Luc

3 Sa té ka fè 15 lannen Tibèr Sézar té rwa, a té Pons Pilat ki té ka dirijé Jidé, é Éròd té ka dirijé Galilé, so frè Filip té ka dirijé Itiré ké Trakonitid, épi Lizanyas té ka dirijé Abilèn, 2 annan lépòk gran prèt Ann ké Kayif, Bondjé voyé roun mésaj pou Jan, pitit Zakari-a lò i té annan dézèr-a. 3 Donk Jan alé annan tout koté alantou Jourden-an. I té ka préché pou moun-yan pran batenm-an pou montré ki yé té répanti é pou Bondjé pardonnen yé péché. 4 kou sa ékri annan liv profèt Izayi-a : « Roun moun ka rélé annan dézèr-a : “Préparé chimen Jéova-a ! Fè so larout-ya divini drèt ! 5 Yé ké divèt plen tout koté ki bas, ké latè, é tout ti montangn ké divèt divini plat. Chimen-yan ki tòrdé ké divèt divini drèt. Chimen-yan ki pa bon ké divèt divini plat. 6 É tout moun ké wè délivrans Bondjé.” » 7 Apré sa, i koumansé di pou patché moun-yan ki té ka vini pou i batizé yé : « Pitit vipèr, kimoun di zòt ki zòt pouvé chapé anba kòlè-a ki ka vini ? 8 A pou zòt aji roun fason ki ka montré ki zòt répanti. Épi pa koumansé di zòt kò : « Nou papa, a Abraam. » Paské mo ka di zòt ki Bondjé pouvé sèrvi ròch pou bay Abraam timoun. 9 Wi, rach-a déja asou rasin pyébwa-ya. Yé ké koupé é yé ké boulé tout pyébwa ki pa ka bay frwi ki bon. » 10 É moun-yan té ka doumandé l’ : « Enben, kisa nou divèt fè ? » 11 I réponn yé : « A pou sa-la ki gen dé lenj partajé l’ ké sa-la ki pa gen. É a pou sa-la ki gen manjé fè menm bagaj-a. » 12 Menm sa-ya ki ka ranmasé enpo vini fè yé kò batizé. Yé doumandé l’ : « Ansényan, kisa nou divèt fè ? » 13 I réponn yé : « Pa pran plis enpo-a ki sa moun-yan gen pou péyé. » 14 Sòlda-ya osi té ka doumandé li : « Kisa nou divèt fè ? » É i di yé : « Pa vòlò pyès moun, é pa akizé pyès moun si a pa vré. Mé a pou zòt kontan ké lajan yé ka bay zòt. » 15 Pèp-a té ka antann Kris-a, é yé tout té ka réfléchi asou Jan, yé té ka di annan yé tchò : « Ès a pa Kris-a ki la ? » 16 Jan réponn é i di yé tout : « Mo, mo ka batizé zòt ké dlo, mé sa-la ki pi fò pasé mo ka vini, é mo pa menm ka mérité tiré so soulyé. I ké batizé zòt ké lèspri sen ké difé. 17 I gen annan so lanmen pèl-a i ka sèrvi pou séparé blé-a di pay-a é i ké nétwayé koté yé ka bat blé-a nèt. I ké gardé blé-a, mé pay-a, i ké boulé l’ annan roun difé nou pa pouvé étenn. » 18 I té ka bay patché ròt konsèy é i té ka kontinyé anonsé bon nouvèl-a pou pèp-a. 19 Mé i babyé Éròd ki té ka dirijé Galilé-a. I babyé l’ akoz di Érodyad, madanm so frè, é akoz di tout mové bagaj i té fè. 20 Anplis di tout mové bagaj i té fè, Éròd mété sa-la osi asou so kont : i jité Jan lajòl. 21 Lò tout pèp-a fin batizé, Jézi osi batizé. Pannan i té ka priyè, syèl-a louvri 22 é lèspri sen-an désann asou li kou roun kolonm. Épi roun vwa ki té ka soti annan syèl-a di : « To sa mo Pitit, sa-la mo kontan-an ; to ka fè mo plézi. » 23 Lò Jézi koumansé préché, i té gen apéprè 30 lannen. Dapré sa moun-yan té ka krè, a té pitit Jozèf, pitit Éli, 24 pitit Mata, pitit Lévi, pitit Mèlki, pitit Janay, pitit Jozèf, 25 pitit Matatyas, pitit Amos, pitit Nayim, pitit Èsli, pitit Nagay, 26 pitit Maat, pitit Matatyas, pitit Séméyin, pitit Josèk, pitit Joda, 27 pitit Joanann, pitit Résa, pitit Zorobabèl, pitit Chéaltyèl, pitit Néri, 28 pitit Mèlki, pitit Adi, pitit Kosam, pitit Èlmadam, pitit Èr, 29 pitit Jézi, pitit Éliézèr, pitit Jorim, pitit Mata, pitit Lévi, 30 pitit Siméyon, pitit Jida, pitit Jozèf, pitit Jonam, pitit Éliyakim, 31 pitit Méléa, pitit Ména, pitit Matata, pitit Natan, pitit David, 32 pitit Jésé, pitit Obèd, pitit Boaz, pitit Salmòn, pitit Nachòn, 33 pitit Aminadab, pitit Arni, pitit Èzròn, pitit Pérèz, pitit Jida, 34 pitit Jakòb, pitit Izaak, pitit Abraam, pitit Téra, pitit Naòr, 35 pitit Séroug, pitit Réou, pitit Pélèg, pitit Ébèr, pitit Chéla, 36 pitit Kaynan, pitit Arpakchad, pitit Sèm, pitit Noé, pitit Lamèk, 37 pitit Matizalèm, pitit Énòk, pitit Jarèd, pitit Maalaléèl, pitit Kaynan, 38 pitit Énòk, pitit Sèt, pitit Adan, pitit Bondjé.