Lè Pyè é Jan sòti lajòl, sé disip-la priyé Jéova pou yo té pé sa fè volonté a-y. Mi sa yo mandé-y : « Édé èsklav a-w pou yo kontinyé montré-yo brav pou anonsé pawòl a-w. » Yo priyé Jéova èvè tout tchè a yo é Jéova réponn a priyè a yo (li Akt 4:29, 31).

13. Ka ègzanp a Jin-hyuk ka aprann-nou ?

¹³ Nou pé imité sé disip-la ki té ka viv o 1^é syèk lè nou ka kontinyé préché menmsi adan péyi-la nou ka rété la gouvènman-la ka entèwdi-nou préché. An-nou palé dè ègzanp a frè Jin-hyuk, on frè yo mèt lajòl pas i pa té vlé fè lawmé. Adan lajòl-la, té ni on koté yo té ka mèt sé prizonyé-la apa é yo mandé-y okipé dè sé prizonyé-lasa. I té pé palé èvè yo dè sa yo té bizwen men i pa té ni dwa palé dè Labib èvè yo menm menm menm. Alò i mandé Jéova ba-y kouraj pou i pé sa pwofité dè tout ti lokazyon i té’é ni pou i préché é i mandé-y édé-y fè atansyon pou ponmoun pa suiv sa (Akt 5:29). Mi sa i ka di : « Jéova réponn-mwen é i ban-mwen kouraj-la é sajès-la an té bizwen la. Sa édé-mwen koumansé étid a onlo prizonyé. An té ka fè étid-la douvan pòt a sélil-la é sa té ka diré 5 minit. É aprésa, lèswa an té ka maké on lèt ba yochak é an té ka ba-yo lèt-la lèlandèmen-la. » Kon Jin-hyuk, nou pé mandé Jéova kouraj-la é sajès-la nou bizwen la é nou pé sèten kè i ké édé-nou fè travay a prédikasyon-la i ban-nou fè la.

14. Si nou ka jwenn difikilté, ka ki ké édé-nou ? (Sòm 37:3, 5).

¹⁴ Mandé Jéova édé-w pou ou pé sa andiré sé difikilté-la ou ka jwenn la. Ni onlo adan nou ki pa ni on bon santé, ki ka soufè pas tchè a yo an bobo, ki pèd on moun yo té enmé, ki ka jwenn pwoblèm an fanmi a yo, ki ka jwenn pèwsékisyon oben ki ka jwenn dòt difikilté ankò. É lèwvwè yo ka jwenn sé difikilté-lasa alòskè ni lagè oben on épidémi pa ègzanp, sa pli rèd ankò. Ka ou pé fè adan on sitiyasyon konsa ? Di Jéova tousa ou ni an fon a tchè a-w. Palé-y dè sitiyasyon a-w é fè sa konsi sé ba on zanmi a-w ou ka palé. Ou pé sèten kè « i ké pòté mannèv ba-w » (li Sòm 37:3, 5).

15. Kijan lapriyè pé édé-nou « andiré anba sé éprèv-la » ? Bay on ègzanp.

¹⁵ Si nou ka kontinyé priyé, sa ké édé-nou « andiré anba sé éprèv-la » (Wom. 12:12). Jéova konnèt sa sèwvitè a-y ka viv. « I ka tann lè yo ka kriyé-y o sèkou » (Sòm 145:18, 19). Sé sa Kristie konstaté. Sè-lasa pyonyé é i ni 29 an. Santé a-y désann onsèl kou é sa té grav. É konm i pa té ka atann-li a sa, i fè on gwo déprésyon. Kèlkètan apré, yo dékouvè kè manman-y té ni on maladi é kè pa té ka rété-y onlo tan pou viv ankò. Mi sa Kristie ka di : « Touléjou Bondyé fè jou, an té ka mèt jounou atè pou mandé Jéova fòs pou mwen sipòté jouné-la é an té ka fè tousa an té pé pou mwen suiv on pwogram ki té’é édé-mwen rété bon bon zanmi èvè Jéova. An té k’ay lasal é an té ka étidyé tousèl an mwen. » Mi sa i ka ajouté : « Lèwvwè an touvé-mwen anba dlo menm, sé lapriyè ki édé-mwen. An té sav kè Jéova té toujou èvè mwen. Lè an té ka sonjé sa, sa té ka fè-mwen santi-mwen myé. Jéova pa fè tout pwoblèm an mwen disparèt men i réponn a priyè an mwen, kifè, lèspri an mwen té trankil é tchè an mwen pa té enkyèt ankò. » On biten pou nou pa jen oubliyé sé kè « Jéova sav sové lézòm ki anba éprèv é ki fidèl a-y » (2 Pyè 2:9).

16. Pou pon tantasyon pa pran lanmen asi nou, poukwa nou bizwen kè Jéova soutyenn-nou ?

¹⁶ Mandé Jéova édé-w pou pon tantasyon pa pran lanmen asi-w. Konm nou enpawfè, fò-nou goumé toutlè pou nou pa fè pon mové biten. Anplisdisa, Satan ka fè tousa i pé pou mèt baton an wou an nou pou anpéché-nou gangné konba-lasa. I ka éséyé mèt mové lidé an tèt an nou. Pou sa, i ka sèvi èvè anmizman ki pa pwòp pa ègzanp. Sé anmizman-lasa pé mèt enpé mové lidé an tèt an nou ki pa’a fè Jéova plézi é sa pé pousé-nou a fè on péché ki grav (Mawk 7:21-23 ; Jak 1:14, 15).

17. Apré nou mandé Jéova èd a-y adan priyè an nou, ka pou nou fè pou nou pa touvé-nou douvan on tantasyon ? (gadé imaj-la osi).

¹⁷ Pou nou kenbé douvan on tantasyon, nou bizwen kè Jéova édé-nou. É jistèman, lèwvwè Jézi montré disip a-y kijan pou yo priyé, mi sa i di-yo mandé osi : « Pa fè-nou antré an tantasyon, men woté-nou anba men a méchan-la » (Mat. 6:13). A pa ti anvi Jéova anvi édé-nou men fò-nou mandé-y èd a-y. Lè nou fin priyé pou mandé Jéova édé-nou, fò-nou fè tousa nou pé pou nou pa ay dèyè do a sèwten biten si nou sav kè sa pé fè-nou bigidi. Pa ègzanp, nou ké fè atansyon a sa nou ka li é a sa nou ka kouté pou nou pa lésé mové lidé ki lanmòd adan mond a Satan rantré adan lèspri an nou (Sòm 97:10). Vométan nou li oben nou étidyé Labib pou nou mèt dé biten ki pwòp adan lèspri an nou. Fò-nou ay an réinyon osi é fò-nou préché pas sé dé biten ki ka pwotéjé lèspri an nou. Li Jéova aprézan ka pwomèt-nou kè i pé’é jen lésé on tantasyon nou ka sibi ay pli lwen ki sa nou pé sipòté (1 Kor. 10:12, 13).

18. Ki biten pou nou mandé Jéova adan priyè an nou é ki labitid pou nou ni anrapò èvè lapriyè ?

¹⁸ Si nou vlé rété fidèl pannan sé dènyé jou-la ki difisil toubònman, fò-nou mèt jounou atè é sé alè pou nou pran labitid fè sa. Pran on ti tan pou ou pé sa priyé Jéova touléjou èvè tout tchè a-w. I vé ou ‘wouvè tchè a-w ba-y’ (Sòm 62:8). Ba-y louwanj é di-y mèsi pou tousa i ka fè. Mandé-y ba-w kouraj pou ou pé sa préché. Lè ou anba on éprèv oben lè ou douvan on tantasyon, sipliyé Jéova pou i pé sa édé-w kenbé. Pran labitid priyé é pa jen lésé on biten oben on moun anpéché-w fè sa. Men kijan Jéova ka réponn a priyè an nou ? Sa enpòwtan kè nou sav sa é sé sa nou ké vwè adan awtik-ka ki ka vin la.