Romains

16 Lèspri-a li menm ka témwanyé ké nou lèspri ki nou sa pitit Bondjé. 17 Donk si nou sa pitit Bondjé, nou érityé osi (wi, érityé Bondjé, mé érityé ansanm ké Kris), dipi nou ka soufri ké Kris pou Bondjé glorifyé nou ansanm ké li osi. 20 Kréyasyon-an tonbé annan roun lavi ki pa ka mennen pyès koté, pa paské i té lé mé paské Bondjé pèrmèt sa rivé akoz di sa èspérans-a : 21 kréyasyon-an osi ké libéré di èsklavaj roun kò ki ka gaté é i ké gen libèrté ké laglwar pitit Bondjé-ya. 22 Paské nou savé ki jik aprézan tout kréyasyon-an ka kontinyé jémi ansanm ké soufri ansanm. 24 Paské i sové nou grasa sa éspérans-a. Mé lò nou ka wè sa nou té ka antann, a pa roun èspwar ankò paské, sa nou ka wè, ès nou ka antann li toujou ? 25 Mé si nou ka antann sa nou pa ka wè, nou ka kontinyé antann li é toupannan nou présé i rivé, nou ka tchenbé rèd. 31 Atò kisa mo ké di asou sa ? Si Bondjé pou nou, kimoun ki ké pouvé ganyen nou ? 32 I pa menm sové so pròp Pitit, mé pasé i fè sa i bay nou li. Donk, ès i pa ké kontan bay nou tout ròt bagaj anplis di so Pitit ? 34 Kimoun ki ké kondané yé ? Wi, Jézi Kris, sa-la ki mouri, wi sa-la menm ki résisité, a òbò lanmen drèt Bondjé i fika é a li ki ka sipliyé pou nou. 35 Kimoun ki ké séparé nou di lanmou Kris gen pou nou ? Ès a éprèv ? Ès a enkyétid ? Ès a pèrsékisyon ? Rété san manjé ? Rété toutouni ? Danjé ouben zépé ? 36 Kou sa marké, « paské nou ka sèrvi to, yé ka tchwé nou tout lajournen ; yé ka gadé nou kou mouton yé k’alé tchwé ». 37 Mé, annan tout sa bagaj-ya, nou ka ganyen nèt grasa sa-la ki kontan nou. 38 Paské mo sir ki ni lanmò, ni lavi, ni zanj, ni gouvèrnman, ni bagaj ki la aprézan, ni bagaj ki ké rivé, ni pwisans, 39 ni rotò, ni bagaj ki fon, ni pyès ròt kréyasyon pa ké pouvé séparé nou di lanmou Bondjé gen pou nou é ki annan Kris Jézi nou Sényèr.