Isaïe

2 Poukisa zòt ka kontinyé dépansé soumaké pou sa ki pa dipen ? Poukisa zòt ka dépansé soumaké zòt travay pou zòt gen, pou bagaj ki pa ka plen zòt vant ? Kouté mo byen, épi manjé sa ki bon ; konsa, zòt ké pran plézi manjé pi bon manjé i pouvé gen. 4 Gadé ! mo fè li divini roun témwen pou nasyon-yan, roun gid ké roun chèf pou nasyon-yan. 6 Chaché Jéova pannan nou pouvé trapé li toujou. Aplé l’ pannan i tou pròch. 7 A pou méchan-an chanjé so konpòrtman, é a pou moun-an ki mové lésé tout lidé i gen ; a pou i rouvin òbò Jéova ki ké pran so lapenn, wi òbò nou Bondjé, paské i ké pardonnen l’ ké tout so tchò ; 8 « Paské mo pa ka réfléchi kou zòt ka réfléchi, é mo pa ka fè bagaj-ya kou zòt ka fè yé, a sa Jéova ka di. 9 Menm fason syèl-a pi rot ki latè-a, fason mo ka aji pi rot pasé fason zòt ka aji, é fason mo ka réfléchi pi rot pasé fason zòt ka réfléchi. 10 Menm fason lapli ké lanèj ka tonbé di syèl-a é yé pa ka viré san yé pa mouyé latè-a pou fè grenn-yan pousé, é san yé pa bay sa-la ki ka planté, grenn pou i sonmen ké dipen pou moun manjé, 11 a menm bagaj-a pou paròl-a ki ka soti di mo bouch. Non, i pa ké viré òbò mo san i pa bay anyen, mé i ké fè tousa ki ka fè mo plézi é asiré pa pitèt i ké fè travay mo voyé li fè-a.