1 Pierre

5 A pou sa, mo ki wè soufrans Kris-a é ki ka partisipé annan laglwar ki divèt parèt, mo ki sa roun ansyen kou yé menm, mo ka sipliyé ansyen-yan ki anmitan zòt : 2 Pran swen di troupo Bondjé ka bay zòt, véyé asou li, pa kousidiré yé ka oblijé zòt, mé ké tchò kontan douvan Bondjé ; pa paské zòt kontan rousouvwè bagaj pou zòt menm di roun fason malonèt, mé fè l’ ké ti kouri ; 3 pa koumandé sa-ya ki éritaj Bondjé kousidiré zòt té sa yé chèf, mé divini dé èkzanp pou troupo-a. 4 É lò bèrjé-a ki chèf ké rivé, zòt ké rousouvwè kouròn laglwar-a, ki pa pouvé fannen. 5 Menm fason-an, zòt, jennjan-yan, a pou zòt soumèt zòt kò anba wonm-yan ki granmoun. Mé zòt tout, a pa pou zòt fè ròklò ké zòt konpanyen, pas Bondjé kont sa-ya ki ka fè ròklò, mé i ka bay sa-ya ki ka fè yé kò toupiti so favèr nou pa mérité. 6 Donk fè zòt kò toupiti anba lanmen Bondjé ki pwisan, konsa lò moman-an ké rivé, i ké mété zòt anlè, 7 toupannan zòt ka jité tout zòt enkyétid asou li, paské i ka pran swen di zòt. 8 Kontinyé byen réfléchi, véyé ! Zòt lèlmi, Djab-a, ka maché toupatou kou roun lyon ki ka grondé fò, i ka chaché manjé roun moun. 9 Mé a pou zòt tchenbé rèd douvan li, byen djòk annan lafwa, paské zòt savé ki fanmi frè ké sò toupatou asou tout latè-a ka pasé anba sa menm kalité soufrans-ya. 10 Mé lò zòt ké fini soufri roun tibi, Bondjé ki ka bay tout favèr nou pa mérité, ki aplé zòt pou zòt gen laglwar pou tout-tan ansanm ké Kris, ké fini fòrmé zòt li menm. I ké fè zòt divini djòk, i ké fè zòt divini fò, é i ké fè zòt rété byen dibout. 13 Madanm-an ki Babilòn é ki yé chwazi kou yé chwazi zòt, ka voyé bonjou bay zòt é Mark, mo pitit, ka voyé bonjou bay zòt osi.