Romains

5 Donk, aprézan Bondjé déklaré ki nou jis grasa nou lafwa, annou viv annan lapè ké Bondjé grasa nou Sényèr Jézi Kris. 2 A grasa li osi nou rivé gen sa favèr nou pa mérité-a nou gen aprézan, grasa lafwa ; é a pou nou tchò kontan, kou nou ka apiyé asou èspérans nou ké rousouvwè laglwar Bondjé. 3 Mé a pa sa rounso, a pou nou tchò kontan lò nou annan éprèv, paské nou savé ki éprèv-a ka fè nou tchenbé rèd, 4 é lò nou ka tchenbé, Bondjé kontan sa nou ka fè, é lò nou savé sa, sa ka bay nou èspwar. 5 É nou pa gen èspwar pou bon tchò, paské lanmou Bondjé plen nou tchò grasa lèspri sen i bay nou. 8 Mé, men kouman Bondjé ka montré nou so lanmou : Kris mouri pou nou toupannan nou té péchèr toujou. 10 Menmsi nou té lèlmi Bondjé, nou viré byen ké li grasa lanmò so Pitit. Donk, nou pi sir ankò ki nou ké sové grasa lavi Jézi, aprézan nou viré byen ké Bondjé. 11 Anplis di sa, nou tchò kontan parapòrta Bondjé grasa nou Sényèr Jézi Kris ki fè nou viré byen ké Bondjé. 12 A konsa, akoz di rounsèl wonm, péché-a antré annan monn-an é akoz di péché-a lanmò antré osi, é a konsa lanmò détenn asou tout moun paské yé tout té péché. 14 Mé, a lanmò ki koumandé dipi Adan jik Moyiz, menm asou sa-ya ki pa té fè menm péché ké Adan ki ka sanblé ké sa-la ki té divèt vini-a. 18 Atò, menm fason akoz di rounsèl fot tout kalité moun vin kondané, grasa rounsèl bagaj ki té jis roun moun fè, Bondjé ka di ki tout kalité moun jis pou yé gen lavi. 19 Menm fason roun patché moun vini gen péché akoz di dézobéyisans sa sèl wonm-an, menm fason osi roun patché moun ké divini jis douvan Bondjé grasa sa sèl moun-an ki obéyi.