Hébreux

11 Lafwa, a lò to sir ki tout bagaj to ka antann ké fèt vré, é lò to gen prèv ki klè ki sa to pa ka wè ka vréman èkzisté. 3 Grasa lafwa nou gen, nou ka konprann ki a paròl Bondjé-a ki ranjé sistèm-yan, atò bagaj nou ka wè koumansé èkzisté grasa bagaj nou pa ka wè. 4 Grasa lafwa i té gen, Abèl ofri Bondjé roun pi gran sakrifis ki sa-la Kayen té fè-a, é pas i té gen sa lafwa-a Bondjé fè l’ savé ki i té jis, paské Bondjé asèpté so ofrann ; é menmsi i mouri, i ka palé toujou grasa so lafwa. 5 Grasa lafwa Énòk té gen, Bondjé chanjé l’ di plas pou i pa wè so lanmò , é pyès moun pa té ka trapé l’ pyès koté, paské Bondjé té chanjé l’ di plas ; é anvan sa, Bondjé té fè l’ savé ki i té kontan li. 6 San lafwa, nou pa pouvé fè Bondjé plézi, paské sa-la ki ka vini douvan Bondjé divèt krè ki i ka èkzisté é ki i ka divini sa-la ki ka rékonpansé moun-yan ki ka chaché l’ ké tout yé tchò. 7 Grasa lafwa Noé té gen, lò Bondjé fè l’ savé ki sèrten bagaj moun patékò ka wè té ké rivé, i vin gen lakrent pou Bondjé é i konstrwi roun arch pou sové so fanmi. É grasa so lafwa, i kondané monn-an é i vin gen lajistis moun ka ganyen grasa lafwa. 8 Grasa lafwa i té gen, Abraam obéyi lò Bondjé aplé l’, é i lésé koté i té ka rété pou alé rounòt koté ki té pou divini so éritaj ; i pati san i pa té menm savé koté i té ka alé. 9 Grasa lafwa i té gen, i rété kou roun étranjé annan péyi Bondjé té promèt li, kousidiré i té annan roun péyi étranjé, i rété anba tant ké Izaak ké Jakòb, sa-ya ki té pou érité di menm promès-a ké li. 10 Paské i té ka antann vil-a ki gen vré fondasyon-yan, vil Bondjé désidé kouman i té pou fèt épi ki i fè li menm. 11 Grasa lafwa i té gen osi, Sara rousouvwè pwisans pou i ansent menmsi i pa té gen laj pou fè timoun ankò, pas i té ka krè ki sa-la ki té fè sa promès-a té fidèl. 12 A pou sa, rounsèl mouché ki té près mouri, rivé gen roun patché pitit, yé té bokou kou zétwèl annan syèl-a é kou sab ki òbò lanmè-a é ki nou pa pouvé konté. 16 Mé aprézan, yé ka chaché gen roun koté ki miyò, sa lé di roun koté ki annan syèl-a. A pou sa Bondjé pa ka ronté yé aplé li yé Bondjé, paské i préparé roun vil pou yé. 20 Grasa lafwa i té gen osi, Izaak béni Jakòb ké Ézayu parapòrta bagaj ki té gen pou rivé. 24 Paské i té gen lafwa, Moyiz réfizé yé aplé l’ pitit tifi Faraon-an lò i divini gran. 25 é i chwazi yé malmennen l’ ké pèp Bondjé-a pasé i pran plézi roun ti moman annan plézi péché-a ka bay, 26 Paské i wè fason yé dézonoré Kris kou roun bagaj ki gen plis valò ki tout trézòr i gen an Éjip, paské a rékonpans-a i té ka gadé. 27 Paské i té gen lafwa, i lésé Léjip, san i pa té pè kòlè rwa-a, paské i pa moli kousidiré i té ka wè sa-la nou pa pouvé wè-a. 28 Pas i té gen lafwa, i fété Lapak é i mété disan kou yé té di li fè, pou sa-la ki ka tchwé-a pa manyen yé prémyé pitit-ya. 32 É kisa mo ké di ankò ? Paské mo pa ké gen asé tan pou mo rakonté tousa Jédéyon, Barak, Sanson, Jèfté, David, Samiyèl ké ròt profèt-ya fè. 33 Grasa lafwa, yé ganyen kont plizyèr rwayonm, yé fè sa ki jis, yé rousouvwè sa Bondjé té promèt yé, yé fronmen djòl lyon-yan, 34 yé étenn chalò difé-a, yé chapé anba kout zépé, yé vin pi fò lò yé té fèb, yé divini vayan annan lagèr, é yé fè larmé-ya ki té lé baré yé pran kouri. 35 I gen madanm ki rivé rouwè moun yé té kontan ki té mouri grasa rézirèksyon-an. Mé i gen ròt moun yé fè roun patché mizè paské sa moun-yan pa té lé bay pyès ranson pou yé té libéré. Konsa, yé té pouvé trapé roun rézirèksyon ki té miyò.