LÈSON 6

Èspliké poukwa ou li vèwsé-la

Jan 10:33-36

SA POU-W FÈ : Lè ou fin li on vèwsé, avan ou palé dè ondòt lidé, fè moun-la konprann ka vèwsé-la ni a vwè èvè lidé-la ou ka èspliké la.

Mèt sé mo enpòwtan la douvan. Lè ou fin li on vèwsé, fò ou rété yenki asi sé mo-la ki ni on rapò dirèk èvè lidé-la ou ka èspliké la. Pousa, répété sé mo enpòwtan la oben pozé on kèsyon ki ka édé sé moun-la touvé-yo.

Si ou ka èspliké lidé a vèwsé-la èvè mo a-w ki ta-w, fò sé moun-la toujou vwè ki rapò i ni ant vèwsé-la é sa ou ka di.
Fè sé moun-la vwè lidé enpòwtan la. Asipozé ou di ou kay li on vèwsé pou réponn a on kèsyon, lè ou fin li-y, montré kijan sé mo enpòwtan la ki adan vèwsé-la ka réponn a kèsyon-lasa.

Lè ou ka èspliké on vèwsé ou sòti li, lésé Bib a-w wouvè. Konsa, sa ké édé sé moun-la konprann ka vèwsé-la ni a vwè èvè sa ou ka di.
Èspliké on mannyè ki senp. Pa rété asi détay ki pa nésésè é ki pa ka apiyé lidé enpòwtan la. Tchenn kont dè sa sé moun-la ja konnèt pou sav ki kantité enfòwmasyon ou pé ba-yo. Konsa, ou ké pé èspliké lidé-la on mannyè ki klè é sé moun-la ké konprann-li plibyen.