Révélation

2 « Men sa pou to ékri pou zanj-a ki annan asanblé Éfèz-a : Sa-la ki ka tchenbé sèt zétwèl-ya annan so lanmen drèt é ki ka maché anmitan sèt pòrtlanp-ya ki fèt ké lò, men sa i ka di : 2 “Mo savé tousa to fè, mo savé ki to ka travay rèd é ki to ka tchenbé rèd. Mo savé osi ki to pa ka asèpté moun mové é ki to mété anba éprèv sa-ya ki ka di yé apot alòr ki yé pa apot pyès — to wè ki a manti yé ka manti. 3 To ka tchenbé rèd osi, to pa moli paské to ka rèspèkté mo non, to pa dékourajé. 4 Mé men sa mo wè ki pa k’alé koté to : a ki to pédi lanmou to té gen o koumansman. 7 A pou sa-la ki gen zorè kouté sa lèspri-a ka di asanblé-ya : mo ké bay sa-la ki ganyen, drwa pou i manjé frwi pyébwa lavi-a ki annan paradi Bondjé-a.” 8 « Men sa pou to ékri pou zanj-a ki annan asanblé Èsmirn : Men sa “Prémyé-a ké Dèrnyé-a”, sa-la ki té mouri é ki résisité, ka di : 9 “Mo savé ki to ka soufri é ki to pov. Mé to rich. Mo savé osi ki roun ran moun ka di ki yé Jwif swadizan é yé ka manti asou to. Mé yé pa Jwif, a ké Satan yé fika. 10 A pa pou to pè bagaj-ya ki ké rivé to titalò. Kouté ! Djab-a ké kontinyé mété roun ran annan zòt lajòl pou zòt éprèv antchè é yé ké pèrsékité zòt pannan dis jou. Rété fidèl jistan to mouri, é mo ké bay to kouròn lavi-a. 11 A pou sa-la ki gen zorè kouté sa lèspri-a ka di asanblé-ya : sa-la ki ké ganyen pa ké konnèt dézyèm lanmò-a.” 18 « Men sa pou to ékri pou zanj-a ki annan asanblé Tiyatir-a : Men sa Pitit Bondjé-a, sa-la so wéy kou flanm difé épi so pyé ka sanblé kwiv ki fin ka di : 19 “Mo savé tousa to ka fè, ki to gen lanmou ké lafwa, mo ka wè to sèrvis, kouman to ka tchenbé rèd, é mo savé ki to ka fè plis bagaj jòdla pasé sa to té ka fè o koumansman. 20 « “Mé, men sa mo pa kontan ké to : to ka asèpté sa fanm-an, sa Jézabèl-a, ki ka di i profèt ; i la ka ansényé mo èsklav é i ka bloublou yé, i ka fè yé fè vyé bagaj sèksyèl malpròp é i ka fè yé manjé bagaj moun sakrifyé pou zidòl-ya. 21 Mo bay li tan pou i répanti, mé i pa lé répanti di so kondwit sèksyèl malpròp. 24 « “Mé, pou tout ròt-ya annan asanblé Tiyatir-a, a pou zòt mo ka di sa, zòt ki pa ka swiv sa ansèyman-an, zòt ki pa anprann sa roun ran moun ka aplé ‘bagaj Satan ki fon’ : Mo pa ka mété pyès ròt fardo asou zòt. 25 Sèl bagaj mo ka di zòt, byen gardé sa zòt gen jiktan mo vini. 26 É sa-la ki ganyen, sa-la ki ka fè sa mo fè jiska lafen, mo ké bay li pouvwar asou nasyon-yan, 27 é i ké mennen yé ké roun baton an fè, é a konsa i ké krazé yé kou bagaj fèt ké latè gra — sa pouvwar-a, a mo Papa ki bay mo l’.