Romains

12 Donk, kou Bondjé gen konpasyon pou nou, mo ka sipliyé zòt, frè, pou zòt prézanté zòt kò kou roun sakrifis ki vivan, ki sen é ki Bondjé pouvé asèpté : roun sèrvis sakré zòt ka bay ké tout zòt tèt. 2 É pa lésé monn-an fòrmé zòt ankò, mé a pou zòt chanjé nèt, kontinyé chanjé mannyè zòt ka réfléchi, pou zòt pouvé wè zòt menm a kisa ki volonté Bondjé : sa ki bon, sa ki ka fè l’ plézi, sa ki parfè. 3 Paské, grasa favèr Bondjé nou pa mérité yé bay mo-a, mo ka di zòt chak, a pa pou zòt gen roun lidé asou zòt ki pi rot pasé sa zòt divèt pansé, mé a pou zòt pansé roun fason ki rézonab, zòt chak soulon kantité lafwa Bondjé bay li-a. 4 Menm fason-an tout parti-ya annan rounsèl kò pa ka fè menm bagaj-a, 5 menm fason-an, menmsi nou bokou, nou ké Jézi ka fè rounsèl kò, mé nou chak nou sa roun parti annan kò-a, é ansanm nou tout ka fè rounsèl. 6 Nou gen diféran don soulon favèr nou pa mérité Bondjé bay nou. Atò si a profési nou rousouvwè annou di profési dapré nou lafwa ; 7 si a roun travay yé bay nou fè, annou fè sa travay-a ; sa-la ki ka ansényé, a pou i ansényé ; 8 sa-la ki ka ankourajé, a pou i ankourajé ; sa-la ki ka bay, a pou i bay san konté ; sa la ki ka gidé asanblé-a, a pou i fè l’ byen ; sa-la ki ka fè mizérikòrd, a pou i fè l’ ké tchò kontan. 9 Pa di zòt kontan ròt-ya épi anyen pa la. Rayi sa ki mové, kontan sa ki bon. 10 Kou annan roun fanmi, a pou zòt kontan zòt konpanyen ké tout zòt tchò. A pou zòt toujou pran douvan pou bay zòt konpanyen lònò. 11 A pou zòt travay rèd, pa fè fenyan. A pou lèspri-a limen difé an zòt tchò. Travay kou èsklav pou Jéova. 12 A pou zòt tchò kontan grasa lèspérans. Tchenbé rèd annan éprèv-ya. Kontinyé priyè. 13 Partajé ké sen-yan soulon sa yé bézwen. A pou zòt toujou byen rousouvwè moun. 14 Kontinyé béni sa-ya ki ka pèrsékité zòt ; béni moun, pa voyé malédiksyon asou yé. 15 A pou zòt tchò kontan ké sa-ya yé tchò kontan ; pléré ké sa-ya ki ka pléré. 17 Pa randé pyès moun mové bagaj yé fè zòt. Mé tchenbé kont di sa ki bèl pou tout moun. 18 Si zòt pouvé fè l’, é si sa ka dépann di zòt, a pou zòt byen ké tout moun. 19 Zòt mo kontan-an, pa alé vanjé zòt kò, mé lésé kòlè Bondjé aji, paské men sa ki ékri : « “Lavanjans, a di mo ; a mo ki ké randé”, a sa Jéova ka di. » 20 Mé pito, « si to lèlmi fen, bay li manjé, si i swèf, bay li bwè ; paské si to ka fè sa, to ké mété difé charbon asou so tèt ». 21 Pa lésé sa ki mové pran pyé asou to, mé kontinyé ganyen asou sa ki mové grasa bon bagaj to ka fè.