1 Pierre

4 Kou Kris soufri annan so lachè, zòt menm osi, a pou zòt gen menm mantalité-a, paské sa-la ki soufri annan so lachè fini ké péché-ya, 2 konsa, tan i ka rété li pou i viv annan so kò fèt ké lachè, i pa ké viv li pou fè volonté wonm-yan ankò, mé pou fè volonté Bondjé. 3 Wi, zòt ja pasé asé tan konsa ka fè sa nasyon-yan lé, lò zòt té ka lésé zòt kò alé ka fè bagaj ki ka dèrèspèkté Bondjé san ronté, lò zòt pa té ka kontrolé vyé anvi zòt té gen, lò zòt té tafyatò, lò zòt té ka alé annan lafèt koté yé ka fè yenki bagaj malpròp, lò zòt té annan zafè bwè pou sou ké adoré zidòl, bagaj ki dégoutan. 4 Yé pa ka konprann poukisa zòt pa ka kouri ké yé annan tout yé malpròpté ankò. Atò yé ka malpalé zòt. 7 Mé lafen tout bagaj tou pròch. Donk, a pou zòt sa dé moun ki ka byen réfléchi é a pou zòt fè atansyon pou zòt pa néglijé lapriyè. 8 Pasé pyès ròt bagaj, a pou zòt gen bokou lanmou pou zòt konpanyen, paské lanmou ka kouvri roun patché péché. 9 A pou zòt rousouvwè zòt konpanyen, san rounourounou. 10 Si zòt rousouvwè roun don, sèrvi sa don-an pou sèrvi zòt konpanyen, kou moun ki ka byen sèrvi favèr Bondjé nou pa mérité. Bondjé ka montré sa favèr-a di plizyèr fason diféran. 11 Si roun moun ka palé, a pou i palé kousidiré i té ka bay paròl Bondjé-ya ; si roun moun ka sèrvi, a pou i konté asou fòrs Bondjé ka bay ; pou Bondjé rousouvwè laglwar annan tout bagaj grasa Jézi Kris. Laglwar ké pwisans a di li pou tout-tan. Anmèn. 14 Si yé ka jouré zòt akoz di non Kris, zòt pouvé kontan, paské lèspri laglwar, wi lèspri Bondjé, asou zòt. 15 Parkont, a pa pou pyès moun annan zòt soufri paské i ka tchwé moun, i ka vòlò, i sa roun bandi ouben paské i ka mélé annan zafè moun.