AWTIK POU ÉTIDYÉ 26
Fè ansòt pou ou toujou paré pou jou a Jéova !
« Jou a Jéova ka vin ègzaktèman kon on vòlè pannan lannuit » (1 TÉS. 5:2).
KANTIK 143 Continuons de veiller, de servir et d’attendre
ON TI LIDÉ ASI SA NOU KAY VWÈa
1. Lè jou a Jéova ké vin, ka pou nou fè pou nou rété vivan ?
« JOU a Jéova ». Ka jou-lasa yé ojis ? Adan Labib, yo ka sèvi èvè èsprésyon-lasa pou palé dè lè Jéova ké détwi lènmi a-y é dè lè i ké sové sèwvitè a-y. An tan lontan, i ni lokazyon pini plizyè nasyon (Iz. 13:1, 6 ; Ézék. 13:5 ; Sof. 1:8). A épòk an nou, « jou a Jéova » ké koumansé lè yo ké ataké Gran Babilòn-la é jou-lasa ké fin èvè lagè a Awmagédon. Pou nou pé rété vivan jou-lasa, fò-nou préparé-nou dépi aprézan. Anfèt, pawòl a Jézi ka fè-nou konprann kè non sèlman fò-nou préparé-nou pou « gwo tribilasyon-la » men fò-nou fè ansòt pou nou toujou paré (Mat. 24:21 ; Lik 12:40).
2. Lè nou ké ègzaminé prèmyé lèt-la Pòl maké ba sé Tésalonisyen-la, ki bon biten sa ké pòté ban-nou ?
2 Adan prèmyé lèt-la Pòl maké ba sé Tésalonisyen-la, i sèvi èvè plizyè ègzanp pou édé sé krétyen-lasa fè ansòt pou yo toujou paré pou gran jou a jijman a Jéova. I té sav kè jou-lasa pa té’é vin tousuit (2 Tés. 2:1-3). Magrésa, i di sé krétyen-la kè fò yo té préparé-yo konsi sé dèmen menm jou-lasa té ka rivé. I ba-yo on bèl konsèy é konsèy-lasa valab pou nou osi. Sa Pòl èspliké la pé édé-nou réponn a sé kèsyon-lasa : 1) Kijan jou-lasa ké rivé ? 2) Kimoun ki pé’é rété vivan lè jou-lasa ké rivé ? é 3) Kijan pou nou préparé-nou pou nou rété vivan jou-lasa ?
KIJAN JOU A JÉOVA KÉ VIN ?
Adan prèmyé lèt-la Pòl maké ba sé Tésalonisyen-la, i sèvi èvè diféran ègzanp é sé ègzanp-lasa pé itil pou nou osi (gadé paragraf 3 la).
3. An ki sans jou a Jéova ké vin kon on vòlè pannan lannuit ? (gadé imaj-la osi).
3 « Kon on vòlè pannan lannuit » (1 Tés. 5:2). Pòl pran 3 ègzanp pou palé dè jan-la jou a Jéova ké vin é tala sé prèmyé-la. Pli souvan ki rarman sé lèswa sé vòlè-la ka rantré aka moun, lèwvwè sé moun-la pa ka atann-yo a sa. É anplisdisa, yo ka fè sa vit. Menmjan-la, jou a Jéova ké rivé onsèl kou é sa ké siwprann lamajorité a sé moun-la. Tèlman sa ké ay vit, pétèt sé vré krétyen-la menm ké èstèbèkwè lè sa ké fèt. Men yo, yo pé’é détwi kon sé méchan-la.
4. An ki sans jou a Jéova ké kon doulè ki ka vin asi on madanm ansent lè i kay akouché ?
4 « Menmjan doulè ka vin asi on madanm ansent lè i kay akouché » (1 Tés. 5:3). On madanm ansent sav kè onlè fò i ké akouché. Men i pé pa sav a ki moman ègzaktèman tibébé-la ké sòti. È lèwvwè moman-la ké rivé, travay-la ké enn koumansé asi-y, sa ké fè-y soufè é ayen pé’é pé arété travay-la. Menmjan-la osi, nou pa sav a ki moman ègzaktèman jou a Jéova ké vin é nou pa sav a ki lè nonplis. Men nou sèten kè jou-lasa ké vin é kè Bondyé ké détwi sé méchan-la onsèl kou. Yo pé’é pé chapé kò a yo.
5. An ki sans gwo tribilasyon-la ké kon limyè a jou ki ka wouvè ?
5 Kon limyè a « jou ki ka wouvè. » Ègzanp-lasa sé twazyèm-la Pòl ka pran la é i ka woupalé dè vòlè ki ka vin pannan lannuit. Men kou-lasa i ka sanm sa i vlé konparé jou a Jéova èvè jou ki ka wouvè (1 Tés. 5:4). Lèwvwè vòlè ka pété on kaz, délè yo tèlman okipé kè yo pa menm ka vwè tan-la ka pasé. Alò lèwvwè jou ka wouvè é kè limyè-la ka koumansé parèt, sa pé siwprann-yo é moun pé rivé a vwè-yo. Sé menm biten ki ké rivé moun ki ka kaché an nwèsè kon vòlè pou kontinyé fè biten Jéova pa enmé. Gwo tribilasyon-la ké mèt tout vis a yo déwò. Kanta nou, nou ké montré kè nou paré pou jou a Jéova si nou ka lagé tout konpòwtasyon Bondyé hay é si nou ka montré kè nou ni « tout kalté bonté, jistis é vérité » adan nou (Éféz. 5:8-12). Aprésa, Pòl ka sèvi èvè dézòt ègzanp pou palé dè moun ki pé ké rété vivan lè jou a Jéova ké rivé. An-nou vwè ki ègzanp ésa.
KIMOUN KI PÉ’É RÉTÉ VIVAN LÈ JOU A JÉOVA KÉ RIVÉ ?
6. An ki sans lamajorité a sé moun-la ka dòmi ? (1 Tésalonisyen 5:6, 7).
6 « Moun ki ka dòmi » (li 1 Tésalonisyen 5:6, 7). Pòl konparé moun ki pé’é rété vivan lèwvwè jou a Jéova ké vin èvè moun ki ka dòmi. Poukwa i fè sa ? Pas yo pa’a rann-yo kont dè sa ki ka pasé alantou a yo é yo pa’a vwè kè lè-la ka touné. Kifè, lèwvwè on biten enpòwtan ka pasé adan mond-la, yo pa annéta konprann é yo pa’a pòté pon mannèv nonplis. Lamajorité a sé moun-la ki adan mond-lasa kon dé moun ki ka dòmi (Wom. 11:8). Pétèt yo ka vwè an 2 zyé a yo kè nou adan « sé dènyé jou-la » é kè gwo tribilasyon-la toupré rivé. Men sa pa’a fè yo ayen. Délè, lèwvwè dé gwo évènman ka fèt adan mond-lasa, sa ka lévé sèwten moun é yo ka koumansé kouté mésaj a Wayòm-la. Men aprésa, ni onlo adan yo ki ka viré dòmi olyé yo rété doubout. Ni moun osi ki ka kwè kè ni on jou a jijman ki ké fèt men pou yo a pa aprézan sa ké fèt menm (2 Pyè 3:3, 4). Men pi tan ka pasé é pi nou ka vwè jan sa enpòwtan dè suiv konsèy-la Pòl ban-nou la, kivédi kè nou rété véyatif.
7. An ki sans sé moun-la Bondyé ké détwi la kon moun ki ka bwè pou sou ?
7 « Moun ki ka bwè pou sou. » Pòl konparé sé moun-la Bondyé ké détwi la èvè moun ki ka bwasonné. Lè on moun ni alkòl an kò a-y, i ka pran plis tan pou i réyaji parapòt a sa ki ka fèt alantou a-y é i pa annéta pran pa menm onsèl bon désizyon. Menmjan-la, sé moun-la ki méchan la pa ka tchenn kont dè avèwtisman a Bondyé. Jan-la yo ka chwazi viv la ké menné-yo a ladèstriksyon. Men sé krétyen-la aprézan, Labib ka ankourajé-yo a kontinyé ni bon jijman pou tèt a yo rété byen asi zépòl a yo (1 Tés. 5:6). Dapré on èspésyalis a Labib, on moun ki ni bon jijman sé on moun lèspri a-y kalm, i pa ka pèd lakat é i kapab konprann on sitiyasyon byen konm i fo pou i pé sa pran on bon désizyonb. Poukwa fò-nou rété kalm é fò-nou aji èvè sajès ? Sé pou nou pa mélanjé-nou adan pon biten ki anrapò èvè lapolitik oben ki anrapò èvè pwoblèm a mond-lasa. Pli jou a Jéova ké toupré rivé, pli yo ké mèt présyon asi nou pou nou pran pawti adan sé domenn-lasa. Men fò pa nou tèwbolizé lèspri an nou pou sa. Lèspri a Jéova ké édé-nou rété kalm, i ké édé-nou rété fò é i ké édé-nou pran bon désizyon (Lik 12:11, 12).
KIJAN POU NOU PRÉPARÉ-NOU POU JOU A JÉOVA ?
Onlo moun pa’a fè atansyon a sa ki ka pasé alantou a yo men nou, nou ka montré kè nou paré pou jou a Jéova lèwvwè nou ka abiyé-nou èvè lafwa é èvè lanmou, é lèwvwè nou ka mèt èspérans an nou kon on kas asi tèt an nou (gadé sé paragraf 8 é 12 la).
8. Adan 1 Tésalonisyen 5:8, lapòt Pòl ka palé dè sèwten kalité ki ké édé-nou rété véyatif é ki ké édé-nou ni bon jijman. Ki kalité ésa é èvè kibiten i konparé-yo ? (gadé imaj-la osi).
8 « An-nou abiyé-nou èvè lafwa é lanmou kon on lenj ki ka pwotéjé tchè a-w, é pou sèvi-nou kas, an-nou mèt èspwa a délivrans-la. » Pòl ka di kè nou kon on sòlda ki ni ékipman a-y asi-y é ki ka véyé tousa ki ka pasé alantou a-y (li 1 Tésalonisyen 5:8). Lèwvwè on sòlda adan on lagè, sa yo ka atann dè-y sé kè i toujou paré pou i goumé kèlkèswa moman-la. Sé menm biten pou nou. Nou ké fè ansòt pou nou toujou paré pou jou a Jéova siwvwè nou ka abiyé-nou èvè lafwa é lanmou, é siwvwè nou ka mèt èspérans an nou kon on kas asi tèt an nou. Sé kalité-lasa ké itil pou nou toubònman.
9. Kijan fwa an nou ka pwotéjé-nou ?
9 On sòlda té ka mèt on biten asi-y pou pwotéjé tchè a-y. Menmjan-la, sa ki ka pwotéjé tchè an nou sé fwa an nou é sé lanmou an nou. Grasa sa, nou pé kontinyé sèvi Jéova é suiv Jézikris. Grasa fwa-la nou ni la, nou sèten kè Jéova ké rékonpansé-nou davwa nou chèché-y èvè tout tchè an nou (Ébr. 11:6). É fwa-lasa ka ban-nou fòs pou nou rété fidèl a Chèf an nou, Jézi, menm lèwvwè nou ka jwenn éprèv. Lèwvwè nou ka jwenn dé bout rèd adan vi an nou, nou pé fè ansòt pou fwa an nou vin pi fò. Nou ka rivé fè sa lè nou ka pran tan réfléchi asi ègzanp a sèwvitè a Jéova ki ka viv a épòk an nou é ki rété fidèl a san pou san magré yo té ka pèwsékité-yo oben magré yo té ni pwoblèm a lajan. É anplisdisa, nou pé fè ansòt pou imité moun ki désidé menné on vi ki senp pou yo té mèt Wayòm-la prèmyé douvanc. Lè nou ka fè sa, sa ka anpéché-nou kouri dèyè biten ki matéryèl pas sé on danjé pou nou.
10. Konm nou enmé Bondyé é konm nou enmé pwochen an nou sa pé édé-nou andiré toupannan nou ka préché. Kijansa ?
10 Sa enpòwtan kè nou ni lanmou pou nou rété véyatif é pou nou pa pèd bon jijman an nou (Mat. 22:37-39). Konm nou enmé Bondyé, sa ka édé-nou kontinyé préché kèlkèswa sitiyasyon nou ka jwenn (2 Tim. 1:7, 8). É konm nou enmé pwochen an nou menmsi yo pa ka adoré Jéova, nou ka kontinyé préché ba yo, ki sé lè nou k’ay akaz a yo, ki sé lè nou ka kriyé-yo pa téléfòn oben lè nou ka voyé lèt ba yo. Nou toujou ka mèt an tèt an nou kè on jou moun nou ka préché ba yo ké chanjé é yo ké mèt-yo ka fè lèbyen. Nou pa ka pèd èspwa (Ézék. 18:27, 28).
11. Poukwa sa enpòwtan kè nou enmé frè é sè an nou ? (1 Tésalonisyen 5:11).
11 On moun ki enmé pwochen a-y enmé frè é sè a-y. Yonn ka montré lòt kè i enmé-y lè yonn ka ankourajé lòt é lè yonn ka fòwtifyé lòt (li 1 Tésalonisyen 5:11). Lè sé sòlda-la ka goumé, yonn ka pwotéjé lòt. Menmjan-la osi, adan lasanblé-la yonn ka ankourajé lòt. Sé vré, adan tout mannèv-la i ka pòté-la, on sòlda pé rivé a blésé ondòt men i pé’é jen fè sa pa èspré. Menmjan-la osi, nou pé’é jen fè on biten pa èspré pou fè frè é sè an nou mal é si on moun fè-nou ditò, nou pé’é viré fè-y ditò nonplis (1 Tés. 5:13, 15). Anplisdisa, lè nou ka rèspékté sé frè-la ki ka dirijé lasanblé-la, nou ka montré-yo kè nou enmé-yo (1 Tés. 5:12). Lè Pòl maké prèmyé lèt-la i voyé la ba lasanblé a Tésalonik, sa pa menm té ka fè on lanné kè lasanblé-lasa té vwè jou. Alò sé frè-la ki té ni rèsponsabilité adan lasanblé-lasa pa té ni onlo èkspéryans é sèten yo dwèt fè déotwa érè. Men apapousa yo pa té mérité kè yo rèspèkté-yo. Lèwvwè gwo tribilasyon-la ké pi pré ankò, pétèt kè biwo mondyal la oben filyal a péyi an nou pé’é pé ban-nou pon dirèksyon. Siwvwè sa rivé, fò-nou ké konté plis ankò asi sé ansyen-la ki adan lasanblé an nou pou nou risivwè sé enstriksyon-la nou ké bizwen la. Sé pousa sa enpòwtan toubònman kè nou aprann enmé-yo é rèspèkté-yo dépi aprézan. Kèlkèswa sa ki pasé, fò pa nou pèd bon jijman an nou. Olyé nou rété gadé défo a yo, sa pou nou gadé sé kè Jéova ka sèvi èvè Jézikris pou gidonné sé nonm fidèl lasa.
12. Kijan èspérans an nou ka pwotéjé lèspri an nou ?
12 On kas ka pwotéjé tèt a on sòlda. Menmjan-la osi èspérans an nou ka pwotéjé lèspri an nou. Lèwvwè nou ka kwè fò adan èspérans an nou, sa ka édé-nou vwè kè kèlkèswa sa mond-la té’é pwopozé-nou, sa pa ni pon valè (Filip. 3:8). Sa ka trankilizé-nou é pa ni ayen ki ka vin jouwé an lèspri an nou. Sé sa Wallace é Laurinda konstaté. Frè-lasa é madanm a-y ka travay adan on Bétèl an Afrik. An 3 simenn, Laurinda pèd manman-y é Wallace pèd pap’a-y. É akòz dè pandémi a Covid-19 la, yo pa té pé viré adan péyi a yo owa fanmi a yo. Mi sa Wallace maké : « Grasa èspérans-la nou ni la, lè an ka sonjé-yo, an pa’a vwè-yo kon yo té yé jis avan yo té mò men an plito ka imajiné jan yo ké yé lèwvwè yo ké toufré résisité adan nouvo mond-la. Lèwvwè an ka santi-mwen tris oben kè sé moun-la an pèd la ka manké mwen onlo, èspérans an nou ka trankilizé-mwen. »
13. Ka nou pé fè pou lèspri sen aji asi nou ?
13 « Pa étenn difé a lèspri-la » (1 Tés. 5:19). Pòl konparé lèspri sen èvè on difé ki ka brilé andidan an nou. Lèwvwè lèspri-lasa ka aji asi nou, a pa ti balan nou ni pou fè sa ki byen é nou présé touvé on lokazyon pou fè sa osi. Lèspri sen ka ban-nou fòs-la nou bizwen la pou nou sèvi Jéova (Wom. 12:11). Ka nou pé fè pou lèspri sen aji asi nou ? An-nou mandé Jéova ban-nou-y, an-nou étidyé Pawòl a-y kè yo maké grasa lèspri-lasa é an-nou pòté bon mannèv adan òwganizasyon a-y kè i ka dirijé èvè lèspri sen a-y. Konsa, nou ké pé ni ‘fwi a lèspri-lasa’ andidan an nou (Gal. 5:22, 23).
Mi sa pou-w mandé-w : « Ès sa an ka fè ka montré kè an vlé Jéova kontinyé ban-mwen lèspri sen a-y ? » (gadé paragraf 14 la).
14. Si nou vlé Bondyé kontinyé ban-nou lèspri sen a-y, ka pou nou fè ? (gadé imaj-la osi).
14 Lèwvwè Jéova ka ban-nou lèspri sen a-y, fò pa nou étenn difé a lèspri-lasa. Pou Jéova ba on moun lèspri sen a-y, fò moun-lasa fè éfò pou i ni enki biten ki pwòp an lèspri a-y é fò i aji on mannyè ki pwòp osi. Si on moun ka lésé dé lidé ki pa pwòp vin an lèspri a-y é kè olyé i woté sa an lèspri a-y i ka lésé sa fè-y fè on mové biten, Jéova pé’é kontinyé ba-y lèspri sen a-y (1 Tés. 4:7, 8). Anplisdisa, pou Jéova kontinyé ban-nou lèspri sen a-y, fò pa nou « méprizé sé pwofési-la » (1 Tés. 5:20). Adan vèwsé-lasa, lè yo ka palé dè pwofési, sé pou palé dè tout sé mésaj-la Jéova ka ban-nou la grasa lèspri sen. Pawmi sé mésaj-lasa, nou ka touvé mésaj-la ki ka konsèwné jou a jijman-la é ki ka montré kè jou-lasa toupré rivé. Nou pa’a mèt an lèspri an nou kè a pa aprézan Awmagédon ké rivé é kè nou ké ni tan mò avan i rivé. Okontrè, nou vlé toujou sonjé jou-lasa é toujou mèt an lèspri an nou ké adan on ti moman i ké vin. Pou sa, chak jou Bondyé fè jou, nou ka fè éfò pou nou fè dé bon biten é nou ka aji on mannyè ki ka montré kè nou enmé Bondyé (2 Pyè 3:11, 12).
« VÉRIFYÉ TOUT BITEN »
15. Ka pou nou fè pou nou pa lésé dé biten ki pa vré é manti a sé démon-la kouyonné-nou ? (1 Tésalonisyen 5:21).
15 Talè, moun ki kont Bondyé ké anonsé dapré yo kè ni « lapé é lasékirité ! » (1 Tés. 5:3). Sé sé démon-la ki ké dèyè do a mésaj-lasa é yo ké fè ansòt pou toutmoun asi latè tann sa. É sé konsa yo ké kouyonné lamajorité a sé moun-la ki asi latè (Rév. 16:13, 14). É nou ? Ès nou ké pri adan sa ? Si nou ka « vérifyé [oben : tèsté] tout biten », nou pé’é pri adan manti-lasa (li 1 Tésalonisyen 5:21). Yo té ka sèvi èvè mo grèk la yo tradui la é ki bay « vérifyé », pou palé dè on tès moun té ka fè asi dé biten ki té annò oben annawjan pou vwè si sé biten-lasa té vréman annò oben annawjan. Menmjan-la, fò-nou vérifyé, kivédi tèsté sa nou ka tann oben sa nou ka li pou vwè si sa vré. Sa té enpòwtan kè sé Tésalonisyen-la fè sa, é pli gwo tribilasyon-la ké toupré rivé é pli sa ké enpòwtan kè nou fè sa osi. Fò pa nou pran tousa moun ka di pou lajan-kontan. Okontrè, an-nou sèvi èvè tèt an nou pou réfléchi é an-nou konparé sa nou ka tann oben sa nou ka li èvè sa Labib é òwganizasyon a Jéova ka anségné-nou. Konsa, kèlkèswa manti-la sé démon-la té’é fè monté-é-désann la, nou pé’é lésé sa kouyonné-nou (Pwov. 14:15 ; 1 Tim. 4:1).
16. Ki èspérans nou ni, é ki biten pou nou byen désidé a fè ?
16 Nou sav kè pèp a Bondyé ké pasé gwo tribilasyon-la vivan. Men é nou pèwsonèlman ? Nou pa sav ka ki ka atann-nou (Jak 4:14). Men on biten nou sèten, sé kè ki nou pasé gwo tribilasyon-la vivan, ki nou vin mò avan jou a Jéova rivé, si nou ka rété fidèl, Jéova ké ban-nou lavi étèwnèl pou rékonpansé-nou. Sé krétyen wen la ké viv an syèl-la èvè Kris é sélézòt mouton-la ké viv asi latè adan paradi-la. Alò fò-nou byen désidé a mèt bèl èspérans an nou byen fon an tèt an nou é fò-nou fè ansòt pou nou toujou paré pou jou a Jéova !
KANTIK 150 Chèché Bondyé pou ou pé sa sové
a Adan 1 Tésalonisyen chapit 5, yo ka sèvi èvè plizyè ègzanp pou palé dè jou a Jéova ki ka vin talè. Men lè yo ka palé dè ‘jou-lasa’ dè kibiten yo ka palé ? Kijan i ké rivé ? Kimoun ki ké rété vivan apré jou-lasa ? Kimoun ki pé’é rété vivan ? Ka nou pé fè pou nou préparé-nou pou jou-lasa ? Pou nou réponn a sé kèsyon-lasa nou ké ègzaminé sa lapòt Pòl di asi sa.
b R. Lenski, The Interpretation of The Epistles of St. Peter, St. John and St. Jude, Augsburg Publishing House, 1966.
c Asi jw.org, gadé ribrik-la, « Ils se sont offerts volontairement ».