Isaïe

40 Men sa zòt Bondjé ka di : « Konsolé, konsolé mo pèp. 3 Vwa roun moun ka rélé annan dézèr-a : « Trasé chimen Jéova-a ! Fè roun gran larout ki drèt anmitan dézèr-a pou nou Bondjé. 4 A pou tout savann anmitan dé montangn vin pi rot, a pou tout montangn ké tout ti montangn vin bas. A pou vyé larout ki plen ké trou vin lis, téren ki ka monté ké divèt vin plat kou savann. 5 Laglwar Jéova ké parèt, é tout moun ké wè l’, paské a bouch Jéova ki di l’. » 8 Radyé-a ka vini sèk é flèr-a ka fannen, mé paròl nou Bondjé ka rété pou tout-tan. » 11 I ké fè kou roun bèrjé, i ké gadé pou so troupo. I ké rasanblé ti-mouton-yan é i ké poté yé asou so lèstomak. I ké mennen brébi-ya ki ka bay yé pitit tété é i ké fè l’ dousman. 26 Lévé zòt wéy laro syèl-a é gadé. A kimoun ki fè sa bagaj-ya ? A sa-la ki ka fè yé soti kou roun larmé, yé chak dapré yé niméro ; i ka aplé yé tout ké yé non. Grasa patché fòrs ké pwisans i gen, pyès annan yé pa ka manké. 28 Ès a konnèt to pa konnèt ? Ès a tandé to pa tandé ? Jéova, Sa-la ki fè tout koté asou latè-a, a li ki Bondjé pou tout-tan. I pa jen las, i pa jen ka fatigé. Pyès moun pa pouvé rivé konnèt tousa Bondjé ka konprann. 29 I ka bay sa-la ki las, fòrs é sa-ya ki pa gen fòrs, i ka bay yé bokou fòrs. 30 Tibolonm-yan ké las é yé pa ké gen fòrs ankò, jennjan-yan ké bité é yé ké tonbé, 31 mé sa-ya ki ka mété yé èspwar annan Jéova ké roupran fòrs. Yé ké volé kousidiré yé té gen zèl, kou zèg. Yé ké kouri mé yé pa ké las ; yé ké maché mé yé pa ké las. »