2 Corinthiens

7 Donk, zòt mo byen kontan-an, kou nou gen sa promès-ya, annou lavé nou kò di tousa ki ka sali nou lachè ké nou lèspri, pou nou rivé divini sen nèt, toupannan nou gen lakrent pou Bondjé. 5 Pou byen di, lò nou rivé Masédwann, nou pa trapé soulajman, mé yé kontinyé bay nou traka an tout sans — dèrò, a té briga, é ofon, nou té ka enkyété nou kò. 6 Mé Bondjé, ki ka konsolé sa-ya ki dékourajé, konsolé nou lò Tit rivé, 7 é pa lò i rivé rounso, mé osi grasa konsolasyon zòt té bay li-a, paské i di nou kouman zòt té présé rouwè mo, kouman zòt té gen chagren é kouman zòt té ka vréman enkyété pou mo ; é tousa bay mo ankò plis tchò kontan. 9 aprézan mo tchò kontan, mé a pa paské zòt té tris, a paské tèlman zòt té tris sa fè zòt répanti. Kou fason zòt té tris té k’alé ké volonté Bondjé, zòt pa soufri akoz di nou. 10 Pas zòt pa gen pou rigrété lapenn ki ka fè Bondjé plézi é ki fè zòt répanti pou Bondjé sové zòt ; parkont lapenn monn-an ka bay lanmò. 11 Kou zòt té gen sa lapenn-an ki ka vini di Bondjé, gadé ki balan sa bay zòt, wi kouman zòt té présé pou montré ki a pa té zòt fot, wi zòt té pè, wi a ké ti kouri zòt té lé ranjé déga zòt fè ! Zòt byen montré ki zòt té pròp annan sa zafè-a.